শ্রীমদ্বাল্মীকীয় রামাযণে অয়োধ্য়াকাংডম্ ।
অথ চতুস্ত্রিংশস্সর্গঃ ।
ততঃ কমলপত্রাক্ষঃ শ্য়ামো নিরুপমো মহান্ ।
উবাচ রাম স্তং সূতং পিতুরাখ্য়াহি মামিতি ॥ 1 ॥
স রামপ্রেষিতঃ ক্ষিপ্রং সংতাপকলুষেংদ্রিয়ঃ ।
প্রবিশ্য় নৃপতিং সূতো নিশ্বসংতং দদর্শ হ ॥ 2 ॥
উপরক্তমিবাদিত্য়ং ভস্মচ্ছন্নমিবানলম্ ।
তটাকমিব নিস্তোযমপশ্যজ্জগতীপতিম্ ॥ 3 ॥
আলোক্য় তু মহাপ্রাজ্ঞঃ পরমাকুলচেতসম্ ।
রামমেবানুশোচংতং সূতঃ প্রাংজলিরাসদত্ ॥ 4 ॥
তং বর্ধয়িত্বা রাজানং পূর্বং সূতো জয়াশিষা ।
ভযবিক্লবয়া বাচা মংদয়া শ্লক্ষ্ণমব্রবীত্ ॥ 5 ॥
অয়ং স পুরুষব্য়াঘ্রো দ্বারি তিষ্ঠতি তে সুতঃ ।
ব্রাহ্মণেভ্য়ো ধনং দত্বা সর্বংচৈবোপজীবিনাম্ ॥ 6 ॥
গমিষ্যতি মহারণ্য়ং তং পশ্য় জগতীপতে ।
বৃতং রাজগুণৈ স্সর্বৈরাদিত্যমিব রশ্মিভিঃ ॥ 7 ॥
স সত্যবাদী ধর্মাত্মা গাংভীর্য়াত্সাগরোপমঃ ।
আকাশ ইব নিষ্পংকো নরেংদ্রঃ প্রত্য়ুবাচ তম্ ॥ 8 ॥
সুমংংত্রানয় মে দারান্ যে কেচিদিহ মামকাঃ ।
দারৈঃ পরিবৃতস্সর্বৈর্দ্রষ্টুমিচ্ছামি ধার্মিকম্ ॥ 9 ॥
সোঽংতঃপুরমতীত্য়ৈব স্ত্রিযস্তা বাক্যমব্রবীত্ ।
আর্য়াহ্বযতি বো রাজা গম্যতাং তত্র মা চিরম্ ॥ 10 ॥
এবমুক্তাঃ স্ত্রিয় স্সর্বাঃ সুমংত্রেণ নৃপাজ্ঞয়া ।
প্রচক্রমু স্তদ্ভবনং ভর্তুরাজ্ঞায় শাসনম্ ॥ 11 ॥
অর্ধসপ্তশতাস্তাস্তু প্রমদাস্তাম্রলোচনাঃ ।
কৌসল্য়াং পরিবার্য়াথ শনৈর্জগ্মুর্ধৃতব্রতাঃ ॥ 12 ॥
আগতেষু চ দারেষু সমবেক্ষ্য় মহীপতিঃ ।
উবাচ রাজা তং সূতং সুমংত্রাঽনয় মে সুতম্ ॥ 13 ॥
স সূতো রামমাদায় লক্ষ্মণং মৈথিলীং তদা ।
জগামাভিমুখস্তূর্ণং সকাশং জগতীপতেঃ ॥ 14 ॥
স রাজা পুত্রমায়াংতং দৃষ্ট্বা দূরাত্কৃতাংজলিম্ ।
উত্পপাতাসনাত্তূর্ণমার্ত স্ত্রীজনসংবৃতঃ ॥ 15 ॥
সোঽভিদুদ্রাব বেগেন রামং দৃষ্ট্বা বিশাংপতিঃ ।
তমসংপ্রাপ্য় দুঃখার্তঃ পপাত ভুবি মূর্ছিতঃ ॥ 16 ॥
তং রামোঽভ্যপতত্ ক্ষিপ্রং লক্ষ্মণশ্চ মহারথঃ ।
বিসংজ্ঞমিব দুঃখেন সশোকং নৃপতিং তদা ॥ 17 ॥
স্ত্রীসহস্রনিনাদশ্চ সংজজ্ঞে রাজবেশ্মনি ।
হা হা রামেতি সহসা ভূষণধ্বনিমূর্ছিতঃ ॥ 18 ॥
তং পরিষ্বজ্য় বাহুভ্য়াং তাবুভৌ রামলক্ষ্মণৌ ।
পর্য়ংংকে সীতয়া সার্ধং রুদংতঃ সমবেশযন্ ॥ 19 ॥
অথ রামো মুহূর্তেন লব্ধসংজ্ঞং মহীপতিম্ ।
উবাচ প্রাংজলির্ভূত্বা শোকার্ণবপরিপ্লুতম্ ॥ 20 ॥
আপৃচ্ছে ত্বাং মহারাজ সর্বেষামীশ্বরোঽসি নঃ ।
প্রস্থিতং দংডকারণ্য়ং পশ্য় ত্বং কুশলেন মাম্ ॥ 21 ॥
লক্ষ্মণং চানুজানীহি সীতা চান্বেতি মাং বনম্ ।
কারণৈর্বহুভি স্তথ্য়ৈর্বার্যমাণৌ ন চেচ্ছতঃ ॥ 22 ॥
অনুজানীহি সর্বান্নঃ শোকমুত্সৃজ্য় মানদ ।
লক্ষ্মণং মাং চ সীতাং চ প্রজাপতিরিব প্রজাঃ ॥ 23 ॥
প্রতীক্ষমাণমব্যগ্রমনুজ্ঞাং জগতীপতেঃ ।
উবাচ রাজা সংপ্রেক্ষ্য় বনবাসায় রাঘবম্ ॥ 24 ॥
অহং রাঘব কৈকেয়্য়া বরদানেন মোহিতঃ ।
অয়োধ্য়ায়াস্ত্বমেবাদ্য় ভব রাজা নিগৃহ্য় মাম্ ॥ 25 ॥
এবমুক্তো নৃপতিনা রামো ধর্মভৃতাং বরঃ ।
প্রত্য়ুবাচাংজলিং কৃত্বা পিতরং বাক্যকোবিদঃ ॥ 26 ॥
ভবান্বর্ষ সহস্রায় পৃথিব্য়া নৃপতে পতিঃ ।
অহং ত্বরণ্য়েবত্স্য়ামি ন মে কার্য়ং ত্বয়াঽনৃতম্ ॥ 27 ॥
নব পংচ চ বর্ষাণি বনবাসে বিহৃত্য় তে ।
পুনঃপাদৌ গ্রহীষ্য়ামি প্রতিজ্ঞাংতে নরাধিপ ॥ 28 ॥
রুদন্নার্তঃ প্রিয়ং পুত্রং সত্যপাশেন সংযতঃ ।
কৈকেয়্য়া চোদ্যমানস্তু মিথো রাজা তমব্রবীত্ ॥ 29 ॥
শ্রেযসে বৃদ্ধয়ে তাত পুনরাগমনায় চ ।
গচ্ছস্বারিষ্টমব্যগ্রঃ পংথানমকুতোভযম্ ॥ 30 ॥
ন হি সত্য়াত্মনস্তাত ধর্মাভিমনস স্তব ।
বিনিবর্তয়িতুং বুদ্ধিঃ শক্যতে রঘুনংদন ॥ 31 ॥
অদ্য় ত্বিদানীং রজনীং পুত্র মা গচ্ছ সর্বথা ।
একাহদর্শনেনাপি সাধু তাবচ্চরাম্যহম্ ॥ 32 ॥
মাতরং মাং চ সংপশ্যন্ বসেমামদ্য় শর্বরীম্ ।
তর্পিত স্সর্বকামৈস্ত্বং শ্বঃ কালে সাধয়িষ্যসি ॥ 33 ॥
দুষ্করং ক্রিযতে পুত্র সর্বথা রাঘব ত্বয়া ।
মত্প্রিয়ার্থং প্রিয়াংস্ত্যক্ত্বা যদ্য়াসি বিজনং বনম্ ॥ 34 ॥
ন চৈতন্মে প্রিয়ং পুত্র শপে সত্য়েন রাঘব ।
ছন্নয়া চলিতস্ত্বস্মি স্ত্রিয়া ছন্নাগ্নিকল্পয়া ॥ 35 ॥
বংচনা যা তু লব্ধা মে তাং ত্বং নিস্তর্তুমিচ্ছসি ।
অনয়া বৃত্তসাদিন্য়া কৈকেয়্য়াঽভিপ্রচোদিতঃ ॥ 36 ॥
ন চৈতদাশ্চর্যতমং যত্তজ্য়েষ্ঠস্সুতো মম ।
অপানৃতকথং পুত্র পিতরং কর্তুমিচ্ছসি ॥ 37 ॥
অথ রামস্তথা শ্রুত্বা পিতুরার্তস্য় ভাষিতম্ ।
লক্ষ্মণেন সহ ভ্রাত্রা দীনো বচনমব্রবীত্ ॥ 38 ॥
প্রাপ্স্য়ামি যানদ্য় গুণান্কো মে শ্বস্তান্ প্রদাস্যতি ।
অপক্রমণমেবাতঃ সর্বকামৈরহং বৃণে ॥ 39 ॥
ইয়ং সরাষ্ট্রা সজনা ধনধান্যসমাকুলা ।
ময়া বিসৃষ্টা বসুধা ভরতায় প্রদীযতাম্ ॥ 40 ॥
বনবাসকৃতা বুদ্ধির্ন চ মেঽদ্য় চলিষ্যতি ।
যস্তুষ্টেন বরো দত্তঃ কৈকেয়্য়ৈ বরদ ত্বয়া ॥ 41 ॥
দীযতাং নিখিলেনৈব সত্যস্ত্বং ভব পার্থিব ।
অহং নিদেশং ভবতো যথোক্তমনুপালযন্ ॥ 42 ॥
চতুর্দশ সমা বত্স্য়ে বনে বনচরৈস্সহ ।
মা বিমর্শো বসুমতী ভরতায় প্রদীযতাম্ ॥ 43 ॥
ন হি মে কাংক্ষিতং রাজ্য়ং সুখমাত্মনি বা প্রিযম্ ।
যথানিদেশং কর্তুং বৈ তবৈব রঘুনংদন ॥ 44 ॥
অপগচ্ছতু তে দুঃখং মাভূর্বাষ্পপরিপ্লুতঃ ।
ন হি ক্ষুভ্যতি দুর্ধর্ষঃ সমুদ্রঃ সরিতাং পতিঃ ॥ 45 ॥
নৈবাহং রাজ্যমিচ্ছামি ন সুখং ন চ মেদিনীম্ ।
নৈব সর্বানিমান্ কামা ন্নস্বর্গং নৈব জীবিতম্ ॥ 46 ॥
ত্বামহং সত্যমিচ্ছামি নানৃতং পুরুষর্ষভ ।
প্রত্যক্ষং তব সত্য়েন সুকৃতেন চ তে শপে ॥ 47 ॥
ন চ শক্য়ং ময়া তাত স্থাতুং ক্ষণমপি প্রভো ।
স শোকং ধারযস্বেমং ন হি মেঽস্তি বিপর্যয়ঃ ॥ 48 ॥
অর্থিতো হ্যস্মি কৈকেয়্য়া বনং গচ্ছেতি রাঘব ।
ময়া চোক্তং ব্রজামীতি তত্সত্যমনুপালয়ে ॥ 49 ॥
মা চোত্কংঠাং কৃথা দেব বনে রংস্য়ামহে বযম্ ।
প্রশাংতহরিণাকীর্ণে নানাশকুনিনাদিতে ॥ 50 ॥
পিতা হি দৈবতং তাত দেবতানামপি স্মৃতম্ ।
তস্মাদ্দৈবতমিত্য়েব করিষ্য়ামি পিতুর্বচঃ ॥ 51 ॥
চতুর্দশসু বর্ষেষু গতেষু নরসত্তম ।
পুনর্দ্রক্ষ্যসি মাং প্রাপ্তং সংতাপোঽয়ং বিমুচ্যতাম্ ॥ 52 ॥
যেন সংস্তংভনীয়োঽয়ং সর্বো বাষ্পগলো জনঃ ।
স ত্বং পুরুষশার্দূল কিমর্থং বিক্রিয়াং গতঃ ॥ 53 ॥
পুরং চ রাষ্ট্রং চ মহী চ কেবলা ময়া নিসৃষ্টা ভরতায় দীযতাম্ ।
অহং নিদেশং ভবতোঽনুপালযন্ বনং গমিষ্য়ামি চিরায় সেবিতুম্ ॥ 54 ॥
ময়া নিসৃষ্টাং ভরতো মহীমিমাং সশৈলষংডাং সপুরাং সকাননাম্ ।
শিবাং সুসীমামনুশাস্তু কেবলং ত্বয়া যদুক্তং নৃপতে তথাস্তু তত্ ॥ 55 ॥
ন মে তথা পার্থিব ধীযতে মনো মহত্সু কামেষু ন চাত্মনঃপ্রিয়ে ।
যথা নিদেশে তব শিষ্টসম্মতে ব্যপৈতু দুঃখং তব মত্কৃতেঽনঘ ॥ 56 ॥
তদদ্য় নৈবানঘ রাজ্যমব্যয়ং ন সর্বকামান্ন সুখং ন মৈথিলীম্ ।
ন জীবিতং ত্বামনৃতেন যোজযন্ বৃণীয় সত্য়ং ব্রতমস্তু তে তথা ॥ 57 ॥
ফলানি মূলানি চ ভক্ষযন্বনে গিরীংশ্চ পশ্যন্ সরিতস্সরাংসি চ ।
বনং প্রবিশ্য়ৈব বিচিত্রপাদপং সুখী ভবিষ্য়ামি তবাস্তু নির্বৃতিঃ ॥ 58 ॥
এবং স রাজা ব্যসনাভিপন্নঃ শোকেন দুঃখেন চ তাম্যমানঃ ।
আলিংগ্য় পুত্রং সুবিনষ্টসংজ্ঞো মোহং গতো নৈব চিচেষ্ট কিংংচিত্ ॥ 59 ॥
দেব্যস্তত স্সংরুরুদুস্সমেতা স্তাং বর্জয়িত্বা নরদেবপত্নীম্ ।
রুদন্ সুমংত্রোঽঽপি জগাম মূর্ছাং হাহাকৃতং তত্র বভূব সর্বম্ ॥ 60 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে চতুস্ত্রিংশস্সর্গঃ ॥
