শ্রীমদ্বাল্মীকীয় রামাযণে সুংদরকাংডম্ ।
অথ দ্বিচত্বারিংশস্সর্গঃ ।
ততঃ পক্ষিনিনাদেন বৃক্ষভংগস্বনেন চ ।
বভূবুস্ত্রাসসংভ্রাংতাস্সর্বে লংকানিবাসিনঃ ॥ 1 ॥
বিদ্রুতাশ্চ ভযত্রস্তা বিনেদুর্মৃগপক্ষিণঃ ।
রক্ষসাং চ নিমিত্তানি ক্রূরাণি প্রতিপেদিরে ॥ 2 ॥
ততো গতায়াং নিদ্রায়াং রাক্ষস্য়ো বিকৃতাননাঃ ।
তদ্বনং দদৃশুর্ভগ্নং তং চ বীরং মহাকপিম্ ॥ 3 ॥
স তা দৃষ্ট্বা মহাবাহুর্মহাসত্ত্বো মহাবলঃ ।
চকার সুমহদ্রূপং রাক্ষসীনাং ভয়াবহম্ ॥ 4 ॥
ততস্তং গিরিসংকাশমতিকায়ং মহাবলম্ ।
রাক্ষস্য়ো বানরং দৃষ্ট্বা পপ্রচ্ছুর্জনকাত্মজাম্ ॥ 5 ॥
কোঽয়ং কস্য় কুতো বায়ং কিং নিমিত্তমিহাগতঃ ।
কথং ত্বয়া সহানেন সংবাদঃ কৃত ইত্য়ুত ॥ 6 ॥
আচক্ষ্ব নো বিশালাক্ষি মা ভূত্তে সুভগে ভযম্ ।
সংবাদমসিতাপাংগে ত্বয়া কিং কৃতবানযম্ ॥ 7 ॥
অথাব্রবীন্মহাসাধ্বী সীতা সর্বাংগসুংদরী ।
রক্ষসাং ভীমরূপাণাং বিজ্ঞানে মম কা গতিঃ ॥ 8 ॥
যূযমেবাভিজানীত যোঽয়ং যদ্বা করিষ্যতি ।
অহিরেব হ্যহেঃ পাদান্বিজানাতি ন সংশয়ঃ ॥ 9 ॥
অহমপ্যস্য় ভীতাস্মি নৈনং জানামি কো ন্বযম্ ।
বেদ্মি রাক্ষসমেবৈনং কামরূপিণমাগতম্ ॥ 10 ॥
বৈদেহ্য়া বচনং শ্রুত্বা রাক্ষস্য়ো বিদ্রুতা দিশঃ ।
স্থিতাঃ কাশ্চিদ্গতাঃ কাশ্চিদ্রাবণায় নিবেদিতুম্ ॥ 11 ॥
রাবণস্য় সমীপে তু রাক্ষস্য়ো বিকৃতাননাঃ ।
বিরূপং বানরং ভীমমাখ্য়াতুমুপচক্রমুঃ ॥ 12 ॥
অশোকবনিকামধ্য়ে রাজন্ভীমবপুঃ কপিঃ ।
সীতয়া কৃতসংবাদস্তিষ্ঠত্যমিতবিক্রমঃ ॥ 13 ॥
ন চ তং জানকী সীতা হরিং হরিণলোচনা ।
অস্মাভির্বহুধা পৃষ্টা নিবেদয়িতুমিচ্ছতি ॥ 14 ॥
বাসবস্য় ভবেদ্দূতো দূতো বৈশ্রবণস্য় বা ।
প্রেষিতো বাপি রামেণ সীতান্বেষণকাংক্ষয়া ॥ 15 ॥
তেন ত্বদ্ভুতরূপেণ যত্তত্তব মনোহরম্ ।
নানামৃগগণাকীর্ণং প্রমৃষ্টং প্রমদাবনম্ ॥ 16 ॥
ন তত্র কশ্চিদুদ্দেশো যস্তেন ন বিনাশিতঃ ।
যত্র সা জানকী সীতা স তেন ন বিনাশিতঃ ॥ 17 ॥
জানকীরক্ষণার্থং বা শ্রমাদ্বা নোপলভ্যতে ।
অথবা কশ্শ্রমস্তস্য় সৈব তেনাভিরক্ষিতা ॥ 18 ॥
চারুপল্লবপুষ্পাঢ্য়ং যং সীতা স্বযমাস্থিতা ।
প্রবৃদ্ধশ্শিংশুপাবৃক্ষ স্স চ তেনাভিরক্ষিতঃ ॥ 19 ॥
তস্য়োগ্ররূপস্য়োগ্র ত্বং দংডমাজ্ঞাতুমর্হসি ।
সীতা সংভাষিতা যেন তদ্বনং চ বিনাশিতম্ ॥ 20 ॥
মনঃ পরিগৃহীতাং তাং তব রক্ষোগণেশ্বর ।
কস্সীতামভিভাষেত যো ন স্য়াত্ত্যক্তজীবিতঃ ॥ 21 ॥
রাক্ষসীনাং বচশ্ত্রুত্বা রাবণো রাক্ষসেশ্বরঃ ।
হুতাগ্নিরিব জজ্বাল কোপসংবর্তিতেক্ষণঃ ॥ 22 ॥
তস্য় ক্রুদ্ধস্য় নেত্রাভ্য়াং প্রাপতন্নাস্রবিংদবঃ ।
দীপ্তাভ্য়ামিব দীপাভ্য়াং সার্চিষ স্স্নেহবিংদবঃ ॥ 23 ॥
আত্মনস্সদৃশান্শূরান্কিংকরান্নাম রাক্ষসান্ ।
ব্য়াদিদেশ মহাতেজা নিগ্রহার্থং হনূমতঃ ॥ 24 ॥
তেষামশীতিসাহস্রং কিংকরাণাং তরস্বিনাম্ ।
নির্যয়ুর্ভবনাত্তস্মাত্কূটমুদ্গরপাণয়ঃ ॥ 25 ॥
মহোদরা মহাদংষ্ট্রা ঘোররূপা মহাবলাঃ ।
যুদ্ধাভিমনসস্সর্বে হনুমদ্গ্রহণোদ্যতাঃ ॥ 26 ॥
তে কপীংদ্রং সমাসাদ্য় তোরণস্থমবস্থিতম্ ।
অভিপেতুর্মহাবেগাঃ পতংগা ইব পাবকম্ ॥ 27 ॥
তে গদাভির্বিচিত্রাভিঃ পরিঘৈঃ কাংচনাংগদৈঃ ।
আজঘ্নুর্বানরশ্রেষ্ঠং শরৈশ্চাদিত্যসন্নিভৈঃ ॥ 28 ॥
মুদ্গরৈঃ পট্টিশৈশ্শূলৈঃ প্রাসতোমরশক্তিভিঃ ।
পরিবার্য় হনূমংতং সহসা তস্থুরগ্রতঃ ॥ 29 ॥
হনুমানপি তেজস্বী শ্রীমান্পর্বতসন্নিভঃ ।
ক্ষিতাবাবিধ্য় লাংগূলং ননাদ চ মহাস্বনম্ ॥ 30 ॥
স ভূত্বা সুমহাকায়ো হনুমান্মারুতাত্মজঃ ।
ধৃষ্টমাস্ফোটয়ামাস লংকাং শব্দেন পূরযন্ ॥ 31 ॥
তস্য়াস্ফোটিতশব্দেন মহতা সানুনাদিনা ।
পেতুর্বিহংগা গগনাদুচ্চৈশ্চেদমঘোষযত্ ॥ 32 ॥
জযত্যতিবলো রামো লক্ষ্মণশ্চ মহাবলঃ ।
রাজা জযতি সুগ্রীবো রাঘবেণাভিপালিতঃ ॥ 33 ॥
দাসোঽহং কোসলেংদ্রস্য় রামস্য়াক্লিষ্টকর্মণঃ ।
হনুমান্শত্রুসৈন্য়ানাং নিহংতা মারুতাত্মজঃ ॥ 34 ॥
ন রাবণসহস্রং মে যুদ্ধে প্রতিবলং ভবেত্ ।
শিলাভিস্তু প্রহরতঃ পাদপৈশ্চ সহস্রশঃ ॥ 35 ॥
অর্দয়িত্বা পুরীং লংকামভিবাদ্য় চ মৈথিলীম্ ।
সমৃদ্ধার্থো গমিষ্য়ামি মিষতাং সর্বরক্ষসাম্ ॥ 36 ॥
তস্য় সন্নাদশব্দেন তেঽভবন্ভযশংকিতাঃ ।
দদৃশুশ্চ হনূমংতং সংধ্য়ামেঘমিবোন্নতম্ ॥ 37 ॥
স্বামিসংদেশনিশ্শংকাস্ততস্তে রাক্ষসাঃ কপিম্ ।
চিত্রৈঃ প্রহরণৈর্ভীমৈরভিপেতুস্ততস্ততঃ ॥ 38 ॥
স তৈঃ পরিবৃতশ্শূরৈস্সর্বতস্সুমহাবলঃ ।
আসসাদাঽযসং ভীমং পরিঘং তোরণাশ্রিতম্ ॥ 39 ॥
স তং পরিঘমাদায় জঘান রজনীচরান্ ।
স পন্নগমিবাদায় স্ফুরংতং বিনতাসুতঃ ॥ 40 ॥
বিচচারাংবরে বীরঃ পরিগৃহ্য় চ মারুতিঃ ।
স হত্বা রাক্ষসান্বীরান্কিংকরান্মারুতাত্মজঃ ॥ 41 ॥
যুদ্ধাকাংক্ষী পুনর্বীরস্তোরণং সমুপাশ্রিতঃ ।
ততস্তস্মাদ্ভয়ান্মুক্তাঃ কতিচিত্তত্র রাক্ষসাঃ ॥ 42 ॥
নিহতান্কিংকরান্সর্বান্রাবণাযন্যবেদযন্ ।
স রাক্ষসানাং নিহতং মহদ্বলং নিশম্য় রাজা পরিবৃত্তলোচনঃ ।
সমাদিদেশাপ্রতিমং পরাক্রমে প্রহস্তপুত্রং সমরে সুদুর্জযম্ ॥ 43 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে দ্বিচত্বারিংশস্সর্গঃ ॥
