শ্রীমদ্বাল্মীকীয় রামাযণে সুংদরকাংডম্ ।
অথ সপ্তদশস্সর্গঃ ।
ততঃ কমুদষংডাভো নির্মলং নির্মলোদয়ঃ ।
প্রজগাম নভশ্চংদ্রো হংসো নীলমিবোদকম্ ॥ 1 ॥
সাচিব্যমিব কুর্বন্ স প্রভয়া নির্মলপ্রভঃ ।
চংদ্রমা রশ্মিভিশ্শীতৈস্সিষেবে পবনাত্মজম্ ॥ 2 ॥
স দদর্শ ততঃ সীতাং পূর্ণচংদ্রনিভাননাম্ ।
শোকভারৈরিব ন্যস্তাং ভারৈর্নাবমিবাংভসি ॥ 3 ॥
দিদৃক্ষমাণো বৈদেহীং হনুমান্মারুতাত্মজঃ ।
স দদর্শাবিদূরস্থা রাক্ষসীর্ঘোরদর্শনাঃ ॥ 4 ॥
একাক্ষীমেককর্ণাং চ কর্ণপ্রাবরণাং তথা ।
অকর্ণাং শংকুকর্ণাং চ মস্তকোচ্ছ্বাসনাসিকাম্ ॥ 5 ॥
অতিকায়োত্তমাংগীং চ তনুদীর্ঘশিরোধরাম্ ।
ধ্বস্তকেশীং তথাঽকেশীং কেশকংবলধারিণীম্ ॥ 6 ॥
লংবকর্ণললাটাং চ লংবোদরপয়োধরাম্ ।
লংবোষ্ঠীং চুবুকোষ্ঠীং চ লংবাস্য়াং লংবজানুকাম্ ॥ 7 ॥
হ্রস্বাং দীর্ঘাং তথা কুব্জাং বিকটাং বামনাং তথা ।
করালাং ভুগ্নবক্ত্রাং চ পিংগাক্ষীং বিকৃতাননাম্ ॥ 8 ॥
বিকৃতাঃ পিংগলাঃ কালীঃ ক্রোধনাঃ কলহপ্রিয়াঃ ।
কালাযসমহাশূলকূটমুদ্গরধারিণীঃ ॥ 9 ॥
বরাহমৃগশার্দূলমহিষাজশিবামুখীঃ ।
গজোষ্ট্রহযপাদীশ্চ নিখাতশিরসোঽপরাঃ ॥ 10 ॥
একহস্তৈকপাদাশ্চ খরকর্ণ্যশ্বকর্ণিকাঃ ।
গোকর্ণীর্হস্তিকর্ণীশ্চ হরিকর্ণীস্তথাপরাঃ ॥ 11 ॥
অনাসা অতিনাসাশ্চ তির্যঙ্নাসা বিনাসিকাঃ ।
গজসন্নিভনাসাশ্চ ললাটোচ্ছবাসনাসিকাঃ ॥ 12 ॥
হস্তিপাদা মহাপাদা গোপাদাঃ পাদচূলিকাঃ ।
অতিমাত্রশিরোগ্রীবা অতিমাত্রকুচোদরীঃ ॥ 13 ॥
অতিমাত্রাস্যনেত্রাশ্চ দীর্ঘজিহ্বানখাস্তথা ।
অজামুখীর্হস্তিমুখীর্গোমুখীস্সূকরীমুখীঃ ॥ 14 ॥
হয়োষ্ট্রখরবক্ত্রাশ্চ রাক্ষসীর্ঘোরদর্শনাঃ ।
শূলমুদ্গরহস্তাশ্চ ক্রোধনাঃ কলহপ্রিয়াঃ ॥ 15 ॥
করালা ধূম্রকেশীশ্চ রাক্ষসীর্বিকৃতাননাঃ ।
পিবংতীঃ সততং পানং সদা মাংসসুরাপ্রিয়াঃ ॥ 16 ॥
মাংসশোণিতদিগ্ধাংগীর্মাংসশোণিতভোজনাঃ ।
তা দদর্শ কপিশ্রেষ্ঠো রোমহর্ষণদর্শনাঃ ॥ 17 ॥
স্কংধবংতমুপাসীনাঃ পরিবার্য় বনস্পতিম্ ।
তস্য়াধস্তাচ্চ তাং দেবীং রাজপুত্রীমনিংদিতাম্ ॥ 18 ॥
লক্ষয়ামাস লক্ষ্মীবান্ হনুমান্ জনকাত্মজাম্ ।
নিষ্প্রভাং শোকসংতপ্তাং মলসংকুলমূর্ধজাম্ ॥ 19 ॥
ক্ষীণপুণ্য়াং চ্য়ুতাং ভূমৌ তারাং নিপতিতামিব ।
চারিত্রব্যপদেশাঢ্য়াং ভর্তৃদর্শনদুর্গতাম্ ॥ 20 ॥
ভূষণৈরুত্তমৈর্হীনাং ভর্তৃবাত্সল্যভূষণাম্ ।
রাক্ষসাধিপসংরুদ্ধাং বংধুভিশ্চ বিনা কৃতাম্ ॥ 21 ॥
বিয়ূথাং সিংহসংরুদ্ধাং বদ্ধাং গজবধূমিব ।
চংদ্ররেখাং পয়োদাংতে শারদাভ্রৈরিবাবৃতাম্ ॥ 22 ॥
ক্লিষ্টরূপামসংস্পর্শাদয়ুক্তামিব বল্লকীম্ ।
সীতাং ভর্তৃবশে যুক্তাময়ুক্তাং রাক্ষসীবশে ॥ 23 ॥
অশোকবনিকামথ্য়ে শোকসাগরমাপ্লুতাম্ ।
তাভিঃ পরিবৃতাং তত্র সগ্রহামিব রোহিণীম্ ॥ 24 ॥
দদর্শ হনুমান্ দেবীং লতামকুসুমামিব ।
সা মলেন চ দিগ্ধাংগী বপুষা চাপ্যলংকৃতা ॥ 25 ॥
মৃণালী পংকদিগ্ধেব বিভাতি ন বিভাতি চ ।
মলিনেন তু বস্ত্রেণ পরিক্লিষ্টেন ভামিনীম্ ॥ 26 ॥
সংবৃতাং মৃগশাবাক্ষীং দদর্শ হনুমান্ কপিঃ ।
তাং দেবীং দীনবদনামদীনাং ভর্তৃতেজসা ॥ 27 ॥
রক্ষিতাং স্বেন শীলেন সীতামসিতলোচনাম্ ।
তাং দৃষ্ট্বা হনুমান্ সীতাং মৃগশাবনিভেক্ষণাম্ ।
মৃগকন্য়ামিব ত্রস্তাং বীক্ষমাণাং সমংততঃ ॥ 28 ॥
দহংতীমিব নিঃশ্বাসৈর্বৃক্ষান্ পল্লবধারিণঃ ।
সংঘাতমিব শোকানাং দুঃখস্য়োর্মিমিবোত্থিতাম্ ॥ 29 ॥
তাং ক্ষমাং সুবিভক্তাংগী বিনাভরণশোভিনীম্ ॥ 30 ॥
প্রহর্ষমতুলং লেভে মারুতিঃ প্রেক্ষ্য় মৈথিলীম্ ।
হর্ষজানি চ সোঽশ্রূণি তাং দৃষ্ট্বা মদিরেক্ষণাম্ ।
মুমুচে হনুমাংস্তত্র নমশ্চক্রে চ রাঘবম্ ॥ 31 ॥
নমস্কৃত্বা চ রামায় লক্ষ্মণায় চ বীর্যবান্ ।
সীতাদর্শনসংহৃষ্টো হনুমান্ সংবৃতোঽভবত্ ॥ 32 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে সপ্তদশস্সর্গঃ ॥
