শ্রীমদ্বাল্মীকীয় রামাযণে অয়োধ্য়াকাংডম্ ।
অথ ত্রিষষ্টিতমস্সর্গঃ ।
প্রতিবুদ্ধো মুহূর্তেন শোকোপহতচেতনঃ ।
অথ রাজা দশরথস্সচিংতামভ্যপদ্যত ॥ 1 ॥
রামলক্ষ্মণয়োশ্চৈব বিবাসা দ্বাসবোপমম্ ।
আবিবেশোপসর্গস্তং তম স্সূর্যমিবাসুরম্ ॥ 2 ॥
সভার্য়ে নির্গতে রামে কৌসল্য়াং কোশলেশ্বরঃ ।
বিবক্ষুরসিতাপাংগাং স্মৃত্বা দুষ্কৃতমাত্মনঃ ॥ 3 ॥
স রাজা রজনীং ষষ্ঠীং রামে প্রব্রাজিতে বনম্ ।
অর্ধরাত্রে দশরথ স্সংস্মরন্ দুষ্কৃতং কৃতম্ ॥ 4 ॥
স রাজা পুত্রশোকার্তঃ স্মৃত্বা দুষ্কৃতমাত্মনঃ ।
কৌসল্য়াং পুত্রশোকার্তামিদং বচনমব্রবীত্ ॥ 5 ॥
যদাচরতি কল্য়াণি শুভং বা যদি বাঽশুভম্ ।
তদেব লভতে ভদ্রে কর্তা কর্মজমাত্মনঃ ॥ 6 ॥
গুরুলাঘবমর্থানামারংভে কর্মণাং ফলম্ ।
দোষং বা যো ন জানাতি ন বাল ইতি হোচ্যতে ॥ 7 ॥
কশ্চিদাম্রবণং ছিত্ত্বা পলাশাং শ্চ নিষিংচতি ।
পুষ্পং দৃষ্ট্বা ফলে গৃধ্নু স্স শোচতি ফলাগমে ॥ 8 ॥
অবিজ্ঞায় ফলং যো হি কর্ম ত্বেবানুধাবতি ।
স শোচেত্ফলবেলায়াং যথা কিংশুকসেচকঃ ॥ 9 ॥
সোঽহমাম্রবণং ছিত্বা পলাশাংশ্চ ন্যষেচযম্ ।
রামং ফলাগমে ত্যক্ত্বা পশ্চাচ্ছোচামি দুর্মতিঃ ॥ 10 ॥
লব্ধশব্দেন কৌসল্য়ে কুমারেণ ধনুষ্মতা ।
কুমারশ্শব্দবেধীতি ময়া পাপমিদং কৃতম্ ॥ 11 ॥
তদিদং মেঽনুসংংপ্রাপ্তং দেবি দুঃখং স্বয়ং কৃতম্ ।
সম্মোহাদিহ বালেন যথা স্য়াদ্ভক্ষিতং বিষম্ ॥ 12 ॥
যথান্য়ঃ পুরুষঃ কশ্চিত্পলাশৈর্মোহিতো ভবেত্ ।
এবং মমাঽপ্যবিজ্ঞাতং শব্দবেধ্যময়ং ফলম্ ॥ 13 ॥
দেব্যনূঢা ত্বমভবো যুবরাজো ভবাম্যহম্ ।
ততঃ প্রাবৃডনুপ্রাপ্তা মদকামবিবর্ধিনী ॥ 14 ॥
উপাস্য় চ রসান্ভৌমাং স্তপ্ত্বা চ জগদংশুভিঃ ।
পরেতাচরিতাং ভীমাং রবিরাবিশতে দিশম্ ॥ 15 ॥
উষ্ণমংতর্দধে সদ্য় স্স্নিগ্ধা দদৃশিরে ঘনাঃ ।
ততো জহৃষিরে সর্বে ভেকসারংগবর্হিণঃ ॥ 16 ॥
ক্লিন্ন পক্ষোত্তরাস্স্নাতাঃ কৃচ্ছ্রাদিব পতত্রিণঃ ।
বৃষ্টিবাতাবধূতাগ্রান্পাদপানভিপেদিরে ॥ 17 ॥
পতিতেনাংভসাচ্ছন্নঃ পতমানেন চাসকৃত্ ।
আবভৌ মত্তসারংগস্তোযরাশিরিবাচলঃ ॥ 18 ॥
পাংডুরারুণবর্ণানি স্রোতাংসি বিমলান্যপি ।
সুস্রুবুর্গিরিধাতুভ্যস্সভস্মানি ভুজংগবত্ ॥ 19 ॥
আকুলারুণ তোয়ানি স্রোতাংসি বিমলান্যপি ।
উন্মার্গজলবাহিনী বভূবুর্জলদাগমে ॥ 20 ॥
তস্মিন্নতিসুখে কালে ধনুষ্মানিষুমান্রথী ।
ব্য়ায়ামকৃতসংকল্পস্সরয়ূমন্বগাং নদীম্ ॥ 21 ॥
নিপানে মহিষং রাত্রৌ গজং বাঽভ্য়াগতং নদীম্ ।
অন্য়ং বা শ্বাপদং কংচিজ্জিঘাংসু রজিতেংদ্রিয়ঃ ।
তস্মিং স্তত্রাহমেকাংতে রাত্রৌ বিবৃতকার্মুকঃ ॥ 22 ॥
তত্রাহং সংবৃতং বন্য়ং হতবাংস্তীরমাগতম্ ।
অন্য়ং চাপি মৃগং হিংস্রং শব্দং শ্রুত্বাঽভ্য়ুপাগতম্ ॥ 23 ॥
অথাংধকারে ত্বশ্রৌষং জলে কুংভস্য় পূর্যতঃ ।
অচক্ষুর্বিষয়ে ঘোষং বারণস্য়েব নর্দতঃ ॥ 24 ॥
ততোঽহং শরমুধৃত্য় দীপ্তমাশীবিষোপমম্ ।
শব্দং প্রতি গজপ্রেপ্সুরভিলক্ষ্য় ত্বপাতযম্ ॥ 25 ॥
অমুংচং নিশিতং বাণমহমাশীবিষোপমম্ ।
তত্র বাগুষসি ব্যক্তা প্রাদুরাসীদ্বনৌকসঃ ॥ 26 ॥
হাহেতি পততস্তোয়ে বাণাভিহতমর্মণঃ ॥ 27 ॥
তস্মিন্নিপতিতে বাণে বাগভূত্তত্র মানুষী ।
কথমস্মদ্বিধে শস্ত্রং নিপতেত্তু তপস্বিনি ॥ 28 ॥
প্রবিবিক্তাং নদীং রাত্রাবুদাহাঽরোহমাগতঃ ।
ইষুণাঽভিহতঃ কেন কস্য় বা কিং কৃতং ময়া ॥ 29 ॥
ঋষের্হিন্যস্তদংডস্য় বনে বন্য়েন জীবতঃ ।
কথং নু শস্রেণ বধো মদ্বিধস্য় বিধীযতে ॥ 30 ॥
জটাভারধরস্য়ৈব বল্কলাজিনবাসসঃ ।
কো বধেন মমর্থী স্য়াত্কিংবাঽস্য়াপকৃতং ময়া ॥ 31 ॥
এবং নিষ্ফলমারব্ধং কেবলানর্থসংহিতম্ ।
ন কশ্চিত্সাধু মন্য়েত যথৈব গুরুতল্পগম্ ॥ 32 ॥
নাহং তথাঽনু শোচামি জীবিতক্ষযমাত্মনঃ ।
মাতরং পিতরং চোভাবনুশোচামি মদ্বধে ॥ 33 ॥
তদেতন্মিথুনং বৃদ্ধং চিরকালভৃতং ময়া ।
ময়ি পংচত্বমাপন্নে কাং বৃত্তিং বর্তয়িষ্যতি ॥ 34 ॥
বৃদ্ধৈ চ মতাপিতরাবহং চৈকেষুণা হতা ।
কেন স্মনিহতা স্সর্বে সুবালেনাকৃতাত্মনা ॥ 35 ॥
তাং গিরং করুণাং শ্রুত্বা মম ধর্মানুকাংক্ষিণঃ ।
করাভ্য়াং সশরং চাপং ব্যথিতস্য়াপতদ্ভুবি ॥ 36 ॥
তস্য়াহং করুণং শ্রুত্বা নিশি লালবতো বহু ।
সংভ্রাংত শ্শোকবেগেন ভৃশমাসং বিচেতনঃ ॥ 37 ॥
তং দেশমহমাগম্য় দীনসত্ত্বস্সুদুর্মনাঃ ।
অপশ্যমিষুণা তীরে সরয়্বাস্তাপসং হতম্ ॥ 38 ॥
অবকীর্ণ জটাভারং প্রবিদ্ধকলশোদকম্ ।
পাংসুশোণিতদিগ্ধাংগং শয়ানং শল্যপীডিতম্ ॥ 39 ॥
স মামুদ্বীক্ষ্য় নেত্রাভ্য়াং ত্রস্তমস্বস্থচেতসম্ ।
ইত্য়ুবাচ ততঃ ক্রূরং দিধক্ষন্নিব তেজসা ॥ 40 ॥
কিং তবাপকৃতং রাজন্বনে নিবসতা ময়া ।
জিহীর্ষুরংভো গুর্বুর্থং যদহং তাডিতস্ত্বয়া ॥ 41 ॥
একেন খলু বাণেন মর্মণ্যভিহতে ময়ি ।
দ্বাবংধৌ নিহতৌ বৃদ্ধৌ মাতা জনয়িতা চ মে ॥ 42 ॥
তৌ কথং দুর্বলাবংধৌ মত্প্রতীক্ষৌ পিপাসিতৌ ।
চিরমাশাকৃতাং তৃষ্ণাং কষ্টাং সংধারয়িষ্যতঃ ॥ 43 ॥
ন নূনং তপসো বাস্তি ফলয়োগশ্শ্রুতস্য় বা ।
পিতা যন্মাং ন জানাতি শয়ানং পতিতং ভুবি ॥ 44 ॥
জানন্নপি চ কিং কুর্য়াদশক্তিরপরিক্রমঃ ।
ভিদ্যমানমিবাশক্ত স্ত্রতুমন্য়ো নগো নগম্ ॥ 45 ॥
পিতুস্ত্বমেব মে গত্বা শীঘ্রমাচক্ষ্য় রাঘব ।
ন ত্বামনুদহেত্ক্রুদ্ধো বনং বহ্নিরিবৈধিতঃ ॥ 46 ॥
ইযমেকপদী রাজন্যতো মে পিতুরাশ্রমঃ ।
তং প্রসাদয় গত্বা ত্বং ন ত্বাং স কুপিতশ্শপেত্ ॥ 47 ॥
বিশল্য়ং কুরু মাং রাজন্মর্ম মে নিশিতশ্শরঃ ।
রুণদ্ধি মৃদুসোত্সেধং তীরমংবুরয়ো যথা ॥ 48 ॥
সশল্য়ঃ ক্লিশ্যতে প্রাণৈর্বিশল্য়ো বিনশিষ্যতি ।
ইতি মামবিশচ্চিংতা তস্য় শল্য়াপকর্ষণে ॥ 49 ॥
দুঃখিতস্য় চ দীনস্য় মম শোকাতুরস্য় চ ।
লক্ষয়ামাস হৃদয়ে চিংতাং মুনিসুতস্তদা ॥ 50 ॥
তাম্যমানস্স মাং কৃচ্ছ্রাদুবাচ পরমার্তবত্ ।
সীদমানো বিবৃত্তাংগো বেষ্টমানো গতঃ ক্ষযম্ ॥ 51 ॥
সংস্তভ্য় শোকং ধৈর্য়েণ স্থিরচিত্তো ভবাম্যহম্ ।
ব্রহ্মহত্য়াকৃতং পাপং হৃদয়াদপনীযতাম্ ॥ 52 ॥
ন দ্বিজাতিরহং রাজন্মা ভূত্তে মনসো ব্যথা ।
শূদ্রায়ামস্মি বৈশ্য়েন জাতো জনপদাধিপ ॥ 53 ॥
ইতীব বদতঃ কৃচ্ছ্রাদ্বাণাভিহতমর্মণঃ বিঘূর্ণতো বিচেষ্টস্য় বেপমানস্য় ভূতলে ।
তস্যত্বানম্যমানস্য় তং বাণমহমুদ্ধরং স মামুদ্বীক্ষ্য় সংত্রস্তো জহৌ প্রাণাংস্তপোধনঃ ॥ 54 ॥
জলার্দ্রগাত্রংতু বিলপ্য় কৃচ্ছ্রান্মর্মব্রণং সংততমুচ্ছবসংতম্ ।
তত স্সরয়্বাং তমহং শয়ানং সমীক্ষ্য় ভদ্রেঽস্মি ভৃশং বিষণ্ণঃ ॥ 55 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে ত্রিষষ্টিতমস্সর্গঃ ॥
