শ্রীমদ্বাল্মীকীয় রামাযণে অরণ্যকাংডম্ ।
অথ ত্রযস্ত্রিংশস্সর্গঃ ।
ততঃ শূর্পণখা দীনা রাবণং লোকরাবণম্ ।
অমাত্যমধ্য়ে সংক্রুদ্ধা পরুষং বাক্যমব্রবীত্ ॥ 1 ॥
প্রমত্তঃ কামভোগেষু স্বৈরবৃত্তো নিরংকুশঃ ।
সমুত্পন্নং ভয়ং ঘোরং বোদ্ধব্য়ং নাববুধ্যসে ॥ 2 ॥
সক্তং গ্রাম্য়েষু ভোগেষু কামবৃত্তং মহীপতিম্ ।
লুব্ধং ন বহুমন্য়ংতে শ্মশানাগ্নিমিব প্রজাঃ ॥ 3 ॥
স্বয়ং কার্য়াণি যঃ কালে নানুতিষ্ঠতি পার্থিবঃ ।
স তু বৈ সহ রাজ্য়েন তৈশ্চ কার্য়ৈর্বিনশ্যতি ॥ 4 ॥
অয়ুক্তচারং দুর্দর্শমস্বাধীনং নরাধিপম্ ।
বর্জয়ংতি নরা দূরান্নদীপংকামিব দ্বিপাঃ ॥ 5 ॥
যে ন রক্ষংতি বিষযমস্বাধীনা নরাধিপাঃ ।
তে ন বৃদ্ধ্য়া প্রকাশংতে গিরযস্সাগরে যথা ॥ 6 ॥
আত্মবদ্ভির্বিগৃহ্য় ত্বং দেবগংধর্বদানবৈঃ ।
অয়ুক্তচারশ্চপলঃ কথং রাজা ভবিষ্যসি ॥ 7 ॥
ত্বংতু বালস্বভাবশ্চ বুদ্ধিহীনশ্চ রাক্ষস ।
জ্ঞাতব্য়ংতু ন জানীষে কথং রাজা ভবিষ্যসি ॥ 8 ॥
যেষাং চারশ্চ কোশশ্চ নযশ্চ জযতাং বর ।
অস্বাধীনা নরেংদ্রাণাং প্রাকৃতৈস্তে জনৈস্সমাঃ ॥ 9 ॥
যস্মাত্পশ্য়ংতি দূরস্থান্ সর্বানর্থান্নরাধিপাঃ ।
চারেণ তস্মাদুচ্য়ংতে রাজানো দীর্ঘচক্ষুষঃ ॥ 10 ॥
অয়ুক্তচারং মন্য়ে ত্বাং প্রাকৃতৈস্সচিবৈর্বৃতম্ ।
স্বজনং তু জনস্থানে হতং যো নাববুদ্ধ্যসে ॥ 11 ॥
চতুর্দশ সহস্রাণি রক্ষসাং ক্রূরকর্মণাম্ ।
হতান্য়েকেন রামেণ খরশ্চ সহদূষণঃ ॥ 12 ॥
ঋষীণামভয়ং দত্তং কৃতক্ষেমাশ্চ দংডকাঃ ।
ধর্ষিতং চ জনস্থানং রামেণাক্লিষ্টকর্মণা ॥ 13 ॥
ত্বংতু লুব্দঃ প্রমত্তশ্চ পরাধীনশ্চ রাবণ ।
বিষয়ে স্বে সমুত্পন্নং ভয়ং যো নাববুধ্যসে ॥ 14 ॥
তীক্ষ্ণমল্পপ্রদাতারং প্রমত্তং গর্বিতং শঠম্ ।
ব্যসনে সর্বভূতানি নাভিধাবংতি পার্থিবম্ ॥ 15 ॥
অতিমানিনমগ্রাহ্যমাত্মসংভাবিতং নরম্ ।
ক্রোধিনং ব্যসনে হংতি স্বজনোঽপি মহীপতিম্ ॥ 16 ॥
নানুতিষ্ঠতি কার্য়াণি ভয়েষু ন বিভেতি চ ।
ক্ষিপ্রং রাজ্য়াচ্য়ুতো দীনস্তৃণৈস্তুল্য়ো ভবিষ্যতি ॥ 17 ॥
শুষ্কৈঃ কাষ্ঠৈর্ভবেত্কার্য়ং লোষ্টৈরপি চ পাংসুভিঃ ।
ন তু স্থানাত্পরিভ্রষ্টৈঃ কার্য়ং স্য়াদ্বসুধাধিপৈঃ ॥ 18 ॥
অপভুক্তং যথা বাসস্স্রজো বা মৃদিতা যথা ।
এবং রাজ্য়াত্পরিভ্রষ্টস্সমর্থোঽপি নিরর্থকঃ ॥ 19 ॥
অপ্রমত্তশ্চ যো রাজা সর্বজ্ঞো বিজিতেংদ্রিয়ঃ ।
কৃতজ্ঞো ধর্মশীলশ্চ স রাজা তিষ্ঠতে চিরম্ ॥ 20 ॥
নযনাভ্য়াং প্রসুপ্তোঽপি জাগর্তি নযচক্ষুষা ।
ত্যক্তক্রোধপ্রমাদশ্চ স রাজা পূজ্যতে জনৈঃ ॥ 21 ॥
ত্বং তু রাবণ দুর্বুদ্ধির্গুণৈরেতৈর্বিবর্জিতঃ ।
যস্য় তেঽবিদিতশ্চারৈ রক্ষসাং সুমহান্বধঃ ॥ 22 ॥
পরাবমংতা বিষয়েষু সংগতো ন দেশকালপ্রবিভাগতত্ববিত্ ।
অয়ুক্তবুদ্ধির্গুণদোষনিশ্চয়ে বিপন্নরাজ্য়ো নচিরাদ্বিপত্স্যসে ॥ 23 ॥
ইতি স্বদোষান্ পরিকীর্তিতাংস্তয়া সমীক্ষ্য় বুদ্ধ্য়া ক্ষণদাচরেশ্বরঃ ।
ধনেন দর্পেণ বলেন চান্বিতো বিচিংতয়ামাস চিরং স রাবণঃ ॥ 24 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে ত্রযস্ত্রিংশস্সর্গঃ ॥
