শ্রীমদ্বাল্মীকীয় রামাযণে অয়োধ্য়াকাংডম্ ।
অথ ত্র্যধিকশততমস্সর্গঃ ।
বসিষ্ঠঃ পুরতঃ কৃত্বা দারাংদশরথস্য় চ ।
অভিচক্রাম তং দেশং রামদর্শনতর্ষিতঃ ॥ 1 ॥
রাজপত্ন্যশ্চ গচ্ছংত্য়ো মংদং মংদাকিনীং প্রতি ।
দদৃশু স্তত্র তত্ তীর্থং রামলক্ষ্মণসেবিতম্ ॥ 2 ॥
কৌসল্য়া বাষ্পপূর্ণেন মুখেন পরিশুষ্যতা ।
সুমিত্রামব্রবীদ্দীনা যাশ্চান্য়া রাজয়োষিতঃ ॥ 3 ॥
ইদং তেষামনাথানাং ক্লিষ্টমক্লিষ্টকর্মণাম্ ।
বনে প্রাক্কলনং তীর্থং যে তে নির্বিষয়ীকৃতাঃ ॥ 4 ॥
ইত স্সুমিত্রে পুত্রস্তে সদা জলমতংদ্রিতঃ ।
স্বয়ং হরতি সৌমিত্রির্মম পুত্রস্য় কারণাত্ ॥ 5 ॥
জঘন্যমপি তে পুত্রঃ কৃতবান্ ন তু গর্হিতঃ ।
ভ্রাতুর্যদর্থরহিতং সর্বং তদ্ গর্হিতংং গুণৈঃ ॥ 6 ॥
অদ্য়াযমপি তে পুত্রঃ ক্লেশানামতথোচিতঃ ।
নীচানর্থ সমাচারং সজ্জং কর্ম প্রমুংচতু ॥ 7 ॥
দক্ষিণাগ্রেষু দর্ভেষু সা দদর্শ মহীতলে ।
পিতুরিংগুদিপিণ্য়াকং ন্যস্তমাযতলোচনা ॥ 8 ॥
তং ভূমৌ পিতুরার্তেন ন্যস্তং রামেণ বীক্ষ্য় সা ।
উবাচ দেবী কৌসল্য়া সর্বা দশরথস্ত্রিয়ঃ ॥ 9 ॥
ইদমিক্ষ্বাকুনাথস্য় রাঘবস্য় মহাত্মনঃ ।
রাঘবেণ পিতুর্দত্তং পশ্যতৈতদ্যথাবিধি ॥ 10 ॥
তস্য় দেবসমানস্য় পার্থিবস্য় মহাত্মনঃ ।
নৈতদৌপয়িকং মন্য়ে ভুক্তভোগস্য় ভোজনম্ ॥ 11 ॥
চতুরংতাং মহীং ভুক্ত্বা মহেংদ্রসদৃশো বিভুঃ ।
কথমিংগুদিপিণ্য়াকং স ভুক্তে বসুধাধিপঃ ॥ 12 ॥
অতো দুঃখতরং লোকে ন কিংচিত্প্রতিভাতি মা ।
যত্র রামঃ পিতুর্দদ্য়াদিংগুদিক্ষোদমৃদ্ধিমান্ ॥ 13 ॥
রামেণেংগুদিপিণ্য়াকং পিতুর্দত্তং সমীক্ষ্য় মে ।
কথং দুঃখেন হৃদয়ং ন স্ফোটতি সহস্রধা ॥ 14 ॥
শ্রুতিস্তু খল্বিয়ং সত্য়া লৌকিকী প্রতিভাতি মা ।
যদন্নঃ পুরুষো ভবতি তদন্নাস্তস্য় দেবতাঃ ॥ 15 ॥
এবমার্তাং সপত্ন্যস্তা জগ্মুরাশ্বাস্য় তাং তদা ।
দদৃশুশ্চাশ্রমে রামং স্বর্গচ্য়ুতমিবামরম্ ॥ 16 ॥
সর্বভোগৈঃ পরিত্যক্তং রামং সংপ্রেক্ষ্য় মাতরঃ ।
আর্তা মুমুচুরশ্রূণি সস্বরং শোককর্শিতাঃ ॥ 17 ॥
তাসাং রামস্সমুত্থায় জগ্রাহ চরণান্ শুভান্ ।
মাত্রূণাং মনুজব্য়াঘ্রস্সর্বাসাং সত্যসংগরঃ ॥ 18 ॥
তাঃ পাণিভি স্সুখস্পর্শৈর্মৃদ্বংগুলিতলৈ শ্শুভৈঃ ।
প্রমমার্জূ রজঃ পৃষ্ঠাদ্রামস্য়াযতলোচনাঃ ॥ 19 ॥
সৌমিত্রিরপি তা স্সর্বা মাতৃস্সংপ্রেক্ষ্য় দুঃখিতঃ ।
অভ্যবাদযতাসক্তং শনৈ রামাদনংতরম্ ॥ 20 ॥
যথা রামে তথা তস্মিন্সর্বা ববৃতিরে স্ত্রিয়ঃ ।
বৃত্তিং দশরথাজ্জাতে লক্ষ্মণে শুভলক্ষণে ॥ 21 ॥
সীতাঽপি চরণাংস্তাসামুপসংগৃহ্য় দুঃখিতা ।
শ্বশ্রূণামশ্রুপূর্ণাক্ষী সা বভূবাগ্রতঃ স্থিতা ॥ 22 ॥
তাং পরিষ্বজ্য় দুঃখার্তাং মাতা দুহিতরং যথা ।
বনবাসকৃশাং দীনাং কৌসল্য়া বাক্যমব্রবীত্ ॥ 23 ॥
বিদেহরাজস্য় সুতা স্নুষা দশরথস্য় চ ।
রামপত্নী কথং দুঃখং সংপ্রাপ্তা নির্জনে বনে ॥ 24 ॥
পদ্মমাতপসংতপ্তং পরিক্লিষ্টমিবোত্পলম্ ।
কাংচনং রজসা ধ্বস্তং ক্লিষ্টং চংদ্রমিবাংবুদৈঃ ॥ 25 ॥
মুখং তে প্রেক্ষ্য় মাং শোকো দহত্যগ্নিরিবাঽশ্রযম্ ।
ভৃশং মনসি বৈদেহি ব্যসনারণিসংভবঃ ॥ 26 ॥
ব্রুবংত্য়ামেবমার্তায়াং জনন্য়াং ভরতাগ্রজঃ ।
পাদাবাসাদ্য় জগ্রাহ বসিষ্ঠস্য় চ রাঘবঃ ॥ 27 ॥
পুরোহিতস্য়াগ্নিসমস্য় বৈ তদা বৃহস্পতেরিংদ্রমিবামরাধিপঃ ।
প্রগৃহ্য় পাদৌ সুসমৃদ্ধতেজসস্সহৈব তেনোপবিবেশ রাঘবঃ ॥ 28 ॥
ততো জঘন্য়ং সহিতৈ স্সমংত্রিভিঃ পুরপ্রধানৈশ্চ সহৈব সৈনিকৈঃ ।
জনেন ধর্মজ্ঞতমেন ধর্মবানুপোপবিষ্টো ভরত স্তদাঽগ্রজম্ ॥ 29 ॥
উপোপবিষ্ট স্তু তদা স বীর্যবাংস্তপস্বিবেষেণ সমীক্ষ্য় রাঘবম্ ।
শ্রিয়া জ্বলংতং ভরতঃ কৃতাংজলির্যথা মহেংদ্রঃ প্রযতঃ প্রজাপতিম্ ॥ 30 ॥
কিমেষ বাক্য়ং ভরতোঽদ্য় রাঘবং প্রণম্য় সত্কৃত্য় চ সাধু বক্ষ্যতি ।
ইতীব তস্য়ার্যজনস্য় তত্ত্বতো বভূব কৌতূহলমুত্তমং তদা ॥ 31 ॥
স রাঘব স্সত্যধৃতি শ্চ লক্ষ্মণো মহানুভাবো ভরত শ্চ ধার্মিকঃ ।
বৃতাঃ সুহৃদ্ভি শ্চ বিরেজুরধ্বরে যথা সদস্য়ৈ স্সহিতাস্ত্রয়োঽগ্নয়ঃ ॥ 32 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে ত্র্যধিকশততমস্সর্গঃ ॥
