শ্রীমদ্বাল্মীকীয় রামাযণে অয়োধ্য়াকাংডম্ ।
অথ ষট্চত্বারিংশস্সর্গঃ ।
ততস্তু তমসাতীরং রম্যমাশ্রিত্য় রাঘবঃ ।
সীতামুদ্বীক্ষ্য় সৌমিত্রিমিদং বচনমব্রবীত্ ॥ 1 ॥
ইযমদ্য় নিশা পূর্বা সৌমিত্রে প্রহিতা বনম্ ।
বনবাসস্য় ভদ্রং তে স নোত্কংঠিতুমর্হসি ॥ 2 ॥
পশ্য় শূন্য়ান্যরণ্য়ানি রুদংতীব সমংততঃ ।
যথানিলযমাযদ্ভির্নিলীনানি মৃগদ্বিজৈঃ ॥ 3 ॥
অদ্য়ায়োধ্য়া তু নগরী রাজধানী পিতুর্মম ।
সস্ত্রীপুংসা গতানস্মাঞ্শোচিষ্যতি ন সংশয়ঃ ॥ 4 ॥
অনুরক্তা হি মনুজা রাজানং বহুভির্গুণৈঃ ।
ত্বাং চ মাং চ নরব্য়াঘ্র শত্রুঘ্ন ভরতৌ তথা ॥ 5 ॥
পিতরং চানুশোচামি মাতরং চ যশস্বিনীম্ ।
অপি বাংধৌ ভবেতাং তু রুদংতৌ তাবভীক্ষ্ণশঃ ॥ 6 ॥
ভরতঃ খলু ধর্মাত্মা পিতরং মাতরং চ মে ।
ধর্মার্থকামসহিতৈর্বাক্য়ৈর্বাশ্বাসয়িষ্যতি ॥ 7 ॥
ভরতস্য়ানৃশংসত্বং বিচিংত্য়াহং পুনঃ পুনঃ ।
নানুশোচামি পিতরং মাতরং চাপি লক্ষ্মণ ॥ 8 ॥
ত্বয়া কার্য়ং নরব্য়াঘ্র মামনুব্রজতা কৃতম্ ।
অন্বেষ্টব্য়া হি বৈদেহ্য়া রক্ষণার্থে সহাযতা ॥ 9 ॥
অদ্ভিরেব তু সৌমিত্রে বত্স্য়াম্যদ্য় নিশামিমাম্ ।
এতধ্দি রোচতে মহ্য়ং বন্য়েঽপি বিবিধে সতি ॥ 10 ॥
এবমুক্ত্বা তু সৌমিত্রিং সুমংত্রমপি রাঘবঃ ।
অপ্রমত্তস্ত্বমশ্বেষু ভব সৌম্য়েত্য়ুবাচ হ ॥ 11 ॥
সোঽশ্বান্সুমংত্রঃ সংযম্য় সূর্য়েঽস্তং সমুপাগতে ।
প্রভূতযবসান্ কৃত্বা বভূব প্রত্যনংতরঃ ॥ 12 ॥
উপাস্য় তু শিবাং সংধ্য়াং দৃষ্ট্বা রাত্রিমুপস্থিতাম্ ।
রামস্য় শযনং চক্রে সূতঃ সৌমিত্রিণা সহ ॥ 13 ॥
তাং শয়্য়াং তমসাতীরে বীক্ষ্য় বৃক্ষদলৈঃ কৃতাম্ ।
রামঃ সৌমিত্রিণা সার্ধং সভার্যস্সংবিবেশ হ ॥ 14 ॥
সভার্য়ং সংপ্রসুপ্তং তং ভ্রাতরং বীক্ষ্য় লক্ষ্মণঃ ।
কথয়ামাস সূতায় রামস্য় বিবিধান্ গুণান্ ॥ 15 ॥
জাগ্রতো হ্য়েব তাং রাত্রিং সৌমিত্রেরুদিতো রবিঃ ।
সূতস্য় তমসাতীরে রামস্য় ব্রুবতো গুণান্ ॥ 16 ॥
গোকুলাকুলতীরায়াস্তমসায়া বিদূরতঃ ।
অবসত্তত্র তাং রাত্রিং রামঃ প্রকৃতিভিস্সহ ॥ 17 ॥
উত্থায় স মহাতেজাঃ প্রকৃতীস্তা নিশাম্য় চ ।
অব্রবীদ্ভ্রাতরং রামো লক্ষ্মণং পুণ্যলক্ষণম্ ॥ 18 ॥
অস্মদ্ব্যপেক্ষান্ সৌমিত্রে নিরপেক্ষান্ গৃহেষ্বপি ।
বৃক্ষমূলেষু সংসুপ্তান্ পশ্য় লক্ষ্মণ সাংপ্রতম্ ॥ 19 ॥
যথৈতে নিযমং পৌরাঃ কুর্বংত্যস্মন্নিবর্তনে ।
অপি প্রাণান্ন্যসিষ্য়ংতি ন তু ত্যক্ষ্য়ংতি নিশ্চযম্ ॥ 20 ॥
যাবদেব তু সংসুপ্তা স্তাবদেব বয়ং লঘু ।
রথমারুহ্য় গচ্ছামঃ পংথানমকুতোভযম্ ॥ 21 ॥
অতো ভূয়োঽপি নেদানীমিক্ষ্বাকুপুরবাসিনঃ ।
স্বপেয়ুরনুরক্তা মাং বৃক্ষমূলানি সংশ্রিতাঃ ॥ 22 ॥
পৌরা হ্য়াত্মকৃতাদ্দুঃখাদ্বিপ্রমোচ্য়া নৃপাত্মজৈঃ ।
ন তু খল্বাত্মনা যোজ্য়া দুঃখেন পুরবাসিনঃ ॥ 23 ॥
অব্রবীল্লক্ষ্মণো রামং সাক্ষাদ্ধর্মমিবস্থিতম্ ।
রোচতে মে তথা প্রাজ্ঞ ক্ষিপ্র মারুহ্যতামিতি ॥ 24 ॥
অথ রামোঽব্রবীচ্ছ্রীমান্সুমংত্রং যুজ্যতাং রথঃ ।
গমিষ্য়ামি ততোঽরণ্য়ং গচ্ছ শীঘ্রমিতঃ প্রভো ॥ 25 ॥
সূতস্তত স্সত্ত্বরিতঃ স্য়ংদনং তৈর্হয়োত্তমৈঃ ।
যোজয়িত্ব্রাঽথ রামায় প্রাংজলিঃ প্রত্যবেদযত্ ॥ 26 ॥
অয়ং যুক্তো মহাবাহো রথস্তে রথিনাং বর ।
ত্বমারোহস্ব ভদ্রং তে সসীত স্সহলক্ষ্মণঃ ॥ 27 ॥
তং স্য়ংদনমধিষ্ঠায় রাঘব স্সপরিচ্ছদঃ ।
শীঘ্রগামাকুলাবর্তাং তমসামতরন্নদীম্ ॥ 28 ॥
স সংতীর্য় মহাবাহুঃ শ্রীমান্ শিবমকংটকম্ ।
প্রাপদ্যত মহামার্গমভয়ং ভযদর্শিনাম্ ॥ 29 ॥
মোহনার্থং তু পৌরাণাং সূতং রামোঽব্রবীদ্বচঃ ।
উদঙ্মুখঃ প্রয়াহি ত্বং রথমাস্থায় সারথে ॥ 30 ॥
মুহূর্তং ত্বরিতং গত্বা নিবর্তয় রথং পুনঃ ।
যথা ন বিদ্য়ুঃ পৌরা মাং তথা কুরু সমাহিতঃ ॥ 31 ॥
রামস্য় বচনং শ্রুত্বা তথা চক্রে স সারথিঃ ।
প্রত্য়াগম্য় চ রামস্য় স্য়ংদনং প্রত্যবেদযত্ ॥ 32 ॥
তৌ সংপ্রয়ুক্তং তু রথং সমাস্থিতৌ তদা সসীতৌ রঘুবংশবর্ধনৌ ।
প্রচোদয়ামাস ততস্তুরংগমান্ স সারথির্য়েন পথা তপোবনম্ ॥ 33 ॥
তত স্সমাস্থায় রথং মহারথঃ সসারথির্দাশরথির্বনং যয়ৌ ।
উদঙ্মুখং তং তু রথং চকার স প্রয়াণমাংগল্য় নিমিত্তদর্শনাত্ ॥ 34 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে ষট্চত্বারিংশস্সর্গঃ ॥
