শ্রীমদ্বাল্মীকীয় রামাযণে সুংদরকাংডম্ ।
অথ চতুঃপংচাশস্সর্গঃ ।
বীক্ষমাণস্ততো লংকাং কপিঃ কৃতমনোরথঃ ॥ 1 ॥
বর্ধমানসমুত্সাহঃ কার্যশেষমচিংতযত্ ।
কিন্নু খল্ববশিষ্টং মে কর্তব্যমিহ সাংপ্রতম্ ॥ 2 ॥
যদেষাং রক্ষসাং ভূয়ঃ সংতাপজননং ভবেত্ ।
বনং তাবত্প্রমথিতং প্রকৃষ্টা রাক্ষসা হতাঃ ॥ 3 ॥
বলৈকদেশঃ ক্ষপিতশ্শেষং দুর্গবিনাশনম্ ।
দুর্গে বিনাশিতে কর্ম ভবেত্সুখপরিশ্রমম্ ।
অল্পযত্নেন কার্য়েঽস্মিন্ মম স্য়াত্সফলশ্শ্রমঃ ॥ 4 ॥
যো হ্যয়ং মম লাংগূলে দীপ্যতে হব্যবাহনঃ ।
অস্য় সংতর্পণং ন্য়ায়্য়ং কর্তুমেভির্গৃহোত্তমৈঃ ॥ 5 ॥
ততঃ প্রদীপ্তলাংগূলস্সবিদ্য়ুদিব তোযদঃ ।
ভবনাগ্রেষু লংকায়া বিচচার মহাকপিঃ ॥ 6 ॥
গৃহাদ্গৃহং রাক্ষসানামুদ্য়ানানি চ বানরঃ ।
বীক্ষমাণো হ্যসংত্রস্তঃ প্রাসাদাংশ্চ চচার সঃ ॥ 7 ॥
অবপ্লুত্য় মহাবেগঃ প্রহস্তস্য় নিবেশনম্ ।
অগ্নিং তত্র স নিক্ষিপ্য় শ্বসনেন সমো বলী ॥ 8 ॥
ততোঽন্যত্পুপ্লুবে বেশ্ম মহাপার্শ্বস্য় বীর্যবান্ ।
মুমোচ হনুমানগ্নিং কালানলশিখোপমম্ ॥ 9 ॥
বজ্রদংষ্ট্রস্য় চ তদা পুপ্লুবে স মহাকপিঃ ।
শুকস্য় চ মহাতেজাস্সারণস্য় চ ধীমতঃ ॥ 10 ॥
তথা চেংদ্রজিতো বেশ্ম দদাহ হরিয়ূথপঃ ।
জংবুমালে স্সুমালেশ্চ দদাহ ভবনং ততঃ ॥ 11 ॥
রশ্মিকেতোশ্চ ভবনং সূর্যশত্রোস্তথৈব চ ।
হ্রস্বকর্ণস্য় দংষ্ট্রস্য় রোমশস্য় চ রক্ষসঃ ॥ 12 ॥
যুদ্ধোন্মত্তস্য় মত্তস্য় ধ্বজগ্রীবস্য় রক্ষসঃ ।
বিদ্য়ুজ্জিহ্বস্য় ঘোরস্য় তথা হস্তিমুখস্য় চ ॥ 13 ॥
করালস্য় পিশাচস্য় শোণিতাক্ষস্য় চৈব হি ।
কুংভকর্ণস্য় ভবনং মকরাক্ষস্য় চৈব হি ॥ 14 ॥
যজ্ঞশত্রোশ্চ ভবনং ব্রহ্মশত্রোস্তথৈব চ ।
নরাংতকস্য় কুংভস্য় নিকুংভস্য় দুরাত্মনঃ ॥ 15 ॥
বর্জয়িত্বা মহাতেজা বিভীষণগৃহং প্রতি ।
ক্রমমাণঃ ক্রমেণৈব দদাহ হরিপুংগবঃ ॥ 16 ॥
তেষু তেষু মহার্হেষু ভবনেষু মহাযশাঃ ।
গৃহেষ্বৃদ্ধিমতামৃদ্ধিং দদাহ স মহাকপিঃ ॥ 17 ॥
সর্বেষাং সমতিক্রম্য় রাক্ষসেংদ্রস্য় বীর্যবান্ ।
আসসাদাথ লক্ষ্মীবান্ রাবণস্য় নিবেশনম্ ॥ 18 ॥
ততস্তস্মিন্ গৃহে মুখ্য়ে নানারত্নবিভূষিতে ।
মেরুমংদরসংকাশে সর্বমংগলশোভিতে ॥ 19 ॥
প্রদীপ্তমগ্নিমুত্সৃজ্য় লাংগূলাগ্রে প্রতিষ্ঠিতম্ ।
ননাদ হনুমান্বীরো যুগাংতজলদো যথা ॥ 20 ॥
শ্বসনেন চ সংয়োগাদতিবেগো মহাবলঃ ।
কালাগ্নিরিব জজ্বাল প্রাবর্ধত হুতাশনঃ ॥ 21 ॥
প্রদীপ্তমগ্নিং পবনস্তেষু বেশ্মস্বচারযত্ ।
অভূচ্ছ্বসনসংয়োগাদতিবেগো হুতাশনঃ ॥ 22 ॥
তানি কাংচনজালানি মুক্তামণিময়ানি চ ।
ভবনান্যবশীর্য়ংত রত্নবংতি মহাংতি চ ॥ 23 ॥
সংজজ্ঞে তুমুলশ্শব্দো রাক্ষসানাং প্রধাবতাম্ ।
স্বগৃহস্য় পরিত্রাণে ভগ্নোত্সাহোর্জিতশ্রিয়াম্ ॥ 24 ॥
নূনমেষোঽগ্নিরায়াতঃ কপিরূপেণ হা ইতি ।
ক্রংদংত্যস্সহসা পেতুঃ স্তনংধযধরাঃ স্ত্রিয়ঃ ॥ 25 ॥
কাশ্চিদগ্নিপরীতেভ্য়ো হর্মেভ্য়ো মুক্তমূর্ধজাঃ ।
পতংত্য়ো রেজিরেঽভ্রেভ্যস্সৌদামন্য় ইবাংবরাত্ ॥ 26 ॥
বজ্রবিদ্রুমবৈদূর্যমুক্তারজতসংহিতান্ ।
বিচিত্রান্ভবনাদ্ধাতূন্ স্য়ংদমানাংদদর্শ সঃ ॥ 27 ॥
নাগ্নিস্তৃপ্যতি কাষ্ঠানাং তৃণানাং চ যথা তথা ।
হনূমান্ রাক্ষসেংদাণাং বিশস্তানাং ন তৃপ্যতি ॥ 28 ॥
ক্বচিত্কিংশুকসংকাশাঃ ক্বচিচ্ছাল্মলিসন্নিভাঃ ॥ 29 ॥
ক্বচিত্কুংকুমসংকাশাশ্শিখা বহ্নেশ্চকাশিরে ।
হনূমতা বেগবতা বানরেণ মহাত্মনা ।
লংকাপুরং প্রদগ্ধং তদ্রুদ্রেণ ত্রিপুরং যথা ॥ 30 ॥
ততস্তু লংকাপুরপর্বতাগ্রে সমুত্থিতো ভীমপরাক্রমোঽগ্নিঃ ।
প্রসার্য় চূডাবলয়ং প্রদীপ্তো হনূমতা বেগবতা বিসৃষ্টঃ ॥ 31 ॥
যুগাংতকালানলতুল্যবেগ স্সমারুতোঽগ্নির্ববৃধে দিবিস্পৃক্ ।
বিধূমরশ্মির্ভবনেষু সক্তো রক্ষশ্শরীরাজ্যসমর্পতার্চিঃ ॥ 32 ॥
আদিত্যকোটীসদৃশস্সুতেজা লংকাং সমস্তাং পরিবার্য় তিষ্ঠন্ ।
শব্দৈরনেকৈরশনিপ্ররূঢৈর্ভিংদন্নিবাংডং প্রবভৌ মহাগ্নিঃ ॥ 33 ॥
তত্রাংবরাদগ্নিরতিপ্রবৃদ্ধো রূক্ষপ্রভঃ কিংশুকপুষ্পচূডঃ ।
নির্বাণধূমাকুলরাজযশ্চ নীলোত্পলাভাঃ প্রচকাশিরেঽভ্রাঃ ॥ 34 ॥
বজ্রী মহেংদ্রস্ত্রিদশেশ্বরো বা সাক্ষাদ্যমো বা বরুণোঽনিলো বা ।
রুদ্রোঽগ্নিরর্কো ধনদশ্চ সোমো ন বানরোঽয়ং স্বযমেব কালঃ ॥ 35 ॥
কিং ব্রহ্মণস্সর্বপিতামহস্য় সর্বস্য় ধাতুশ্চতুরাননস্য় ।
ইহাঽঽগতো বানররূপধারী রক্ষোপসংহারকরঃ প্রকোপঃ ॥ 36 ॥
কিং বৈষ্ণবং বা কপিরূপমেত্য় রক্ষোবিনাশায় পরং সুতেজঃ ।
অনংতমব্যক্তমচিংত্যমেকং স্বমাযয়া সাংপ্রতমাগতং বা ॥ 37 ॥
ইত্য়েবমূচুর্বহবো বিশিষ্টা রক্ষোগণাস্তত্র সমেত্য় সর্বে ।
সপ্রাণিসংঘাং সগৃহাং সবৃক্ষাং দগ্ধাং পুরীং তাং সহসা সমীক্ষ্য় ॥ 38 ॥
ততস্তু লংকা সহসা প্রদগ্ধা সরাক্ষসা সাশ্বরথা সনাগা ।
সপক্ষিসংঘা সমৃগা সবৃক্ষা রুরোদ দীনা তুমুলং সশব্দম্ ॥ 39 ॥
হা তাত হা পুত্রক কাংত মিত্র হা জীবিতং ভোগয়ুতং সুপুণ্যম্ ।
রক্ষোভিরেবং বহুধা ব্রুবদ্ভি শ্শব্দঃ কৃতো ঘোরতরস্সুভীমঃ ॥ 40 ॥
হুতাশনজ্বালসমাবৃতা সা হতপ্রবীরা পরিবৃত্তয়োধা হনূমতঃ ক্রোধবলাভিভূতা বভূব শাপোপহতেব লংকা ॥ 41 ॥
স সংভ্রমত্রস্তবিষণ্ণরাক্ষসাং সমুজ্জ্বলজ্জ্বালহুতাশনাংকিতাম্ ।
দদর্শ লংকাং হনুমান্মহামনাঃ স্বয়ংভূকোপোপহতামিবাবনিম্ ॥ 42 ॥
ভংক্ত্বা বনং পাদপরত্নসংকুলং হত্বা তু রক্ষাংসি মহাংতি সংয়ুগে ।
দগ্ধ্বা পুরীং তাং গৃহরত্নমালিনীং তস্থৌ হনূমান্পবনাত্মজঃ কপিঃ ॥ 43 ॥
ত্রিকূটশৃংগাগ্রতলে বিচিত্রে প্রতিষ্ঠিতো বানররাজসিংহঃ ।
প্রদীপ্তলাংগূলকৃতার্চিমালী ব্যরাজতাঽঽদিত্য় ইবাংশুমালী ॥ 44 ॥
স রাক্ষসাংস্তান্সুবহূংশ্চ হত্বা বনং চ ভংক্ত্বা বহুপাদপং তত্ ।
বিসৃজ্য় রক্ষোভবনেষু চাগ্নিং জগাম রামং মনসা মহাত্মা ॥ 45 ॥
ততস্তু তং বানরবীরমুখ্য়ং মহাবলং মারুততুল্যবেগম্ ।
মহামতিং বায়ুসুতং বরিষ্ঠং প্রতুষ্টুবুর্দেবগণাশ্চ সর্বে ॥ 46 ॥
ভংক্ত্বা বনং মহাতেজা হত্বা রক্ষাংসি সংয়ুগে ।
দগ্ধ্বা লংকাপুরীং রম্য়াং ররাজ স মহাকপিঃ ॥ 47 ॥
তত্র দেবাস্সগংধর্বাস্সিদ্ধাশ্চ পরমর্ষয়ঃ ।
দৃষ্ট্বা লংকাং প্রদগ্ধাং তাং বিস্ময়ং পরমং গতাঃ ॥ 48 ॥
তং দৃষ্ট্বা বানরশ্রেষ্ঠং হনুমংতং মহাকপিম্ ।
কালাগ্নিরিতি সংচিংত্য় সর্বভূতানি তত্রসুঃ ॥ 49 ॥
দেবাশ্চ সর্বে মুনিপুংগবাশ্চ গংধর্ববিদ্য়াধরনাগযক্ষাঃ ।
ভূতানি সর্বাণি মহাংতি তত্র জগ্মুঃ পরাং প্রীতিমতুল্যরূপাম্ ॥ 50 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে চতুঃপংচাশস্সর্গঃ ॥
