শ্রীমদ্বাল্মীকীয় রামাযণে অয়োধ্য়াকাংডম্ ।
অথ দ্বাদশাধিকশততমস্সর্গঃ ।
তমপ্রতিমতেজোভ্য়াং ভ্রাতৃভ্য়াং রোমহর্ষণম্ ।
বিস্মিতাঃ সংগমং প্রেক্ষ্য় সমবেতা মহর্ষয়ঃ ॥ 1 ॥
অংতর্হিতা মুনিগণাস্সিদ্ধাশ্চ পরমর্ষয়ঃ ।
তৌ ভ্রাতরৌ মহাত্মানৌ কাকুত্স্থৌ প্রশশংসিরে ॥ 2 ॥
স ধন্য়ো যস্য় পুত্রৌ দ্বৌ ধর্মজ্ঞৌ ধর্মবিক্রমৌ ।
শ্রুত্বা বয়ং হি সংভাষামুভয়োস্স্পৃহয়ামহে ॥ 3 ॥
ততস্ত্বৃষিগণাঃ ক্ষিপ্রং দশগ্রীববধৈষিণঃ ।
ভরতং রাজশার্দূলমিত্য়ূচুঃ সংগতা বচঃ ॥ 4 ॥
কুলে জাত মহাপ্রাজ্ঞ মহাবৃত্ত মহাযশঃ ।
গ্রাহ্য়ং রামস্য় বাক্য়ং তে পিতরং যদ্যবেক্ষসে ॥ 5 ॥
সদাঽনৃণমিমং রামং বযমিচ্ছামহে পিতুঃ ।
আনৃণত্বাচ্চ কৈকেয়্য়াঃ স্বর্গং দশরথো গতঃ ॥ 6 ॥
এতাবদুক্ত্বা বচনং গংধর্বাঃ সমহর্ষয়ঃ ।
রাজর্ষযশ্চৈব তদা সর্বে স্বাং স্বাং গতিং গতাঃ ॥ 7 ॥
হ্লাদিতস্তেন বাক্য়েন শুভেন শুভদর্শনঃ ।
রাম স্সংহৃষ্টবদনস্তানৃষীনভ্যপূজযত্ ॥ 8 ॥
ত্রস্তগাত্রস্তু ভরতস্স বাচা সজ্জমানয়া ।
কৃতাংজলিরিদং বাক্য়ং রাঘবং পুনরব্রবীত্ ॥ 9 ॥
রাজধর্মমনুপ্রেক্ষ্য় কুলধর্মানুসংততিম্ ।
কর্তুমর্হসি কাকুত্স্থ মম মাতুশ্চ যাচনাম্ ॥ 10 ॥
রক্ষিতুং সুমহদ্রাজ্যমহমেকস্তু নোত্সহে ।
পৌরজানপদাংশ্চাপি রক্তান্রংজয়িতুং তথা ॥ 11 ॥
জ্ঞাতযশ্চ হি যোধাশ্চ মিত্রাণি সুহৃদশ্চ নঃ ।
ত্বামেব প্রতিবীক্ষংতে পর্জন্যমিব কর্ষকাঃ ॥ 12 ॥
ইদং রাজ্য়ং মহাপ্রাজ্ঞ স্থাপয় প্রতিপদ্য় হি ।
শক্তিমানসি কাকুত্স্থ লোকস্য় পরিপালনে ॥ 13 ॥
ইত্য়ুক্ত্বা ন্যপতদ্ভ্রাতুঃ পাদয়োর্ভরতস্তদা ।
ভৃশং সংপ্রার্থয়ামাস রামমেব প্রিয়ংবদঃ ॥ 14 ॥
তমংকে ভরতং কৃত্বা রামো বচনমব্রবীত্ ।
শ্য়ামং নলিনপত্রাক্ষং মত্তহংসস্বরং স্বযম্ ॥ 15 ॥
আগতা ত্বামিয়ং বুদ্ধিস্স্বজা বৈনয়িকী চ যা ।
ভৃশমুত্সহসে তাত রক্ষিতুং পৃথিবীমপি ॥ 16 ॥
অমাত্য়ৈশ্চ সুহৃদ্ভিশ্চ বুদ্ধিমদ্ভিশ্চ মংত্রিভিঃ ।
সর্বকার্য়াণি সম্মংত্র্য় সুমহংত্যপি কারয় ॥ 17 ॥
লক্ষ্মীশ্চংদ্রাদপেয়াদ্বা হিমবান্বা হিমং ত্যজেত্ ।
অতীয়াত্সাগরো বেলাং ন প্রতিজ্ঞামহং পিতুঃ ॥ 18 ॥
কামাদ্বা তাত লোভাদ্বা মাত্রাতুভ্যমিদং কৃতম্ ।
ন তন্মনসি কর্তব্য়ং বর্তিতব্য়ং চ মাতৃবত্ ॥ 19 ॥
এবং ব্রুবাণং ভরতঃ কৌসল্য়াসুতমব্রবীত্ ।
তেজসাঽঽদিত্যসংকাশং প্রতিপচ্চংদ্রদর্শনম্ ॥ 20 ॥
আধিরোহাঽর্য় পাদাভ্য়াং পাদুকে হেমভূষিতে ।
এতেহি সর্বলোকস্য় যোগক্ষেমং বিধাস্যতঃ ॥ 21 ॥
সোঽধিরুহ্য় নরব্য়াঘ্রঃ পাদুকে হ্যবরুহ্য় চ ।
প্রাযচ্ছত্সুমহাতেজা ভরতায় মহাত্মনে ॥ 22 ॥
স পাদুকে সংপ্রণম্য় রামং বচনমব্রবীত্ চতুর্দশ হি বর্ষাণি জটাচীরধরো হ্য়াহম্ ॥ 23 ॥
ফলমূলাশনো বীর ভবেয়ং রঘুনংদন ।
তবাঽগমনমাকাংক্ষান্বসন্বৈ নগরাদ্বহিঃ ॥ 24 ॥
তব পাদুকয়োর্ন্যস্তরাজ্যতংত্রঃ পরংতপ ।
চতুর্দশে তু সংপূর্ণে বর্ষেঽহনি রঘূত্তম ॥ 25 ॥
ন দ্রক্ষ্য়ামি যদি ত্বাং তু প্রবেক্ষ্য়ামি হুতাশনম্ ।
তথেতি চ প্রতিজ্ঞায় তং পরিষ্বজ্য় সাদরম্ ॥ 26 ॥
শত্রুঘ্নং চ পরিষ্বজ্য় ভরতং চেদমব্রবীত্ ।
মাতরং রক্ষ কৈকেয়ীং মা রোষং কুরু তাং প্রতি ॥ 27 ॥
ময়া চ সীতয়া চৈব শপ্তোঽসি রঘুসত্তম ।
ইত্য়ুক্ত্বাঽশ্রুপরীতাক্ষো ভ্রাতরং বিসসর্জ হ ॥ 28 ॥
স পাদুকে তে ভরতঃ প্রতাপবান্ স্বলংকৃতে সংপরিপূজ্য় ধর্মবিত্ ।
প্রদক্ষিণং চৈব চকার রাঘবং চকার তে চোত্তমনাগমূর্ধনি ॥ 29 ॥
অথাঽনুপূর্ব্য়াত্প্রতিনংদ্য় তং জনং গুরূংশ্চ মংত্রিপ্রকৃতীস্তথাঽনুজৌ ।
ব্যসর্জযদ্রাঘববংশবর্ধনস্থিরঃ স্বধর্মে হিমবানিবাচলঃ ॥ 30 ॥
তং মাতরো বাষ্পগৃহীতকংঠ্য়ো দুঃখেন নামংত্রয়িতুং হি শেকুঃ ।
স ত্বেব মাত্রৃরভিবাদ্য় সর্বারুদন্কুটীং স্বাং প্রবিবেশ রাঘবঃ ॥ 31 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে দ্বাদশাধিকশততমস্সর্গঃ ॥
