শ্রীমদ্বাল্মীকীয় রামাযণে সুংদরকাংডম্ ।
অথ একোনবিংশস্সর্গঃ ।
তস্মিন্নেব ততঃ কালে রাজপুত্রী ত্বনিংদিতা ।
রূপয়ৌবনসংপন্নং ভূষণোত্তমভূষিতম্ ॥ 1 ॥
ততো দৃষ্ট্বৈব বৈদেহী রাবণং রাক্ষসাধিপম্ ।
প্রাবেপত বরারোহা প্রবাতে কদলী যথা ॥ 2 ॥
আচ্ছাদ্য়োদরমূরুভ্য়াং বাহুভ্য়াং চ পয়োধরৌ ।
উপবিষ্টা বিশালাক্ষী রুদংতী বরবর্ণিনী ॥ 3 ॥
দশগ্রীবস্তু বৈদেহীং রক্ষিতাং রাক্ষসীগণৈঃ ।
দদর্শ সীতাং দুঃখার্তাং নাবং সন্নামিবার্ণবে ॥ 4 ॥
অসংবৃতায়ামাসীনাং ধরণ্য়াং সংশিতব্রতাম্ ।
ছিন্নাং প্রপতিতাং ভূমৌ শাখামিব বনস্পতেঃ ॥ 5 ॥
মলমংডনচিত্রাংগীং মংডনার্হামমংডিতাম্ ।
মৃণালী পংকদিগ্ধেব বিভাতি ন বিভাতি চ ॥ 6 ॥
সমীপং রাজসিংহস্য় রামস্য় বিদিতাত্মনঃ ।
সংকল্পহযসংয়ুক্সৈর্য়াংতীমিব মনোরথৈঃ ॥ 7 ॥
শুষ্য়ংতীং রুদতীমেকাং ধ্য়ানশোকপরাযণাম্ ।
দুঃখস্য়াংতমপশ্য়ংতীং রামাং রামমনুব্রতাম্ ॥ 8 ॥
বেষ্টমানাং তথাঽবিষ্টাং পন্নগেংদ্রবধূমিব ।
ধূপ্যমানাং গ্রহেণেব রোহিণীং ধূমকেতুনা ॥ 9 ॥
বৃত্তশীলকুলে জাতামাচারবতি ধার্মিকে ।
পুনঃসংস্কারমাপন্নাং জাতামিব চ দুষ্কুলে ॥ 10 ॥
অভূতেনাপবাদেন কীর্তিং নিপতিতামিব ।
আম্নায়ানাময়োগেন বিদ্য়াং প্রশিথিলামিব ॥ 11 ॥
সন্নামিব মহাকীর্তিং শ্রদ্ধামিব বিমানিতাম্ ।
পূজামিব পরিক্ষীণামাশাং প্রতিহতামিব ॥ 12 ॥
আযতীমিব বিধ্বস্তামাজ্ঞাং প্রতিহতামিব ।
দীপ্তামিব দিশং কালে পূজামপহৃতামিব ॥ 13 ॥
পদ্মিনীমিব বিধ্বস্তাং হতশূরাং চমূমিব ।
প্রভামিব তমোধ্বস্তামুপক্ষীণামিবাপগাম্ ॥ 14 ॥
বেদীমিব পরামৃষ্টাং শাংতামগ্নিশিখামিব ।
পৌর্ণমাসীমিব নিশাং রাহুগ্রস্তেংদুমংডলাম্ ॥ 15 ॥
উত্কৃষ্টপর্ণকমলাং বিত্রাসিতবিহংগমাম্ ।
হস্তিহস্তপরামৃষ্টামাকুলাং পদ্মিনীমিব ॥ 16 ॥
পতিশোকাতুরাং শুষ্কাং নদীং বিস্রাবিতামিব ।
পরয়া মৃজয়া হীনাং কৃষ্ণপক্ষনিশামিব ॥ 17 ॥
সুকুমারীং সুজাতাংগীং রত্নগর্ভগৃহোচিতাম্ ।
তপ্যমানামিবোষ্ণেন মৃণালীমচিরোদ্ধৃতাম্ ॥ 18 ॥
গৃহীতামালিতাং স্তংভে যূথপেন বিনাকৃতাম্ ।
নিঃশ্বসংতীং সুদুঃখার্তাং গজরাজবধূমিব ॥ 19 ॥
একয়া দীর্ঘয়া বেণ্য়া শোভমানামযত্নতঃ ।
নীলয়া নীরদাপায়ে বনরাজ্য়া মহীমিব ॥ 20 ॥
উপবাসেন শোকেন ধ্য়ানেন চ ভয়েন চ ।
পরিক্ষীণাং কৃশাং দীনামল্পাহারাং তপোধনাম্ ॥ 21 ॥
আয়াচমানাং দুঃখার্তাং প্রাংজলিং দেবতামিব ।
ভাবেন রঘুমুখ্যস্য় দশগ্রীবপরাভবম্ ॥ 22 ॥
সমীক্ষমাণাং রুদতীমনিংদিতাং সুপক্ষ্মতাম্রাযতশুক্ললোচনাম্ ।
অনুব্রতাং রামমতীব মৈথিলীং প্রলোভয়ামাস বধায় রাবণঃ ॥ 23 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে একোনবিংশস্সর্গঃ ॥
