শ্রীমদ্বাল্মীকীয় রামাযণে অয়োধ্য়াকাংডম্ ।
অথ ত্র্য়াশীতিতমস্সর্গঃ ।
তত স্সমুত্থিতঃ কাল্যমাস্থায় স্য়ংদনোত্তমম্ ।
প্রযয়ৌ ভরতশ্শীঘ্রং রামদর্শনকাংক্ষয়া ॥ 1 ॥
অগ্রতঃ প্রযয়ুস্তস্য় সর্বে মংত্রিপুরোধসঃ ।
অধিরুহ্য় হয়ৈর্য়ুক্তান্রথান্সূর্যরথোপমান্ ॥ 2 ॥
নবনাগসহস্রাণি কল্পিতানি যথাবিধি ।
অন্বয়ুর্ভরতং যাংতমিক্ষ্বাকুকুলনংদনম্ ॥ 3 ॥
ষষ্টী রথসহস্রাণি ধন্বিনো বিবিধায়ুধাঃ ।
অন্বয়ুর্ভরতং যাংতং রাজপুত্রং যশস্বিনম্ ॥ 4 ॥
শতং সহস্রাণ্যশ্বানাং সমারূঢানি রাঘবম্ ।
অন্বয়ুর্ভরতং যাংতং সত্যসংধং জিতেংদ্রিযম্ ॥ 5 ॥
কৈকেয়ী চ সুমিত্রা চ কৌসল্য়া চ যশস্বিনী ।
রামানযনসংহৃষ্টা যয়ুর্য়ানেন ভাস্বতা ॥ 6 ॥
প্রয়াতাশ্চার্যসংঘাতা রামং দ্রষ্টুং সলক্ষ্মণম্ ।
তস্য়ৈব চ কথাশ্চিত্রাঃ কুর্বাণা হৃষ্টমানসাঃ ॥ 7 ॥
মেঘশ্য়ামং মহাবাহুং স্থিরসত্ত্বং দৃঢব্রতম্ ।
কদা দ্রক্ষ্য়ামহে রামং জগত শ্শোকনাশনম্ ॥ 8 ॥
দৃষ্ট এব হি ন শ্শোকমপনেষ্যতি রাঘবঃ ।
তম স্সর্বস্য় লোকস্য় সমুদ্যন্নিব ভাস্করঃ ॥ 9 ॥
ইত্য়েবং কথয়ংতস্তে সংপ্রহৃষ্টাঃ কথা শ্শুভাঃ ।
পরিষ্বজানাশ্চান্য়োন্য়ং যয়ুর্নাগরিকা জনাঃ ॥ 10 ॥
যে চ তত্রাপরে সর্বে সম্মতা যে চ নৈগমাঃ ।
রামং প্রতি যয়ুর্হৃষ্টা স্সর্বাঃ প্রকৃতযস্তথা ॥ 11 ॥
মণিকারাশ্চ যে কেচিত্কুংভকারাশ্চ শোভনাঃ ।
সূত্রকর্মকৃতশ্চৈব যে চ শস্ত্রোপজীবিনঃ ॥ 12 ॥
ময়ূরকাঃ ক্রাকচিকা রোচকা বেধকাস্তথা ।
দংতকারা স্সুধাকারা স্তথা গংধোপজীবিনঃ ॥ 13 ॥
সুবর্ণকারাঃ প্রখ্য়াতাস্তথা কংবলধাবকাঃ ।
স্নাপকোষ্ণোদকা বৈদ্য়াধূপকাশ্শৌংডিকাস্তথা ॥ 14 ॥
রজকাস্তুন্নবায়াশ্চ গ্রামঘোষমহত্তরাঃ ।
শৈলূষাশ্চ সহ স্ত্রীভির্যয়ুঃ কৈবর্তকাস্তথা ॥ 15 ॥
সমাহিতা বেদবিদো ব্রাহ্মণা বৃত্তসম্মতাঃ ।
গোরথৈর্ভরতং যাংতমনুজগ্মু স্সহস্রশঃ ॥ 16 ॥
সুবেষা শ্শুদ্ধবসনাস্তাম্রমৃষ্টানুলেপনাঃ ।
সর্বে তে বিবিধৈর্য়ানৈ শ্শনৈর্ভরতমন্বয়ুঃ ॥ 17 ॥
প্রহৃষ্টমুদিতা সেনা সাঽন্বয়াত্কৈকয়ীসুতম্ ।
ভ্রাতুরানযনে যাংতং ভরতং ভ্রাতৃবত্সলম্ ॥ 18 ॥
তে গত্বা দূরমধ্বানং রথয়ানাশ্বকুংজরৈঃ ।
সমাসেদুস্ততো গংগাং শৃংগীবেরপুরং প্রতি ॥ 19 ॥
যত্র রামসখো বীরো গুহো জ্ঞাতিগণৈর্বৃতঃ ।
নিবসত্যপ্রমাদেন দেশং তং পরিপালযন্ ॥ 20 ॥
উপেত্য় তীরং গংগায়াশ্চক্রবাকৈরলংকৃতম্ ।
ব্যবাতিষ্ঠত সা সেনা ভরতস্য়ানুয়ায়িনী ॥ 21 ॥
নিরীক্ষ্য়ানুগতাং সেনাং তাং চ গংগাং শিবোদকাম্ ।
ভরতস্সচিবান্সর্বানব্রবীদ্বাক্যকোবিদঃ ॥ 22 ॥
নিবেশযত মে সৈন্যমভিপ্রায়েণ সর্বতঃ ।
বিশ্রাংতাঃ প্রতরিষ্য়ামশ্শ্ব ইদানীমিমাং নদীম্ ॥ 23 ॥
দাতুং চ তাবদিচ্ছামি স্বর্গতস্য় মহীপতেঃ ।
ঔর্ধ্বদেহনিমিত্তার্থমবতীর্য়োদকং নদীম্ ॥ 24 ॥
তস্য়ৈবং ব্রুবতোঽমাত্য়াস্তথেত্য়ুক্ত্বা সমাহিতাঃ ।
ন্যবেশয়ংস্তাং ছংদেন স্বেন স্বেন পৃথক্পৃথক্ ॥ 25 ॥
নিবেশ্য় গংগামনু তাং মহানদীং চমূং বিধানৈঃ পরিবর্হশোভিনীম্ ।
উবাস রামস্য় তদা মহাত্মনো বিচিংতয়ানো ভরতো নিবর্তনম্ ॥ 26 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে ত্র্য়াশীতিতমস্সর্গঃ ॥
