শ্রীমদ্বাল্মীকীয় রামাযণে কিষ্কিংধাকাংডম্ ।
অথ দ্বিচত্বারিংশস্সর্গঃ ।
অথ প্রস্থাপ্য় সুগ্রীবস্তান্হরীংদক্ষিণাং দিশম্ ।
অব্রবীন্মেঘসংকাশং সুষেণং নাম যূথপম্ ॥ 1 ॥
তারায়াঃ পিতরং রাজা শ্বশুরং ভীমবিক্রমম্ ।
অব্রবীত্প্রাংজলির্বাক্যমভিগম্য় প্রণম্য় চ ॥ 2 ॥
মরীচিপুত্রং মারীচমর্চিষ্মংতং মহাকপিম্ ।
বৃতং কপিবরৈ শ্শূরৈর্মহেংদ্রসদৃশদ্য়ুতিম্ ॥ 3 ॥
বুদ্ধিবিক্রমসংপন্নং বৈনতেযসমদ্য়ুতিম্ ।
মরীচিপুত্রান্মারীচানর্চির্মালান্মহাবলান্ ॥ 4 ॥
ঋষিপুত্রাংশ্চতাংত্সর্বান্প্রতীচীমাদিশদ্দিশম্ ।
দ্বাভ্য়াং শতসহস্রাভ্য়াং কপীনাং কপিসত্তমাঃ ॥ 5 ॥
সুষেণপ্রমুখা যূয়ং বৈদেহীং পরিমার্গতঃ ।
সুরাষ্ট্রান্সহবাহ্লীকান্ শ্চংদ্রচিত্রাংস্তথৈব চ ॥ 6 ॥
স্ফীতাংজনপদান্রম্য়ান্বিপুলানি পুরাণি চ ।
পুন্নাগগহনং কুক্ষিং বকুলোদ্দালকাকুলম্ ॥ 7 ॥
তথা কেতকষংডাংশ্চ মার্গধ্বং হরিয়ূথপাঃ ।
প্রত্যক্স্রোতোগমাশ্চৈব নদ্যশ্শীতজলাশ্শিবাঃ ॥ 8 ॥
তাপসানামরণ্য়ানি কাংতারা গিরযশ্চ যে ।
তত্রস্থলীং মরুপ্রায়ামত্য়ুচ্চশিরসশ্শিলাঃ ॥ 9 ॥
গিরিজালাবৃতাং দুর্গাং মার্গিত্বা পশ্চিমাং দিশম্ ।
ততঃ পশ্চিমমাসাদ্য় সমুদ্রং দ্রষ্টুমর্হথ ॥ 10 ॥
তিমিনক্রায়ুতজলমক্ষোভ্যমথ বানরাঃ ।
ততঃ কেতকষংডেষু তমালগহনেষু চ ॥ 11 ॥
কপয়ো বিহরিষ্য়ংতি নারিকেলবনেষু চ ।
তত্র সীতাং চ মার্গধ্বং নিলয়ং রাবণস্য় চ ॥ 12 ॥
বেলাতলনিবিষ্টেষু পর্বতেষু বনেষু চ ।
মুরচীপত্তনং চৈব রম্য়ং চৈব জটীপুরম্ ॥ 13 ॥
অবংতীমংগলোপাং চ তথা চালক্ষিতং বনম্ ।
রাষ্ট্রাণি চ বিশালানি পত্তনানি ততস্ততঃ ॥ 14 ॥
সিংধুসাগরয়োশ্চৈব সংগমে তত্র পর্বতঃ ।
মহান্হেমগিরির্নাম শতশৃংগো মহাদ্রুমঃ ॥ 15 ॥
তস্য় প্রস্থেষু রম্য়েষু সিংহাঃ পক্ষগমাঃ স্থিতাঃ ।
তিমিমত্স্যগজাংশ্চৈব নীডান্য়ারোপয়ংতি তে ॥ 16 ॥
তানি নীডানি সিংহানাং গিরিশৃংগগতাশ্চ যে ।
দৃপ্তাস্তৃপ্তাশ্চ মাতংগাস্তোযদস্বননিস্বনাঃ ॥ 17 ॥
বিচরংতি বিশালেঽস্মিংস্তোযপূর্ণে সমংততঃ ।
তস্য় শৃংগং দিবস্পর্শং কাংচনং চিত্রপাদপম্ ॥ 18 ॥
সর্বমাশু বিচেতব্য়ং কপিভিঃ কামরূপিভিঃ ।
কোটিং তত্র সমুদ্রে তু কাংচনীং শতয়োজনাম্ ॥ 19 ॥
দুর্দর্শাং পারিয়াত্রস্য় গতাং দ্রক্ষ্যথ বানরাঃ ।
কোট্যস্তত্র চতুর্বিংশদ্গংধর্বাণাং তপস্বিনাম্ ॥ 20 ॥
বসংত্যগ্নিনিকাশানাং ঘোরাণাং কামরূপিণাম্ ।
পাবকার্চিঃ প্রতীকাশাস্সমবেতাস্সহস্রশঃ ॥ 21 ॥
নাত্য়াসাদয়িতব্য়াস্তে বানরৈর্ভীমবিক্রমৈঃ ।
নাদেয়ং চ ফলং তস্মাদ্দেশাত্কিংচিত্ প্লবংগমৈঃ ॥ 22 ॥
দুরাসদা হি তে বীরা স্সত্ত্ববংতো মহাবলাঃ ।
ফলমূলানি তে তত্র রক্ষংতে ভীমবিক্রমাঃ ॥ 23 ॥
তত্র যত্নশ্চ কর্তব্য়ো মার্গিতব্য়া চ জানকী ।
ন হি তেভ্য়ো ভয়ং কিংচিত্কপিত্বমনুবর্ততাম্ ॥ 24 ॥
তত্র বৈঢূর্যবর্ণাভো বজ্রসংস্থানসংস্থিতঃ ।
নানাদ্রুমলতাকীর্ণো বজ্রো নাম মহাগিরিঃ ॥ 25 ॥
শ্রীমান্সমুদিতস্তত্র যোজনানাং শতং সমম্ ।
গুহাস্তত্র বিচেতব্য়া প্রযত্নেন প্লবংগমাঃ ॥ 26 ॥
চতুর্ভাগে সমুদ্রস্য় চক্রবান্নাম পর্বতঃ ।
তত্র চক্রং সহস্রারং নির্মিতং বিশ্বকর্মণা ॥ 27 ॥
তত্র পংচজনং হত্বা হযগ্রীবং চ দানবম্ ।
আজহার ততশ্চক্রং শংখং চ পুরুষোত্তমঃ ॥ 28 ॥
তস্য় সানুষু চিত্রেষু বিশালাসু গুহাসু চ ।
রাবণ স্সহ বৈদেহ্য়া মার্গিতব্যস্তত স্ততঃ ॥ 29 ॥
যোজনানাং চতুষ্ষষ্টির্বরাহো নাম পর্বতঃ ।
সুবর্ণশৃংগস্সুশ্রীমা নগাধে বরুণালয়ে ॥ 30 ॥
তত্র প্রাগ্জ্য়োতিষং নাম জাতরূপময়ং পুরম্ ।
যস্মিন্বসতি দুষ্টাত্মা নরকো নাম দানবঃ ॥ 31 ॥
তত্র সানুষু চিত্রেষু বিশালাসু গুহাসু চ ।
রাবণস্সহ বৈদেহ্য়া মার্গিতব্যস্ততস্ততঃ ॥ 32 ॥
তমতিক্রম্য় শৈলেংদ্রং কাংচনাংতরনির্দরঃ ।
পর্বত স্সর্বসৌবর্ণো ধারাপ্রস্রবণায়ুতঃ ॥ 33 ॥
তং গজাশ্চ বরাহাশ্চ সিংহ ব্য়াঘ্রাশ্চ সর্বতঃ ।
অভিগর্জংতি সততং তেন শব্দেন দর্পিতাঃ ॥ 34 ॥
যস্মিন্হরিহয়্শীমান্মহেংদ্রঃ পাকশাসনঃ ।
অভিষিক্তঃ সুরৈ রাজা মেঘবান্নাম পর্বতঃ ॥ 35 ॥
তমতিক্রম্য় শৈলেংদ্রং মহেংদ্রপরিপালিতম্ ।
ষষ্টি র্গিরিসহস্রাণি কাংচনানি গমিষ্যথ ॥ 36 ॥
তরুণাদিত্যবর্ণানি ভ্রাজমানানি সর্বতঃ ।
জাতরূপময়ৈর্বৃক্ষৈ শোভিতানি সুপুষ্পিতৈঃ ॥ 37 ॥
তেষাং মধ্য়ে স্থিতো রাজা মেরুরুত্তরপর্বতঃ ।
আদিত্য়েন প্রসন্নেন শৈলো দত্তবরঃ পুরা ॥ 38 ॥
তেনৈব মুক্তশ্শৈলেংদ্রস্সর্ব এব ত্বদাশ্রয়াঃ ।
মত্প্রসাদাদ্ভবিষ্য়ংতি দিবা রাত্রং চ কাংচনাঃ ॥ 39 ॥
ত্বয়ি যে চাপি বত্স্য়ংতি দেবগংধর্বদানবাঃ ।
তে ভবিষ্য়ংতি রক্তাশ্চ প্রভয়া কাংচনপ্রভাঃ ॥ 40 ॥
বিশ্বে দেবাশ্চ মরূতো বসবশ্চ দিবৌকসঃ ।
আগম্য় পশ্চিমাং সংধ্য়াং মেরুমুত্তমপর্বতম্ ॥ 41 ॥
আদিত্যমুপতিষ্ঠংতি তৈশ্চ সূর্য়োঽভিপূজিতঃ ।
অদৃশ্যস্সর্বভূতানামস্তং গচ্ছতিপর্বতম্ ॥ 42 ॥
যোজনানাং সহস্রাণি দশ তানি দিবাকরঃ ।
মুহূর্তার্ধেন তং শীঘ্রমভিয়াতি শিলোচ্চযম্ ॥ 43 ॥
শৃংগে তস্য় মহদ্দিব্য়ং ভবনং সূর্যসন্নিভম্ ।
প্রাসাদগণসংবাধং বিহিতং বিশ্বকর্মণা ॥ 44 ॥
শোভিতং তরুভিশ্চিত্রৈর্নানাপক্ষিসমাকুলৈঃ ।
নিকেতং পাশহস্তস্য় বরুণস্য় মহাত্মনঃ ॥ 45 ॥
অংতরা মেরুমস্তং চ তালো দশশিরা মহান্ ।
জাতরূপময়্শীমান্ভ্রাজতে চিত্রবেদিকঃ ॥ 46 ॥
তেষু সর্বেষু দুর্গেষু সরস্সু চ সরিত্সু চ ।
রাবণস্সহ বৈদেহ্য়া মার্গিতব্যস্তত স্ততঃ ॥ 47 ॥
যত্র তিষ্ঠতি ধর্মজ্ঞস্তপসা স্বেন ভাবিতঃ ।
মেরুসাবর্ণিরিত্য়েব খ্য়াতো বৈ ব্রহ্মণা সমঃ ॥ 48 ॥
প্রষ্টব্য়ো মেরুসাবর্ণির্মহর্ষিঃ সূর্যসন্নিভঃ ।
প্রণম্য় শিরসা ভূমৌ প্রবৃত্তিং মৈথিলীং প্রতি ॥ 49 ॥
এতাব জ্জীবলোকস্য় ভাস্করো রজনীক্ষ্য়ে ।
কৃত্বা বিতিমিরং সর্বমস্তং গচ্ছতি পর্বতম্ ॥ 50 ॥
এতাবদ্বানরৈশ্শক্য়ং গংতুং বানরপুংগবাঃ ।
অভাস্করমমর্য়াদং ন জানীমস্ততঃ পরম্ ॥ 51 ॥
অধিগম্য় তু বৈদেহীং নিলয়ং রাবণস্য় চ ।
অস্ত পর্বতমাসাদ্য় পূর্ণে মাসে নিবর্তত ॥ 52 ॥
ঊর্ধ্বং মাসান্ন বস্তব্য়ং বসন্ বধ্য়ো ভবেন্মম ।
সহৈব শূরো যুষ্মাভিশ্শ্বশুরো মে গমিষ্যতি ॥ 53 ॥
শ্রোতব্য়ং সর্বমেতস্য় ভবদ্ভির্দিষ্টকারিভিঃ ।
গুরুরেষ মহাবাহুশ্শ্বশুরো মে মহাবলঃ ॥ 54 ॥
ভবংতশ্চাপি বিক্রাংতাঃ প্রমাণং সর্ব কর্মসু ।
প্রমাণমেনং সংস্থাপ্য় পশ্যধ্বং পশ্চিমাং দিশম্ ॥ 55 ॥
দৃষ্টায়াং তু নরেংদ্রস্য় পত্ন্য়ামমিততেজসঃ ।
কৃতকৃত্য়া ভবিষ্য়ামঃ কৃতস্য় প্রতিকর্মণা ॥ 56 ॥
অতোঽন্যদপি যত্কার্য়ং কার্যস্য়াস্য় হিতং ভবেত্ ।
সংপ্রধার্য় ভবদ্ভিশ্চ দেশকালার্থসংহিতম্ ॥ 57 ॥
ততঃ সুষেণপ্রমুখাঃ প্লবংগামাঃ স্সুগ্রীব বাক্য়ং নিপুণং নিশম্য় ।
আমংত্য়্র সর্বে প্লবগাধিপং তে জগ্মুর্দিশং তাং বরুণাভিগুপ্তাম্ ॥ 58 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে দ্বিচত্বারিংশস্সর্গঃ ॥
