শ্রীমদ্বাল্মীকীয় রামাযণে বালকাংডম্ ।
অথ পংচসপ্ততিতমস্সর্গঃ ।
রাম দাশরথে রাম বীর্য়ং তে শ্রূযতেঽদ্ভুতম্ ।
ধনুষো ভেদনং চৈব নিখিলেন ময়া শ্রুতম্ ॥ 1 ॥
তদদ্ভুতমচিংত্য়ং চ ভেদনং ধনুষস্ত্বয়া ।
তচ্ছ্রুত্বাঽহমনুপ্রাপ্তো ধনুর্গৃহ্য়াপরং শুভম্ ॥ 2 ॥
তদিদং ঘোরসংকাশং জামদগ্ন্য়ং মহদ্ধনুঃ ।
পূরযস্ব শরেণৈব স্ববলং দর্শযস্ব চ ॥ 3 ॥
তদহং তে বলং দৃষ্ট্বা ধনুষোঽস্য় প্রপূরণে ।
দ্বংদ্বয়ুদ্ধং প্রদাস্য়ামি বীর্যশ্লাঘ্যস্য় রাঘব ॥ 4 ॥
তস্য় তদ্বচনং শ্রুত্বা রাজা দশরথস্তদা ।
বিষণ্ণবদনো দীনঃ প্রাংজলির্বাক্যমব্রবীত্ ॥ 5 ॥
ক্ষত্ররোষাত্প্রশাংতস্ত্বং ব্রাহ্মণশ্চ মহাযশাঃ ।
বালানাং মম পুত্রাণামভয়ং দাতুমর্হসি ॥ 6 ॥
ভার্গবাণাং কুলে জাতঃ স্বাধ্য়াযব্রতশালিনাম্ ।
সহাস্রাক্ষে প্রতিজ্ঞায় শস্ত্রং নিক্ষিপ্তবানসি ॥ 7 ॥
স ত্বং ধর্মপরো ভূত্বা কাশ্যপায় বসুংধরাম্ ।
দত্ত্বা বনমুপাগম্য় মহেংদ্রকৃতকেতনঃ ॥ 8 ॥
মম সর্ববিনাশায় সংপ্রাপ্তস্ত্বং মহামুনে ।
ন চৈকস্মিন্ হতে রামে সর্বে জীবামহে বযম্ ॥ 9 ॥
ব্রুবত্য়েবং দশরথে জামদগ্ন্য়ঃ প্রতাপবান্ ।
অনাদৃত্য়ৈব তদ্বাক্য়ং রামমেবাভ্যভাষত ॥ 10 ॥
ইমে দ্বে ধনুষী শ্রেষ্ঠে দিব্য়ে লোকাভিবিশ্রুতে ।
দৃঢে বলবতী মুখ্য়ে সুকৃতে বিশ্বকর্মণা ॥ 11 ॥
অতিসৃষ্টং সুরৈরেকং ত্র্য়ংবকায় যুয়ুত্সবে ।
ত্রিপুরঘ্নং নরশ্রেষ্ঠ ভগ্নং কাকুত্স্থ যত্ত্বয়া ॥ 12 ॥
ইদং দ্বিতীয়ং দুর্ধর্ষং বিষ্ণোর্দত্তং সুরোত্তমৈঃ ।
তদিদং বৈষ্ণবং রাম ধনুঃ পরমভাস্বরম্ ।
সমানসারং কাকুত্স্থ রৌদ্রেণ ধনুষা ত্বিদম্ ॥ 13 ॥
তদা তু দেবতাস্সর্বাঃ পৃচ্ছংতি স্ম পিতামহম্ ।
শিতিকংঠস্য় বিষ্ণোশ্চ বলাবলনিরীক্ষয়া ॥ 14 ॥
অভিপ্রায়ং তু বিজ্ঞায় দেবতানাং পিতামহঃ ।
বিরোধং জনয়ামাস তয়ো স্সত্যবতাং বরঃ ॥ 15 ॥
বিরোধে চ মহদ্য়ুদ্ধমভবদ্রোমহর্ষণম্ ।
শিতিকংঠস্য় বিষ্ণোশ্চ পরস্পরজিগীষুণোঃ ॥ 16 ॥
তদা তু জৃংভিতং শৈবং ধনুর্ভীমপরাক্রমম্ ।
হুংকারেণ মহাদেব স্তংভিতোঽথ ত্রিলোচনঃ ॥ 17 ॥
দেবৈস্তদা সমাগম্য় সর্ষিসঘৈ স্সচারণৈঃ ।
যাচিতৌ প্রশমং তত্র জগ্মতুস্তৌ সুরোত্তমৌ ॥ 18 ॥
জৃংভিতং তদ্ধনুর্দ্রৃষ্ট্বা শৈবং বিষ্ণুপরাক্রমৈঃ ।
অধিকং মেনিরে বিষ্ণুং দেবা স্সর্ষিগণাস্তদা ॥ 19 ॥
ধনূ রুদ্রস্তু সংকৃদ্ধো বিদেহেষু মহাযশাঃ ।
দেবরাতস্য় রাজর্ষের্দদৌ হস্তে সসাযকম্ ॥ 20 ॥
ইদং চ বৈষ্ণবং রাম ধনুঃ পরপুরংজযম্ ।
ঋচীকে ভার্গবে প্রাদাদ্বিষ্ণুঃ স ন্য়াসমুত্তমম্ ॥ 21 ॥
ঋচীকস্তু মহাতেজাঃ পুত্রস্য়াপ্রতিকর্মণঃ ।
পিতুর্মম দদৌ দিব্য়ং জমদগ্নের্মহাত্মনঃ ॥ 22 ॥
ন্যস্তশস্ত্রে পিতরি মে তপোবলসমন্বিতে ।
অর্জুনো বিদধে মৃত্য়ুং প্রাকৃতাং বুদ্ধিমাস্থিতঃ ॥ 23 ॥
বধমপ্রতিরূপং তু পিতু শ্শৃত্বা সুদারুণম্ ।
ক্ষত্রমুত্সাদযন্রোষাজ্জাতং জাতমনেকশঃ ॥ 24 ॥
পৃথিবীং চাখিলাং প্রাপ্য় কাশ্যপায় মহাত্মনে ।
যজ্ঞস্য়াংতে তদা রাম দক্ষিণাং পুণ্যকর্মণে ।
দত্ত্বা মহেংদ্রনিলযস্তপোবলসমন্বিতঃ ॥ 25 ॥
অদ্যতূত্তমবীর্য়েণ ত্বয়া রাম মহাবল ।
শ্রুতবান্ ধনুষো ভেদং ততোঽহং দ্রুতমাগতঃ ॥ 26 ॥
তদিদং বৈষ্ণবং রাম পিতৃপৈতামহং মহত্ ।
ক্ষত্রধর্মং পুরস্কৃত্য় গৃহ্ণীষ্ব ধনুরুত্তমম্ ॥ 27 ॥
যোজযস্ব ধনুশ্শ্রেষ্ঠে শরং পরপুরংজযম্ ।
যদি শক্নোষি কাকুত্স্থ দ্বংদ্বং দাস্য়ামি তে ততঃ ॥ 28 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে পংচসপ্ততিতমস্সর্গঃ ॥
