শ্রীমদ্বাল্মীকীয় রামাযণে বালকাংডম্ ।
অথ দশমস্সর্গঃ ।
সুমংত্রশ্চোদিতো রাজ্ঞা প্রোবাচেদং বচস্তদা ।
যথর্শ্যশৃংগস্ত্বানীত শ্শ্রুণু মে মংত্রিভিস্সহ ॥ 1 ॥
রোমপাদমুবাচেদং সহামাত্য়ঃ পুরোহিতঃ ।
উপায়ো নিরপায়োঽযমস্মাভিরভিচিংতিতঃ ॥ 2 ॥
ঋশ্যশৃংগো বনচরস্তপস্স্বাধ্যযনে রতঃ ।
অনভিজ্ঞস্স নারীণাং বিষয়াণাং সুখস্য় চ ॥ 3 ॥
ইংদ্রিয়ার্থৈরভিমতৈর্নরচিত্তপ্রমাথিভিঃ ।
পুরমানাযয়িষ্য়ামঃ ক্ষিপ্রং চাধ্যবসীযতাম্ ॥ 4 ॥
গণিকাস্তত্র গচ্ছংতু রূপবত্যস্স্বলংকৃতাঃ ।
প্রলোভ্য় বিবিধোপায়ৈরানেষ্য়ংতীহ সত্কৃতাঃ ॥ 5 ॥
শ্রুত্বা তথেতি রাজা চ প্রত্য়ুবাচ পুরোহিতম্ ।
পুরোহিতো মংত্রিণশ্চ তথা চক্রুশ্চ তে তদা ॥ 6 ॥
বারমুখ্য়াশ্চ তচ্ছ্রুত্বা বনং প্রবিবিশুর্মহত্ ।
আশ্রমস্য়াবিদূরেঽস্মিন্ যত্নং কুর্বংতি দর্শনে ॥ 7 ॥
ঋষিপুত্রস্য় ধীরস্য় নিত্যমাশ্রমবাসিনঃ ।
পিতুস্সনিত্যসংতুষ্টো নাতিচক্রাম চাশ্রমাত্ ॥ 8 ॥
ন তেন জন্মপ্রভৃতি দৃষ্টপূর্বং তপস্বিনা ।
স্ত্রী বা পুমান্বা যচ্চান্যত্সর্বং নগররাষ্ট্রজম্ ॥ 9 ॥
ততঃ কদাচিত্তং দেশমাজগাম যদৃচ্ছয়া ।
বিভংডকসুতস্তত্র তাশ্চাপশ্যদ্বরাংগনাঃ ॥ 10 ॥
তাশ্চিত্রবেষাঃ প্রমদা গায়ংত্য়ো মধুরস্বরাঃ ।
ঋষিপুত্রমুপাগম্য় সর্বা বচনমব্রুবন্ ॥ 11 ॥
কস্ত্বং কিং বর্তসে ব্রহ্মন্ জ্ঞাতুমিচ্ছামহে বযম্ ।
একস্ত্বং বিজনে ঘোরে বনে চরসি শংস নঃ ॥ 12 ॥
অদৃষ্টরূপাস্তাস্তেন কাম্যরূপা বনে স্ত্রিয়ঃ ।
হার্দাত্তস্য় মতির্জাতা ব্য়াখ্য়াতুং পিতরং স্বকম্ ॥ 13 ॥
পিতা বিভংডকোঽস্মাকং তস্য়াহং সুত ঔরসঃ ।
ঋশ্যশৃংগ ইতি খ্য়াতং নাম কর্ম চ মে ভুবি ॥ 14 ॥
ইহাশ্রমপদোঽস্মাকং সমীপে শুভদর্শনাঃ ।
করিষ্য়ে বোঽত্র পূজাং বৈ সর্বেষাং বিধিপূর্বকম্ ॥ 15 ॥
ঋষিপুত্রবচশ্শ্রুত্বা সর্বাসাং মতিরাস বৈ ।
তদাশ্রমপদং দ্রষ্টুং জগ্মুস্সর্বাশ্চ তেন তাঃ ॥ 16 ॥
আগতানাং ততঃ পূজামৃষিপুত্রশ্চকার হ ।
ইদমর্ঘ্যমিদং পাদ্যমিদং মূলমিদং ফলং চ নঃ ॥ 17 ॥
প্রতিগৃহ্য় চ তাং পূজাং সর্বা এব সমুত্সুকাঃ ।
ঋষের্ভীতাশ্চ শীঘ্রং তা গমনায় মতিং দধুঃ ॥ 18 ॥
অস্মাকমপি মুখ্য়ানি ফলানীমানি বৈ দ্বিজ ।
গৃহাণ প্রতি ভদ্রং তে ভক্ষযস্ব চ মা চিরম্ ॥ 19 ॥
ততস্তাস্তং সমালিংগ্য় সর্বা হর্ষসমন্বিতাঃ ।
মোদকান্প্রদদুস্তস্মৈ ভক্ষ্য়াংশ্চ বিবিধান্ বহূন্ ॥ 20 ॥
তানি চাস্বাদ্য় তেজস্বী ফলানীতি স্ম মন্যতে ।
অনাস্বাদিতপূর্বাণি বনে নিত্যনিবাসিনাম্ ॥ 21 ॥
আপৃচ্ছ্য় চ তদা বিপ্রং ব্রতচর্য়াং নিবেদ্য় চ ।
গচ্ছংতি স্মাপদেশাত্তা ভীতাস্তস্য় পিতুস্স্ত্রিয়ঃ ॥ 22 ॥
গতাসু তাসু সর্বাসু কাশ্যপস্য়াত্মজো দ্বিজঃ ।
অস্বস্থহৃদযশ্চাসীদ্দুঃখং স্ম পরিবর্ততে ॥ 23 ॥
ততোঽপরেদ্য়ুস্তং দেশমাজগাম স বীর্যবান্ ।
মনোজ্ঞা যত্র তা দৃষ্টা বারমুখ্য়াস্স্বলংকৃতাঃ ॥ 24 ॥
দৃষ্ট্বৈব চ তাস্তদা বিপ্রমায়াংতং হৃষ্টমানসাঃ ।
উপসৃত্য় ততস্সর্বাস্তাস্তমূচুরিদং বচঃ ॥ 25 ॥
এহ্য়াশ্রমপদং সৌম্য় হ্যস্মাকমিতি চাব্রুবন্ ।
তত্রাপ্য়েষ বিধিশ্শ্রীমান্ বিশেষেণ ভবিষ্যতি ॥ 26 ॥
শ্রুত্বা তু বচনং তাসাং সর্বাসাং হৃদয়ংগমম্ ।
গমনায় মতিং চক্রে তং চ নিন্য়ুস্তদা স্ত্রিয়ঃ ॥ 27 ॥
তত্র চানীযমানে তু বিপ্রে তস্মিন্মহাত্মনি ।
ববর্ষ সহসা দেবো জগত্প্রহ্লাদয়ংস্তদা ॥ 28 ॥
বর্ষেণৈবাগতং বিপ্রং বিষয়ং স্বং নরাধিপঃ ।
প্রত্য়ুদ্গম্য় মুনিং প্রহ্বশ্শিরসা চ মহীং গতঃ ॥ 29 ॥
অর্ঘ্য়ং চ প্রদদৌ তস্মৈ ন্য়াযতস্সুসমাহিতঃ ।
বব্রে প্রসাদং বিপ্রেংদ্রান্মা বিপ্রং মন্য়ুরাবিশেত্ ॥ 30 ॥
অংতঃপুরং প্রবিশ্য়াস্মৈ কন্য়াং দত্ত্বা যথাবিধি ।
শাংতাং শাংতেন মনসা রাজা হর্ষমবাপ সঃ ॥ 31 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে দশমস্সর্গঃ ॥
