শ্রীমদ্বাল্মীকীয় রামাযণে অরণ্যকাংডম্ ।
অথ ষড্বিংশস্সর্গঃ ।
দূষণস্তু স্বকং সৈন্য়ং হন্যমানং নিরীক্ষ্য় সঃ ।
সংদিদেশ মহাবাহুর্ভীমবেগাংদুরাসদান্ ॥ 1 ॥
রাক্ষসান্পংচসহস্রান্সমরেষ্বনিবর্তিনঃ ।
তে শূলৈঃ পট্টিশৈঃ খংগৈ শিলাবর্ষৈর্দ্রুমৈরপি ॥ 2 ॥
শরবর্ষৈরবিচ্ছিন্নং ববর্ষুস্তং সমংততঃ ।
স দৃমাণাং শিলানাং চ বর্ষং প্রাণহরং মহত্ ॥ 3 ॥
প্রতিজগ্রাহ ধর্মাত্মা রাঘবস্তীক্ষ্ণসাযকৈঃ ।
প্রতিগৃহ্য় চ তদ্বর্ষং নিমীলিত ইবর্ষভঃ ॥ 4 ॥
রামঃ ক্রোধং পরং ভেজে বধার্থং সর্বরক্ষসাম্ ।
ততঃ ক্রোধসমাবিষ্টঃ প্রদীপ্ত ইব তেজসা ॥ 5 ॥
শরৈরবাকিরত্সৈন্য়ং সর্বতস্সহদূষণম্ ।
ততস্সেনাপতিঃ ক্রুদ্ধো দূষণশ্শত্রুদূষণঃ ॥ 6 ॥
শরৈরশনিকল্পৈস্তং রাঘবং সমবাকিরত্ ।
ততো রামস্সুসংকৃদ্ধঃ ক্ষুরেণাস্য় মহদ্ধনুঃ ॥ 7 ॥
চিচ্ছেদ সমরে বীরশ্চতুর্ভিশ্চতুরো হয়ান্ ।
হত্বা চাশ্বান্শরৈস্তীক্ষ্ণৈরর্ধচংদ্রেণ সারথেঃ ॥ 8 ॥
শিরো জহার তদ্রক্ষস্ত্রিভির্বিব্য়াধ বক্ষসি ।
স চ্ছিন্নধন্বা বিরথো হতাশ্বো হতসারথিঃ ॥ 9 ॥
জগ্রাহ গিরিশৃংগাভং পরিঘং রোমহর্ষণম্ ।
বেষ্টিতং কাংচনৈঃ পট্টৈর্দেবসৈন্যপ্রমর্দনম্ ॥ 10 ॥
আযসৈশ্শংকুভিস্তীক্ষ্ণৈঃ কীর্ণং পরবসোক্ষিতম্ ।
বজ্রাশনিসমস্পর্শং পরগোপুরদারণম্ ॥ 11 ॥
তং মহোরগসংকাশং প্রগৃহ্য় পরিঘং রণে ।
দূষণোঽভ্যদ্রবদ্রামং ক্রূরকর্মা নিশাচরঃ ॥ 12 ॥
তস্য়াভিপতমানস্য় দূষণস্য় স রাঘবঃ ।
দ্বাভ্য়াং শরাভ্য়াং চিচ্ছেদ সহস্তাভরণৌ ভুজৌ ॥ 13 ॥
ভ্রষ্টস্তস্য় মহাকায়ঃ পপাত রণমূর্ধনি ।
পরিঘশ্ছিন্নহস্তস্য় শক্রধ্বজ ইবাগ্রতঃ ॥ 14 ॥
স করাভ্য়াং বিকীর্ণাভ্য়াং পপাত ভুবি দূষণঃ ।
বিষাণাভ্য়াং বিশীর্ণাভ্য়াং মনস্বীব মহাগজঃ ॥ 15 ॥
তং দৃষ্ট্বা পতিতং ভূমৌ দূষণং নিহতং রণে ।
সাধুসাধ্বিতি কাকুত্স্থং সর্বভূতান্যপূজযন্ ॥ 16 ॥
এতস্মিন্নংতরে ক্রুদ্ধাস্ত্রয়ঃ সেনাগ্রয়ায়িনঃ ।
সংহৃত্য়াভ্যদ্রবন্ রামং মৃত্য়ুপাশাবপাশিতাঃ ॥ 17 ॥
মহাকপালঃ স্থূলাক্ষঃ প্রমাথী চ মহাবলঃ ।
মহাকপালো বিপুলং শূলমুদ্যম্য় রাক্ষসঃ ॥ 18 ॥
স্থূলাক্ষঃ পট্টিসং গৃহ্য় প্রমাথী চ পরশ্বধম্ ।
দৃষ্ট্বৈবাপততস্তূর্ণং রাঘবস্সাযকৈশ্শিতৈঃ ॥ 19 ॥
তীক্ষ্ণাগ্রৈঃ প্রতিজগ্রাহ সংপ্রাপ্তানতিথীনিব ।
মহাকপালস্য় শিরশ্চিচ্ছেদ পরমেষুভিঃ ॥ 20 ॥
অসংখ্য়েয়ৈস্তু বাণৌঘৈঃ প্রমমাথ প্রমাথিনম্ ।
স পপাত হতো ভূমৌ বিটপীব মহাদ্রুমঃ ॥ 21 ॥
স্থূলাক্ষস্য়াক্ষিণী তীক্ষ্ণৈঃ পূরয়ামাস সাযকৈঃ ।
দূষণস্য়ানুগান্পংচসহস্রান্কুপিতঃ ক্ষণাত্ ॥ 22 ॥
বাণৌঘৈঃ পংচসাহস্রৈরনযদ্যমসাদনম্ ।
দূষণং নিহতং দৃষ্ট্বা তস্য় চৈব পদানুগান্ ॥ 23 ॥
ব্য়াদিদেশ খরঃ ক্রুদ্ধঃ সেনাধ্যক্ষান্মহাবলান্ ।
অয়ং বিনিহতস্সংখ্য়ে দূষণস্সপদানুগঃ ॥ 24 ॥
মহত্য়া সেনয়া সার্ধং যুদ্ধ্বা রামং কুমানুষম্ ।
শস্ত্রৈর্নানাবিধাকারৈর্হনধ্বং সর্বরাক্ষসাঃ ॥ 25 ॥
এবমুক্ত্বা খরঃ ক্রুদ্ধো রামমেবাভিদুদ্রুবে ।
শ্য়েনগামী পৃথুগ্রীবো যজ্ঞশত্রুর্বিহংগমঃ ॥ 26 ॥
দুর্জয়ঃ করবীরাক্ষঃ পরুষঃ কালকার্মুকঃ ।
মেঘমালী মহামালী সর্পাস্য়ো রুধিরাশনঃ ॥ 27 ॥
দ্বাদশৈতে মহাবীর্য়া বলাধ্যক্ষাস্সসৈনিকাঃ ।
রামমেবাভ্যধাবংত বিসৃজংতশ্শরোত্তমান্ ॥ 28 ॥
ততঃ পাবকসংকাশৈর্হেমবজ্রবিভূষিতৈঃ ।
জঘান শেষং তেজস্বী তস্য় সৈন্যস্য় সাযকৈঃ ॥ 29 ॥
তে রুক্মপুংখা বিশিখাস্সধূমা ইব পাবকাঃ ।
নিজঘ্নুস্তানি রক্ষাংসি বজ্রা ইব মহাদ্রুমান্ ॥ 30 ॥
রক্ষসাং তু শতং রামশ্শতেনৈকেন কর্ণিনা ।
সহস্রং চ সহস্রেণ জঘান রণমূর্ধনি ॥ 31 ॥
তৈর্ভিন্নবর্মাভরণাশ্ছিন্নভিন্নশরাসনাঃ ।
নিপেতুশ্শোণিতাদিগ্ধা ধরণ্য়াং রজনীচরাঃ ॥ 32 ॥
তৈর্মুক্তকেশৈস্সমরে পতিতৈশ্শোণিতোক্ষিতৈঃ ।
আস্তীর্ণা বসুধা কৃত্স্না মহাবেদিঃ কুশৈরিব ॥ 33 ॥
ক্ষণেন তু মহাঘোরং বনং নিহতরাক্ষসম্ ।
বভূব নিরযপ্রখ্য়ং মাংসশোণিতকর্দমম্ ॥ 34 ॥
চতুর্দশ সহস্রাণি রক্ষসাং ভীমকর্মণাম্ ।
হতান্য়েকেন রামেণ মানুষেণ পদাতিনা ॥ 35 ॥
তস্য় সৈন্যস্য় সর্বস্য় খরশ্শেষো মহারথঃ ।
রাক্ষসস্ত্রিশিরাশ্চৈব রামশ্চ রিপুসূদনঃ ॥ 36 ॥
শেষা হতা মহাসত্বা রাক্ষসা রণমূর্ধনি ।
ঘোরা দুর্বিষহাঃ সর্বে লক্ষ্মণস্য়াগ্রজেন তে ॥ 37 ॥
ততস্তু তদ্ভীমবলং মহাহবে সমীক্ষ্য় রামেণ হতং বলীযসা ।
রথেন রামং মহতা খরস্তদা সমাসসাদেংদ্র ইবোদ্যতাশনিঃ ॥ 38 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে ষড্বিংশস্সর্গঃ ॥
