শ্রীমদ্বাল্মীকীয় রামাযণে অয়োধ্য়াকাংডম্ ।
অথ পংচমস্সর্গঃ ।
সংদিশ্য় রামং নৃপতি শ্শ্বোভাবিন্যভিষেচনে ।
পুরোহিতং সমাহূয় বশিষ্ঠমিদমব্রবীত্ ॥ 1 ॥
গচ্ছোপবাসং কাকুত্স্থং কারয়াদ্য় তপোধন ।
শ্রীযশোরাজ্যলাভায় বধ্বা সহ যতব্রতম্ ॥ 2 ॥
তথেতি চ স রাজানমুক্ত্বা বেদবিদাং বরঃ ।
স্বয়ং বসিষ্ঠো ভগবান্যয়ৌ রামনিবেশনম্ ॥ 3 ॥
উপবাসয়িতুং রামং মংত্রবন্মংত্রকোবিদঃ ।
ব্রাহ্মং রথবরং যুক্তমাস্থায় সুদৃঢব্রতঃ ॥ 4 ॥
স রামভবনং প্রাপ্য় পাংডুরাভ্রঘনপ্রভম্ ।
তিস্রঃ কক্ষ্য়া রথেনৈব বিবেশমুনিসত্তমঃ ॥ 5 ॥
তমাগতমৃষিং রামস্ত্বরন্নিব সসংভ্রমঃ ।
মানয়িষ্যন্সমানার্হং নিশ্চক্রাম নিবেশনাত্ ॥ 6 ॥
অভ্য়েত্য় ত্বরমাণশ্চ রথাভ্য়াশং মনীষিণঃ ।
ততোঽবতারয়ামাস পরিগৃহ্য় রথাত্স্বযম্ ॥ 7 ॥
স চৈনং প্রশ্রিতং দৃষ্ট্বা সংভাষ্য়াভিপ্রসাদ্য় চ ।
প্রিয়ার্হং হর্ষযন্রামমিত্য়ুবাচ পুরোহিতঃ ॥ 8 ॥
প্রসন্নস্তে পিতা রাম যৌবরাজ্যমবাপ্স্যসি ।
উপবাসং ভবানদ্য় করোতু সহ সীতয়া ॥ 9 ॥
প্রাতস্ত্বামভিষেক্তা হি যৌবরাজ্য়ে নরাধিপঃ ।
পিতা দশরথঃ প্রীত্য়া যয়াতিং নহুষো যথা ॥ 10 ॥
ইত্য়ুক্ত্বা স তদা রামমুপবাসং যতব্রতম্ ।
মংত্রবত্কারয়ামাস বৈদেহ্য়া সহিতং মুনিঃ ॥ 11 ॥
ততো যথাবদ্রামেণ স রাজ্ঞো গুরুরর্চিতঃ ।
অভ্যনুজ্ঞাপ্য় কাকুত্স্থং যয়ৌ রামনিবেশনাত্ ॥ 12 ॥
সুহৃদ্ভিস্তত্র রামোঽপি সহাসীনঃ প্রিয়ংবদৈঃ ।
সভাজিতো বিবেশাঽথ তাননুজ্ঞাপ্য় সর্বশঃ ॥ 13 ॥
হৃষ্টনারীনরয়ুতং রামবেশ্ম তদা বভৌ ।
যথা মত্তদ্বিজগণং প্রফুল্লনলিনং সরঃ ॥ 14 ॥
স রাজভবনপ্রখ্য়াত্তস্মাদ্রামনিবেশানাত্ ।
নির্গত্য় দদৃশে মার্গং বসিষ্ঠো জনসংবৃতম্ ॥ 15 ॥
বৃংদবৃংদৈরয়োধ্য়ায়াং রাজমার্গাস্সমংততঃ ।
বভূবুরভিসংবাধাঃ কুতূহলজনৈর্বৃতাঃ ॥ 16 ॥
জনবৃংদোর্মিসংঘর্ষহর্ষস্বনবতস্তদা ।
বভূব রাজমার্গস্য় সাগরস্য়েব নিস্বনঃ ॥ 17 ॥
সিক্তসম্মৃষ্টরথ্য়া হি তদহর্বনমালিনী ।
আসীদয়োধ্য়ানগরী সমুচ্ছ্রিতগৃহধ্বজা ॥ 18 ॥
তদা হ্যয়োধ্য়ানিলয়ঃ সস্ত্রীবালাবলো জনঃ ।
রামাভিষেকমাকাংক্ষন্নাকাংক্ষদুদয়ং রবেঃ ॥ 19 ॥
প্রজালংকারভূতং চ জনস্য়ানংদবর্ধনম্ ।
উত্সুকোঽভূজ্জনো দ্রষ্টুং তময়োধ্য়ামহোত্সবম্ ॥ 20 ॥
এবং তজ্জনসংবাধং রাজমার্গং পুরোহিতঃ ।
ব্য়ূহন্নিব জনৌঘং তং শনৈ রাজকুলং যয়ৌ ॥ 21 ॥
সিতাভ্রশিখরপ্রখ্য়ং প্রাসাদমধিরুহ্য় সঃ ।
সমীয়ায় নরেংদ্রেণ শক্রেণেব বৃহস্পতিঃ ॥ 22 ॥
তমাগতমভিপ্রেক্ষ্য় হিত্বা রাজাসনং নৃপঃ ।
পপ্রচ্ছ স চ তস্মৈ তত্কৃতমিত্যভ্যবেদযত্ ॥ 23 ॥
চৈব তদা তুল্য়ং সহাসীনাস্সভাসদঃ ।
আসনেভ্যস্সমুত্তস্থুঃ পূজয়ংতঃ পুরোহিতম্ ॥ 24 ॥
গুরুণা ত্বভ্যনুজ্ঞাতো মনুজৌঘং বিসৃজ্য় তম্ ।
বিবেশাংতঃ পুরং রাজা সিংহো গিরিগুহামিব ॥ 25 ॥
তদগ্য়্রবেষপ্রমদাজনাকুলং মহেংদ্রবেশ্মপ্রতিমং নিবেশনম্ ।
বিদীপয়ংশ্চারু বিবেশ পার্থিব শ্শশীব তারাগণসংকুলং নভঃ ॥ 26 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে পংচমস্সর্গঃ ॥
