শ্রীমদ্বাল্মীকীয় রামাযণে কিষ্কিংধাকাংডম্ ।
অথ দশমস্সর্গঃ ।
ততঃ ক্রোধসমাবিষ্টং সম্রব্ধং তমুপাগতম্ ।
অহং প্রসাদয়াংচক্রে ভ্রাতরং প্রিযকাম্যয়া ॥ 1 ॥
দিষ্ট্য়াসি কুশলী প্রাপ্তো নিহতশ্চ ত্বয়া রিপুঃ ।
অনাথস্য় হি মে নাথস্ত্বমেকোঽনাথনংদনঃ ॥ 2 ॥
ইদং বহুশলাকং তে পূর্ণচংদ্রমিবোদিতম্ ।
ছত্রং সবালব্যজনং প্রতীচ্ছস্ব ময়া ধৃতম্ ॥ 3 ॥
আর্তশ্চাথ বিলদ্বারি স্থিতস্সংবত্সরং নৃপ ।
দৃষ্ট্বাঽহং শোণিতং দ্বারি বিলাচ্চাপি সমুত্থিতম্ ॥ 4 ॥
শোকসংবিগ্নহৃদয়ো ভৃশং ব্য়াকুলিতেংদ্রিয়ঃ ।
অপিধায় বিলদ্বারং শৈলশৃংগেণ তত্তথা ॥ 5 ॥
তস্মাদ্দেশাদপাক্রম্য় কিষ্কিংধাং প্রাবিশং পুনঃ ।
বিষাদাত্বিহ মাং দৃষ্ট্বা পৌরৈর্মংত্রিভিরেব চ ॥ 6 ॥
অভিষিক্তো ন কামেন তন্মেত্বং ক্ষংতুমর্হসি ।
ত্বমেব রাজা মানার্হস্সদা চাহং যথা পুরম্ ॥ 7 ॥
রাজভাবনিয়োগোঽয়ং মম ত্বদ্বিরহাত্কৃতঃ ।
সামাত্যপৌরনগরং স্থিতং নিহতকংটকম্ ॥ 8 ॥
ন্য়াসভূতমিদং রাজ্য়ং তব নির্য়াতয়াম্যহম্ ।
মা চ রোষং কৃথাস্সৌম্য় ময়ি শত্রুনিবর্হণ ॥ 9 ॥
যাচে ত্বাং শিরসা রাজন্ময়া বদ্ধোঽযমংজলিঃ ।
বলাদস্মিন্ সমাগম্য় মংত্রিভিঃ পুরবাসিভিঃ ॥ 10 ॥
রাজভাবে নিয়ুক্তোঽহং শূন্যদেশজিগীষয়া ।
স্নিগ্ধমেবং ব্রুবাণং মাং স তু নির্ভর্ত্স্য় বানরঃ ॥ 11 ॥
ধিক্ত্বামিতি চ মা মুক্ত্বা বহু তত্তদুবাচ হ ।
প্রকৃতীশ্চ সমানীয় মুংত্রিণশ্চৈব সম্মতান্ ॥ 12 ॥
মামাহ সুহৃদাং মধ্য়ে বাক্য়ং পরমগর্হিতম্ ।
বিদিতং বো যথা রাত্রৌ মায়াবী স মহাসুরঃ ॥ 13 ॥
মাং সমাহ্বযত ক্রূরো যুদ্ধাকাংক্ষী সুদুর্মতিঃ ।
তস্য় তদ্বচনং শ্রুত্বা নিস্সৃতোঽহং নৃপালয়াত্ ॥ 14 ॥
অনুয়াতশ্চ মাং তূর্ণময়ং ভ্রাতা সুদারুণঃ ।
স তু দৃষ্ট্বৈব মাং রাত্রৌ সদ্বিতীয়ং মহাবলঃ ॥ 15 ॥
প্রাদ্রবদ্ভযসংত্রস্তো বীক্ষ্য়াবাং সমুপাগতৌ ।
অনুদ্রুতশ্চ বেগেন প্রবিবেশ মহাবিলম্ ॥ 16 ॥
তং প্রবিষ্টং বিদিত্বা সুঘোরং সুমহদ্বিলম্ ।
অযমুক্তোঽথ মে ভ্রাতা ময়া তু ক্রূরদর্শনঃ ॥ 17 ॥
অহত্বা নাস্তি মে শক্তিঃ প্রতিগংতুমিতঃ পুরীম্ ।
বিলদ্বারি প্রতীক্ষ ত্বং যাবদেনং নিহন্ম্যহম্ ॥ 18 ॥
স্থিতোঽযমিতি মত্বা তু প্রবিষ্টোঽহং দুরাসদম্ ।
তং চ মে মার্গমাণস্য় গতস্সংবত্সরস্তদা ॥ 19 ॥
স তু দৃষ্টো ময়া শত্রুরনির্বেদাদ্ভয়াবহঃ ।
নিহতশ্চ ময়া তত্র সোঽসুরো বংধুভিস্সহ ॥ 20 ॥
তস্য়াস্য়াত্তু প্রবৃত্তেন রুধিরৌঘেণ তদ্বিলম্ ।
পূর্ণমাসীদ্দুরাক্রামং স্তনতস্তস্য় ভূতলে ॥ 21 ॥
সূদয়িত্বা তু তং শত্রুং বিক্রাংতং দুংদুভেস্সুতম্ ।
নিষ্ক্রামন্নেব পশ্য়ামি বিলস্য় পিহিতং মুখম্ ॥ 22 ॥
বিক্রোশমানস্য় তু মে সুগ্রীবেতি পুনঃ পুনঃ ।
যদা প্রতিবচো নাস্তি ততোঽহং ভৃশদুঃখিতঃ ॥ 23 ॥
পাদপ্রহারৈস্তু ময়া বহুভিস্তদ্বিদারিতম্ ।
ততোঽহং তেন নিষ্ক্রম্য় যথা পুরমুপাগতঃ ॥ 24 ॥
অত্রানেনাস্মি সংরুদ্ধো রাজ্য়ং প্রার্থযতাঽত্মনঃ ।
সুগ্রীবেণ নৃশংসেন বিস্মৃত্য় ভ্রাতৃসৌহৃদম্ ॥ 25 ॥
এবমুক্ত্বা তু মাং তত্র বস্ত্রেণৈকেন বানরঃ ।
নির্বাসয়ামাস তদা বালী বিগতসাধ্বসঃ ॥ 26 ॥
তেনাহমপবিদ্ধশ্চ হৃতদারশ্চ রাঘব ।
তদ্ভয়াচ্ছ মহীকৃত্স্না ক্রাংতেয়ং সবনার্ণবা ॥ 27 ॥
ঋষ্যমূকং গিরিবরং ভার্য়াহরণদুঃখিতঃ ।
প্রবিষ্টোঽস্মি দুরাধর্ষং বালিনঃ কারণাংতরে ॥ 28 ॥
এতত্তে সর্বমাখ্য়াতং বৈরানুকথনং মহত্ ।
অনাগসা ময়া প্রাপ্তং ব্যসনং পশ্য় রাঘব ॥ 29 ॥
বালিনস্তু ভয়ার্তস্য় সর্বলোকভয়ংকর ।
কর্তুমর্হসি মে বীর প্রসাদং তস্য় নিগ্রহাত্ ॥ 30 ॥
এবমুক্তস্স তেজস্বী ধর্মজ্ঞো ধর্মসংহিতম্ ।
বচনং বক্তুমারেভে সুগ্রীবং প্রহসন্নিব ॥ 31 ॥
অমোঘাস্সূর্যসংকাশা মমৈতে নিশিতা শ্শরাঃ ।
তস্মিন্বালিনি দুর্বৃত্তে নিপতিষ্য়ংতি বেগিতাঃ ॥ 32 ॥
যাবত্তং নাভিপশ্য়ামি তব ভার্য়াপহারিণম্ ।
তাবত্স জীবেত্পাপাত্মা বালী চারিত্রদূষকঃ ॥ 33 ॥
আত্মানুমানাত্পশ্য়ামি মগ্নং ত্বাং শোকসাগরে ।
ত্বামহং তারয়িষ্য়ামি কামং প্রাপ্স্যসি পুষ্কলম্ ॥ 34 ॥
তস্য় তদ্বচনং শ্রুত্বা হর্ষপৌরুষবর্ধনম্ ।
সুগ্রীবঃ পরমপ্রীতস্সুমহদ্বাক্যমব্রবীত্ ॥ 35 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে দশমস্সর্গঃ ॥
