শ্রীমদ্বাল্মীকীয় রামাযণে সুংদরকাংডম্ ।
অথ একবিংশস্সর্গঃ ।
তস্য় তদ্বচনং শ্রুত্বা সীতা রৌদ্রস্য় রক্ষসঃ ।
আর্তা দীনস্বরা দীনং প্রত্য়ুবাচ শনৈর্বচঃ ॥ 1 ॥
দুঃখার্তা রুদতী সীতা বেপমানা তপস্বিনী ।
চিংতয়ংতী বরারোহা পতিমেব পতিব্রতা ॥ 2 ॥
তৃণমংতরতঃ কৃত্বা প্রত্য়ুবাচ শুচিস্মিতা ।
নিবর্তয় মনো মত্তঃ স্বজনে ক্রিযতাং মনঃ ॥ 3 ॥
ন মাং প্রার্থয়িতুং যুক্তং সুসিদ্ধিমিব পাপকৃত্ ।
অকার্য়ং ন ময়া কার্যমেকপত্ন্য়া বিগর্হিতম্ ॥ 4 ॥
কুলং সংপ্রাপ্তয়া পুণ্য়ং কুলে মহতি জাতয়া ।
এবমুক্ত্বা তু বৈদেহী রাবণং তং যশস্বিনী ॥ 5 ॥
রাক্ষসং পৃষ্ঠতঃ কৃত্বা ভূয়ো বচনমব্রবীত্ ।
নাহমৌপয়িকী ভার্য়া পরভার্য়া সতী তব ॥ 6 ॥
সাধু ধর্মমবেক্ষস্ব সাধু সাধুব্রতং চর ।
যথা তব তথান্য়েষাং দারা রক্ষ্য়া নিশাচর ॥ 7 ॥
আত্মানমুপমাং কৃত্বা স্বেষু দারেষু রম্যতাম্ ।
অতুষ্টং স্বেষু দারেষু চপলং চলিতেংদ্রিযম্ ॥ 8 ॥
নয়ংতি নিকৃতিপ্রজ্ঞং পরদারাঃ পরাভবম্ ।
ইহ সংতো ন বা সংতি সতো বা নানুবর্তসে ॥ 9 ॥
তথাহি বিপরীতা তে বুদ্ধিরাচারবর্জিতা ।
বচো মিথ্য়াপ্রণীতাত্মা পথ্যমুক্তং বিচক্ষণৈঃ ॥ 10 ॥
রাক্ষসানামভাবায় ত্বং বা ন প্রতিপদ্যসে ।
অকৃতাত্মানমাসাদ্য় রাজানমনয়ে রতম্ ॥ 11 ॥
সমৃদ্ধানি বিনশ্য়ংতি রাষ্ট্রাণি নগরাণি চ ।
তথেয়ং ত্বাং সমাসাদ্য় লংকা রত্নৌঘসংকুলা ॥ 12 ॥
অপরাধাত্তবৈকস্য় নচিরাদ্বিনশিষ্যতি ।
স্বকৃতৈর্হন্যমানস্য় রাবণাদীর্ঘদর্শিনঃ ॥ 13 ॥
অভিনংদংতি ভূতানি বিনাশে পাপকর্মণঃ ।
এবং ত্বাং পাপকর্মাণং বক্ষ্য়ংতি নিকৃতা জনাঃ ॥ 14 ॥
দিষ্ট্য়ৈতদ্ব্যসনং প্রাপ্তো রৌদ্র ইত্য়েব হর্ষিতাঃ ।
শক্য়া লোভয়িতুং নাহমৈশ্বর্য়েণ ধনেন বা ॥ 15 ॥
অনন্য়া রাঘবেণাহং ভাস্করেণ প্রভা যথা ।
উপধায় ভুজং তস্য় লোকনাথস্য় সত্কৃতম্ ॥ 16 ॥
কথং নামোপধাস্য়ামি ভুজমন্যস্য় কস্য় চিত্ ।
অহমৌপয়িকী ভার্য়া তস্য়ৈব বসুধাপতেঃ ॥ 17 ॥
ব্রতস্নাতস্য় বিপ্রস্য় বিদ্য়েব বিদিতাত্মনঃ ।
সাধু রাবণ রামেণ মাং সমানয় দুঃখিতাম্ ॥ 18 ॥
বনে বাশিতয়া সার্ধং করেণ্বেব গজাধিপম্ ।
মিত্রমৌপয়িকং কর্তুং রামঃ স্থানং পরীপ্সতা ॥ 19 ॥
বধং চানিচ্ছতা ঘোরং ত্বয়াসৌ পুরুষর্ষভঃ ।
বিদিতঃ স হি ধর্মজ্ঞঃ শরণাগতবত্সলঃ ॥ 20 ॥
তেন মৈত্রী ভবতু তে যদি জীবিতুমিচ্ছসি ।
প্রসাদযস্ব ত্বং চৈনং শরণাগতবত্সলম্ ॥ 21 ॥
মাং চাস্মৈ নিযতো ভূত্বা নির্য়াতয়িতুমর্হসি ।
এবং হি তে ভবেত্স্বস্তি সংপ্রদায় রঘূত্তমে ॥ 22 ॥
অন্যথা ত্বং হি কুর্বাণো বধং প্রাপ্স্যসি রাবণ ।
বর্জয়েদ্বজ্রমুত্সৃষ্টং বর্জয়েদংতকশ্চিরম্ ॥ 23 ॥
ত্বদ্বিধং তু ন সংকৃদ্ধো লোকনাথঃ স রাঘবঃ ।
রামস্য় ধনুষঃ শব্দং শ্রোষ্যসি ত্বং মহাস্বনম্ ॥ 24 ॥
শতক্রতুবিসৃষ্টস্য় নির্ঘোষমশনেরিব ।
ইহ শীঘ্রং সুপর্বাণো জ্বলিতাস্য়া ইবোরগাঃ ॥ 25 ॥
ইষবো নিপতিষ্য়ংতি রামলক্ষ্মণলক্ষণাঃ ।
রক্ষাংসি পরিনিঘ্নংতঃ পুর্য়ামস্য়াং সমংততঃ ॥ 26 ॥
অসংপাতং করিষ্য়ংতি পতংতঃ কংকবাসসঃ ।
রাক্ষসেংদ্রমহাসর্পান্ স রামগরুডো মহান্ ॥ 27 ॥
উদ্ধরিষ্যতি বেগেন বৈনতেয় ইবোরগান্ ।
অপনেষ্যতি মাং ভর্তা ত্বত্তঃ শীঘ্রমরিংদমঃ ॥ 28 ॥
অসুরেভ্য়ঃ শ্রিয়ং দীপ্তাং বিষ্ণুস্ত্রিভিরিব ক্রমৈঃ ।
জনস্থানে হতস্থানে নিহতে রক্ষসাং বলে ॥ 29 ॥
অশক্তেন ত্বয়া রক্ষঃ কৃতমেতদসাধু বৈ ।
আশ্রমং তু তয়োঃ শূন্য়ং প্রবিশ্য় নরসিংহয়োঃ ॥ 30 ॥
গোচরং গতয়োর্ভ্রাত্রোরপনীতা ত্বয়াধম ।
ন হি গংধমুপাঘ্রায় রামলক্ষ্মণয়োস্ত্বয়া ॥ 31 ॥
শক্য়ং সংদর্শনে স্থাতুং শুনা শার্দূলয়োরিব ।
তস্য় তে বিগ্রহে তাভ্য়াং যুগগ্রহণমস্থিরম্ ॥ 32 ॥
বৃত্রস্য়েবেংদ্রবাহুভ্য়াং বাহোরেকস্য় বিগ্রহে ।
ক্ষিপ্রং তব স নাথো মে রামঃ সৌমিত্রিণা সহ ॥ 33 ॥
তোযমল্পমিবাদিত্য়ঃ প্রাণানাদাস্যতে শরৈঃ ।
গিরিং কুবেরস্য় গতোঽথ বালয়ং সভাং গতো বা বরুণস্য় রাজ্ঞঃ ।
অসংশয়ং দাশরথের্ন মোক্ষ্যসে মহাদ্রুমঃ কালহতোঽশনেরিব ॥ 34 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে একবিংশস্সর্গঃ ॥
