শ্রীমদ্বাল্মীকীয় রামাযণে অয়োধ্য়াকাংডম্ ।
অথ সপ্তচত্বারিংশস্সর্গঃ ।
প্রভাতায়াং তু শর্বর্য়াং পৌরাস্তে রাঘবং বিনা ।
শোকোপহতনিশ্চেষ্টা বভূবুর্হতচেতসঃ ॥ 1 ॥
শোকজাশ্রুপরিদ্য়ূনা বীক্ষমাণাস্ততস্ততঃ ।
আলোকমপি রামস্য় ন পশ্য়ংতি স্ম দুঃখিতাঃ ॥ 2 ॥
তে বিষাদার্তবদনা রহিতাস্তেন ধীমতা ।
কৃপণাঃ করুণা বাচো বদংতি স্ম মনস্বিনঃ ॥ 3 ॥
ধিগস্তু খলু নিদ্রাং তাং যয়াঽপহৃতচেতসঃ ।
নাদ্য় পশ্য়ামহে রামং পৃথূরস্কং মহাভুজম্ ॥ 4 ॥
কথং নাম মহাবাহু স্স তথাবিতথক্রিয়ঃ ।
ভক্তং জনং পরিত্যজ্য় প্রবাসং রাঘবো গতঃ ॥ 5 ॥
যো নঃ সদা পালযতি পিতা পুত্রানিবৌরসান্ ।
কথং রঘূণাং স শ্রেষ্ঠস্ত্যক্ত্বা নো বিপিনং গতঃ ॥ 6 ॥
ইহৈব নিধনং যামো মহাপ্রস্থানমেব বা ।
রামেণ রহিতানাং হি কিমর্থং জীবিতং হি নঃ ॥ 7 ॥
সংতি শুষ্কাণি কাষ্ঠানি প্রভূতানি মহাংতি চ ।
তৈঃ প্রজ্বাল্য় চিতাং সর্বে প্রবিশামোঽথ পাবকম্ ॥ 8 ॥
কিং বক্ষ্য়ামো মহাবাহুরনসূয়ঃ প্রিয়ংবদঃ ।
নীত স্স রাঘবোঽস্মাভিরিতি বক্তুং কথং ক্ষমম্ ॥ 9 ॥
সা নূনং নগরী দীনা দৃষ্ট্বাঽস্মান্ রাঘবং বিনা ।
ভবিষ্যতি নিরানংদা সস্ত্রীবালবয়োধিকা ॥ 10 ॥
নির্য়াতাস্তেন বীরেণ সহ নিত্য়ং জিতাত্মনা ।
বিহীনাস্তেন চ পুনঃ কথং পশ্য়াম তাং পুরীম্ ॥ 11 ॥
ইতীব বহুধা বাচো বাহুমুদ্যম্য় তে জনাঃ ।
বিলপংতি স্ম দুঃখার্তা বিবত্সা ইব ধেনবঃ ॥ 12 ॥
ততো মার্গানুসারেণ গত্বা কিংচিত্ ক্ষণং পুনঃ ।
মার্গনাশাদ্বিষাদেন মহতা সমভিপ্লুতাঃ ॥ 13 ॥
রথস্য় মার্গনাশেন ন্যবর্তংত মনস্বিনঃ ।
কিমিদং কিং করিষ্য়ামো দৈবেনোপহতা ইতি ॥ 14 ॥
ততো যথাগতেনৈব মার্গেণ ক্লাংতচেতসঃ ।
অয়োধ্য়ামাগমন্সর্বে পুরীং ব্যথিতসজ্জনাম্ ॥ 15 ॥
আলোক্য় নগরীং তাং চ ক্ষযব্য়াকুলমানসাঃ ।
আবর্তয়ংত তেঽশ্রূণি নযনৈঃ শোকপীডিতৈঃ ॥ 16 ॥
এষা রামেণ নগরী রহিতা নাতিশোভতে ।
আপগা গরুডেনেব হ্রদাদুদ্ধৃতপন্নগা ॥ 17 ॥
চংদ্রহীনমিবাকাশং তোযহীনমিবার্ণবম্ ।
অপশ্যন্নিহতানংদং নগরং তে বিচেতসঃ ॥ 18 ॥
তে তানি বেশ্মানি মহাধনানি দুঃখেন দুঃখোপহতা বিশংতঃ ।
নৈব প্রজজ্ঞুঃ স্বজনং জনং বা নিরীক্ষমাণাঃ প্রবিনষ্টহর্ষাঃ ॥ 19 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে সপ্তচত্বারিংশস্সর্গঃ ॥
