ශ්රීමද්වාල්මීකීය රාමායණේ බාලකාංඩම් ।
අථ ඒකසප්තතිතමස්සර්ගඃ ।
ඒවං බ්රුවාණං ජනකඃ ප්රත්යුවාච කෘතාංජලිඃ ।
ශ්රෝතුමර්හසි භද්රං තේ කුලං නඃ පරිකීර්තිතම් ॥ 1 ॥
ප්රදානේ හි මුනිශ්රේෂ්ඨ කුලං නිරවශේෂතඃ ।
වක්තව්යං කුලජාතේන තන්නිබෝධ මහාමුනේ ॥ 2 ॥
රාජාऽභූත් ත්රිෂු ලෝකේෂු විශ්රුත ස්ස්වේන කර්මණා ।
නිමිඃ පරමධර්මාත්මා සර්වසත්ත්වවතාං වරඃ ॥ 3 ॥
තස්ය පුත්රෝමිථිර්නාම මිථිලා යේන නිර්මිතා ।
ප්රථමෝ ජනකෝ නාම ජනකාදප්යුදාවසුඃ ॥ 4 ॥
උදාවසෝස්තු ධර්මාත්මා ජාතෝ වෛ නංදිවර්ධනඃ ।
නංදිවර්ධනපුත්රස්තු සුකේතුර්නාම නාමතඃ ॥ 5 ॥
සුකේතෝරපි ධර්මාත්මා දේවරාතෝ මහාබලඃ ।
දේවරාතස්ය රාජර්ෂේර්බෘහද්රථ ඉති ස්මෘතඃ ॥ 6 ॥
බෘහද්රථස්ය ශූරෝऽභූන්මහාවීරඃ ප්රතාපවාන් ।
මහාවීරස්ය ධෘතිමාන් සුධෘතිස්සත්යවික්රමඃ ॥ 7 ॥
සුධෘතේරපි ධර්මාත්මා දෘෂ්ටකේතුස්සුධාර්මිකඃ ।
දෘෂ්ටකේතෝස්තු රාජර්ෂේර්හර්යශ්ව ඉති විශ්රුතඃ ॥ 8 ॥
හර්යශ්වස්ය මරුඃ පුත්රෝ මරෝඃ පුත්රඃ ප්රතිංධකඃ ।
ප්රතිංධකස්ය ධර්මාත්මා රාජා කීර්තිරථස්සුතඃ ॥ 9 ॥
පුත්රඃ කීර්තිරථස්යාපි දේවමීඪ ඉති ස්මෘතඃ ।
දේවමීඪස්ය විබුධෝ විබුධස්ය මහීධ්රකඃ ॥ 10 ॥
මහීධ්රකසුතෝ රාජා කීර්තිරාතෝ මහාබලඃ ।
කීර්තිරාතස්ය රාජර්ෂේර්මහාරෝමා ව්යජායත ॥ 11 ॥
මහාරෝම්ණස්තු ධර්මාත්මා ස්වර්ණරෝමා ව්යජායත ।
ස්වර්ණරෝම්ණස්තු රාජර්ෂේර්හ්රස්වරෝමා ව්යජායත ॥ 12 ॥
තස්ය පුත්රද්වයං ජජ්ඤේ ධර්මජ්ඤස්ය මහාත්මනඃ ।
ජ්යේෂ්ඨෝऽහමනුජෝ භ්රාතා මම වීරඃ කුශධ්වජඃ ॥ 13 ॥
මාං තු ජ්යේෂ්ඨං පිතා රාජ්යේ සෝऽභිෂිච්ය නරාධිපඃ ।
කුශධ්වජං සමාවේශ්ය භාරං මයි වනං ගතඃ ॥ 14 ॥
වෘද්ධේ පිතරි ස්වර්යාතේ ධර්මේණ ධුරමාවහම් ।
භ්රාතරං දේවසංකාශං ස්නේහාත්පශ්යන් කුශධ්වජම් ॥ 15 ॥
කස්ය චිත්ත්වථකාලස්ය සාංකාශ්යාදගමත්පුරාත් ।
සුධන්වා වීර්යවාන්රාජා මිථිලාමවරෝධකඃ ॥ 16 ॥
ස ච මේ ප්රේෂයාමාස ශෛවං ධනුරනුත්තමම් ।
සීතා කන්යා ච පද්මාක්ෂී මහ්යං වෛ දීයතාමිති ॥ 17 ॥
තස්යාප්රදානාද්බ්රහ්මර්ෂේ යුද්ධමාසීන්මයා සහ ।
ස හතෝऽභිමුඛෝ රාජා සුධන්වා තු මයා රණේ ॥ 18 ॥
නිහත්ය තං මුනිශ්රේෂ්ඨ සුධන්වානං නරාධිපම් ।
සාංකාශ්යේ භ්රාතරං වීරමභ්යෂිංචං කුශධ්වජම් ॥ 19 ॥
කනීයානේෂ මේ භ්රාතා අහං ජ්යේෂ්ඨෝ මහාමුනේ ।
දදාමි පරමප්රීතෝ වධ්වෞ තේ මුනිපුංගව ॥ 20 ॥
සීතාං රාමාය භද්රං තේ ඌර්මිලා ලක්ෂ්මණාය ච ।
වීර්යශුල්කාං මම සුතාං සීතාං සුරසුතෝපමාම් ॥ 21 ॥
ද්විතීයාමූර්මිලාං චෛව ත්රිර්දදාමි න සංශයඃ ।
දදාමි පරමප්රීතෝ වධ්වෞ තේ රඝුනංදන ॥ 22 ॥
රාමලක්ෂ්මණයෝ රාජන් ගෝදානං කාරයස්ව හ ।
පිතෘකාර්යං ච භද්රං තේ තතෝ වෛවාහිකං කුරු ॥ 23 ॥
මඛා හ්යද්ය මහාබාහෝ තෘතීයේ දිවසේ ප්රභෝ ।
ඵල්ගුන්යාමුත්තරේ රාජංස්තස්මින්වෛවාහිකං කුරු ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකසප්තතිතමස්සර්ගඃ ॥
