শ্রীমদ্বাল্মীকীয় রামাযণে কিষ্কিংধাকাংডম্ ।
অথ ত্রিপংচাশস্সর্গঃ ।
এবমুক্তশ্শুভং বাক্য়ং তাপস্য়া ধর্মসংহিতম্ ।
উবাচ হনুমান্বাক্য়ং তামনিংদিতচেষ্টিতাম্ ॥ 1 ॥
শরণং ত্বাং প্রপন্না স্ম সর্বে বৈ ধর্মচারিণীম্ ।
যঃ কৃতস্সময়োঽস্মাকং সুগ্রীবেণ মহাত্মনা ॥ 2 ॥
স চ কালো হ্যতিক্রাংতো বিলে চ পরিবর্ততাম্ ।
সা ত্বমস্মাদ্বিলাদ্ঘোরাদুত্তারয়িতুমর্হসি ॥ 3 ॥
তস্মাত্সুগ্রীববচনাদতিক্রাংতান্গতায়ুষঃ ।
ত্রাতুমর্হসি নস্সর্বান্সুগ্রীবভযকর্শিতান্ ॥ 4 ॥
মহচ্চকার্যমস্মাভিঃ কর্তব্য়ং ধর্মচারিণি ।
তচ্চাপি ন কৃতং কার্যমস্মাভিরিহ বাসিভিঃ ॥ 5 ॥
এবমুক্তা হনুমতা তাপসী বাক্যমব্রবীত্ ।
জীবতা দুষ্করং মন্য়ে প্রবিষ্টেন নিবর্তিতুম্ ॥ 6 ॥
তপসস্তু প্রভাবেন নিযমোপার্জিতেন চ ।
সর্বানেব বিলাদস্মাদুদ্ধরিষ্য়ামি বানরান্ ॥ 7 ॥
নিমীলযত চক্ষূংষি সর্বে বানরপুংগবাঃ ।
ন হি নিষ্ক্রমিতুং শক্যমনিমীলিতলোচনৈঃ ॥ 8 ॥
ততস্সম্মীলিতাস্সর্বে সুকুমারাংগুলৈঃ করৈঃ ।
সহসাঽপিদধুর্দৃষ্টিং হৃষ্টা গমনকাংক্ষয়া ॥ 9 ॥
বানরাস্তু মহাত্মানো হস্তরুদ্ধমুখাস্তদা ।
নিমেষাংতরমাত্রেণ বিলাদুত্তারিতাস্তয়া ॥ 10 ॥
ততস্তান্বানরান্সর্বাংস্তাপসী ধর্মচারিণী ।
নিস্সৃতান্বিষমাত্তস্মাত্সমাশ্বাস্য়েদমব্রবীত্ ॥ 11 ॥
এষ বিংধ্য়ো গিরিশ্শ্রীমান্নানাদ্রুমলতাকুলঃ ।
এষ প্রস্রবণশ্শৈলস্সাগরোঽয়ং মহোদধিঃ ॥ 12 ॥
স্বস্তি বোঽস্তু গমিষ্য়ামি ভবনং বানরর্ষভাঃ ।
ইত্য়ুক্ত্বা তদ্বিলং শ্রীমত্প্রবিবেশ স্বয়ংপ্রভা ॥ 13 ॥
ততস্তে দদৃশুর্ঘোরং সাগরং বরুণালযম্ ।
অপারমভিগর্জংতং ঘোরৈরূর্মিভিরাবৃতম্ ॥ 14 ॥
মযস্য় মায়াবিহিতং গিরিদুর্গং বিচিন্বতাম্ ।
তেষাং মাসো ব্যতিক্রাংতো যো রাজ্ঞা সময়ঃ কৃতঃ ॥ 15 ॥
বিংধ্যস্য় তু গিরেঃ পাদে সংপ্রপুষ্পিতপাদপে ।
উপবিশ্য় মহাভাগাশ্চিংতামাপেদিরে তদা ॥ 16 ॥
ততঃ পুষ্পাতিভারাগ্রান্ লতাশতসমাবৃতান্ ।
দ্রুমান্বাসংতিকাংদৃষ্টবা বভূবুর্ভযশংকিতাঃ ॥ 17 ॥
তে বসংতমনুপ্রাপ্তং প্রতিবুদ্ধ্বা পরস্পরম্ ।
নষ্টসংদেশকালার্থা নিপেতুর্ধরণীতলে ॥ 18 ॥
ততস্তান্কপিবৃদ্ধাংস্তু শিষ্টাংশ্চৈব বনৌকসঃ ।
বাচা মধুরয়াঽভাষ্য় যথাবদনুমান্য় চ ॥ 19 ॥
স তু সিংহবৃষস্কংধঃ পীনাযতভুজঃ কপিঃ ।
যুবরাজো মহাপ্রাজ্ঞঃ অংগদো বাক্যমব্রবীত্ ॥ 20 ॥
শাসনাত্কপিরাজস্য় বয়ং সর্বে বিনির্গতাঃ ।
মাসঃ পূর্ণো বিলস্থানাং হরয়ঃ কিং ন বুদ্ধ্যতে ॥ 21 ॥
বযমাশ্বয়ুজে মাসি কালসংখ্য়াব্যবস্থিতাঃ ।
প্রস্থিতাস্সোঽপি চাতীতঃ কিমতঃ কার্যমুত্তরম্ ॥ 22 ॥
ভবংতঃ প্রত্যয়ং প্রাপ্তাঃ নীতিমার্গবিশারদাঃ ।
হিতেষ্বভিরতা ভর্তুর্নিসৃষ্টাস্সর্বকর্মসু ॥ 23 ॥
কর্মস্বপ্রতিমাস্সর্বে দিক্ষু বিশ্রুতপৌরুষাঃ ।
মাং পুরস্কৃত্য় নির্য়াতাঃ পিংগাক্ষপ্রতিচোদিতাঃ ॥ 24 ॥
ইদানীমকৃতার্থানাং মর্তব্য়ং নাত্র সংশয়ঃ ।
হরিরাজস্য় সংদেশমকৃত্বা কস্সুখী ভবেত্ ॥ 25 ॥
তস্মিন্নতীতে কালে তু সুগ্রীবেণ কৃতে স্বযম্ ।
প্রায়োপবেশনং যুক্তং সর্বেষাং চ বনৌকসাম্ ॥ 26 ॥
তীক্ষ্ণঃ প্রকৃত্য়া সুগ্রীবস্স্বামিভাবে ব্যবস্থিতঃ ।
ন ক্ষমিষ্যতি নস্সর্বানপরাধকৃতো গতান্ ॥ 27 ॥
অপ্রবৃত্তৌ চ সীতায়াঃ পাপমেব করিষ্যতি ।
তস্মাত্ ক্ষমমিহাদ্য়ৈব গংতুং প্রায়োপবেশনং হি নঃ ॥ 28 ॥
ত্যক্ত্বা পুত্রাংশ্চ দারাংশ্চ ধনানি চ গৃহাণি চ ।
ধৃবং নো হিংসিতা রাজা সর্বান্প্রতিগতানিতঃ ॥ 29 ॥
বধেনাপ্রতিরূপেণ শ্রেয়ান্মৃত্য়ুরিহৈব নঃ ।
ন চাহং যৌবরাজ্য়েন সুগ্রীবেণাভিষেচিতঃ ॥ 30 ॥
নরেংদ্রেণাভিষিক্তোঽস্মি রামেণাক্লিষ্টকর্মণা ।
স পূর্বং বদ্ধবৈরো মাং রাজা দৃষ্ট্বা ব্যতিক্রমম্ ॥ 31 ॥
ঘাতয়িষ্যতি দংডেন তীক্ষ্ণেন কৃতনিশ্চয়ঃ ।
কিং মে সুহৃদভির্ব্যসনং পশ্যদ্ভির্জীবিতাংতরে ॥ 32 ॥
ইহৈব প্রাযমাসিষ্য়ে পুণ্য়ে সাগররোধসি ।
এতচ্ছ্রুত্বা কুমারেণ যুবরাজেন ভাষিতম্ ॥ 33 ॥
সর্বে তে বানরশ্রেষ্ঠাঃ করুণং বাক্যমব্রুবন্ ।
তীক্ষ্ণঃ প্রকৃত্য়া সুগ্রীবঃ প্রিয়াসক্তশ্চ রাঘবঃ ॥ 34 ॥
অদৃষ্টায়াং তু বৈদেহ্য়াং দৃষ্ট্বাঽস্মাংশ্ত সমাগতান্ ।
রাঘবপ্রিযকামার্থং ঘাতয়িষ্যত্যসংশযম্ ॥ 35 ॥
ন ক্ষমং চাপরাদ্ধানাং গমনং স্বামিপার্শ্বতঃ ।
ইহৈব সীতামন্বিষ্য় প্রবৃত্তিমুপলভ্য় বা ॥ 36 ॥
নো চেদ্গচ্ছাম তং বীরং গমিষ্য়ামো যমক্ষযম্ ।
প্লবংগমানাং তু ভয়ার্দিতানাং শ্রুত্বা বচস্তার ইদং বভাষে ।
অলং বিষাদেন বিলং প্রবিশ্য় বসাম সর্বে যদি রোচতে বঃ ॥ 37 ॥
ইদং হি মায়াবিহিতং সুদুর্গমং প্রভূতবৃক্ষোদকভোজ্যপেযকম্ ।
ইহাস্তি নো নৈব ভয়ং পুরংদরা ন্ন রাঘবাদ্বানররাজতোঽপি বা ॥ 38 ॥
শ্রুত্বাঽংগদস্য়াপি বচোঽনুকূল মূচুশ্চ সর্বে হরয়ঃ প্রতীতাঃ ।
যথা ন হিংস্য়েম তথা বিধান মসক্তমদ্য়ৈব বিধীযতাং নঃ ॥ 39 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে ত্রিপংচাশস্সর্গঃ ॥
