শ্রীমদ্বাল্মীকীয় রামাযণে অরণ্যকাংডম্ ।
অথ ষট্চত্বারিংশস্সর্গঃ ।
তয়া পরুষমুক্তস্তু কুপিতো রাঘবানুজঃ ।
স বিকাংক্ষন্ভৃশং রামং প্রতস্থে নচিরাদিব ॥ 1 ॥
তদাসাদ্য় দশগ্রীবঃ ক্ষিপ্রমংতরমাস্থিতঃ ।
অভিচক্রাম বৈদেহীং পরিব্রাজকরূপধৃক্ ॥ 2 ॥
শ্লক্ষ্ণকাষাযসংবীতশ্শিখী ছত্রী উপানহী ।
বামে চাংসেঽবসজ্য়াথ শুভে যষ্টিকমংডলূ ॥ 3 ॥
পরিব্রাজকরূপেণ বৈদেহীমন্বপদ্যত ।
তামাসসাদাতিবলো ভ্রাতৃভ্য়াং রহিতাং বনে ॥ 4 ॥
রহিতাং চংদ্রসূর্য়াভ্য়াং সংধ্য়ামিব মহত্তমঃ ।
তামপশ্যত্ততো বালাং রামপত্নীং যশস্বিনীম্ ॥ 5 ॥
রোহিণীং শশিনা হীনাং গ্রহবদ্ভৃশদারুণঃ ।
তমুগ্রতেজঃকর্মাণং জনস্থানরূহা দ্রুমাঃ ॥ 6 ॥
সমীক্ষ্য় সংপ্রকংপংতে ন প্রবাতি চ মারুতঃ ।
শীঘ্রস্রোতাশ্চ তং দৃষ্ট্বা বীক্ষংতং রক্তলোচনম্ ॥ 7 ॥
স্তিমিতং গংতুমারেভে ভয়াদ্গোদাবরী নদী ।
রামস্য় ত্বংতরপ্রেপ্সুর্দশগ্রীবস্তদংতরে ॥ 8 ॥
উপতস্থে চ বৈ দেহীং ভিক্ষুরূপেণ রাবণঃ ।
অভব্য়ো ভব্যরূপেণ ভর্তারমনুশোচতীম্ ॥ 9 ॥
অভ্যবর্তত বৈদেহীং চিত্রামিব শনৈশ্চরঃ ।
স পাপো ভব্যরূপেণ তৃণৈঃ কূপ ইবাবৃতঃ ॥ 10 ॥
অতিষ্ঠত্প্রেক্ষ্য় বৈদেহীং রামপত্নিং যশস্বিনীম্ ।
শুভাং রুচিরদংতোষ্ঠীং পূর্ণচংদ্রনিভাননাম্ ॥ 11 ॥
আসীনাং পর্ণশালায়াং বাষ্পশোকাভিপীডিতাম্ ।
স তাং পদ্মপলাশাক্ষীং পীতকৌশেযবাসিনীম্ ॥ 12 ॥
অভ্যগচ্ছত বৈদেহীং দুষ্টচেতা নিশাচরঃ ।
স মন্মথশরাবিষ্টো ব্রহ্মঘোষমুদীরযন্ ॥ 13 ॥
অব্রবীত্প্রশ্রিতং বাক্য়ং রহিতে রাক্ষসাধিপঃ ।
তামুত্তমাং স্ত্রিয়ং লোকে পদ্মহীনামিব শ্রিযম্ ॥ 14 ॥
বিভ্রাজমানাং বপুষা রাবণঃ প্রশশংস হ ।
কা ত্বং কাংচনবর্ণাভে পীতকৌশেযবাসিনি ॥ 15 ॥
কমলানাং শুভাং মালাং পদ্মিনীব হি বিভ্রতী ।
হ্রীঃ কীর্তিঃ শ্রীশ্শুভা লক্ষ্মীরপ্সরা বা শুভাননে ॥ 16 ॥
ভূতির্বা ত্বং বরারোহে রতির্বা স্বৈরচারিণী ।
সমাশ্শিখরিণস্স্নিগ্ধাঃ পাংডুরা দশনাস্তব ॥ 17 ॥
বিশালে বিমলে নেত্রে রক্তাংতে কৃষ্ণতারকে ।
বিশালং জঘনং পীনমূরূ করিকরোপমৌ ॥ 18 ॥
এতাবুপচিতৌ বৃত্তৌ সংহতৌ সংপ্রবল্গিতৌ ।
পীনোন্নতমুখৌ কাংতৌ স্নিগ্ধৌ তালফলোপমৌ ॥ 19 ॥
মণিপ্রবেকাভরণৌ রুচিরৌ তে পয়োধরৌ ।
চারুস্মিতে চারুদতি চারুনেত্রে বিলাসিনি ॥ 20 ॥
মনো হরসি মে কাংতে নদী কূলমিবাংভসা ।
করাংতমিতমধ্য়াসি সুকেশী সংহতস্তনী ॥ 21 ॥
নৈব দেবী ন গংধর্বী ন যক্ষী ন চ কিন্নরী ।
নৈবংরূপা ময়া নারী দৃষ্টপূর্বা মহীতলে ॥ 22 ॥
রূপমগ্র্য়ং চ লোকেষু সৌকুমার্য়ং বযশ্চতে ।
ইহ বাসশ্চ কাংতারে চিত্তমুন্মাদয়ংতি মে ॥ 23 ॥
সা প্রতিক্রাম ভদ্রং তে নৈবং বস্তুমিহার্হসি ।
রাক্ষসানাময়ং বাসো ঘোরাণাং কামরূপিণাম্ ॥ 24 ॥
প্রাসাদাগ্রাণি রম্য়াণি নগরোপবনানি চ ।
সংপন্নানি সুগংধীনি যুক্তান্য়াচরিতুং ত্বয়া ॥ 25 ॥
বরং মাল্য়ং বরং ভোজ্য়ং বরং বস্ত্রং চ শোভনে ।
ভর্তারং চ বরং মন্য়ে ত্বদ্য়ুক্তমসিতেক্ষণে ॥ 26 ॥
কা ত্বং ভবসি রুদ্রাণাং মরুতাং বা বরাননে ।
বসূনাং বা বরাবোহে দেবতা প্রতিভাসি মে ॥ 27 ॥
নেহ গচ্ছংতি গংধর্বা ন দেবা ন চ কিন্নরাঃ ।
রাক্ষসানাময়ং বাসঃ কথং নু ত্বমিহাগতা ॥ 28 ॥
ইহ শাখামৃগাস্সিংহা দ্বীপিব্য়াঘ্রমৃগাস্তথা ।
ঋক্ষাস্তরক্ষবঃ কংকাঃ কথং তেভ্য়ো ন বিভ্যসি ॥ 29 ॥
মদান্বিতানাং ঘোরাণাং কুংজরাণাং তরস্বিনাম্ ।
কথমেকা মহারণ্য়ে ন বিভেষি বরাননে ॥ 30 ॥
কাসি কস্য় কুতশ্চিত্ত্বং কিং নিমিত্তং চ দংডকান্ ।
একা চরসি কল্য়াণি ঘোরান্রাক্ষসসেবিতান্ ॥ 31 ॥
ইতি প্রশস্তা বৈদেহী রাবণেন দুরাত্মনা ।
দ্বিজাতিবেশেণ হি তং দৃষ্ট্বা রাবণমাগতম্ ॥ 32 ॥
সর্বৈরতিথিসত্কারৈঃ পূজয়ামাস মৈথিলী ।
উপনীয়াসনং পূর্বং পাদ্য়েনাভিনিমংত্র্য় চ ॥ 33 ॥
অব্রবীত্সিদ্ধমিত্য়েব তদা তং সৌম্যদর্শনম্ ।
দ্বিজাতিবেষেণ সমীক্ষ্য় মৈথিলী সমাগতং পাত্রকুসুংভধারিণম্ ।
অশক্যমুদ্বেষ্টুমপাযদর্শনং ন্যমংত্রযদ্ব্রাহ্মণবত্তদাংগনা ॥ 34 ॥
ইয়ং বৃসী ব্রাহ্মণ কামমাস্যতামিদং চ পাদ্য়ং প্রতিগৃহ্যতামিতি ।
ইদং চ সিদ্ধং বনজাতমুত্তমং ত্বদর্থমব্যগ্রমিহোপভুজ্যতাম্ ॥ 35 ॥
নিমংত্র্যমাণঃ প্রতিপূর্ণভাষিণীং নরেংদ্রপত্নীং প্রসমীক্ষ্য় মৈথিলীম্ ।
প্রসহ্য় তস্য়াহরণে ধৃতং মনঃ সমর্পযত্স্বাত্মবধায় রাবণঃ ॥ 36 ॥
ততঃ সুবেষং মৃগয়াগতং পতিং প্রতীক্ষমাণা সহলক্ষ্মণং তদা ।
বিবীক্ষমাণা হরিতং দদর্শ তন্মহদ্বনং নৈব তু রামলক্ষ্ণৌ ॥ 37 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে ষট্চত্বারিংশস্সর্গঃ ॥
