শ্রীমদ্বাল্মীকীয় রামাযণে সুংদরকাংডম্ ।
অথ চতুঃষষ্টিতমস্সর্গঃ ।
সুগ্রীবেণৈবমুক্তস্তু হৃষ্টো দধিমুখঃ কপিঃ ।
রাঘবং লক্ষ্মণং চৈব সুগ্রীবং চাভ্যবাদযত্ ॥ 1 ॥
স প্রণম্য় চ সুগ্রীবং রাঘবৌ চ মহাবলৌ ।
বানরৈঃ সহিতঃ শূরৈর্দিবমেবোত্পপাত হ ॥ 2 ॥
স যথৈবাঽগতঃ পূর্বং তথৈব ত্বরিতং গতঃ ।
নিপত্য় গগনাদ্ভূমৌতদ্বনং প্রবিবেশ হ ॥ 3 ॥
স প্রবিষ্টো মধুবনং দদর্শ হরিয়ূথপান্ ।
বিমদানুত্থিতান্সর্বান্ মেহমানান্মধূদকম্ ॥ 4 ॥
স তানুপাগমদ্বীরো বদ্ধ্বা করপুটাংজলিম্ ।
উবাচ বচনং শ্লক্ষ্ণমিদং হৃষ্টবদংগদম্ ॥ 5 ॥
সৌম্য় রোষো ন কর্তব্য়ো যদেতত্পরিবারিতম্ ।
অজ্ঞানাদ্রক্ষিভিঃ ক্রোধাদ্ভবংতঃ প্রতিষেধিতাঃ ॥ 6 ॥
যুবরাজস্ত্বমীশশ্চ বনস্য়াস্য় মহাবল ।
মৌর্খ্য়াত্পূর্বং কৃতো দোষস্তং ভবান্ ক্ষংতুমর্হতি ॥ 7 ॥
আখ্য়াতং হি ময়া গত্বা পিতৃব্যস্য় তবানঘ ।
ইহোপয়াতং সর্বেষামেতেষাং বনচারিণাম্ ॥ 8 ॥
স ত্বদাগমনং শ্রুত্বা সহৈভির্হরিয়ূথপৈঃ ।
প্রহৃষ্টো ন তু রুষ্টোঽসৌ বনং শ্রুত্বা প্রধর্ষিতম্ ॥ 9 ॥
প্রহৃষ্টো মাং পিতৃব্যস্তে সুগ্রীবো বানরেশ্বরঃ ।
শীঘ্রং প্রেষয় সর্বাংস্তানিতি হোবাচ পার্থিবঃ ॥ 10 ॥
শ্রুত্বা দধিমুখস্য়েদং বচনং শ্লক্ষ্ণমংগদঃ ।
অব্রবীত্তান্ হরিশ্রেষ্ঠো বাক্য়ং বাক্যবিশারদঃ ॥ 11 ॥
শংকে শ্রুতোঽয়ং বৃত্তাংতো রামেণ হরিয়ূথপাঃ ।
তত্ক্ষমং নেহ নঃ স্থাতুং কৃতে কার্য়ে পরংতপাঃ ॥ 12 ॥
পীত্বা মধু যথাকামং বিশ্রাংতা বনচারিণঃ ।
কিং শেষং গমনং তত্র সুগ্রীবো যত্র মে গুরুঃ ॥ 13 ॥
সর্বে যথা মাং বক্ষ্য়ংতি সমেত্য় হরিয়ূথপাঃ ।
তথাস্মি কর্তা কর্তব্য়ে ভবদ্ভিঃ পরবানহম্ ॥ 14 ॥
নাজ্ঞাপয়িতুমীশোঽহং যুবরাজোঽস্মি যদ্যপি ।
অয়ুক্তং কৃতকর্মাণো যূয়ং ধর্ষয়িতুং ময়া ॥ 15 ॥
ব্রুবতশ্চাংগদস্য়ৈবং শ্রুত্বা বচনমব্যযম্ ।
প্রহৃষ্টমনসো বাক্যমিদমূচুর্বনৌকসঃ ॥ 16 ॥
এবং বক্ষ্যতি কো রাজন্ প্রভুস্সন্বানরর্ষভ ।
ঐশ্বর্যমদমত্তো হি সর্বোঽহমিতি মন্যতে ॥ 17 ॥
তব চেদং সুসদৃশং বাক্য়ং নান্যস্য় কস্যচিত্ ।
সন্নতির্হি তবাখ্য়াতি ভবিষ্যচ্ছুভয়োগ্যতাম্ ॥ 18 ॥
সর্বে বযমপি প্রাপ্তাস্তত্র গংতুং কৃতক্ষণাঃ ।
স যত্র হরিবীরাণাং সুগ্রীবঃ পতিরব্যয়ঃ ॥ 19 ॥
ত্বয়া হ্যনুক্তৈর্হরিভির্নৈব শক্য়ং পদাত্পদম্ ।
ক্বচিদ্গংতুং হরিশ্রেষ্ঠ ব্রূমঃ সত্যমিদং তু তে ॥ 20 ॥
এবং তু বদতাং তেষামংগদঃ প্রত্য়ুবাচ হ ।
বাঢং গচ্ছাম ইত্য়ুক্ত্বা খমুত্পেতুর্মহাবলাঃ ॥ 21 ॥
উত্পতংতমনূত্পেতু স্সর্বে তে হরিয়ূথপাঃ ।
কৃত্বাকাশং নিরাকাশং যংত্রোত্ক্ষিপ্তা ইবাচলাঃ ॥ 22 ॥
তেঽংবরং সহসোত্পত্য় বেগবংতঃ প্লবংগমাঃ ।
বিনদংতো মহানাদং ঘনা বাতেরিতা যথা ॥ 23 ॥
অংগদে হ্যননুপ্রাপ্তে সুগ্রীবো বানরাধিপঃ ।
উবাচ শোকোপহতং রামং কমললোচনম্ ॥ 24 ॥
সমাশ্বসিহি ভদ্রং তে দৃষ্টা দেবী ন সংশয়ঃ ।
নাগংতুমিহ শক্য়ং তৈরতীতে সময়ে হি নঃ ॥ 25 ॥
ন মত্সকাশমাগচ্ছেত্কৃত্য়ে হি বিনিপাতিতে ।
যুবরাজো মহাবাহুঃ প্লবতাং প্রবরোঽংগদঃ ॥ 26 ॥
যদ্যপ্যকৃতকৃত্য়ানামীদৃশ স্স্য়াদুপক্রমঃ ।
ভবেত্স দীনবদনো ভ্রাংতবিপ্লুতমানসঃ ॥ 27 ॥
পিতৃপৈতামহং চৈতত্পূর্বকৈরভিরক্ষিতম্ ।
ন মে মধুবনং হন্য়াদহৃষ্টঃ প্লবগেশ্বরঃ ॥ 28 ॥
কৌসল্য়াসুপ্রজা রাম সমাশ্বসিহি সুব্রত ।
দৃষ্টা দেবী ন সংদেহো ন চান্য়েন হনূমতা ॥ 29 ॥
ন হ্যন্য়ঃ কর্মণো হেতুস্সাধনেঽস্য় হনূমতঃ ।
হনূমতি হি সিদ্ধিশ্চ মতিশ্চ মতিসত্তমঃ ॥ 30 ॥
ব্যবসাযশ্চ বীর্য়ং চ সূর্য়ে তেজ ইব ধ্রুবম্ ।
জাংববান্যত্র নেতা স্য়াদংগদশ্চ বলেশ্বরঃ ।
হনুমাংশ্চাপ্যধিষ্ঠাতা ন তস্য় গতিরন্যথা ॥ 31 ॥
মা ভূশ্চিংতাসমায়ুক্তস্সংপ্রত্যমিতবিক্রমঃ ॥ 32 ॥
ততঃ কিলকিলাশব্দং শুশ্রাবাসন্নমংবরে ।
হনুমত্কর্মদৃপ্তানাং নার্ধতাং কাননৌকসাম্ ॥ 33 ॥
কিষ্কিংধামুপয়াতানাং সিদ্ধিং কথযতামিব ।
ততশ্শ্রুত্বা নিনাদং তং কপীনাং কপিসত্তমঃ ॥ 34 ॥
আযতাংচিতলাংগূলস্সোঽভবদ্ধৃষ্টমানসঃ ।
আজগ্মুস্তেঽপি হরয়ো রামদর্শনকাংক্ষিণঃ ॥ 35 ॥
অংগদং পুরতঃ কৃত্বা হনূমংতং চ বানরম্ ।
তেঽংগদপ্রমুখা বীরাঃ প্রহৃষ্ঠাশ্চ মুদান্বিতাঃ ॥ 36 ॥
নিপেতুর্হরিরাজস্য় সমীপে রাঘবস্য় চ ।
হনুমাংশ্চ মহাবাহুঃ প্রণম্য় শিরসা ততঃ ॥ 37 ॥
নিযতামক্ষতাং দেবীং রাঘবায় ন্যবেদযত্ ।
দৃষ্টা দেবীতি হনুমদ্বদনাদমৃতোপমম্ ॥ 38 ॥
আকর্ণ্য় বচনং রামো হর্ষমাপ সলক্ষ্মণঃ ।
নিশ্চিতার্থং ততস্তস্মিন্ সুগ্রীবং পবনাত্মজে ॥ 39 ॥
লক্ষ্মণঃ প্রীতিমান্ প্রীতং বহুমানাদবৈক্ষত ।
প্রীত্য়া চ রমমাণোঽথ রাঘবঃ পরবীরহা ॥ 40 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে চতুঃষষ্টিতমস্সর্গঃ ॥
