শ্রীমদ্বাল্মীকীয় রামাযণে সুংদরকাংডম্ ।
অথ ত্রিংশস্সর্গঃ ।
হনুমানপি বিক্রাংতঃ সর্বং শুশ্রাব তত্ত্বতঃ ।
সীতায়াস্ত্রিজটায়াশ্চ রাক্ষসীনাং চ তর্জনম্ ॥ 1 ॥
অবেক্ষমাণস্তাং দেবীং দেবতামিব নংদনে ।
ততো বহুবিধাং চিংতাং চিংতয়ামাস বানরঃ ॥ 2 ॥
যাং কপীনাং সহস্রাণি সুবহূন্যয়ুতানি চ ।
দিক্ষু সর্বাসু মার্গংতে সেযমাসাদিতা ময়া ॥ 3 ॥
চারেণ তু সুয়ুক্তেন শত্রোশ্শক্তিমবেক্ষতা ।
গূঢেন চরতা তাবদবেক্ষিতমিদং ময়া ॥ 4 ॥
রাক্ষসানাং বিশেষশ্চ পুরী চেযমবেক্ষিতা ।
রাক্ষসাধিপতেরস্য় প্রভাবো রাবণস্য় চ ॥ 5 ॥
যুক্তং তস্য়াপ্রমেযস্য় সর্বসত্ত্বদয়াবতঃ ।
সমাশ্বাসয়িতুং ভার্য়াং পতিদর্শনকাংক্ষিণীম্ ॥ 6 ॥
অহমাশ্বাসয়াম্য়েনাং পূর্ণচংদ্রনিভাননাম্ ।
অদৃষ্টদুঃখাং দুঃখার্তাং দুঃখস্য়াংতমগচ্ছতীম্ ॥ 7 ॥
যদ্যপ্যহমিমাং দেবীং শোকোপহতচেতনাম্ ।
অনাশ্বাস্য় গমিষ্য়ামি দোষবদ্গমনং ভবেত্ ॥ 8 ॥
গতে হি ময়ি তত্রেয়ং রাজপুত্রী যশস্বিনী ।
পরিত্রাণমবিংদংতী জানকী জীবিতং ত্যজেত্ ॥ 9 ॥
ময়া চ স মহাবাহুঃ পূর্ণচংদ্রনিভাননঃ ।
সমাশ্য়াসয়িতুং ন্য়ায়্যস্সীতাদর্শনলালসঃ ॥ 10 ॥
নিশাচরীণাং প্রত্যক্ষমনর্হং চাভিভাষিতম্ ।
কথন্নু খলু কর্তব্যমিদং কৃচ্ছ্রগতো হ্যহম্ ॥ 11 ॥
অনেন রাত্রিশেষেণ যদি নাশ্বাস্যতে ময়া ।
সর্বথা নাস্তি সংদেহঃ পরিত্যক্ষ্যতি জীবিতম্ ॥ 12 ॥
রামশ্চ যদি পৃচ্ছেন্মাং কিং মাং সীতাব্রবীদ্বচঃ ।
কিমহং তং প্রতি ব্রূয়ামসংভাষ্য় সুমধ্যমাম্ ॥ 13 ॥
সীতাসংদেশরহিতং মামিতস্ত্বরয়াঽগতম্ ।
নির্দহেদপি কাকুত্স্য় ক্রুদ্ধস্তীব্রেণ চক্ষুষা ॥ 14 ॥
যদি চোদ্য়োজয়িষ্য়ামি ভর্তারং রামকারণাত্ ।
ব্যর্থমাগমনং তস্য় সসৈন্যস্য় ভবিষ্যতি ॥ 15 ॥
অংতরং তু অহং আসাদ্য় রাক্ষসীনাং ইহ স্থিতঃ ।
শনৈঃ আশ্বাসয়িষ্য়ামি সম্তাপ বহুলাং ইমাম্ ॥ 16 ॥
অহং ত্বতিতনুশ্চৈব বানরশ্চ বিশেষতঃ ।
বাচং চোদাহরিষ্য়ামি মানুষীমিহ সংস্কৃতাম্ ॥ 17 ॥
যদি বাচং প্রদাস্য়ামি দ্বিজাতিরিব সংস্কৃতাম্ ।
রাবণং মন্যমানা মাং সীতা ভীতা ভবিষ্যতি ॥ 18 ॥
বানরস্য় বিশেষেণ কথং স্য়াদভিভাষণম্ ।
অবশ্যমেব বক্তব্য়ং মানুষং বাক্যমর্থবত্ ॥ 19 ॥
ময়া সাংত্বয়িতুং শক্য়া নান্যথেযমনিংদিতা ।
সেযমালোক্য় মে রূপং জানকী ভাষিতং তথা ॥ 20 ॥
রক্ষোভিস্ত্রাসিতা পূর্বং ভূযস্ত্রাসং গমিষ্যতি ।
ততো জাতপরিত্রাসা শব্দং কুর্য়ান্মনস্বিনী ॥ 21 ॥
জানমানা বিশালাক্ষী রাবণং কামরূপিণম্ ।
সীতয়া চ কৃতে শব্দে সহসা রাক্ষসীগণাঃ ।
নানাপ্রহরণো ঘোরঃ সমেয়াদংতকোপমঃ ॥ 22 ॥
ততো মাং সংপরিক্ষিপ্য় সর্বতো বিকৃতাননাঃ ॥ 23 ॥
বধে চ গ্রহণে চৈব কুর্য়ুর্যত্নং যথাবলম্ ।
গৃহ্য় শাখাঃ প্রশাখাশ্চ স্কংধাংশ্চোত্তমশাখিনাম্ ॥ 24 ॥
দৃষ্ট্বা বিপরিধাবংতং ভবেয়ুর্ভযশংকিতাঃ ।
মম রূপং চ সংপ্রেক্ষ্য় বনে বিচরতো মহত্ ॥ 25 ॥
রাক্ষস্য়ো ভযবিত্রস্তা ভবেয়ুর্বিকৃতাননাঃ ।
ততঃ কুর্য়ুস্সমাহ্বানং রাক্ষস্য়ো রক্ষসামপি ॥ 26 ॥
রাক্ষসেংদ্রনিয়ুক্তানাং রাক্ষসেংদ্রনিবেশনে ।
তে শূলশক্তিনিস্ত্রিংশবিবিধায়ুধপাণয়ঃ ॥ 27 ॥
আপতেয়ুর্বিমর্দেঽস্মিন্বেগেনোদ্বেগকারণাত্ ।
সমৃদ্ধস্তৈস্তু পরিতো বিধমন্ রক্ষসাং বলম্ ॥ 28 ॥
শক্নুয়াং ন তু সংপ্রাপ্তুং পরং পারং মহোদধেঃ ।
মাং বা গৃহ্ণীয়ুরাপ্লুত্য় বহবশ্শীঘ্রকারিণঃ ॥ 29 ॥
স্য়াদিয়ং চাগৃহীতার্থা মম চ গ্রহণং ভবেত্ ।
হিংসাভিরুচয়ো হিংস্য়ুরিমাং বা জনকাত্মজাম্ ॥ 30 ॥
বিপন্নং স্য়াত্ততঃ কার্য়ং রামসুগ্রীবয়োরিদম্ ।
উদ্দেশে নষ্টমার্গেঽস্মিন্ রাক্ষসৈঃ পরিবারিতে ॥ 31 ॥
সাগরেণ পরিক্ষিপ্তে গুপ্তে বসতি জানকী ।
বিশস্তে বা গৃহীতে বা রক্ষোভির্ময়ি সংয়ুগে ॥ 32 ॥
নান্য়ং পশ্য়ামি রামস্য় সহায়ং কার্যসাধনে ।
বিমৃশংশ্চ ন পশ্য়ামি যো হতে ময়ি বানরঃ ॥ 33 ॥
শতয়োজনবিস্তীর্ণং লংঘয়েত মহোদধিম্ ।
কামং হংতুং সমর্থোঽস্মি সহস্রাণ্যপি রক্ষসাম্ ॥ 34 ॥
ন তু শক্ষ্য়ামি সংপ্রাপ্তুং পরং পারং মহোদধেঃ ।
অসত্য়ানি চ যুদ্ধানি সংশয়ো মে ন রোচতে ॥ 35 ॥
কশ্চ নিস্সংশয়ং কার্য়ং কুর্য়াত্প্রাজ্ঞঃ সসংশযম্ ।
প্রাণত্য়াগশ্চ বৈদেহ্য়া ভবেদনভিভাষণে ॥ 36 ॥
এষ দোষো মহান্হি স্য়ান্মম সীতাভিভাষণে ।
ভূতাশ্চার্থা বিনশ্য়ংতি দেশকালবিরোধিতাঃ ॥ 37 ॥
বিক্লবং দূতমাসাদ্য় তমঃ সূর্য়োদয়ে যথা ।
অর্থানর্থাংতরে বুদ্ধিনিশ্চিতাপি ন শোভতে ॥ 38 ॥
ঘাতয়ংতি হি কার্য়াণি দূতাঃ পংডিতমানিনঃ ।
ন বিনশ্য়েত্কথং কার্য়ং বৈক্লব্য়ং ন কথং ভবেত্ ॥ 39 ॥
লংঘনং চ সমুদ্রস্য় কথং নু ন বৃথা ভবেত্ ।
কথং নু খলু বাক্য়ং মে শৃণুয়ান্নোদ্বিজেত বা ।
ইতি সংচিংত্য় হনুমাংশ্চকার মতিমান্মতিম্ ॥ 40 ॥
রামমক্লিষ্টকর্মাণং সুবংধুমনুকীর্তযন্ ॥ 41 ॥
নৈনামুদ্বেজয়িষ্য়ামি তদ্বংধুগতমানসাম্ ।
ইক্ষ্বাকূণাং বরিষ্ঠস্য় রামস্য় বিদিতাত্মনঃ ॥ 42 ॥
শুভানি ধর্ময়ুক্তানি বচনানি সমর্পযন্ ।
শ্রাবয়িষ্য়ামি সর্বাণি মধুরাং প্রব্রুবন্ গিরম্ ॥ 43 ॥
শ্রদ্ধাস্যতি যথাহীয়ং তথা সর্বং সমাদধে ।
ইতি স বহুবিধং মহানুভাবো জগতিপতেঃ প্রমদামবেক্ষমাণঃ ।
মধুরমবিতথং জগাদ বাক্য়ং দ্রুমবিটপাংতরমাস্থিতো হনূমান্ ॥ 44 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে ত্রিংশস্সর্গঃ ॥
