শ্রীমদ্বাল্মীকীয় রামাযণে বালকাংডম্ ।
অথ একপংচাশস্সর্গঃ ।
তস্য় তদ্বচনং শ্রুত্বা বিশ্বামিত্রস্য় ধীমতঃ ।
হৃষ্টরোমা মহাতেজাশ্শতানংদো মহাতপাঃ ॥ 1 ॥
গৌতমস্য় সুতো জ্য়েষ্ঠস্তপসা দ্য়োতিতপ্রভঃ ।
রামসংদর্শনাদেব পরং বিস্মযমাগতঃ ॥ 2 ॥
স তৌ নিষণ্ণৌ সংপ্রেক্ষ্য় সুখাসীনৌ নৃপাত্মজৌ ।
শতানংদো মুনিশ্রেষ্ঠং বিশ্বামিত্রমথামব্রবীত্ ॥ 3 ॥
অপি তে মুনিশার্দূল মম মাতা যশস্বিনী ।
দর্শিতা রাজপুত্রায় তপো দীর্ঘমুপাগতা ॥ 4 ॥
অপি রামে মহাতেজা মম মাতা যশস্বিনী ।
বন্য়ৈরুপাহরত্পূজাং পূজার্হে সর্বদেহিনাম্ ॥ 5 ॥
অপি রামায় কথিতং যথাবৃত্তং পুরাতনম্ ।
মম মাতুর্মহাতেজো দৈবেন দুরনুষ্ঠিতম্ ॥ 6 ॥
অপি কৌশিক ভদ্রং তে গুরুণা মম সংগতা ।
মম মাতা মুনিশ্রেষ্ঠ রামসংদর্শনাদিতঃ ॥ 7 ॥
অপি মে গুরুণা রামঃ পূজিতঃ কুশিকাত্মজ ।
ইহাগতো মহাতেজাঃ পূজাং প্রাপ্তো মহাত্মনঃ ॥ 8 ॥
অপি শাংতেন মনসা গুরুর্মে কুশিকাত্মজ ।
ইহাঽগতেন রামেণ প্রযতেনাভিবাদিতঃ ॥ 9 ॥
তচ্ছ্রুত্বা বচনং তস্য় বিশ্বামিত্রো মহামুনিঃ ।
প্রত্য়ুবাচ শতানংদং বাক্যজ্ঞো বাক্যকোবিদম্ ॥ 10 ॥
নাতিক্রাংতং মুনিশ্রেষ্ঠ যত্কর্তব্য়ং কৃতং ময়া ।
সংগতা মুনিনা পত্নী ভার্গবেণেব রেণুকা ॥ 11 ॥
তচ্ছ্রুত্বা বচনং তস্য় বিশ্বামিত্রস্য় ভাষিতম্ ।
শতানংদো মহাতেজা রামং বচনমব্রবীত্ ॥ 12 ॥
স্বাগতং তে নরশ্রেষ্ঠ দিষ্ট্য়া প্রাপ্তোঽসি রাঘব ।
বিশ্বামিত্রং পুরস্কৃত্য় মহর্ষিমপরাজিতম্ ॥ 13 ॥
অচিংত্যকর্মা তপসা ব্রহ্মর্ষিরতুলপ্রভঃ ।
বিশ্বামিত্রো মহাতেজা বেত্স্য়েনং পরমাং গতিম্ ॥ 14 ॥
নাস্তি ধন্যতরো রাম ত্বত্তোঽন্য়ো ভুবি কশ্চন ।
গোপ্তা কুশিকপুত্রস্তে যেন তপ্তং মহত্তপঃ ॥ 15 ॥
শ্রূযতাং চাভিধাস্য়ামি কৌশিকস্য় মহাত্মনঃ ।
যথা বলং যথা বৃত্তং তন্মে নিগদতঃ শ্রুণু ॥ 16 ॥
রাজাঽভূদেষ ধর্মাত্মা দীর্ঘকালমরিংদমঃ ।
ধর্মজ্ঞঃ কৃতবিদ্যশ্চ প্রজানাং চ হিতে রতঃ ॥ 17 ॥
প্রজাপতিসুতশ্চাসীত্কুশো নাম মহীপতিঃ ।
কুশস্য় পুত্রো বলবান্ কুশনাভস্সুধার্মিকঃ ॥ 18 ॥
কুশনাভসুতস্ত্বাসীদ্গাধিরিত্য়েব বিশ্রৃতঃ ।
গাধেঃ পুত্রো মহাতেজা বিশ্বামিত্রো মহামুনিঃ ॥ 19 ॥
বিশ্বামিত্রো মহাতেজাঃ পালয়ামাস মেদিনীম্ ।
বহুবর্ষসহস্রাণি রাজা রাজ্যমকারযত্ ॥ 20 ॥
কদাচিত্তু মহাতেজা যোজয়িত্বা বরূথিনীম্ ।
অক্ষৌহীণীপরিবৃতঃ পরিচক্রাম মেদিনীম্ ॥ 21 ॥
নগরাণি সরাষ্ট্রাণি সরিতশ্চ তথা গিরীন্ ।
আশ্রমান্ক্রমশো রাম বিচরন্নাজগাম হ ॥ 22 ॥
বসিষ্ঠস্য়াশ্রমপদং নানাবৃক্ষসমাকুলম্ ।
নানামৃগগণাকীর্ণং সিদ্ধচারণসেবিতম্ ॥ 23 ॥
দেবদানবগংধর্বৈঃ কিন্নরৈরুপশোভিতম্ ।
প্রশাংতহরিণাকীর্ণং দ্বিজসংঘনিষেবিতম্ ॥ 24 ॥
ব্রহ্মর্ষিগণসংকীর্ণং দেবর্ষিগণসেবিতম্ ।
তপশ্চরণসংসিদ্ধৈরগ্নিকল্পৈর্মহাত্মভিঃ ॥ 25 ॥
অব্ভক্ষৈর্বায়ুভক্ষৈশ্চ শীর্ণপর্ণাশনৈস্তথা ।
ফলমূলাশনৈর্দাংতৈর্জিতরোষৈর্জিতেংদ্রিয়ৈঃ ॥ 26 ॥
ঋষিভির্বালখিল্য়ৈশ্চ জপহোমপরাযণৈঃ ।
অন্য়ৈর্বৈখানসৈশ্চৈব সমংতাদুপশোভিতম্ ॥ 27 ॥
বসিষ্ঠস্য়াশ্রমপদং ব্রহ্মলোকমিবাপরম্ ।
দদর্শ জযতাং শ্রেষ্ঠো বিশ্বামিত্রো মহাবলঃ ॥ 28 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে একপংচাশস্সর্গঃ ॥
