শ্রীমদ্বাল্মীকীয় রামাযণে সুংদরকাংডম্ ।
অথ তৃতীযস্সর্গঃ ।
স লংবশিখরে লংবে লংবতোযদসন্নিভে ।
সত্ত্বমাস্থায় মেধাবী হনুমান্ মারুতাত্মজঃ ॥ 1 ॥
নিশি লংকাং মহাসত্ত্বো বিবেশ কপিকুংজরঃ ।
রম্যকাননতোয়াঢ্য়াং পুরীং রাবণপালিতাম্ ॥ 2 ॥
শারদাংবুধরপ্রখ্য়ৈর্ভবনৈরুপশোভিতাম্ ।
সাগরোপমনির্ঘোষাং সাগরানিলসেবিতাম্ ॥ 3 ॥
সুপুষ্টবলসংপুষ্টাং যথৈব বিটপাবতীম্ ।
চারুতোরণনির্য়ূহাং পাংডুরদ্বারতোরণাম্ ॥ 4 ॥
ভুজগাচরিতাং গুপ্তাং শুভাং ভোগবতীমিব ।
তাং স বিদ্য়ুদ্ঘনাকীর্ণাং জ্য়োতির্মার্গনিষেবিতাম্ ॥ 5 ॥
মংদমারুতসংচারাং যথেংদ্রস্য়ামরাবতীম্ ।
শাতকুংভেন মহতা প্রাকারেণাভিসংবৃতাম্ ॥ 6 ॥
কিংকিণীজালঘোষাভিঃ পতাকাভিরলংকৃতাম্ ।
আসাদ্য় সহসা হৃষ্টঃ প্রাকারমভিপেদিবান্ ॥ 7 ॥
বিস্ময়াবিষ্টহৃদয়ঃ পুরীমালোক্য় সর্বতঃ ।
জাংবূনদময়ৈর্দ্বারৈর্বৈডূর্যকৃতবেদিকৈঃ ॥ 8 ॥
বজ্রস্ফটিকমুক্তাভির্মণিকুট্টিমভূষিতৈঃ ।
তপ্তহাটকনির্য়ূহৈ রাজতামলপাংডুরৈঃ ॥ 9 ॥
বৈঢূর্যকৃতসোপানৈঃ স্ফাটিকাংতরপাংসুভিঃ ।
চারুসংজবনোপেতৈঃ খমিবোত্পতিতৈঃ শুভৈঃ ॥ 10 ॥
ক্রৌংচবর্হিণসংঘুষ্টৈঃ রাজহংস নিষেবিতৈঃ ।
তূর্য়াভরণনির্ঘোষৈঃ সর্বতঃ প্রতিনাদিতাম্ ॥ 11 ॥
বস্বৌকসারাপ্রতিমাং তাং বীক্ষ্য় নগরীং ততঃ ।
খমিবোত্পতিতুং কামাং জহর্ষ হনুমান্ কপিঃ ॥ 12 ॥
তাং সমীক্ষ্য় পুরীং রম্য়াং রাক্ষসাধিপতেঃ শুভাম্ ।
অনুত্তমামৃদ্ধিয়ুতাং চিংতয়ামাস বীর্যবান্ ॥ 13 ॥
নেযমন্য়েন নগরী শক্য়া ধর্ষয়িতুং বলাত্ ।
রক্ষিতা রাবণবলৈরুদ্যতায়ুধধারিভিঃ ॥ 14 ॥
কুমুদাংগদয়োর্বাপি সুষেণস্য় মহাকপেঃ ।
প্রসিদ্ধেয়ং ভবেদ্ভূমির্মৈংদদ্বিবিদয়োরপি ॥ 15 ॥
বিবস্বতস্তনূজস্য় হরেশ্চ কুশপর্বণঃ ।
ঋক্ষস্য় কেতুমালস্য় মম চৈব গতির্ভবেত্ ॥ 16 ॥
সমীক্ষ্য় তু মহাবাহূ রাঘবস্য় পরাক্রমম্ ।
লক্ষ্মণস্য় চ বিক্রাংতমভবত্ প্রীতিমান্ কপিঃ ॥ 17 ॥
তাং রত্নবসনোপেতাং কোষ্ঠাগারাবতংসকাম্ ।
যংত্রাগারস্তনীমৃদ্ধাং প্রমদামিব ভূষিতাম্ ॥ 18 ॥
তাং নষ্টতিমিরাং দীপ্তৈর্ভাস্বরৈশ্চ মহাগৃহৈঃ ।
নগরীং রাক্ষসেংদ্রস্য় স দদর্শ মহাকপিঃ ॥ 19 ॥
থ সা হরিশার্দূলং প্রবিশংতং মহাবলম্ ।
নগরী স্বেন রূপেণ দদর্শ পবনাত্মজম্ ॥ 20 ॥
সা তং হরিবরং দৃষ্ট্বা লংকা রাবণপালিতা ।
স্বযমেবোত্থিতা তত্র বিকৃতাননদর্শনা ॥ 21 ॥
পুরস্তাত্কপিবর্যস্য় বায়ুসূনোরতিষ্ঠত ।
মুংচমানা মহানাদমব্রবীত্পবনাত্মজম্ ॥ 22 ॥
কস্ত্বং কেন চ কার্য়েণ ইহ প্রাপ্তো বনালয় ।
কথযস্বেহ যত্তত্ত্বং যাবত্প্রাণা ধরংতি তে ॥ 23 ॥
ন শক্য়ং খল্বিয়ং লংকা প্রবেষ্টুং বানর ত্বয়া ।
রক্ষিতা রাবণবলৈরভিগুপ্তা সমংততঃ ॥ 24 ॥
অথ তামব্রবীদ্বীরো হনুমানগ্রতঃ স্থিতাম্ ।
কথয়িষ্য়ামি তে তত্ত্বং যন্মাং ত্বং পরিপৃচ্ছসি ॥ 25 ॥
কা ত্বং বিরূপনযনা পুরদ্বারেঽবতিষ্ঠসি ।
কিমর্থং চাপি মাং রুদ্ধ্বা নির্ভর্ত্সযসি দারুণা ॥ 26 ॥
হনুমদ্বচনং শ্রুত্বা লংকা সা কামরূপিণী ।
উবাচ বচনং ক্রুদ্ধা পরুষং পবনাত্মজম্ ॥ 27 ॥
অহং রাক্ষসরাজস্য় রাবণস্য় মহাত্মনঃ ।
আজ্ঞাপ্রতীক্ষা দুর্ধর্ষা রক্ষামি নগরীমিমাম্ ॥ 28 ॥
ন শক্য়া মামবজ্ঞায় প্রবেষ্টুং নগরী ত্বয়া ।
অদ্য় প্রাণৈঃ পরিত্যক্তঃ স্বপ্স্যসে নিহতো ময়া ॥ 29 ॥
অহং হি নগরী লংকা স্বযমেব প্লবংগম ।
সর্বতঃ পরিরক্ষামি হ্য়েতত্তে কথিতং ময়া ॥ 30 ॥
লংকায়া বচনং শ্রুত্বা হনুমান্ মারুতাত্মজঃ ।
যত্নবান্স হরিশ্রেষ্ঠঃ স্থিতশ্শৈল ইবাপরঃ ॥ 31 ॥
স তাং স্ত্রীরূপবিকৃতাং দৃষ্টবা বানরপুংগবঃ ।
আবভাষেঽথ মেধাবী সত্ত্ববান্ প্লবগর্ষভঃ ॥ 32 ॥
দ্রক্ষ্য়ামি নগরীং লংকাং সাট্টপ্রাকারতোরণাম্ ।
নির্বিশংকমিমংলোকং পশ্য়ংত্য়াস্তবসাংপ্রতম্ ।
ইত্যর্থমিহ সংপ্রাপ্তঃ পরং কৌতূহলং হি মে ॥ 33 ॥
বনান্য়ুপবনানীহ লংকায়াঃ কাননানি চ ।
সর্বতো গৃহমুখ্য়ানি দ্রষ্টুমাগমনং হি মে ॥ 34 ॥
তস্য় তদ্বচনং শ্রুত্বা লংকা সা কামরূপিণী ।
ভূয় এব পুনর্বাক্য়ং বভাষে পরুষাক্ষরম্ ॥ 35 ॥
মামনির্জিত্য় দুর্বুদ্ধে রাক্ষসেশ্বরপালিতাম্ ।
ন শক্যমদ্য় তে দ্রষ্টুং পুরীয়ং বানরাধম ॥ 36 ॥
ততঃ স কপিশার্দূলস্তামুবাচ নিশাচরীম্ ।
দৃষ্ট্বা পুরীমিমাং ভদ্রে পুনর্য়াস্য়ে যথাগতম্ ॥ 37 ॥
ততঃ কৃত্বা মহানাদং সা বৈ লংকা ভয়াবহম্ ।
তলেন বানরশ্রেষ্ঠং তাডয়ামাস বেগিতা ॥ 38 ॥
ততঃ স কপিশার্দূলো লংকয়া তাডিতো ভৃশম্ ।
ননাদ সুমহানাদং বীর্যবান্ পবনাত্মজঃ ॥ 39 ॥
ততঃ সংবর্তয়ামাস বামহস্তস্য় সোঽংগুলীঃ ।
মুষ্টিনাঽঽভিজঘানৈনাং হনুমান্ ক্রোধমূর্ছিতঃ ॥ 40 ॥
স্ত্রী চেতি মন্যমানেন নাতিক্রোধঃ স্বয়ং কৃতঃ ।
সা তু তেন প্রহারেণ বিহ্বলাংগী নিশাচরী ॥ 41 ॥
পপাত সহসা ভূমৌ বিকৃতাননদর্শনা ।
ততস্তু হনুমান্ প্রাজ্ঞস্তাং দৃষ্ট্বা বিনিপাতিতাম্ ॥ 42 ॥
কৃপাং চকার তেজস্বী মন্যমানঃ স্ত্রিয়ং তু তাম্ ।
ততো বৈ ভৃশসংবিগ্না লংকা সা গদ্গদাক্ষরম্ ॥ 43 ॥
উবাচাগর্বিতং বাক্য়ং হনূমংতং প্লবংগমম্ ।
প্রসীদ সুমহাবাহো ত্রাযস্ব হরিসত্তম ॥ 44 ॥
সময়ে সৌম্য় তিষ্ঠংতি সত্ত্ববংতো মহাবলাঃ ।
অহং তু নগরী লংকা স্বযমেব প্লবংগম ॥ 45 ॥
নির্জিতাহং ত্বয়া বীর বিক্রমেণ মহাবল ।
ইদং তু তথ্য়ং শৃণু বৈ ব্রুবংত্য়া মে হরীশ্বর ॥ 46 ॥
স্বয়ংভুবা পুরা দত্তং বরদানং যথা মম ।
যদা ত্বাং বানরঃ কশ্চিদ্বিক্রমাদ্বশমানয়েত্ ॥ 47 ॥
তদা ত্বয়া হি বিজ্ঞেয়ং রক্ষসাং ভযমাগতম্ ।
স হি মে সময়ঃ সৌম্য় প্রাপ্তোঽদ্য় তব দর্শনাত্ ॥ 48 ॥
স্বয়ংভূ বিহিতঃ সত্য়ো ন তস্য়াস্তি ব্যতিক্রমঃ ।
সীতানিমিত্তং রাজ্ঞস্তু রাবণস্য় দুরাত্মনঃ ॥ 49 ॥
রক্ষসাং চৈব সর্বেষাং বিনাশঃ সমুপাগতঃ ।
তত্প্রবিশ্য় হরিশ্রেষ্ঠ পুরীং রাবণপালিতাম্ ॥ 50 ॥
বিধত্স্ব সর্বকার্য়াণি যানি যানীহ বাংছসি ।
প্রবিশ্য় শাপোপহতাং হরীশ্বর শুভাং পুরীং রাক্ষসমুখ্যপালিতাম্ ।
যদৃচ্ছয়া ত্বং জনকাত্মজাং সতীং বিমার্গ সর্বত্র গতো যথাসুখম্ ॥ 51 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে তৃতীযস্সর্গঃ ॥
