শ্রীমদ্বাল্মীকীয় রামাযণে অয়োধ্য়াকাংডম্ ।
অথ সপ্তষষ্টিতমস্সর্গঃ ।
আক্রংদিতনিরানংদা সাস্রকংঠজনাকুলা ।
অয়োধ্য়ায়ামবততা সা ব্যতীয়ায় শর্বরী ॥ 1 ॥
ব্যতীতায়াং তু শর্বর্য়ামাদিত্যস্য়োদয়ে ততঃ ।
সমেত্য় রাজকর্তারঃ সভামীয়ুর্দ্বিজাতয়ঃ ॥ 2 ॥
মার্কংডেয়োঽথ মৌদ্গল্য়ো বামদেবশ্চ কাশ্যপঃ ।
কাত্য়াযনো গৌতমশ্চ জাবালিশ্চ মহাযশাঃ ॥ 3 ॥
এতে দ্বিজা স্সহামাত্য়ৈঃ পৃথগ্বা চ মুদীরযন্ ।
বসিষ্ঠমেবাভিমুখাঃ শ্রেষ্ঠং রাজপুরোহিতম্ ॥ 4 ॥
অতীতা শর্বরী দুঃখং যা নো বর্ষশতোপমা ।
অস্মিন্পংচত্বমাপন্নে পুত্রশোকেন পার্থিবে ॥ 5 ॥
স্বর্গতশ্চ মহারাজো রামশ্চারণ্যমাশ্রিতঃ ।
লক্ষ্মণশ্চাপি তেজস্বী রামেণৈব গতস্সহ ॥ 6 ॥
উভৌ ভরতশত্রুঘ্নৌ কেকয়েষু পরংতপৌ ।
পুরে রাজগৃহে রম্য়ে মাতামহনিবেশনে ॥ 7 ॥
ইক্ষ্বাকূণামিহাদ্য়ৈব কশ্চিদ্রাজা বিধীযতাম্ ।
অরাজকং হি নো রাষ্ট্রং বিনাশং সমবাপ্নুয়াত্ ॥ 8 ॥
নারাজকে জনপদে বিদ্য়ুন্মালী মহাস্বনঃ ।
অভিবর্ষতি পর্জন্য়ো মহীং দিব্য়েন বারিণা ॥ 9 ॥
নারাজকে জনপদে বীজমুষ্টিঃ প্রকীর্যতে ।
নারাজকে পিতুঃ পুত্রো ভার্য়া বা বর্ততে বশে ॥ 10 ॥
নারাজকে ধনং চাস্তি নাস্তি ভার্য়া প্যরাজকে ।
ইদ মত্য়াহিতং চান্যত্কুতস্সত্য় মরাজকে ॥ 11 ॥
নারাজকে জনপদে কারয়ংতি সভাং নরাঃ ।
উদ্য়ানানি চ রম্য়াণি হৃষ্টাঃ পুণ্যগৃহাণি চ ॥ 12 ॥
নারাজকে জনপদে যজ্ঞশীলা দ্বিজাতয়ঃ ।
সত্রাণ্যন্বাসতে দাংতা ব্রাহ্মণা স্সংশিতব্রতাঃ ॥ 13 ॥
নারাজকে জনপদে মহাযজ্ঞেষু যজ্বনঃ ।
ব্রাহ্মণা বসুসংপন্না বিসৃজংত্য়াপ্তদক্ষিণাঃ ॥ 14 ॥
নারাজকে জনপদে প্রভূতনটনর্তকাঃ ।
উত্সবাশ্চ সমাজাশ্চ বর্ধংতে রাষ্ট্রবর্ধনাঃ ॥ 15 ॥
নারাজকে জনপদে সিদ্ধার্থা ব্যবহারিণঃ ।
কথাভিরনুরজ্য়ংতে কথাশীলাঃ কথাপ্রিয়ৈঃ ॥ 16 ॥
নারাজকে জনপদে উদ্য়ানানি সমাগতাঃ ।
সায়াহ্নে ক্রীডিতুং যাংতি কুমার্য়ো হেমভূষিতাঃ ॥ 17 ॥
নারাজকে জনপদে বাহনৈ শশীঘ্রগামিভিঃ ।
নরা নির্য়াংত্যরণ্য়ানি নারীভিস্সহ কামিনঃ ॥ 18 ॥
নারাজকে জনপদে ধনবংতস্সুরক্ষিতাঃ ।
শেরতে বিবৃতদ্বারাঃ কৃষিগোরক্ষজীবিনঃ ॥ 19 ॥
নারাজকে জনপদে বদ্ধঘংটাবিষাণিনঃ ।
অটংতি রাজমার্গেষু কুংজরা ষষ্টিহাযনাঃ ॥ 20 ॥
নারাজকে জনপদে শরান্সংততমস্যতাম্ ।
শ্রূযতে তলনির্ঘোষ ইষ্বস্ত্রাণামুপাসনে ॥ 21 ॥
নারাজকে জনপদে বণিজো দূরগামিনঃ ।
গচ্ছংতি ক্ষেমমধ্বানং বহুপণ্যসমাচিতাঃ ॥ 22 ॥
নারাজকে জনপদে চরত্য়েকচরো বশী ।
ভাবযন্নাত্মনাঽত্মানং যত্র সায়ংগৃহো মুনিঃ ॥ 23 ॥
নারাজকে জনপদে যোগক্ষেমং প্রবর্ততে ।
নচাপ্যরাজকে সেনা শত্রূন্বিষহতে যুধি ॥ 24 ॥
নারাজকে জনপদে হৃষ্টৈঃ পরমবাজিভিঃ ।
নরাস্সংয়াংতি সহসা রথৈশ্চ পরিমংডিতাঃ ॥ 25 ॥
নারাজকে জনপদে নরাশ্শাস্ত্রবিশারদাঃ ।
সংবদংতোঽবতিষ্ঠংতে বনেষূপবনেষু চ ॥ 26 ॥
নারাজকে জনপদে মাল্যমোদকদক্ষিণাঃ ।
দেবতাভ্যর্চনার্থায় কল্প্য়ংতে নিযতৈর্জনৈঃ ॥ 27 ॥
নারাজকে জনপদে চংদনাগরুরূষিতাঃ ।
রাজপুত্রা বিরাজংতে বসংত ইব শাখিনঃ ॥ 28 ॥
যথা হ্যনুদকা নদ্য়ঃ যথা বাঽপ্যতৃণং বনম্ ।
অগোপালা যথা গাবস্তথা রাষ্ট্রমরাজকম্ ॥ 29 ॥
নারাজকে জনপদে স্বকং ভবতি কস্যচিত্ ।
মত্স্য়া ইব নরা নিত্য়ং ভক্ষয়ংতি পরস্পরম্ ॥ 30 ॥
যে হি সংভিন্নমর্য়াদা নাস্তিকাশ্ছিন্নসংশয়াঃ ।
তেঽপি ভাবায় কল্পংতে রাজদংডনিপীডিতাঃ ॥ 31 ॥
যথা দৃষ্টি শ্শরীরস্য় নিত্যমেব প্রবর্ততে ।
তথা নরেংদ্রো রাষ্ট্রস্য় প্রভবস্সত্যধর্ময়োঃ ॥ 32 ॥
রাজা সত্য়ং চ ধর্মশ্চ রাজা কুলবতাং কুলম্ ।
রাজা মাতা পিতা চৈব রাজা হিতকরো নৃণাম্ ॥ 33 ॥
যমো বৈশ্রবণ শ্শক্রঃ বরুণশ্চ মহাবলঃ ।
বিশেষ্য়ংতে নরেংদ্রেণ বৃত্তেন মহতা ততঃ ॥ 34 ॥
অহো তম ইবেদং স্য়ান্নপ্রজ্ঞায়েত কিংচন ।
রাজা চে ন্ন ভবে ল্লোকে বিভজ সাধ্বসাধুনী ॥ 35 ॥
জীবত্যপি মহারাজে তবৈব বচনং বযম্ ।
নাতিক্রমামহে সর্বে বেলাং প্রাপ্য়েব সাগরঃ ॥ 36 ॥
স ন স্সমীক্ষ্য় দ্বিজবর্য় বৃত্তং নৃপং বিনা রাজ্যমরণ্যভূতম্ ।
কুমারমিক্ষ্বাকুসুতং বদান্য়ং ত্বমেব রাজানমিহাভিষিংচ ॥ 37 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে সপ্তষষ্টিতমস্সর্গঃ ॥
