শ্রীমদ্বাল্মীকীয় রামাযণে বালকাংডম্ ।
অথ ত্রিচত্বারিংশস্সর্গঃ ।
দেবদেবে গতে তস্মিন্ সোঽংগুষ্ঠাগ্রনিপীডিতাম্ ।
কৃত্বা বসুমতীং রাম সংবত্সরমুপাসত ॥ 1 ॥
অথ সংবত্সরে পূর্ণে সর্বলোকনমস্কৃতঃ ।
উমাপতিঃ পশুপতী রাজানমিদমব্রবীত্ ॥ 2 ॥
প্রীতস্তেঽহং নরশ্রেষ্ঠ করিষ্য়ামি তব প্রিযম্ ।
শিরসা ধারয়িষ্য়ামি শৈলরাজসুতামহম্ ॥ 3 ॥
ততো হৈমবতী জ্য়েষ্ঠা সর্বলোকনমস্কৃতা ।
তদা সাতিমহদ্রূপং কৃত্বা বেগং চ দুস্সহম্ ॥ 4 ॥
আকাশাদপতদ্রাম শিবে শিবশিরস্য়ুত ।
অচিংতযচ্চ সা দেবী গংগা পরমদুর্ধরা ॥ 5 ॥
বিশাম্যহং হি পাতালং স্রোতসা গৃহ্য় শংকরম্ ।
তস্য়াবলেপনং জ্ঞাত্বা ক্রুদ্ধস্তু ভগবান্ হরঃ ॥ 6 ॥
তিরোভাবয়িতুং বুদ্ধিং চক্রে ত্রিনযনস্তদা ।
সা তস্মিন্ পতিতা পুণ্য়া পুণ্য়ে রুদ্রস্য় মূর্ধনি ॥ 7 ॥
হিমবত্প্রতিমে রাম জটামংডলগহ্বরে ।
সা কথংচিন্মহীং গংতুং নাশক্নোদ্যত্নমাস্থিতা ॥ 8 ॥
নৈব নির্গমনং লেভে জটামংডলমোহিতা ।
তত্রৈবাবংভ্রমদ্দেবী সংবত্সরগণান্ বহূন্ ॥ 9 ॥
তামপশ্যন্পুনস্তত্র তপঃ পরমমাস্থিতঃ ।
অনেন তোষিতশ্চাভূদত্যর্থং রঘুনংদন ॥ 10 ॥
বিসসর্জ ততো গংগাং হরো বিংদুসরঃ প্রতি ।
তস্য়াং বিসৃজ্যমানায়াং সপ্তস্রোতাংসি জজ্ঞিরে ॥ 11 ॥
হ্লাদিনী পাবনী চৈব নলিনী চ তথাঽপরা ।
তিস্রঃ প্রাচীং দিশং জগ্মুঃ গংগাশ্শিবজলাশ্শুভাঃ ॥ 12 ॥
সুচক্ষুশ্চৈব সীতা চ সিংধুশ্চৈব মহানদী ।
তিস্রস্ত্বেতা দিশং জগ্মুঃ প্রতীচীং তু শুভোদকাঃ ॥ 13 ॥
সপ্তমী চান্বগাত্তাসাং ভগীরথমথো নৃপম্ ।
ভগীরথোঽপি রাজর্ষির্দিব্য়ং স্য়ংদনমাস্থিতঃ ॥ 14 ॥
প্রায়াদগ্রে মহাতেজা গংগা তং চাপ্যনুব্রজত্ ।
গগনাচ্ছংকরশিরস্ততো ধরণিমাশ্রিতা ॥ 15 ॥
ব্যসর্পত জলং তত্র তীব্রশব্দপুরস্কৃতম্ ।
মত্স্যকচ্ছপসংঘৈশ্চ শিংশুমারগণৈস্তদা ॥ 16 ॥
পতদ্ভিঃ পতিতৈশ্চান্য়ৈর্ব্যরোচত বসুংধরা ।
ততো দেবর্ষিগংধর্বা যক্ষসিদ্ধগণাস্তদা ॥ 17 ॥
ব্যলোকয়ংত তে তত্র গগনাদ্গাং গতাং তথা ।
বিমানৈর্নগরাকারৈর্হয়ৈর্গজবরৈস্তদা ॥ 18 ॥
পারিপ্লবগতৈশ্চাপি দেবতাস্তত্র বিষ্ঠিতাঃ ।
তদদ্ভুততমং লোকে গংগাপতনমুত্তমম্ ॥ 19 ॥
দিদৃক্ষবো দেবগণাঃ সমীয়ুরমিতৌজসঃ ।
সংপতদ্ভিস্সুরগণৈস্তেষাং চাভরণৌজসা ॥ 20 ॥
শতাদিত্যমিবাভাতি গগনং গততোযদম্ ।
শিংশুমারোরগগণৈর্মীনৈরপি চ চংচলৈঃ ॥ 21 ॥
বিদ্য়ুদ্ভিরিব বিক্ষিপ্তমাকাশমভবত্তদা ।
পাংডরৈস্সলিলোত্পীডৈঃ কীর্যমাণৈস্সহস্রধা ॥ 22 ॥
শারদাভ্রৈরিবাকীর্ণং গগনং হংসসংপ্লবৈঃ ।
ক্বচিদ্দ্রুততরং যাতি কুটিলং ক্বচিদাযতম্ ॥ 23 ॥
বিনতং ক্বচিদুদ্ধূতং ক্বচিদ্য়াতি শনৈশ্শনৈঃ ।
সলিলেনৈব সলিলং ক্বচিদভ্য়াহতং পুনঃ ॥ 24 ॥
মুহুরূর্ধ্বমুখং গত্বা পপাত বসুধাতলম্ ।
তচ্ছংকরশিরোভ্রষ্টং ভ্রষ্টং ভূমিতলে পুনঃ ॥ 25 ॥
ব্যরোচত তদা তোয়ং নির্মলং গতকল্মষম্ ।
তত্র দেবর্ষিগংধর্বা বসুধাতলবাসিনঃ ॥ 26 ॥
ভবাংগপতিতং তোয়ং পবিত্রমিতি পস্পৃশুঃ ।
শাপাত্প্রপতিতা যে চ গগনাদ্বসুধাতলম্ ॥ 27 ॥
কৃত্বা তত্রাভিষেকং তে বভূবুর্গতকল্মষাঃ ।
ধূতপাপাঃ পুনস্তেন তোয়েনাথ সুভাস্বতা ॥ 28 ॥
পুনরাকাশমাবিশ্য় স্বান্ লোকান্ প্রতিপেদিরে ।
মুমুদে মুদিতো লোকস্তেন তোয়েন ভাস্বতা ॥ 29 ॥
কৃতাভিষেকো গংগায়াং বভূব বিগতক্লমঃ ।
ভগীরথোঽপি রাজার্ষির্দিব্য়ং স্য়ংদনমাস্থিতঃ ।
প্রায়াদগ্রে মহাতেজাস্তং গংগা পৃষ্ঠতোঽন্বগাত্ ॥ 30 ॥
দেবাস্সর্ষিগণাঃ সর্বে দৈত্যদানবরাক্ষসাঃ ॥ 31 ॥
গংধর্বযক্ষপ্রবরাস্সকিন্নরমহোরগাঃ ।
সর্বাশ্চাপ্সরসো রাম ভগীরথরথানুগাম্ ॥ 32 ॥
গংগামন্বগমন্ প্রীতাস্সর্বে জলচরাশ্চ যে ।
যতো ভগীরথো রাজা ততো গংগাযশস্বিনী ॥ 33 ॥
জগাম সরিতাং শ্রেষ্ঠা সর্বপাপপ্রণাশিনী ।
ততো হি যজমানস্য় জহ্নোরদ্ভুতকর্মণঃ ॥ 34 ॥
গংগা সংপ্লাবয়ামাস যজ্ঞবাটং মহাত্মনঃ ।
তস্য়াবলেপনং জ্ঞাত্বা ক্রুদ্ধো যজ্বা তু রাঘব ॥ 35 ॥
অপিবচ্চ জলং সর্বং গংগায়াঃ পরমাদ্ভুতম্ ।
ততো দেবাস্সগংধর্বা ঋষযশ্চ সুবিস্মিতাঃ ॥ 36 ॥
পূজয়ংতি মহাত্মানং জহ্নুং পুরুষসত্তমম্ ।
গংগাং চাপি নয়ংতি স্ম দুহিতৃত্বে মহাত্মনঃ ॥ 37 ॥
ততস্তুষ্টো মহাতেজাশ্শ্রোত্রাভ্য়ামসৃজত্ পুনঃ ॥ 38 ॥
তস্মাজ্জহ্নুসুতা গংগা প্রোচ্যতে জাহ্নবীতিচ ।
জগাম চ পুনর্গংগা ভগীরথরথানুগা ।
সাগরং চাপি সংপ্রাপ্তা সা সরিত্প্রবরা তদা ॥ 39 ॥
রসাতলমুপাগচ্ছত্সিদ্ধ্যর্থং তস্য় কর্মণঃ ।
ভগীরথোঽপি রাজর্ষিঃ গংগামাদায় যত্নতঃ ।
পিতামহান্ ভস্মকৃতানপশ্যদ্দীনচেতনঃ ॥ 40 ॥
অথ তদ্ভস্মনাং রাশিং গংগাসলিলমুত্তমম্ ।
প্লাবযদ্ধূতপাপ্মানস্স্বর্গং প্রাপ্তা রঘূত্তম ॥ 41 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে ত্রিচত্বারিংশস্সর্গঃ ॥
