শ্রীমদ্বাল্মীকীয় রামাযণে অরণ্যকাংডম্ ।
অথ অষ্টষষ্টিতমস্সর্গঃ ।
রামস্সংপ্রেক্ষ্য় তং গৃধ্রং ভুবি রৌদ্রেণ পাতিতম্ ।
সৌমিত্রিং মিত্রসংপন্নমিদং বচনমব্রবীত্ ॥ 1 ॥
মমায়ং নূনমর্থেষু যতমানো বিহংগমঃ ।
রাক্ষসেন হতস্সংখ্য়ে প্রাণাংস্ত্যক্ষ্যতি দুস্ত্যজান্ ॥ 2 ॥
অযমস্য় শরীরেঽস্মিন্প্রাণো লক্ষ্মণ বিদ্যতে ।
তথা হি স্বরহীনোঽয়ং বিক্লবস্সমুদীক্ষ্যতে ॥ 3 ॥
জটায়ো যদি শক্নোষি বাক্য়ং ব্য়াহরিতুং পুনঃ ।
সীতামাখ্য়াহি ভদ্রং তে বধমাখ্য়াহি চাত্মনঃ ॥ 4 ॥
কিং নিমিত্তোঽহরত্সীতাং রাবণস্তস্য় কিং ময়া ।
অপরাদ্ধং তু যং দৃষ্ট্বা রাবণেন হৃতা প্রিয়া ॥ 5 ॥
কথং তচ্চংদ্রসংকাশং মুখমাসীন্মনোহরম্ ।
সীতয়া কানি চোক্তানি তস্মিন্কালে দ্বিজোত্তম ॥ 6 ॥
কথং বীর্য়ঃ কথং রূপঃ কিং কর্মা স চ রাক্ষসঃ ।
ক্ব চাস্য় ভবনং তাত ব্রূহি মে পরিপৃচ্ছতঃ ॥ 7 ॥
তমুদ্বীক্ষ্য়াথ দীনাত্মা বিলপংতমনংতরম্ ।
বাচাতিসন্নয়া রামং জটায়ুরিদমব্রবীত্ ॥ 8 ॥
হৃতা সা রাক্ষসেংদ্রেণ রাবণেন বিহাযসা ।
মায়ামাস্থায় বিপুলাং বাতদুর্দিনসংকুলাম্ ॥ 9 ॥
পরিশ্রাংতস্য় মে তাত পক্ষৌ ছিত্বা স রাক্ষসঃ ।
সীতামাদায় বৈদেহীং প্রয়াতো দক্ষিণাং দিশম্ ॥ 10 ॥
উপরুধ্য়ংতি মে প্রাণা দৃষ্টির্ভ্রমতি রাঘব ।
পশ্য়ামি বৃক্ষান্সৌবর্ণানুশীরকৃতমূর্ধজান্ ॥ 11 ॥
যেন যাতি মুহূর্তেন সীতামাদায় রাবণঃ ।
বিপ্রণষ্টং ধনং ক্ষিপ্রং তত্স্বামী প্রতিপদ্যতে ॥ 12 ॥
বিংদো নাম মুহূর্তোঽয়ং স চ কাকুত্স্থ নাবুধত্ ।
ত্বত্প্রিয়াং জানকীং হৃত্বা রাবণো রাক্ষসেশ্বরঃ ॥ 13 ॥
ঝষবদ্বডিশং গৃহ্য় ক্ষিপ্রমেব বিনশ্যতি ।
ন চ ত্বয়া ব্যথা কার্য়া জনকস্য় সুতাং প্রতি ॥ 14 ॥
বৈদেহ্য়া রংস্যসে ক্ষিপ্রং হত্বা তং রাক্ষসং রণে ।
অসম্মূঢস্য় গৃধ্রস্য় রামং প্রত্যনুভাষতঃ ॥ 15 ॥
আস্য়াত্সুস্রাব রুধিরং ম্রিযমাণস্য় সামিষম্ ।
পুত্রো বিশ্রবসস্সাক্ষাদ্ভ্রাতা বৈশ্রবণস্য় চ ॥ 16 ॥
ইত্য়ুক্ত্বা দুর্লভান্প্রাণান্মুমোচ পতগেশ্বরঃ ।
ব্রূহি ব্রূহীতি রামস্য় ব্রুবাণস্য় কৃতাংজলেঃ ॥ 17 ॥
ত্বক্ত্বা শরীরং গৃধ্রস্য় জগ্মুঃ প্রাণা বিহাযসম্ ।
স নিক্ষিপ্য় শিরো ভূমৌ প্রসার্য় চরণৌ তদা ॥ 18 ॥
বিক্ষিপ্য় চ শরীরং স্বং পপাত ধরণীতলে ।
তং গৃধ্রং প্রেক্ষ্য় তাম্রাক্ষং গতাসুমচলোপমম্ ॥ 19 ॥
রামস্সুবহুভির্দুঃখৈর্দীনস্সৌমিত্রিমব্রবীত্ ।
বহূনি রক্ষসাং বাসে বর্ষাণি বসতা সুখম্ ॥ 20 ॥
অনেন দংডকারণ্য়ে বিশীর্ণমিহ পক্ষিণা ।
অনেকবার্ষিকো যস্তু চিরকালসমুত্থিতঃ ॥ 21 ॥
সোঽযমদ্য় হতশ্শেতে কালো হি দুরতিক্রমঃ ।
পশ্য় লক্ষ্মণ গৃধ্রোঽযমুপকারী হতশ্চ মে ॥ 22 ॥
সীতামভ্যবপন্নো বৈ রাবণেন বলীযসা ।
গৃধ্ররাজ্য়ং পরিত্যজ্য় পিতৃপৈতামহং মহত্ ॥ 23 ॥
মম হেতোরয়ং প্রাণান্মুমোচ পতগেশ্বরঃ ।
সর্বত্র খলু দৃশ্য়ংতে সাধবো ধর্মচারিণঃ ॥ 24 ॥
শূরাশ্শরণ্য়াস্সৌমিত্রে তির্যগ্য়োনিগতেষ্বপি ।
সীতাহরণজং দুঃখং ন মে সৌম্য় তথাবিধম্ ॥ 25 ॥
যথা বিনাশে গৃধ্রস্য় মত্কৃতে চ পরংতপ ।
রাজা দশরথশ্শ্রীমান্যথা মম মহাযশাঃ ॥ 26 ॥
পূজনীযশ্চ মান্যশ্চ তথাঽয়ং পতগেশ্বরঃ ।
সৌমিত্রে হর কাষ্ঠানি নির্মথিষ্য়ামি পাবকম্ ॥ 27 ॥
গৃধ্ররাজং দিধক্ষামি মত্কৃতে নিধনং গতম্ ।
নাথং পতগলোকস্য় চিতামারোপ্য় রাঘব ॥ 28 ॥
ইমং ধক্ষ্য়ামি সৌমিত্রে হতং রৌদ্রেণ রক্ষসা ।
যা গতির্যজ্ঞশীলানামাহিতাগ্নেশ্চ যা গতিঃ ॥ 29 ॥
অপরাবর্তিনাং যা চ যা চ ভূমিপ্রদায়িনাম্ ।
ময়া ত্বং সমনুজ্ঞাতো গচ্ছ লোকাননুত্তমান্ ॥ 30 ॥
গৃধ্ররাজ মহাসত্ত্ব সংস্কৃতশ্চ ময়া ব্রজ ।
এবমুক্ত্বা চিতাং দীপ্তামারোপ্য় পতগেশ্বরম্ ॥ 31 ॥
দদাহ রামো ধর্মাত্মা স্ববংধুমিব দুঃখিতঃ ।
রামোঽথ সহসৌমিত্রির্বনং গত্বা স বীর্যবান্ ॥ 32 ॥
স্থূলান্হত্বা মহারোহীননুতস্তার তং দ্বিজম্ ।
রোহিমাংসানি চোত্কৃত্য় পেশীকৃত্য় মহাযশাঃ ॥ 33 ॥
শকুনায় দদৌ রামো রম্য়ে হরিতশাদ্বলে ।
যত্তত্প্রেতস্য় মর্ত্যস্য় কথয়ংতি দ্বিজাতয়ঃ ॥ 34 ॥
তত্স্বর্গগমনং তস্য় পিত্র্য়ং রামো জজাপ হ ।
ততো গোদাবরীং গত্বা নদীং নরবরাত্মজৌ ॥ 35 ॥
উদকং চক্রতুস্তস্মৈ গৃধ্ররাজায় তাবুভৌ ।
শাস্ত্রদৃষ্টেন বিধিনা জলে গৃধ্রায় রাঘবৌ ॥ 36 ॥
স্নাত্বা তৌ গৃধ্ররাজায় উদকং চক্রতুস্তদা ।
স গৃধ্ররাজঃ কৃতবান্যশস্করং সুদুষ্করং কর্ম রণে নিপাতিতঃ ।
মহর্ষিকল্পেন চ সংস্কৃতস্তদা জগাম পুণ্য়াং গতিমাত্মনশ্শুভাম্ ॥ 37 ॥
কৃতোদকৌ তাবপি পক্ষিসত্তমে স্থিরাং চ বুদ্ধিং প্রণিধায় জগ্মতুঃ ।
প্রবেশ্য় সীতাধিগমে ততো মনো বনং সুরেংদ্রবিব বিষ্ণুবাসবৌ ॥ 38 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে অষ্টষষ্টিতমস্সর্গঃ ॥
