শ্রীমদ্বাল্মীকীয় রামাযণে অরণ্যকাংডম্ ।
অথ ষষ্টিতমস্সর্গঃ ।
ভৃশমাব্রজমানস্য় তস্য়াধো বামলোচনম্ ।
প্রাস্ফুরচ্চাস্খলদ্রামো বেপথুশ্চাপ্য় জাযত ॥ 1 ॥
উপালক্ষ্য় নিমিত্তানি সোঽশুভানি মুহুর্মুহুঃ ।
অপি ক্ষেমং নু সীতায়া ইতি বৈ ব্য়াজহার চ ॥ 2 ॥
ত্বরমাণো জগামাথ সীতাদর্শনলালসঃ ।
শূন্যমাবসথং দৃষ্ট্বা বভূবোদ্বিগ্নমানসঃ ॥ 3 ॥
উদ্ভ্রমন্নিব বেগেন বিক্ষিপন্রঘুনংদনঃ ।
তত্র তত্রোটজস্থানমভিবীক্ষয় সমংততঃ ॥ 4 ॥
দদর্শ পর্ণশালাং চ রহিতাং সীতয়া তদা ।
শ্রিয়া বিরহিতাং ধ্বস্তাং হেমংতে পদ্মিনীমিব ॥ 5 ॥
রুদংতমিব বৃক্ষৈশ্চ ম্লানপুষ্পমৃগদ্বিজম্ ।
শ্রিয়া বিহীনং বিধ্বস্তং সংত্যক্তবনদেবতম্ ॥ 6 ॥
বিপ্রকীর্ণাজিনকুশং বিপ্রবিদ্ধব্রুসীকটম্ ।
দৃষ্ট্বা শূন্য়ং নিজস্থানং বিললাপ পুনঃ পুনঃ ॥ 7 ॥
হৃতা মৃতা বা নষ্টা বা ভক্ষিতা বা ভবিষ্যতি ।
নিলীনাপ্যথবা ভীরুরথবা বনমাশ্রিতা ॥ 8 ॥
গতা বিচেতুং পুষ্পাণি ফলান্যপি চ বা পুনঃ ।
অথবা পদ্মিনীং যাতা জলার্থং বা নদীং গতা ॥ 9 ॥
যত্নান্মৃগযমাণস্তু নাসসাদ বনে প্রিয়াম্ ।
শোকরক্তেক্ষণশ্শোকাদুন্মত্ত ইব লক্ষ্যতে ॥ 10 ॥
বৃক্ষাদ্বৃক্ষং প্রধাবন্সগিরেশ্চাদ্রিং নদান্নদীম্ ।
বভূব বিলপন্রামশ্শোকার্ণবপরিপ্লুতঃ ॥ 11 ॥
অপি কাচিত্ত্বয়া দৃষ্টা সা কদংবপ্রিয়া প্রিয়া ।
কদংব যদি জানীষে শংস সীতাং শুভাননাম্ ॥ 12 ॥
স্নিগ্ধপল্লবসংকাশা পীতকৌশেযবাসিনী ।
শংসস্ব যদি বা দৃষ্টা বিল্ব বিল্বোপমস্তনী ॥ 13 ॥
অথবাঽর্জুন শংস ত্বং প্রিয়াং তামর্জুনপ্রিয়াম্ ।
জনকস্য় সুতা ভীরুর্যদি জীবতি বা ন বা ॥ 14 ॥
ককুভঃ ককুভোরূং তাং ব্যক্তং জানাতি মৈথিলীম্ ।
যথা পল্লবপুষ্পাঢ্য়ো ভাতি হ্য়েষ বনস্পতিঃ ॥ 15 ॥
ভ্রমরৈরুপগীতশ্চ যথা দ্রুমবরো হ্যযম্ ।
এষ ব্যক্তং বিজানাতি তিলকস্তিলকপ্রিয়াম্ ॥ 16 ॥
অশোক শোকাপনুদ শোকোপহতচেতসম্ ।
ত্বন্নামানং কুরু ক্ষিপ্রং প্রিয়াসংদর্শনেন মাম্ ॥ 17 ॥
যদি তাল ত্বয়া দৃষ্টা পক্বতালফলস্তনী ।
কথযস্ব বরারোহাং কারুণ্য়ং যদি তে ময়ি ॥ 18 ॥
যদি দৃষ্টা ত্বয়া সীতা জংবু জংবূফলোপমা ।
প্রিয়াং যদি বিজানীষে নিঃশংকং কথযস্ব মে ॥ 19 ॥
অহো ত্বং কর্ণিকারাদ্য় সুপুষ্পৈশ্শোভসে ভৃশম্ ।
কর্ণিকারপ্রিয়া সাধ্বী শংস দৃষ্টা প্রিয়া যদি ॥ 20 ॥
চূতনীপমহাসালান্পনসান্কুরবাংধবান্ ।
দাডিমাননসান্গত্বা দৃষ্ট্বা রামো মহাযশাঃ ॥ 21 ॥
মল্লিকা মাধবীশ্চৈব চংপকান্কেতকীস্তথা ।
পৃচ্ছন্রামো বনে ভাংতঃ উন্মত্ত ইব লক্ষ্যতে ॥ 22 ॥
অথবা মৃগশাবাক্ষীং মৃগ জানাসি মৈথিলীম্ ।
মৃগবিপ্রেক্ষণী কাংতা মৃগীভিস্সহিতা ভবেত্ ॥ 23 ॥
গজ সা গজনাসোরূর্যদি দৃষ্টা ত্বয়া ভবেত্ ।
তাং মন্য়ে বিদিতাং তুভ্যমাখ্য়াহি বরবারণ ॥ 24 ॥
শার্দূল যদি সা দৃষ্টা প্রিয়া চংদ্রনিভাননা ।
মৈথিলী মম বিস্রব্ধং কথযস্ব ন তে ভযম্ ॥ 25 ॥
কিং ধাবসি প্রিয়ে দূরে দৃষ্টাসি কমলেক্ষণে ।
বৃক্ষৈরাচ্ছাদ্য় চাত্মানং কিং মাং ন প্রতিভাষসে ॥ 26 ॥
তিষ্ঠ তিষ্ঠ বরারোহে ন তেঽস্তি করুণা ময়ি ।
নাত্যর্থং হাস্যশীলাসি কিমর্থং মামুপেক্ষসে ॥ 27 ॥
পীতকৌশেযকেনাসি সূচিতা বরবর্ণিনি ।
ধাবংত্যপি ময়া দৃষ্টা তিষ্ঠ যদ্যস্তি সৌহৃদম্ ॥ 28 ॥
নৈব সা নূনমথবা হিংসিতা চারুহাসিনী ।
কৃচ্ছ্রপ্রাপ্তং ন মাং নূনং যথোপেক্ষিতুমর্হতি ॥ 29 ॥
ব্যক্তং সা ভক্ষিতা বালা রাক্ষসৈঃ পিশিতাশনৈঃ ।
বিভজ্য়াংকানি সর্বাণি ময়া বিরহিতা প্রিয়া ॥ 30 ॥
নূনং তচ্ছুভদংতোষ্ঠং সুনাসং চারুকুংডলম্ ।
পূর্ণচংদ্রনিভং গ্রস্তং মুখংনিষ্প্রভতাং গতম্ ॥ 31 ॥
সা হি চংপকবর্ণাভা গ্রীবা গ্রৈবেযশোভিতা ।
কোমলা বিলপংত্য়াস্তু কাংতায়া ভক্ষিতা শুভা ॥ 32 ॥
নূনং বিক্ষিপ্যমাণৌ তৌ বাহূ পল্লবকোমলৌ ।
ভক্ষিতৌ বেপমানাগ্রৌ সহস্তাভরণাংগদৌ ॥ 33 ॥
ময়া বিরহিতা বালা রক্ষসাং ভক্ষণায় বৈ ।
সার্ধেনেব পরিত্যক্তা ভক্ষিতা বহুবাংধবা ॥ 34 ॥
হা লক্ষ্মণ মহাবাহো পশ্যসি ত্বং প্রিয়াং ক্বচিত্ ।
হা প্রিয়ে ক্ব গতা ভদ্রে হা সীতেতি পুনঃ পুনঃ ॥ 35 ॥
ইত্য়েবং বিলপন্রামঃ পরিধাবন্বনাদ্বনম্ ।
ক্বচিদুদ্ভ্রমতে বেগাত্ক্বচিদ্বিভ্রমতে বলাত্ ॥ 36 ॥
ক্বচিন্মত্ত ইবাভাতি কাংতান্বেষণতত্পরঃ ।
স বনানি নদীশ্শৈলান্ গিরিপ্রস্রবণানি চ ॥ 37 ॥
কাননানি চ বেগেন ভ্রমত্যপরিসংস্থিতঃ ।
তথা স গত্বা বিপুলং মহদ্বনং পরীত্য় সর্বং ত্বথ মৈথিলীং প্রতি ।
অনিষ্ঠিতাশস্সচকার মার্গণে পুনঃ প্রিয়ায়াঃ পরমং পরিশ্রমম্ ॥ 38 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে ষষ্টিতমস্সর্গঃ ॥
