শ্রীমদ্বাল্মীকীয় রামাযণে অয়োধ্য়াকাংডম্ ।
অথ অষ্টাবিংশস্সর্গঃ ।
স এবং ব্রুবতীং সীতাং ধর্মজ্ঞো ধর্মবত্সলঃ ।
ন নেতুং কুরুতে বুদ্ধিং বনে দুঃখানি চিংতযন্ ॥ 1 ॥
সাংত্বয়িত্বা পুনস্তাং তু বাষ্পদূষিতলোচনাম্ ।
নিবর্তনার্থে ধর্মাত্মা বাক্যমেতদুবাচ হ ॥ 2 ॥
সীতে মহাকুলীনাঽসি ধর্মে চ নিরতা সদা ।
ইহাঽচর স্বধর্মং ত্বং মে যথা মনসস্সুখম্ ॥ 3 ॥
সীতে যথা ত্বাং বক্ষ্য়ামি তথা কার্য়ং ত্বয়াঽবলে ।
বনে হি বহবো দোষা বদতস্তান্নিবোধ মে ॥ 4 ॥
সীতে বিমুচ্যতামেষা বনবাসকৃতা মতিঃ ।
বহুদোষং হি কাংতারং বনমিত্যভিধীযতে ॥ 5 ॥
হিতবুদ্ধ্য়া খলু বচো ময়ৈতদভিধীযতে ।
সদা সুখং ন জানামি দুঃখমেব সদা বনম্ ॥ 6 ॥
গিরিনির্ঝরসংভূতা গিরিকংদর বাসিনাম্ ।
সিংহানাং নিনদা দুঃখা শ্শ্রোতুং দুঃখমতো বনম্ ॥ 7 ॥
ক্রীডমানাশ্চ বিস্রব্ধা মত্তা শ্শূন্য়ে মহামৃগাঃ ।
দৃষ্ট্বা সমভিবর্তংতে সীতে দুঃখমতো বনম্ ॥ 8 ॥
সগ্রাহা স্সরিতশ্চৈব পংকবত্যস্সু দুস্তরাঃ ।
মত্তৈরপি গজৈর্নিত্যমতো দুঃখতরং বনম্ ॥ 9 ॥
লতাকংটকসংকীর্ণাঃ কৃকবাকূপনাদিতাঃ ।
নিরপাশ্চ সুদুর্গাশ্চ মার্গা দুঃখমতো বনম্ ॥ 10 ॥
সুপ্যতে পর্ণশয়্য়াসু স্বয়ং ভগ্নাসু ভূতলে ।
রাত্রিষু শ্রমখিন্নেন তস্মাদ্দুঃখতরং বনম্ ॥ 11 ॥
অহোরাত্রং চ সংতোষঃ কর্তব্য়ো নিযতাত্মনা ।
ফলৈর্বৃক্ষাবপতিতৈ স্সীতে দুঃখমতো বনম্ ॥ 12 ॥
উপবাসশ্চ কর্তব্য়ো যথা প্রাণেন মৈথিলি ।
জটাভারশ্চ কর্তব্য়ো বল্কলাংবরধারিণা ॥ 13 ॥
দেবতানাং পিত্রূণাং কর্তব্য়ং বিধিপূর্বকম্ ।
প্রাপ্তানামতিথীনাং চ নিত্যশঃ প্রতিপূজনম্ ॥ 14 ॥
কার্যস্ত্রিরভিষেকশ্চ কালে কালে চ নিত্যশঃ ।
চরতা নিযমেনৈব তস্মাদ্ধুঃখতরং বনম্ ॥ 15 ॥
উপহারশ্চ কর্তব্য়ঃ কুসুমৈ স্স্বযমাহৃতৈঃ ।
আর্ষেণ বিধিনা বেদ্য়াং বালে দুঃখমতো বনম্ ॥ 16 ॥
যথালব্ধেন কর্তব্য়ঃ সংতোষস্তেন মৈথিলি ।
যতাহারৈর্বনচরৈ র্নিত্য়ং দুঃখমতো বনম্ ॥ 17 ॥
অতীব বাতাস্তিমিরং বুভুক্ষা চাত্র নিত্যশঃ ।
ভয়ানি চ মহাংত্যত্র ততো দুঃখতরং বনম্ ॥ 18 ॥
সরীসৃপাশ্চ বহবো বহুরূপাশ্চ ভামিনি ।
চরংতি পৃথিবীং দর্পাত্ততো দুঃখতরং বনম্ ॥ 19 ॥
নদী নিলযনা স্সর্পা নদীকুটিলগামিনঃ ।
তিষঠংত্য়াবৃত্য় পংথানং ততো দুঃখতরং বনম্ ॥ 20 ॥
পতংগা বৃশ্চিকাঃ কীটা দংশাশ্চ মশকৈ স্সহ ।
বাধংতে নিত্যমবলে সর্বং দুঃখমতো বনম্ ॥ 21 ॥
দ্রুমাঃ কংটকিনশ্চৈব কুশাঃ কাশাশ্চ ভামিনি ।
বনে ব্য়াকুলশাখাগ্রাস্তেন দুঃখতরং বনম্ ॥ 22 ॥
কাযক্লেশাশ্চ বহবো ভয়ানি বিবিধানি চ ।
অরণ্যবাসে বসতো দুঃখমেব ততো বনম্ ॥ 23 ॥
ক্রোধলোভৌ বিমোক্তব্য়ৌ কর্তব্য়া তপসে মতিঃ ।
ন ভেতব্য়ং চ ভেতব্য়ে নিত্য়ং দুঃখমতো বনম্ ॥ 24 ॥
তদলং তে বনং গত্বা ক্ষমং ন হি বনং তব ।
বিমৃশন্নিহ পশ্য়ামি বহুদোষতরং বনম্ ॥ 25 ॥
বনংতু নেতুং ন কৃতা মতিস্তদা বভূব রামেণ যদা মহাত্মনা ।
ন তস্য় সীতা বচনং চকার ত ত্ততোঽব্রবীদ্রামমিদং সুদুঃখিতা ॥ 26 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে অষ্টাবিংশস্সর্গঃ ॥
