শ্রীমদ্বাল্মীকীয় রামাযণে অয়োধ্য়াকাংডম্ ।
অথ প্রথমস্সর্গঃ ।
গচ্ছতা মাতুলকুলং ভরতেন তদাঽনঘ ।
শত্রুঘ্নো নিত্যশত্রুঘ্নো নীতঃ প্রীতিপুরস্কৃতঃ ॥ 1 ॥
তত্র ন্যবসদ্ভ্রাত্রা সহ সত্কারসত্কৃতঃ ।
মাতুলেনাশ্বপতিনা পুত্রস্নেহেন লালিতঃ ॥ 2 ॥
তত্রাপি নিবসংতৌ তৌ তর্প্যমাণৌ চ কামতঃ ।
ভ্রাতরৌ স্মরতাং বীরৌ বৃদ্ধং দশরথং নৃপম্ ॥ 3 ॥
রাজাঽপি তৌ মহাতেজা স্সস্মার প্রোষিতৌ সুতৌ ।
উভৌ ভরতশত্রুঘ্নৌ মহেংদ্রবরুণোপমৌ ॥ 4 ॥
সর্ব এব তু তস্য়েষ্টা শ্চত্বারঃ পুরুষর্ষভাঃ ।
স্বশরীরাদ্বিনির্বৃত্তাশ্চত্বার ইব বাহবঃ ॥ 5 ॥
তেষামপি মহাতেজা রামো রতিকরঃপিতুঃ ।
স্বয়ংভূরিব ভূতানাং বভূব গুণবত্তরঃ ॥ 6 ॥
স হি দেবৈরুদীর্ণস্য় রাবণস্য় বধার্থিভিঃ ।
অর্থিতো মানুষে লোকে জজ্ঞে বিষ্ণুস্সনাতনঃ ॥ 7 ॥
কৌশল্য়া শুশুভে তেন পুত্রেণামিততেজসা ।
যথা বরেণ দেবানামদিতির্বজ্রপাণিনা ॥ 8 ॥
স হি রূপোপপন্নশ্চ বীর্যবাননসূযকঃ ।
ভূমৌবনুপমস্সূনুর্গুণৈর্দশরথোপমঃ ॥ 9 ॥
স তু নিত্য়ং প্রশাংতাত্মা মৃদুপূর্বং চ ভাষতে ।
উচ্যমানোঽপি পরুষং নোত্তরং প্রতিপদ্যতে ॥ 10 ॥
কথংচিদুপকারেণ কৃতেনৈকেন তুষ্যতি ।
ন স্মরত্যপকারাণাং শতমপ্য়াত্মবত্তয়া ॥ 11 ॥
শীলবৃদ্ধৈর্জ্ঞানবৃদ্ধৈর্বয়োবৃদ্ধৈশ্চ সজ্জনৈঃ ।
কথযন্নাস্ত বৈ নিত্যমস্ত্রয়োগ্য়াংতরেষ্বপি ॥ 12 ॥
বুদ্ধিমান্মধুরাভাষী পূর্বভাষী প্রিয়ংবদঃ ।
বীর্যবান্ন চ বীর্য়েণ মহতা স্বেন বিস্মিতঃ ॥ 13 ॥
নচানৃতকথো বিদ্বান্ বৃদ্ধানাং প্রতিপূজকঃ ।
অনুরক্তঃ প্রজাভিশ্চ প্রজাশ্চাপ্যনুরংজতে ॥ 14 ॥
সানুক্রোশো জিতক্রোধো ব্রাহ্মণপ্রতিপূজকঃ ।
দীনানুকংপী ধর্মজ্ঞো নিত্য়ং প্রগ্রহবাংশ্চুচিঃ ॥ 15 ॥
কুলোচিতমতিঃ ক্ষাত্রং ধর্মং স্বং বহুমন্যতে ।
মন্যতে পরয়া কীর্ত্য়া মহত্স্বর্গফলং ততঃ ॥ 16 ॥
নাঽঽশ্রেযসি রতো বিদ্বান্নবিরুদ্ধকথারুচিঃ ।
উত্তরোত্তরয়ুক্তৌ চ বক্তা বাচস্পতির্যথা ॥ 17 ॥
অরোগস্তরুণো বাগ্মী বপুষ্মাংদেশকালবিত্ ।
লোকে পুরুষসারজ্ঞ স্সাধুরেকো বিনির্মিতঃ ॥ 18 ॥
স তু শ্রেষ্ঠৈর্গুণৈর্য়ুক্তঃ প্রজানাং পার্থিবাত্মজঃ ।
বহিশ্চর ইব প্রাণো বভূব গুণতঃ প্রিয়ঃ ॥ 19 ॥
সম্যগ্বিদ্য়াব্রতস্নাতো যথাবত্সাংগবেদবিত্ ।
ইষ্বস্ত্রে চ পিতু শ্শ্রেষ্ঠো বভূব ভরতাগ্রজঃ ॥ 20 ॥
কল্য়াণাভিজন স্সাধুরদীন স্সত্যবাগৃজুঃ ।
বৃদ্ধৈরভিবিনীতশ্চ দ্বিজৈর্ধর্মার্থদর্শিভিঃ ॥ 21 ॥
ধর্মকামার্থতত্ত্বজ্ঞঃ স্মৃতিমান্প্রতিভানবান্ ।
লৌকিকে সময়াচারে কৃতকল্পো বিশারদঃ ॥ 22 ॥
নিভৃত স্সংবৃতাকারো গুপ্তমংত্র স্সহাযবান্ ।
অমোঘক্রোধহর্ষশ্চ ত্য়াগসংযমকালবিত্ ॥ 23 ॥
দৃঢভক্তি স্স্থিরপ্রজ্ঞো নাসদ্গ্রাহী ন দুর্বচাঃ ।
নিস্তংদ্রিরপ্রমত্তশ্চ স্বদোষপরদোষবিত্ ॥ 24 ॥
শাস্ত্রজ্ঞশ্চ কৃতজ্ঞশ্চ পুরুষাংতরকোবিদঃ ।
যঃ প্রগ্রহানুগ্রহয়োর্যথান্য়ায়ং বিচক্ষণঃ ॥ 25 ॥
সত্সংগ্রহপ্রগ্রহণে স্থানবিন্নিগ্রহস্য় চ ।
আযকর্মণ্য়ুপাযজ্ঞ স্সংদৃষ্টব্যযকর্মবিত্ ॥ 26 ॥
শ্রৈষ্ঠ্য়ং শাস্ত্রসমূহেষু প্রাপ্তো ব্য়ামিশ্রকেষু চ ।
অর্থধমৌ চ সংগৃহ্য় সুখতংত্রো ন চালসঃ ॥ 27 ॥
বৈহারিকাণাং শিল্পানাং বিজ্ঞাতাঽঽর্থবিভাগবিত্ ।
আরোহে বিনয়ে চৈব যুক্তো বারণবাজিনাম্ ॥ 28 ॥
ধনুর্বেদবিদাং শ্রেষ্ঠো লোকেঽতিরথসম্মতঃ ।
অভিয়াতা প্রহর্তা চ সেনানযবিশারদঃ ॥ 29 ॥
অপ্রধৃষ্যশ্চ সংগ্রামে ক্রুধ্দৈরপি সুরাসুরৈঃ ।
অনসূয়ো জিতক্রোধো ন দৃপ্তো ন চ মত্সরী ।
ন চাবমংতা ভূতানাং ন চ কালবশানুগঃ ॥ 30 ॥
এবং শ্রেষ্ঠগুণৈর্য়ুক্তঃ প্রজানাং পার্থিবাত্মজঃ ।
সম্মতস্ত্রিষু লোকেষু বসুধায়াঃ ক্ষমাগুণৈঃ ॥ 31 ॥
বুদ্ধ্য়া বৃহস্পতেস্তুল্য়ো বীর্য়েণাপি শচীপতেঃ ।
তথা সর্বপ্রজাকাংতৈঃ প্রীতিসংজননৈঃ পিতুঃ ॥ 32 ॥
গুণৈর্বিরুরুচে রামো দীপ্তস্সূর্য় ইবাংশুভিঃ ।
তমেবং ব্রতসংপন্নমপ্রধৃষ্যপরাক্রমম্ ॥ 33 ॥
লোক পালোপমং নাথমকামযত মেদিনী ।
এতৈস্তু বহুভির্য়ুক্তং গুণৈরনুপমৈস্সুতম্ ॥ 34 ॥
দৃষ্ট্বা দশরথো রাজা চক্রে চিংতাং পরংতপঃ ।
অথ রাজ্ঞো বভূবৈবং বৃদ্ধস্য় চিরজীবিনঃ ॥ 35 ॥
প্রীতিরেষা কথং রামো রাজা স্য়ান্ময়ি জীবতি ।
এষা হ্যস্য় পরা প্রীতির্হৃদি সংপরিবর্ততে ॥ 36 ॥
কদা নাম সুতং দ্রক্ষ্য়াম্যভিষিক্তমহং প্রিযম্ ।
বৃদ্ধিকামো হি লোকস্য় সর্বভূতানুকংপনঃ ॥ 37 ॥
মত্তঃ প্রিযতরো লোকে পর্জন্য় ইব বৃষ্টিমান্ ।
যমশক্রসমো বীর্য়ে বৃহস্পতিসমো মতৌ ॥ 38 ॥
মহীধরসমো ধৃত্য়াং মত্তশ্চ গুণবত্তরঃ ।
মহীমহমিমাং কৃত্স্নামধিতিষ্ঠংতমাত্মজম্ ॥ 39 ॥
অনেন বযসা দৃষ্ট্বা যথাস্বর্গমবাপ্নুয়াম্ ।
ইত্য়েতৈর্বিবিধৈস্তৈস্তৈরন্যপার্থিবদুর্লভৈঃ ॥ 40 ॥
শিষ্টৈরপরিমেয়ৈশ্চ লোকে লোকোত্তরৈর্গুণৈঃ ।
তং সমীক্ষ্য় মহারাজো যুক্তং সমুদিতৈশ্শুভৈঃ ॥ 41 ॥
নিশ্চিত্য় সচিবৈস্সার্ধং যুবরাজমমন্যত ।
দিব্য়ংতরিক্ষে ভূমৌ চ ঘোরমুত্পাতজং ভযম্ ॥ 42 ॥
সংচচক্ষেঽথ মেধাবী শরীরে চাত্মনো জরাম্ ।
পূর্ণচংদ্রাননস্য়াথ শোকাপনুদমাত্মনঃ ॥ 43 ॥
লোকে রামস্য় বুবুধে সংপ্রিযত্বং মহাত্মনঃ ।
আত্মনশ্চ প্রজানাং চ শ্রেযসে চ প্রিয়েণ চ ॥ 44 ॥
প্রাপ্তকালেন ধর্মাত্মা ভক্ত্য়া ত্বরিতবান্ নৃপঃ ।
নানানগরবাস্তব্য়ান্পৃথগ্জানপদানপি ॥ 45 ॥
সমানিনায় মেদিন্য়াঃ প্রধানান্পৃথিবীপতীন্ ।
ন তু কেকযরাজানং জনকং বা নরাধিপঃ ॥ 46 ॥
ত্বরয়া চানয়ামাস পশ্চাত্তৌ শ্রোষ্যতঃ প্রিযম্ ।
তান্বেশ্মনানাভরণৈর্যথাঽর্হং প্রতিপূজিতান্ ॥ 47 ॥
দদর্শালংকৃতো রাজা প্রজাপতিরিব প্রজাঃ ।
অথোপবিষ্টে নৃপতৌ তস্মিন্পরবলার্দনে ॥ 48 ॥
ততঃ প্রবিবিশু শ্শেষা রাজানো লোকসম্মতাঃ ।
অথ রাজবিতীর্ণেষু বিবিধেষ্বাসনেষু চ ॥ 49 ॥
রাজানমেবাভিমুখাঃ নিষেদুর্নিযতা নৃপাঃ ।
সলব্ধমানৈর্বিনয়ান্বিতৈর্নৃপৈঃ পুরালয়ৈর্জানপদৈশ্চ মানদৈঃ ।
উপোপবিষ্টৈর্নৃপতির্বৃতো বভৌ সহস্রচক্ষুর্ভগবানিবামরৈঃ ॥ 50 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে প্রথমস্সর্গঃ ॥
