শ্রীমদ্বাল্মীকীয় রামাযণে অয়োধ্য়াকাংডম্ ।
অথ চতুর্বিংশস্সর্গঃ ।
তং সমীক্ষ্য় ত্ববহিতং পিতুর্নির্দেশ পালনে ।
কৌশল্য়া বাষ্পসংরুদ্ধা বচো ধর্মিষ্ঠমব্রবীত্ ॥ 1 ॥
অদৃষ্টদুঃখো ধর্মাত্মা সর্বভূতপ্রিয়ংবদঃ ।
ময়ি জাতো দশরথাত্কথমুংছেন বর্তয়েত্ ॥ 2 ॥
যস্য় ভৃত্য়াশ্চ দাসাশ্চ মৃষ্টান্যন্নানি ভুংজতে ।
কথং স ভোক্ষ্যতেঽনাথো বনে মূলফলান্যযম্ ॥ 3 ॥
কঃ এতচ্ছ্রদ্দধেচ্ছ্রুত্বা কস্য় বা ন ভবেদ্ভযম্ ।
গুণবাংদয়িতো রাজ্ঞা রাঘবো যদ্বিবাস্যতে ॥ 4 ॥
নূনং তু বলবান্ লোকে কৃতাংতস্সর্বমাদিশন্ ।
লোকে রামাভিরামস্ত্বং বনং যত্র গমিষ্যসি ॥ 5 ॥
অয়ং তু মামাত্মভব স্তবাদর্শনমারুতঃ ।
বিলাপদুঃখসমিধো রুদিতাশ্রুহুতাহুতিঃ ॥ 6 ॥
চিংতাবাষ্পমহাধূমস্তবাগমনচিত্তজঃ ।
কর্শয়িত্বা ভৃশং পুত্র নিশ্বাসায়াসসংভবঃ ॥ 7 ॥
ত্বয়া বিহীনামিহ মাং শোকাগ্নিরতুলো মহান্ ।
প্রধক্ষ্যতি যথা কক্ষং চিত্রভানুর্হিমাত্যয়ে ॥ 8 ॥
কথং হি ধেনু স্স্বং বত্সং গচ্ছংতং নানুগচ্ছতি ।
অহং ত্বাঽনুগমিষ্য়ামি যত্র পুত্র গমিষ্যসি ॥ 9 ॥
. ।
তথা নিগদিতং মাত্রা তদ্বাক্য়ং পুরুষর্ষভঃ ।
শ্রুত্বা রামোঽব্রবীদ্বাক্য়ং মাতরং ভৃশদুঃখিতাম্ ॥ 10 ॥
কৈকেয়্য়া বংচিতো রাজা ময়ি চারণ্যমাশ্রিতে ।
ভবত্য়া চ পরিত্যক্তো ন নূনং বর্তয়িষ্যতি ॥ 11 ॥
ভর্তুঃ কিল পরিত্য়াগো নৃশংসঃ কেবলং স্ত্রিয়াঃ ।
স ভবত্য়া ন কর্তব্য়ো মনসাঽপি বিগর্হিতঃ ॥ 12 ॥
যাবজ্জীবতি কাকুত্স্থঃ পিতা মে জগতীপতিঃ ।
শুশ্রূষা ক্রিযতাং তাবত্সহি ধর্মস্সনাতনঃ ॥ 13 ॥
এবমুক্তা তু রামেণ কৌশল্য়া শুভদর্শনা ।
তথেত্য়ুবাচ সুপ্রীতা রামমক্লিষ্টকারিণম্ ॥ 14 ॥
এবমুক্তস্তু বচনং রামো ধর্মভৃতাং বরঃ ।
ভূযস্তামব্রবীদ্বাক্য়ং মাতরং ভৃশদুঃখিতাম্ ॥ 15 ॥
ময়া চৈব ভবত্য়া চ কর্তব্য়ং বচনং পিতুঃ ।
রাজা ভর্তা গুরু শ্শ্রেষ্ঠস্সর্বেষামীশ্বরঃ প্রভুঃ ॥ 16 ॥
ইমানি তু মহারণ্য়ে বিহৃত্য় নব পংচ চ ।
বর্ষাণি পরমপ্রীতঃ স্থাস্য়ামি বচনে তব ॥ 17 ॥
এবমুক্তা প্রিয়ং পুত্রং বাষ্পপূর্ণাননা তদা ।
উবাচ পরমার্তা তু কৌশল্য়া পুত্রবত্সলা ॥ 18 ॥
আসাং রাম সপত্নীনাং বস্তুং মধ্য়ে ন মে ক্ষমম্ ।
নয় মামপি কাকুত্স্থ বনং বন্য়াং মৃগীং যথা ॥ 19 ॥
যদি তে গমনে বুদ্ধিঃ কৃতা পিতুরপেক্ষয়া ।
তাং তথা রুদতীং রামো রুদন্বচনমব্রবীত্ ॥ 20 ॥
জীবংত্য়া হি স্ত্রিয়া ভর্তা দৈবতং প্রভুরেব চ ভবত্য়া মম চৈবাদ্য় রাজা প্রভবতি প্রভুঃ ।
ন হ্যনাথা বয়ং রাজ্ঞা লোকনাথেন ধীমতা ॥ 21 ॥
ভরতশ্চাপি ধর্মাত্মা সর্বভূতপ্রিয়ংবদঃ ।
ভবতীমনুবর্তেত স হি ধর্মরতস্সদা ॥ 22 ॥
যথা ময়ি তু নিষ্ক্রাংতে পুত্রশোকেন পার্থিবঃ ।
শ্রমং নাবাপ্নুয়াত্কিংচিদপ্রমত্তা তথা কুরু ॥ 23 ॥
দারুণশ্চাপ্যয়ং শোকো যথৈনং ন বিনাশয়েত্ ।
রাজ্ঞো বৃদ্ধস্য় সততং হিতং চর সমাহিতা ॥ 24 ॥
ব্রতোপবাসনিরতা যা নারী পরমোত্তমা ।
ভর্তারং নানুবর্তেত সা তু পাপগতির্ভবেত্ ॥ 25 ॥
ভর্তু শ্শুশ্রূষয়া নারী লভতে স্বর্গমুত্তমম্ ।
অপি যা নির্নমস্কারা নিবৃত্তা দেবপূজনাত্ ॥ 26 ॥
শুশ্রূষামেব কুর্বীত ভর্তুঃ প্রিযহিতে রতা ।
এষ ধর্মঃ পুরা দৃষ্টো লোকে বেদে শ্রুতঃ স্মৃতঃ ॥ 27 ॥
অগ্নিকার্য়েষু চ সদা সুমনোভিশ্চ দেবতাঃ ।
পূজ্য়াস্তে মত্কৃতে দেবি বাহ্মণাশ্চৈব সুব্রতাঃ ॥ 28 ॥
এবং কালং প্রতীক্ষস্ব মমাগমনকাংক্ষিণী ।
নিযতা নিযতাহারা ভর্তৃশুশ্রূষণে রতা ॥ 29 ॥
প্রাপ্স্যসে পরমং কামং ময়ি প্রত্য়াগতে সতি ।
যদি ধর্মভৃতাং শ্রেষ্ঠো ধারয়িষ্যতি জীবিতম্ ॥ 30 ॥
এবমুক্তা তু রামেণ বাষ্পপর্য়াকুলেক্ষণা ।
কৌশল্য়া পুত্রশোকার্তা রামং বচনমব্রবীত্ ॥ 31 ॥
গমনে সুকৃতাং বুদ্ধিং ন তে শক্নোমি পুত্রক ।
বিনিবর্তয়িতুং বীর নূনং কালো দুরত্যয়ঃ ॥ 32 ॥
গচ্ছ পুত্র ত্বমেকাগ্রো ভদ্রং তেঽস্তু সদা বিভুঃ ।
পুনস্ত্বয়ি নিবৃত্তে তু ভবিষ্য়ামি গতব্যথা ॥ 33 ॥
প্রত্য়াগতে মহাভাগে কৃতার্থে চরিতব্রতে ।
পিতুরানৃণ্যতাং প্রাপ্তে ত্বয়ি লপ্স্য়ে পরং সুখম্ ॥ 34 ॥
কৃতাংতস্য় গতিঃ পুত্র দুর্বিভাব্য়া সদা ভুবি ।
যস্ত্বাং সংচোদযতি মে বচ আচ্ছিদ্য় রাঘব ॥ 35 ॥
গচ্ছেদানীং মহাবাহো ক্ষেমেণ পুনরাগতঃ ।
নংদয়িষ্যসি মাং পুত্র সাম্না বাক্য়েন চারুণা ॥ 36 ॥
অপীদানীং স কালস্স্য়াদ্বনাত্প্রত্য়াগতং পুনঃ ।
যত্ত্বাং পুত্রক পশ্য়েয়ং জটাবল্কলধারিণম্ ॥ 37 ॥
তথা হি রামং বনবাসনিশ্চিতং সমীক্ষ্য় দেবী পরমেণ চেতসা ।
উবাচ রামং শুভলক্ষণং বচো বভূব চ স্বস্ত্যযনাভিকাংক্ষিণী ॥ 38 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে চতুর্বিংশস্সর্গঃ ॥
