শ্রীমদ্বাল্মীকীয় রামাযণে অয়োধ্য়াকাংডম্ ।
অথ একোনবিংশত্যধিকশততমস্সর্গঃ ।
অনসূয়া তু ধর্মজ্ঞা শ্রুত্বা তাং মহতীং কথাম্ ।
পর্যষ্বজত বাহুভ্য়াং শিরস্য়াঘ্রায় মৈথিলীম্ ॥ 1 ॥
ব্যক্তাক্ষরপদং চিত্রং ভাষিতং মধুরং ত্বয়া ।
যথা স্বয়ংবরং বৃত্তং তত্সর্বং হি শ্রুতং ময়া ॥ 2 ॥
রমেঽহং কথয়া তে তু দৃঢং মধুরভাষিণি ।
রবিরস্তংগতশ্শ্রীমানুপোহ্য় রজনীং শিবাম্ ॥ 3 ॥
দিবসং প্রতিকীর্ণানামাহারার্থং পতত্রিণাম্ ।
সংধ্য়াকালে নিলীনানাং নিদ্রার্থং শ্রূযতে ধ্বনিঃ ॥ 4 ॥
এতে চাপ্যভিষেকার্দ্রা মুনয়ঃ কলশোদ্যতাঃ ।
সহিতা উপবর্তংতে সলিলাপ্লুতবল্কলাঃ ॥ 5 ॥
ঋষীণামগ্নিহোত্রেষু হুতেষু বিধিপূর্বকম্ ।
কপোতাংগারুণো ধূমো দৃশ্যতে পবনোদ্ধতঃ ॥ 6 ॥
অল্পপর্ণা হি তরবো ঘনীভূতাস্সমংততঃ ।
বিপ্রকৃষ্টেংদ্রিয়ে দেশেঽস্মিন্ন প্রকাশংতি বৈ দিশঃ ॥ 7 ॥
রজনীচরসত্ত্বানি প্রচরংতি সমংততঃ ।
তপোবনমৃগা হ্য়েতে বেদিতীর্থেষু শেরতে ॥ 8 ॥
সংপ্রবৃত্তানিশা সীতে নক্ষত্রসমলংকৃতা ।
জ্য়োত্স্নাপ্রাবরণশ্চংদ্রো দৃশ্যতেঽভ্য়ুদিতোঽংবরে ॥ 9 ॥
গম্যতামনুজানামি রামস্য়ানুচরী ভব ।
কথায়ংত্য়া হি মধুরং ত্বয়াঽহং পরিতোষিতা ॥ 10 ॥
অলংকুরু চ তাবত্ত্বং প্রত্যক্ষং মম মৈথিলি ।
প্রীতিং জনয় মে বত্সে দিব্য়ালংকারশোভিতা ॥ 11 ॥
সা তথা সমলংকৃত্য় সীতা সুরসুতোপমা ।
প্রণম্য় শিরসা তস্য়ৈ রামং ত্বভিমুখী যয়ৌ ॥ 12 ॥
তথা তু ভূষিতাং সীতাং দদর্শ বদতাং বরঃ ।
রাঘবঃ প্রীতিদানেন তপস্বিন্য়া জহর্ষ চ ॥ 13 ॥
ন্যবেদযত্ততস্সর্বং সীতা রামায় মৈথিলী ।
প্রীতিদানং তপস্বিন্য়া বসনাভরণস্রজম্ ॥ 14 ॥
প্রহৃষ্টস্ত্বভবদ্রামো লক্ষ্মণশ্চ মহারথঃ ।
মৈথিল্য়াস্সত্ক্রিয়াং দৃষ্ট্বা মানুষেষু সুদুর্লভাম্ ॥ 15 ॥
ততস্তাং শর্বরীং প্রীতঃ পুণ্য়াং শশিনিভাননঃ ।
অর্চিতস্তাপসৈ স্সিদ্ধৈরুবাস রঘুনংদনঃ ॥ 16 ॥
তস্য়াং রাত্র্য়াং ব্যতীতায়ামভিষিচ্য় হুতাগ্নিকান্ ।
আপৃচ্ছেতাং নরব্য়াঘ্রৌ তাপসান্বনগোচরান্ ॥ 17 ॥
তাবূচুস্তে বনচরাস্তাপসা ধর্মচারিণঃ ।
বনস্য় তস্য় সংচারং রাক্ষসৈস্সমভিপ্লুতম্ ॥ 18 ॥
রক্ষাংসি পুরুষাদানি নানারূপাণি রাঘব ।
বসংত্যস্মিন্মহারণ্য়ে ব্য়ালাশ্চ রুধিরাশনাঃ ॥ 19 ॥
উচ্ছিষ্টং বা প্রমত্তং বা তাপসং ধর্মচারিণম্ ।
অদংত্যস্মিন্মহারণ্য়ে তান্নিবারয় রাঘব ॥ 20 ॥
এষ পংথা মহর্ষীণাং ফলান্য়াহরতাং বনে ।
অনেন তু বনং দুর্গং গংতুং রাঘব তে ক্ষমম্ ॥ 21 ॥
ইতীব তৈঃ প্রাংজলিভিস্তপস্বিভির্দ্বিজৈঃ কৃতস্বস্ত্যযনঃ পরংতপঃ ।
বনং সভার্য়ঃ প্রবিবেশ রাঘবস্সলক্ষ্মণস্সূর্য় ইবাভ্রমংডলম্ ॥ 22 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে একোনবিংশত্যধিকশততমস্সর্গঃ ॥
