śrīmadvālmīkīya rāmāyaṇē bālakāṇḍam ।
atha ēkasaptatitamassargaḥ ।
ēvaṃ bruvāṇaṃ janakaḥ pratyuvācha kṛtāñjaliḥ ।
śrōtumarhasi bhadraṃ tē kulaṃ naḥ parikīrtitam ॥ 1 ॥
pradānē hi muniśrēṣṭha kulaṃ niravaśēṣataḥ ।
vaktavyaṃ kulajātēna tannibōdha mahāmunē ॥ 2 ॥
rājā'bhūt triṣu lōkēṣu viśruta ssvēna karmaṇā ।
nimiḥ paramadharmātmā sarvasattvavatāṃ varaḥ ॥ 3 ॥
tasya putrōmithirnāma mithilā yēna nirmitā ।
prathamō janakō nāma janakādapyudāvasuḥ ॥ 4 ॥
udāvasōstu dharmātmā jātō vai nandivardhanaḥ ।
nandivardhanaputrastu sukēturnāma nāmataḥ ॥ 5 ॥
sukētōrapi dharmātmā dēvarātō mahābalaḥ ।
dēvarātasya rājarṣērbṛhadratha iti smṛtaḥ ॥ 6 ॥
bṛhadrathasya śūrō'bhūnmahāvīraḥ pratāpavān ।
mahāvīrasya dhṛtimān sudhṛtissatyavikramaḥ ॥ 7 ॥
sudhṛtērapi dharmātmā dṛṣṭakētussudhārmikaḥ ।
dṛṣṭakētōstu rājarṣērharyaśva iti viśrutaḥ ॥ 8 ॥
haryaśvasya maruḥ putrō marōḥ putraḥ pratindhakaḥ ।
pratindhakasya dharmātmā rājā kīrtirathassutaḥ ॥ 9 ॥
putraḥ kīrtirathasyāpi dēvamīḍha iti smṛtaḥ ।
dēvamīḍhasya vibudhō vibudhasya mahīdhrakaḥ ॥ 10 ॥
mahīdhrakasutō rājā kīrtirātō mahābalaḥ ।
kīrtirātasya rājarṣērmahārōmā vyajāyata ॥ 11 ॥
mahārōmṇastu dharmātmā svarṇarōmā vyajāyata ।
svarṇarōmṇastu rājarṣērhrasvarōmā vyajāyata ॥ 12 ॥
tasya putradvayaṃ jajñē dharmajñasya mahātmanaḥ ।
jyēṣṭhō'hamanujō bhrātā mama vīraḥ kuśadhvajaḥ ॥ 13 ॥
māṃ tu jyēṣṭhaṃ pitā rājyē sō'bhiṣichya narādhipaḥ ।
kuśadhvajaṃ samāvēśya bhāraṃ mayi vanaṃ gataḥ ॥ 14 ॥
vṛddhē pitari svaryātē dharmēṇa dhuramāvaham ।
bhrātaraṃ dēvasaṅkāśaṃ snēhātpaśyan kuśadhvajam ॥ 15 ॥
kasya chittvathakālasya sāṅkāśyādagamatpurāt ।
sudhanvā vīryavānrājā mithilāmavarōdhakaḥ ॥ 16 ॥
sa cha mē prēṣayāmāsa śaivaṃ dhanuranuttamam ।
sītā kanyā cha padmākṣī mahyaṃ vai dīyatāmiti ॥ 17 ॥
tasyāpradānādbrahmarṣē yuddhamāsīnmayā saha ।
sa hatō'bhimukhō rājā sudhanvā tu mayā raṇē ॥ 18 ॥
nihatya taṃ muniśrēṣṭha sudhanvānaṃ narādhipam ।
sāṅkāśyē bhrātaraṃ vīramabhyaṣiñchaṃ kuśadhvajam ॥ 19 ॥
kanīyānēṣa mē bhrātā ahaṃ jyēṣṭhō mahāmunē ।
dadāmi paramaprītō vadhvau tē munipuṅgava ॥ 20 ॥
sītāṃ rāmāya bhadraṃ tē ūrmilā lakṣmaṇāya cha ।
vīryaśulkāṃ mama sutāṃ sītāṃ surasutōpamām ॥ 21 ॥
dvitīyāmūrmilāṃ chaiva trirdadāmi na saṃśayaḥ ।
dadāmi paramaprītō vadhvau tē raghunandana ॥ 22 ॥
rāmalakṣmaṇayō rājan gōdānaṃ kārayasva ha ।
pitṛkāryaṃ cha bhadraṃ tē tatō vaivāhikaṃ kuru ॥ 23 ॥
makhā hyadya mahābāhō tṛtīyē divasē prabhō ।
phalgunyāmuttarē rājaṃstasminvaivāhikaṃ kuru ॥ 24 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkasaptatitamassargaḥ ॥
