শ্রীমদ্বাল্মীকীয় রামাযণে অয়োধ্য়াকাংডম্ ।
অথ পংচপংচাশস্সর্গঃ ।
উষিত্বা রজনীং তত্র রাজপুত্রাবরিংদমৌ ।
মহর্ষিমভিবাদ্য়াথ জগ্মতুস্তং গিরিং প্রতি ॥ 1 ॥
তেষাং চৈব স্বস্ত্যযনং মহর্ষি স্স চকার হ ।
প্রস্থিতাংশ্চৈব তান্প্রেক্ষ্য় পিতা পুত্রানিবান্বগাত্ ॥ 2 ॥
ততঃ প্রচক্রমে বক্তুং বচনং স মহামুনিঃ ।
ভরদ্বাজো মহাতেজা রামং সত্যপরাক্রমম্ ॥ 3 ॥
গংগাযমুনয়ো স্সংধিমাসাদ্য় মনুজর্ষভৌ ।
কালিংদীমনুগচ্ছেতাং নদীং পশ্চান্মুখাশ্রিতাম্ ॥ 4 ॥
অথাঽসাদ্য় তু কালিংদী শীঘ্রস্রোতসমাপগাম্ ।
তস্য়াস্তীর্থং প্রচলিতং পুরাণং প্রেক্ষ্য় রাঘবৌ ॥ 5 ॥
তত্র যূয়ং প্লবং কৃত্বা তরতাংশুমতীং নদীম্ ।
ততো ন্যগ্রোধমাসাদ্য় মহাংতং হরিতচ্ছদম্ ॥ 6 ॥
বিবৃদ্ধং বহুভির্বৃক্ষৈ শ্শ্য়ামং সিদ্ধোপসেবিতম্ ।
তস্মৈ সীতাংজলিং কৃত্বা প্রয়ুংজীতাশিষশ্শিবাঃ ॥ 7 ॥
সমাসাদ্য় তু তং বৃক্ষং বসেদ্বাতিক্রমেত বা ।
ক্রোশমাত্রং ততো গত্বা নীলং দ্রক্ষ্যথ কাননম্ ॥ 8 ॥
পলাশবদরীমিশ্রং রম্য়ং বংশৈশ্চ যামুনৈঃ ।
স পংথাশ্চিত্রকূটস্য় গত স্সুবহুশো ময়া ॥ 9 ॥
রম্য়ো মার্দবয়ুক্তশ্চ বনদাবৈর্বিবর্জিতঃ ।
ইতি পংথানমাবেদ্য় মহর্ষিস্সন্যবর্তত ॥ 10 ॥
অভিবাদ্য় তথেত্য়ুক্ত্বা রামেণ বিনিবর্তিতঃ ।
উপাবৃত্তে মুনৌ তস্মিন্রামো লক্ষ্মণমব্রবীত্ ॥ 11 ॥
কৃতপুণ্য়াঃ স্ম সৌমিত্রে মুনির্যন্নোঽনুকংপতে ।
ইতি তৌ পুরুষব্য়াঘ্রৌ মংত্রয়িত্বা মনস্বিনৌ ।
সীতামেবাগ্রতঃ কৃত্বা কালিংদীং জগ্মতুর্নদীম্ ॥ 12 ॥
অথাঽসাদ্য় তু কালিংদীং শীঘ্রস্রোতোবহাং নদীম্ ।
চিংতামাপেদিরে সর্বে নদীজলতিতীর্ষবঃ ॥ 13 ॥
তৌ কাষ্ঠসংঘাতমথো চক্রতু স্সুমহাপ্লবম্ ।
শুষ্কৈর্বংশৈ স্সমাস্তীর্ণমুশীরৈশ্চ সমাবৃতম্ ॥ 14 ॥
ততো বেতসশাখাশ্চ জংবূশাখাশ্চ বীর্যবান্ ।
চকার লক্ষ্মণশ্ছিত্বা সীতায়া স্সুখমাসনম্ ॥ 15 ॥
তত্র শ্রিযমিবাচিংত্য়াং রামো দাশরথিঃ প্রিয়াম্ ।
ঈষত্সংলজ্জমানাং তামধ্য়ারোপযতপ্লবম্ ॥ 16 ॥
পার্শ্বে চ তত্র বৈদেহ্য়া বসনে ভূষণানি চ ।
প্লবে কঠিনকাজং চ রামশ্চক্রে সহায়ুধৈঃ ॥ 17 ॥
আরোপ্য় প্রথমং সীতাং সংঘাটং পরিগৃহ্য় তৌ ।
তত প্রতেরতুর্যত্তৌ বীরৌ দশরথাত্মজৌ ॥ 18 ॥
কালিংদীমধ্যমায়াতা সীতা ত্বেনামবংদত ।
স্বস্তি দেবি তরামি ত্বাং পারয়ে ন্মে পতির্ব্রতম্ ॥ 19 ॥
কালিংদী মথ সীতা তু যাচমানা কৃতাংজলিঃ ।
তীরমেবাভিসংপ্রাপ্তা দক্ষিণং বরবর্ণিনী ॥ 20 ॥
তত প্লবেনাংশুমতীং শীঘ্রগামূর্মিমালিনীম্ ।
তীরজৈ র্বহুভির্বৃক্ষৈ স্সংতেরুর্যমুনাং নদীম্ ॥ 21 ॥
তে তীর্ণাঃ প্লবমুত্সৃজ্য় প্রস্থায় যমুনাবনাত্ ।
শ্য়ামং ন্যগ্রোধ মাসেদু শ্শীতলং হরিতচ্ছদম্ ॥ 22 ॥
ন্যগ্রোধং তমুপাগম্য় বৈদেহী বাক্যমব্রবীত্ ।
নমস্তেঽস্তু মহাবৃক্ষ পারয়েন্মে পতির্ব্রতম্ ॥ 23 ॥
কৌশল্য়াং চৈব পশ্য়েয়ং সুমিত্রাং চ যশশ্বিনীম্ ।
ইতি সীতাঽংজলিং কৃত্বা পর্যগচ্ছদ্বনস্পতিম্ ॥ 24 ॥
অবলোক্য় তত স্সীতামায়াচংতীমনিংদিতাম্ ।
দয়িতাং চ বিধেয়াং চ রামো লক্ষ্মণমব্রবীত্ ॥ 25 ॥
সীতামাদায় গচ্ছত্বমগ্রতো ভরতানুজ ।
পৃষ্ঠতোঽহং গমিষ্য়ামি সায়ুধো দ্বিপদাং বর ॥ 26 ॥
যদ্যত্ফলং প্রার্থযতে পুষ্পং বা জনকাত্মজা ।
তত্তত্প্রদদ্য়া বৈদেহ্য়া যত্রাঽস্য়া রমতে মনঃ ॥ 27 ॥
গচ্ছতোঽস্তু তয়োর্মধ্য়ে বভূব জনকাত্মজা ।
মাতংগয়োর্মধ্যগতা শুভা নাগবধূরিব ॥ 28 ॥
একৈকং পাদপং গুল্মং লতাং বা পুষ্পশালিনীম্ ।
অদৃষ্টপূর্বাং পশ্য়ংতী রামং পপ্রচ্ছ সাঽবলা ॥ 29 ॥
রমণীয়ান্বহুবিধান্পাদপান্কুসুমোত্কটান্ ।
সীতাবচনসংরব্ধ আনয়ামাস লক্ষ্মণঃ ॥ 30 ॥
বিচিত্রবালুকজলাং হংসসারসনাদিতাম্ ।
রেমে জনকরাজস্য় সুতা প্রেক্ষ্য় তদা নদীম্ ॥ 31 ॥
ক্রোশমাত্রং ততো গত্বা ভ্রাতরৌ রামলক্ষ্মণৌ ।
বহূন্মেধ্য়ান্মৃগান্হত্বা চেরতুর্যমুনাবনে ॥ 32 ॥
বিহৃত্য় তে বর্হিণপূগনাদিতে শুভে বনে বানরবারণায়ুতে ।
সমং নদীবপ্রমুপেত্য় সম্মতং নিবাস মাজগ্মু রদীনদর্শনাঃ ॥ 33 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে পংচপংচাশস্সর্গঃ ॥
