শ্রীমদ্বাল্মীকীয় রামাযণে অরণ্যকাংডম্ ।
অথ চতুশ্চত্বারিংশস্সর্গঃ ।
তথা তু তং সমাদিশ্য় ভ্রাতরং রঘুনংদনঃ ।
ববংধাসিং মহাতেজা জাংবূনদমযত্সরুম্ ॥ 1 ॥
তত স্ত্র্যবনতং চাপমাদায়াঽত্মবিভূষণম্ ।
আবধ্য় চ কলাপৌ দ্বৌ জগামোদগ্রবিক্রমঃ ॥ 2 ॥
তং বংচয়ানো রাজেংদ্রমাপতংতং নিরীক্ষ্যবৈ ।
বভূবাংতর্হিতস্ত্রাসাত্পুনস্সংদর্শনেঽভবত্ ।
চ ॥ 3 ॥
বদ্ধাসির্ধনুরাদায় প্রদুদ্রাব যতো মৃগঃ ।
তং স্ম পশ্যতি রূপেণ দ্য়োতমানমিবাগ্রতঃ ॥ 4 ॥
অবেক্ষ্য়াবেক্ষ্য় ধাবংতং ধনুষ্পাণির্মহাবনে ।
অতিবৃত্তমিষোঃ পাতাল্লোভয়ানং কদাচন ॥ 5 ॥
শংকিতংতু সমুদ্ভ্রাংতমুত্পতংতমিবাংবরে ।
দৃশ্যমানমদৃশ্য়ং চ বনোদ্দেশেষু কেষুচিত্ ॥ 6 ॥
ছিন্নাভ্রৈরিব সংবীতং শারদং চংদ্রমংডলম্ ।
মুহুর্তাদেব দদৃশে মুহুর্দূরাত্প্রকাশতে ॥ 7 ॥
দর্শনাদর্শনাদেবং সোঽপাকর্ষত রাঘবম্ ।
সুদূরমাশ্রমস্য়াস্য় মারীচো মৃগতাং গতঃ ॥ 8 ॥
আসীত্ ক্রুদ্ধস্তু কাকুত্স্থো বিবশস্তেন মোহিতঃ ।
অথাবতস্থে সংভ্রাংতশ্চায়ামাশ্রিত্য় শাদ্বলে ॥ 9 ॥
স তমুন্মাদয়ামাস মৃগরূপো নিশাচরঃ ।
মৃগৈঃ পরিবৃতো বন্য়ৈরদূরাত্প্রত্যদৃশ্যত ॥ 10 ॥
গৃহীতুকামং দৃষ্ট্বৈবং পুনরেবাভ্যধাবত ।
তত্ক্ষণাদেব সংত্রাসাত্পুনরংতর্হিতোঽভবত্ ॥ 11 ॥
পুনরেব ততো দূরাদ্বৃক্ষষংডাদ্বিনিস্সৃতম্ ।
দৃষ্ট্বা রামো মহাতেজাস্তং হংতুং কৃতনিশ্চয়ঃ ॥ 12 ॥
ভূযস্তু শরমুদ্ধৃত্য় কুপিতস্তত্র রাঘবঃ ।
সূর্যরশ্মিপ্রতীকাশং জ্বলংতমরিমর্দনঃ ॥ 13 ॥
সংধায় সুদৃঢে চাপে বিকৃষ্য় বলবদ্বলী ।
তমেব মৃগমুদ্দিশ্য় শ্বসংতমিব পন্নগম্ ॥ 14 ॥
মুমোচ জ্বলিতং দীপ্তমস্ত্রং ব্রহ্মবিনির্মিতম্ ।
শরীরং মৃগরূপস্য় বিনির্ভিদ্য় শরোত্তমঃ ॥ 15 ॥
মারীচস্য়ৈব হৃদয়ং বিভেদাশনিসন্নিভঃ ।
তালমাত্রমথোত্প্লুত্য় ন্যপতত্সশরাতুরঃ ॥ 16 ॥
বিনদন্ভৈরবং নাদং ধরণ্য়ামল্পজীবিতঃ ।
ম্রিযমাণস্তু মারীচো জহৌ তাং কৃত্রিমাং তনুম্ ॥ 17 ॥
স্মৃত্বা তদ্বচনং রক্ষো দধ্য়ৌ কেন তু লক্ষ্মণম্ ।
ইহ প্রস্থাপয়েত্সীতা শূন্য়ে তাং রাবণো হরেত্ ॥ 18 ॥
স প্রাপ্তকালমাজ্ঞায় চকার চ তত স্বনম্ ।
সদৃশং রাঘবস্য়েহ হা সীতে লক্ষ্মণেতি চ ॥ 19 ॥
তেন মর্মণি নির্বিদ্ধং শরেণানুপমেন হি ।
মৃগরূপং তু তত্ত্যক্ত্বা রাক্ষসং রূপমাস্থিতঃ ॥ 20 ॥
চক্রে স সুমহাকায়ং মারীচো জীবিতং ত্যজন্ ।
তং দৃষ্ট্বা পতিতং ভূমৌ রাক্ষসং ঘোরদর্শনম্ ॥ 21 ॥
রামো রুধিরসিক্তাংগং চেষ্টমানং মহীতলে ।
জগাম মনসা সীতাং লক্ষ্মণস্য় বচস্স্মরন্ ॥ 22 ॥
মারীচস্য় তু মায়ৈষা পূর্বোক্তং লক্ষ্মণেন তু ।
তত্তথা হ্যভবচ্চাদ্য় মারীচোঽয়ং ময়া হতঃ ॥ 23 ॥
হা সীতে লক্ষ্মণেত্য়েবমাক্রুশ্য় চ মহাস্বরম্ ।
মমার রাক্ষসস্সোঽয়ং শ্রুত্বা সীতা কথং ভবেত্ ॥ 24 ॥
লক্ষ্মণশ্চ মহাবাহুঃ কামবস্থাং গমিষ্যতি ।
ইতি সংচিংত্য় ধর্মাত্মা রামো হৃষ্টতনূরুহঃ ॥ 25 ॥
তত্র রামং ভয়ং তীব্রমাবিবেশ বিষাদজম্ ।
রাক্ষসং মৃগরূপং তং হত্বা শ্রুত্বা চ তত্স্বরম্ ॥ 26 ॥
নিহত্য় পৃষতং চান্য়ং মাংসমাদায় রাঘবঃ ।
ত্বরমাণো জনস্থানং সসারাভিমুখস্তদা ॥ 27 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে চতুশ্চত্বারিংশস্সর্গঃ ॥
