শ্রীমদ্বাল্মীকীয় রামাযণে কিষ্কিংধাকাংডম্ ।
অথ দ্বাদশস্সর্গঃ ।
এতচ্চ বচনং শ্রুত্বা সুগ্রীবেণ সুভাষিতম্ ।
প্রত্যয়ার্থং মহাতেজা রামো জগ্রাহ কার্মুকম্ ॥ 1 ॥
স গৃহীত্বা ধনুর্ঘোরং শরমেকং চ মানদঃ ।
সালমুদ্দিশ্য় চিক্ষেপ জ্য়াস্বনৈঃ পূরয়ংদিশঃ ॥ 2 ॥
স বিসৃষ্টো বলবতা বাণস্স্বর্ণপরিষ্কৃতঃ ।
ভিত্ত্বা সালান্ গিরিপ্রস্থং সপ্ত ভূমিং বিবেশ হ ॥ 3 ॥
প্রবিষ্টশ্চ মুহূর্তেন ধরাং ভিত্ত্বা মহাজবঃ ।
নিষ্পত্য় চ পুনস্তূর্ণং স্বতূণীং প্রবিবেশ হ ॥ 4 ॥
তাংদৃষ্ট্বা সপ্ত নির্ভিন্নান্সালান্বানরপুংগবঃ ।
রামস্য় শরবেগেন বিস্ময়ং পরমং গতঃ ॥ 5 ॥
স মূর্ধ্না ন্যপতদভ্মৌ প্রলংবীকৃতভূষণঃ ।
সুগ্রীবঃ পরমপ্রীতো রাঘবায় কৃতাংজলিঃ ॥ 6 ॥
ইদং চোবাচ ধর্মজ্ঞং কর্মণা তেন হর্ষিতঃ ।
রামং সর্বাস্ত্রবিদুষাং শ্রেষ্ঠং শূরমবস্থিতম্ ॥ 7 ॥
সেংদ্রানপি সুরান্সর্বাংস্ত্বং বাণৈঃ পুরুষর্ষভ ।
সমর্থস্সমরে হংতুং কিং পুন র্বালিনং প্রভো ॥ 8 ॥
যেন সপ্তমহাসালা গিরির্ভূমিশ্চ দারিতাঃ ।
বাণেনৈকেন কাকুত্স্থ স্থাতা তে কো রণাগ্রতঃ ॥ 9 ॥
অদ্য় মে বিগতশ্শোকঃ প্রীতিরদ্য় পরা মম ।
সুহৃদং ত্বাং সমাসাদ্য় মহেংদ্রবরুণোপমম্ ॥ 10 ॥
তমদ্য়ৈব প্রিয়ার্থং মে বৈরিণং ভ্রাতৃরূপিণম্ ।
বালিনং জহি কাকুত্স্থ ময়া বদ্ধোঽযমংজলিঃ ॥ 11 ॥
ততো রামঃ পরিষ্বজ্য় সুগ্রীবং প্রিযদর্শনম্ ।
প্রত্য়ুবাচ মহাপ্রাজ্ঞো লক্ষ্মণানুগতং বচঃ ॥ 12 ॥
অস্মাদ্গচ্ছেম কিষ্কিংধাং ক্ষিপ্রং গচ্ছ ত্বমগ্রতঃ ।
গত্বা চাহ্বয় সুগ্রীব বালিনং ভ্রাতৃগংধিনম্ ॥ 13 ॥
সর্বে তে ত্বরিতং গত্বা কিষ্কিংধাং বালিনঃ পুরীম্ ।
বৃক্ষৈরাত্মানমাবৃত্য় ব্যতিষ্ঠন্গহনে বনে ॥ 14 ॥
সুগ্রীবো ব্যনদদ্ঘোরং বালিনোঽঽহ্বানকারণাত্ ।
গাঢং পরিহিতো বেগান্নাদৈর্ভিংদন্নিবাংবরম্ ॥ 15 ॥
তং শ্রুত্বা নিনদং ভ্রাতুঃ ক্রুদ্ধো বালী মহাবলঃ ।
নিশ্চক্রাম সুসংরব্ধো ভাস্করোঽস্ততটাদিব ॥ 16 ॥
ততস্সুতুমুলং যুদ্ধং বালিসুগ্রীবয়োরভূত্ ।
গগনে গ্রহয়োর্ঘোরং বুধাংগারকয়োরিব ॥ 17 ॥
তলৈরশনিকল্পৈশ্চ বজ্রকল্পৈশ্চ মুষ্টিভিঃ ।
জঘ্নতুস্সমরেঽন্য়োন্য়ং ভ্রাতরৌ ক্রোধমূর্ছিতৌ ॥ 18 ॥
ততো রামো ধনুষ্পাণিস্তাবুভৌ সমুদীক্ষ্যতু ।
অন্য়োন্যসদৃশৌ বীরাবুভৌ দেবাবিবাশ্বিনৌ ॥ 19 ॥
যন্নাবগচ্ছত্সুগ্রীবং বালিনং বাপি রাঘবঃ ।
ততো ন কৃতবান্বুদ্ধিং মোক্তুমংতকরং শরম্ ॥ 20 ॥
এতস্মিন্নংতরে ভগ্নস্সুগ্রীবস্তেন বালিনা ।
অপশ্যন্রাঘবং নাথমৃশ্যমূকং প্রদুদ্রুবে ॥ 21 ॥
ক্লাংতো রুধিরসিক্তাংগঃ প্রহারৈর্জর্ঝরীকৃতঃ ।
বালিনাঽভিদ্রুতঃ ক্রোধাত্প্রবিবেশ মহাবনম্ ॥ 22 ॥
তং প্রবিষ্টং বনং দৃষ্ট্বা বালী শাপভয়ার্দিতঃ ।
মুক্তো হ্যসি ত্বমিত্য়ুক্ত্বা স নিবৃত্তো মহাদ্য়ুতিঃ ॥ 23 ॥
রাঘবোঽসি সহ ভ্রাত্রা সহ চৈব হনূমতা ।
তদেব বনমাগচ্ছত্সুগ্রীবো যত্র বানরঃ ॥ 24 ॥
তং সমীক্ষ্য়াগতং রামং সুগ্রীবস্সহলক্ষ্মণম্ ।
হ্রীমাংদীনমুবাচেদং বসুধামবলোকযন্ ॥ 25 ॥
আহ্বযস্বেতি মামুক্ত্বা দর্শয়িত্বা চ বিক্রমম্ ।
বৈরিণা ঘাতয়িত্বা চ কিমিদানীং ত্বয়া কৃতম্ ॥ 26 ॥
তামেন বেলাং বক্তব্য়ং ত্বয়া রাঘব তত্ত্বতঃ ।
বালিনং ন নিহন্মীতি ততো নাহমিতো ব্রজে ॥ 27 ॥
তস্য় চৈবং ব্রুবাণস্য় সুগ্রীবস্য় মহাত্মনঃ ।
করুণং দীনয়া বাচা রাঘবঃ পুনরব্রবীত্ ॥ 28 ॥
সুগ্রীব শ্রূয়াতাং তাত ক্রোধশ্চ ব্যপনীযতাম্ ।
কারণং যেন বাণোঽয়ং ন ময়া স বিসর্জিতঃ ॥ 29 ॥
অলংকারেণ বেষেণ প্রমাণেন গতেন চ ।
ত্বং চ সুগ্রীব বালী চ সদৃশৌ স্থঃ পরস্পরম্ ॥ 30 ॥
স্বরেণ বর্চসা চৈব প্রেক্ষিতেন চ বানর ।
বিক্রমেণ চ বাক্য়ৈশ্চ ব্যক্তিং বাং নোপলক্ষয়ে ॥ 31 ॥
ততোঽহং রূপসাদৃশ্য়ান্মোহিতো বানরোত্তম ।
নোত্সৃজামি মহাবেগং শরং শত্রুনিবর্হণম্ ॥ 32 ॥
জীবিতাংতকরং ঘোরং সাদৃশ্য়াত্তু বিশংকিতঃ ।
মূলঘাতো ন নৌ স্য়াদ্ধি দ্বয়োরপি কৃতো ময়া ॥ 33 ॥
ত্বয়ি বীরে বিপন্নে হি অজ্ঞানাল্লাঘবান্ময়া ।
মৌঢ্য়ং চ মম বাল্য়ং চ খ্য়াপিতং স্য়াত্কপীশ্বর ॥ 34 ॥
দত্তাভযবধো নাম পাতকং মহদুচ্যতে ।
অহং চ লক্ষ্মণশ্চৈব সীতা চ বরবর্ণিনী ॥ 35 ॥
ত্বদধীনা বয়ং সর্বে বনেঽস্মিন্ শরণং ভবান্ ।
তস্মাদ্য়ুধ্যস্ব ভূযস্ত্বং মা মা শংকেশ্চ বানর ॥ 36 ॥
এতন্মুহূর্তে সুগ্রীব পশ্য় বালিনমাহবে ।
নিরস্তমিষুণৈকেন বেষ্টমানং মহীতলে ॥ 37 ॥
অভিজ্ঞানং কুরুষ্ব ত্বমাত্মনো বানরেশ্বর ।
যেন ত্বামভিজানীয়াং দ্বংদ্বয়ুদ্ধমুপাগতম্ ॥ 38 ॥
গজপুষ্পীমিমাং ফুল্লামুত্পাট্য় শুভলক্ষণাম্ ।
কুরু লক্ষ্মণ কংঠেঽস্য় সুগ্রীবস্য় মহাত্মনঃ ॥ 39 ॥
ততো গিরিতটে জাতামুত্পাট্য় কুসুমাকুলাম্ ।
লক্ষ্মণো গজপুষ্পীং তাং তস্য় কংঠে ব্যসর্জযত্ ॥ 40 ॥
স তয়া শুশুভে শ্রীমান্ লতয়া কংঠসক্তয়া ।
মালয়েব বলাকানাং সসংধ্য় ইব তোযদঃ ॥ 41 ॥
বিভ্রাজমানো বপুষা রামবাক্যসমাহিতঃ ।
জগাম সহ রামেণ কিষ্কিংথাং বালিপালিতাম্ ॥ 42 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে দ্বাদশস্সর্গঃ ॥
