শ্রীমদ্বাল্মীকীয় রামাযণে অরণ্যকাংডম্ ।
অথ একাদশস্সর্গঃ ।
অগ্রতঃ প্রযয়ৌ রামস্সীতা মধ্য়ে সুমধ্যমা ।
পৃষ্ঠতস্তু ধনুষ্পাণির্লক্ষ্মণোঽনুজগাম হ ॥ 1 ॥
তৌ পশ্যমানৌ বিবিধান্ শৈলপ্রস্থান্বনানি চ ।
নদীশ্চ বিবিধা রম্য়া জগ্মতুস্সীতয়া সহ ॥ 2 ॥
সারসাংশ্চক্রবাকাংশ্চ নদীপুলিনচারিণঃ ।
সরাংসি চ সপদ্মানি যুক্তানি জলজৈঃ খগৈঃ ॥ 3 ॥
যূথবদ্ধাংশ্চ পৃষতান্মদোন্মত্তান্ বিষাণিনঃ ।
মহিষাংশ্চ বরাহাংশ্চ নাগাংশ্চ দ্রুমবৈরিণঃ ॥ 4 ॥
তে গত্বা দূরমধ্বানং লংবমানে দিবাকরে ।
দদৃশুস্সহিতা রম্য়ং তটাকং যোজনাযতম্ ॥ 5 ॥
পদ্মপুষ্করসংবাধং গজয়ূথৈরলংকৃতম্ ।
সারসৈর্হংসকাদংবৈস্সংকুলং জলচারিভিঃ ॥ 6 ॥
প্রসন্নসলিলে রম্য়ে তস্মিন্সরসি শুশ্রুবে ।
গীতবাদিত্রনির্ঘোষো ন তু কশ্চন দৃশ্যতে ॥ 7 ॥
ততঃ কৌতূহলাদ্রামো লক্ষ্মণশ্চ মহাবলঃ ।
মুনিং ধর্মভৃতং নাম প্রষ্টুং সমুপচক্রমে ॥ 8 ॥
ইদমত্যদ্ভুতং শ্রুত্বা সর্বেষাং নো মহামুনে ।
কৌতূহলং মহজ্জাতং কিমিদং সাধু কথ্যতাম্ ॥ 9 ॥
বক্তব্য়ং যদি চেদবিপ্র নাতিগুহ্যমপি প্রভো ।
তেনৈবমুক্তো ধর্মাত্মা রাঘবেণ মুনিস্তদা ॥ 10 ॥
প্রভবং সরসঃ কৃত্স্নমাখ্য়াতুমুপচক্রমে ।
ইদং পংচাপ্সরো নাম তটাকং সার্বকালিকম্ ॥ 11 ॥
নির্মিতং তপসা রাম মুনিনা মাংডকর্ণিনা ।
স হি তেপে তপস্তীব্রং মাংডকর্ণির্মহামুনিঃ ॥ 12 ॥
দশবর্ষসহস্রাণি বায়ুভক্ষো জলাশ্রয়ঃ ।
ততঃ প্রব্যথিতাস্সর্বে দেবাস্সাগ্নিপুরোগমাঃ ॥ 13 ॥
অব্রুবন্ বচনং সর্বে পরস্পরসমাগতাঃ ।
অস্মাকং কস্যচিত্ স্থানমেষ প্রার্থযতে মুনিঃ ॥ 14 ॥
ইতি সংবিগ্নমনসস্সর্বে তে ত্রিদিবৌকসঃ ।
তত্র কর্তুং তপোবিঘ্নং দেবৈস্সর্বৈর্নিয়োজিতাঃ ॥ 15 ॥
প্রধানাপ্সরসঃ পংচ বিদ্য়ুচ্চলিতবর্চসঃ ।
অপ্সরোভিস্ততস্তাভির্মুনির্দৃষ্টপরাবরঃ ॥ 16 ॥
নীতো মদনবশ্যত্বং সুরাণাং কার্যসিদ্ধয়ে ।
তাশ্চৈবাপ্সরসঃ পংচ মুনেঃ পত্নীত্বমাগতাঃ ॥ 17 ॥
তটাকে নির্মিতং তাসামস্মিন্নংতর্হিতং গৃহম্ ।
তথৈবাপ্সরসঃ পংচ নিবসংত্য়ো যথাসুখম্ ॥ 18 ॥
রময়ংতি তপোয়োগান্মুনিং যৌবনমাস্থিতম্ ।
তাসাং সংক্রীডমানানামেষ বাদিত্রনিস্স্বনঃ ॥ 19 ॥
শ্রূযতে ভূষণোন্মিশ্রো গীতশব্দো মনোহরঃ ।
আশ্চর্যমিতি তস্য়ৈতদ্বচনং ভাবিতাত্মনঃ ॥ 20 ॥
রাঘবঃ প্রতিজগ্রাহ সহ ভ্রাত্রা মহাযশাঃ ।
এবং কথযমানস্য় দদর্শাশ্রমমংডলম্ ॥ 21 ॥
কুশচীরপরিক্ষিপ্তং ব্রাহ্ম্য়া লক্ষ্ম্য়া সমাবৃতম্ ।
প্রবিশ্য় সহ বৈদেহ্য়া লক্ষ্মণেন চ রাঘবঃ ॥ 22 ॥
উবাস মুনিভিস্সর্বৈঃ পূজ্যমানো মহাযশাঃ ।
তদা তস্মিন্সকাকুত্থ্সঃ শ্রীমত্য়াশ্রমমংডলে ॥ 23 ॥
উষিত্বা তু সুখং তত্র পূজ্যমানো মহর্ষিভিঃ ।
জগাম চাশ্রমাংস্তেষাং পর্য়ায়েণ তপস্বিনাম্ ॥ 24 ॥
যেষামুষিতবান্ পূর্বং সকাশে স মহাস্ত্রবিত্ ।
ক্বচিত্পরিদশান্মাসানেকং সংবত্সরং ক্বচিত্ ॥ 25 ॥
ক্বচিচ্ছ চতুরো মাসান্ পংচ ষট্চাপরান্ক্বচিত্ ।
অপরত্রাধিকং মাসাদপ্যর্ধমধিকং ক্বচিত্ ॥ 26 ॥
ত্রীন্মাসানষ্টমাসাংশ্চ রাঘবো ন্যবসত্সুখম্ ।
তথা সংবসতস্তস্য় মুনীনামাশ্রমেষু বৈ ॥ 27 ॥
রমতশ্চানুকূল্য়েন যয়ুস্সংবত্সরা দশ ।
পরিবৃত্য় চ ধর্মজ্ঞো রাঘবস্সহ সীতয়া ॥ 28 ॥
সুতীক্ষ্ণস্য়াশ্রমং শ্রীমান্পুনরেবাজগাম হ ।
স তমাশ্রমমাসাদ্য় মুনিভিঃ প্রতিপূজিতঃ ॥ 29 ॥
তত্রাপি ন্যবসদ্রামঃ কংচিত্কালমরিংদমঃ ।
তদাশ্রমস্থো বিনয়াত্কদাচিত্তং মহামুনিম্ ॥ 30 ॥
উপাসীনস্সকাকুত্স্থস্সুতীক্ষ্ণমিদমব্রবীত্ ।
অস্মিন্নরণ্য়ে ভগবানগস্ত্য়ো মুনিসত্তমঃ ॥ 31 ॥
বসতীতি ময়া নিত্য়ং কথাঃ কথযতাং শ্রুতম্ ।
ন তু জানামি তং দেশং বনস্য়াস্য় মহত্তয়া ॥ 32 ॥
কুত্রাশ্রমপদং রম্য়ং মহর্ষেস্তস্য় ধীমতঃ ।
প্রসাদাত্তত্র ভবতস্সানুজস্সহ সীতয়া ॥ 33 ॥
অগস্ত্যমভিগচ্ছেযমভিবাদয়িতুং মুনিম্ ।
মনোরথো মহানেষ হৃদি মে পরিবর্ততে ॥ 34 ॥
যদ্যহং তং মুনিবরং শুশ্রূষেযমপি স্বযম্ ।
ইতি রামস্য় স মুনিশ্শ্রুত্বা ধর্মাত্মনো বচঃ ॥ 35 ॥
সুতীক্ষ্ণঃ প্রত্য়ুবাচেদং প্রীতো দশরথাত্মজম্ ।
অহমপ্য়েতদেব ত্বাং বক্তুকামস্সলক্ষ্মণম্ ॥ 36 ॥
অগস্ত্যমভিগচ্ছেতি সীতয়া সহ রাঘব ।
দিষ্ট্য়া ত্বিদানীমর্থেঽস্মিন্ স্বযমেব ব্রবীষি মাম্ ॥ 37 ॥
অহমাখ্য়ামি তে বত্স যত্রাগস্ত্য়ো মহামুনিঃ ।
যোজনান্য়াশ্রমাত্তাত যাহি চত্বারি বৈ ততঃ ॥ 38 ॥
দক্ষিণেন মহান্ শ্রীমানগস্ত্যভ্রাতুরাশ্রমঃ ।
স্থলপ্রায়ে বনোদ্দেশে পিপ্পলীবনশোভিতে ॥ 39 ॥
বহুপুষ্পফলে রম্য়ে নানাশকুনিনাদিতে ।
পদ্মিন্য়ো বিবিধাস্তত্র প্রসন্নসলিলাশ্শিবাঃ ॥ 40 ॥
হংসকারংডবাকীর্ণাশ্চক্রবাকোপশোভিতাঃ ।
তত্রৈকাং রজনীং ব্য়ুষ্য় প্রভাতে রাম গম্যতাম্ ॥ 41 ॥
দক্ষিণাং দিশমাস্থায় বনষংডস্য় পার্শ্বতঃ ।
তত্রাগস্ত্য়াশ্রমপদং গত্বা যোজনমংতরা ॥ 42 ॥
রমণীয়ে বনোদ্ধেশে বহুপাদপসংবৃতে ।
রংস্যতে তত্র বৈদেহী লক্ষ্মণশ্চ সহ ত্বয়া ॥ 43 ॥
স হি রম্য়ো বনোদ্দেশো বহুপাদপসংকুলঃ ।
যদি বুদ্ধিঃ কৃতা দ্রষ্টুমগস্ত্য়ং তং মহামুনিম্ ॥ 44 ॥
অদ্য়ৈব গমনে বুদ্ধিং রোচযস্ব মহাযশঃ ।
ইতি রামো মুনেশ্শ্রুত্বা সহ ভ্রাত্রাভিবাদ্য় চ ॥ 45 ॥
প্রতস্থেঽমুদ্দিশ্য় সানুজস্সীতয়া সহ ।
পশ্যন্বনানি রম্য়াণি পর্বতাংশ্চাভ্রসন্নিভান্ ॥ 46 ॥
সরাংসি সরিতশ্চৈব পথি মার্গবশানুগাঃ ।
সুতীক্ষ্ণেনোপদিষ্টেন গত্বা তেন পথা সুখম্ ॥ 47 ॥
ইদং পরমসংহৃষ্টো বাক্য়ং লক্ষ্মণমব্রবীত্ ।
এতদেবাশ্রমপদং নূনং তস্য় মহাত্মনঃ ॥ 48 ॥
অগস্ত্যস্য় মুনের্ভ্রাতুর্দৃশ্যতে পুণ্যকর্মণঃ ।
যথা হি মে বনস্য়াস্য় জ্ঞাতাঃ পথি সহস্রশঃ ॥ 49 ॥
সন্নতাঃ ফলভারেণ পুষ্পভারেণ চ দ্রুমাঃ ।
পিপ্পলীনাং চ পক্বানাং বনাদস্মাদুপাগতঃ ॥ 50 ॥
গংধোঽয়ং পবনোক্ষিপ্তস্সহসা কটুকোদয়ঃ ।
তত্র তত্র চ দৃশ্য়ংতে সংক্ষিপ্তাঃ কাষ্ঠসংচয়াঃ ॥ 51 ॥
লূনাশ্চ পথি দৃশ্য়ংতে দর্ভা বৈডূর্যবর্চসঃ ।
এতচ্চ বনমধ্যস্থং কৃষ্ণাভ্রশিখরোপমম্ ॥ 52 ॥
পাবকস্য়াশ্রমস্থস্য় ধূমাগ্রং সংপ্রদৃশ্যতে ।
বিবিক্তেষু চ তীর্থেষু কৃতস্নানা দ্বিজাতয়ঃ ॥ 53 ॥
পুষ্পোপহারং কুর্বংতি কুসুমৈস্স্বযমর্জিতৈ ।
তত্সুতীক্ষ্ণস্য় বচনং যথা সৌম্য় ময়া শ্রুতম্ ॥ 54 ॥
অগস্ত্যস্য়াশ্রমো ভ্রাতুর্নূনমেষ ভবিষ্যতি ।
নিগৃহ্য় তপসা মৃত্য়ুং লোকানাং হিতকাম্যয়া ॥ 55 ॥
যস্য় ভ্রাত্রা কৃতেয়ং দিক্ছরণ্য়া পুণ্যকর্মণা ।
ধারযন্ ব্রাহ্মণং রূপমিল্বলস্সংস্কৃতং বদন্ ॥ 56 ॥
আমংত্রযতি বিপ্রান্স্মশ্রাদ্ধমুদ্দিশ্য় নির্ঘৃণঃ ।
ভ্রাতরং সংস্কৃতং কৃত্বা ততস্তং মেষরূপিণম্ ॥ 57 ॥
তান্ দ্বিজান্ভোজয়ামাস শ্রাদ্ধদৃষ্টেন কর্মণা ।
ততো ভুক্তবতাং তেষাং বিপ্রাণামিল্বলোঽব্রবীত্ ॥ 58 ॥
বাতাপে নিষ্ক্রমন্বেতি স্বরেণ মহতা বদন্ ।
ততো ভ্রাতুর্বচশ্শ্রুত্বা বাতাপির্মেষবন্নদন্ ॥ 59 ॥
ভিত্ত্বা ভিত্ত্বা শরীরাণি ব্রাহ্মণানাং বিনিষ্পতত্ ।
ব্রাহ্মাণানাং সহস্রাণি তৈরেবং কামরূপিভিঃ ॥ 60 ॥
বিনাশিতানি সংহত্য় নিত্যশঃ পিশিতাশনৈঃ ।
অগস্ত্য়েন তদা দেবৈঃ প্রার্থিতেন মহর্ষিণা ॥ 61 ॥
অনুভূয় কিল শ্রাদ্ধে ভক্ষিতস্সমহাসুরঃ ।
ততস্সংপন্নমিত্য়ুক্ত্বা দত্ত্বা হস্তোদকং ততঃ ॥ 62 ॥
ভ্রাতরং নিষ্ক্রমস্বেতি চেল্বলস্সোঽভ্যভাষত ।
স তং তথা ভাষমাণং ভ্রাতরং বিপ্রঘাতিনম্ ॥ 63 ॥
অব্রবীত্প্রহসংধীমানগস্ত্য়ো মুনিসত্তমঃ ।
কুতো নিষ্ক্রমিতুং শক্তির্ময়া জীর্ণস্য় রক্ষসঃ ॥ 64 ॥
ভ্রাতুস্তে মেষরূপস্য় গতস্য় যমসাদনম্ ।
অথ তস্য় বচশ্শ্রুত্বা ভ্রাতুর্নিধনসংশ্রযম্ ॥ 65 ॥
প্রধর্ষয়িতুমারেভে মুনিং ক্রোধান্নিশাচরঃ ।
সোঽভিদ্রবন্মুনিশ্রেষ্ঠং মুনিনা দীপ্ততেজসা ॥ 66 ॥
চক্ষুষানলকল্পেন নির্দগ্ধো নিধনং গতঃ ।
তস্য়াযমাশ্রমো ভ্রাতুস্তটাকবনশোভিতঃ ॥ 67 ॥
বিপ্রানুকংপয়া যেন কর্মেদং দুষ্করং কৃতম্ ।
এবং কথযমানস্য় তস্য় সৌমিত্রিণা সহ ।
রামস্য়াস্তং গতস্সূর্যস্সংধ্য়াকালোঽভ্যবর্ততঃ ॥ 68 ॥
উপাস্য় পশ্চিমাং সংধ্য়াং সহ ভ্রাত্রা যথাবিধি ।
প্রবিবেশাঽশ্রমপদং তমৃষিং সোঽভ্যবাদযত্ ॥ 69 ॥
সম্যক্ প্রতিগৃহীতশ্চ মুনিনা তেন রাঘবঃ ।
ন্যবসত্তাং নিশামেকাং প্রাশ্য় মূলফলানি চ ॥ 70 ॥
তস্য়াং রাত্য়্রাং ব্যতীতায়াং বিমলে সূর্যমংডলে ।
ভ্রাতরং তমগস্ত্যস্য় হ্য়ামংত্রযত রাঘবঃ ॥ 71 ॥
অভিবাদয়ে ত্বাং ভগবন্ সুখমধ্য়ুষিতো নিশাম্ ।
আমংত্রয়ে ত্বাং গচ্ছামি গুরুং তে দ্রষ্টুমগ্রজম্ ॥ 72 ॥
গম্যতামিতি তেনোক্তো জগাম রঘুনংদনঃ ।
যথোদ্দিষ্টেন মার্গেণ বনং তচ্চাবলোকযন্ ॥ 73 ॥
নীবারান্পনসাংস্তালাংস্তিমিশান্বংচুলাংধবান্ ।
চিরিবিল্বান্মধূকাংশ্চ বিল্বানপি চ তিংদুকান্ ॥ 74 ॥
পুষ্পিতান্পুষ্পিতাগ্রাভির্লতাভিরনুবেষ্টিতান্ ।
দদর্শ রামশ্শতশস্তত্র কাংতারপাদপান্ ॥ 75 ॥
হস্তিহস্তৈর্বিমৃদিতান্বানরৈরুপশোভিতান্ ।
মত্তৈশ্শকুনিসংঘৈশ্চ শতশশ্চ প্রণাদিতান্ ॥ 76 ॥
ততোঽব্রবীত্সমীপস্থং রামো রাজীবলোচনঃ ।
পৃষ্ঠতোঽনুগতং বীরং লক্ষ্মণং লক্ষ্মিবর্ধনম্ ॥ 77 ॥
স্নিগ্ধপত্রা যথা বৃক্ষা যথা ক্ষাংতা মৃগদ্বিজাঃ ।
আশ্রমো নাতিদূরস্থো মহর্ষের্ভাবিতাত্মনঃ ॥ 78 ॥
অগস্ত্য় ইতি বিখ্য়াতো লোকে স্বেনৈব কর্মণা ।
আশ্রমো দৃশ্যতে তস্য় পরিশ্রাংতশ্রমাপহঃ ॥ 79 ॥
প্রাজ্যধূমাকুলবনশ্চীরমালাপরিষ্কৃতঃ ।
প্রশাংতমৃগয়ূথশ্চ নানাশকুনিনাদিতঃ ॥ 80 ॥
তস্য়েদমাশ্রমপদং প্রভাবাদ্যস্য় রাক্ষসৈঃ ।
দিগিয়ং দক্ষিণা ত্রাসাদ্দৃশ্যতে নোপভুজ্যতে ॥ 81 ॥
যদা প্রভৃতি চাক্রাংতা দিগিয়ং পুণ্যকর্মণা ।
তদা প্রভৃতি নির্বৈরাঃ প্রশাংতা রজনীচরাঃ ॥ 82 ॥
নাম্না চেয়ং ভগবতো দক্ষিণা দিক্প্রদক্ষিণা ।
প্রথিতা ত্রিষু লোকেষু দুর্ধর্ষা ক্রূরকর্মভিঃ ॥ 83 ॥
মার্গং নিরোদ্ধুং নিরতো ভাস্করস্য়াচলোত্তমঃ ।
নিদেশং পালযন্যস্য় বিংধ্যশৈলা ন বর্ধতে ॥ 84 ॥
অয়ং দীর্ঘায়ুষস্তস্য় লোকে বিশ্রুতকর্মণঃ ।
অগস্ত্যস্য়াশ্রম শ্রীমান্বিনীতজনসেবিতঃ ॥ 85 ॥
এষ লোকার্চিতস্সাধুর্হিতে নিত্যরতস্সতাম্ ।
অস্মানভিগতানেষ শ্রেযসা যোজয়িষ্যতি ॥ 86 ॥
আরাধয়িষ্য়াম্যত্রাহমগস্ত্য়ং তং মহামুনিম্ ।
শেষং চ বনবাসস্য় সৌম্য় বত্স্য়াম্যহং প্রভো ॥ 87 ॥
অত্র দেবাস্সগংধর্বাস্সিদ্ধাশ্চ পরমর্ষয়ঃ ।
অগস্ত্য়ং নিযতাহারং সততং পর্য়ুপাসতে ॥ 88 ॥
নাত্র জীবেন্মৃষাবাদী ক্রূরো বা যদি বা শঠঃ ।
নৃশংসঃ কামবৃত্তো বা মুনিরেষ তথাবিধঃ ॥ 89 ॥
অত্র দেবাশ্চ যক্ষাশ্চ নাগাশ্চ পতগৈস্সহ ।
বসংতি নিযতাহারা ধর্মমারাধয়িষ্ণবঃ ॥ 90 ॥
অত্র সিদ্ধা মহাত্মানো বিমানৈজস্সূর্যসন্নিভৈঃ ।
ত্যক্তদেহা নবৈর্দেহৈঃ স্বর্য়াতাঃ পরমর্ষয়ঃ ॥ 91 ॥
যক্ষত্বমমরত্বং চ রাজ্য়ানি বিবিধানি চ ।
অত্র দেবাঃ প্রযচ্ছংতি ভূতৈরারাধিতাশ্শুভৈঃ ॥ 92 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে একাদশস্সর্গঃ ॥
