শ্রীমদ্বাল্মীকীয় রামাযণে অরণ্যকাংডম্ ।
অথ প্রথমস্সর্গঃ ।
প্রবিশ্য় তু মহারণ্য়ং দংডকারণ্যমাত্মবান্ ।
দদর্শ রামো দুর্ধর্ষস্তাপসাশ্রমমংডলম্ ॥ 1 ॥
কুশচীরপরিক্ষিপ্তং ব্রাহ্ম্য়া লক্ষ্ম্য়া সমাবৃতম্ ।
যথা প্রদীপ্তং দুর্দর্শং গগনে সূর্যমংডলম্ ॥ 2 ॥
শরণ্য়ং সর্বভূতানাং সুসম্মৃষ্টাজিরং সদা ।
মৃগৈর্বহুভিরাকীর্ণং পক্ষিসংঘৈস্সমাবৃতম্ ॥ 3 ॥
পূজিতং চ প্রনৃত্তং চ নিত্যমপ্সরসাং গণৈঃ ।
বিশালৈরগ্নিশরণৈঃ স্রুগ্ভাংডৈরজিনৈঃ কুশৈঃ ॥ 4 ॥
সমিদ্ভিস্তোযকলশৈঃ ফলমূলৈশ্চ শোভিতম্ ।
আরণ্য়ৈশ্চ মহাবৃক্ষৈঃ পুণ্য়ৈস্স্বাদুফলৈর্বৃতম্ ॥ 5 ॥
বলিহোমার্চিতং পুণ্য়ং ব্রহ্মঘোষনিনাদিতম্ ।
পুষ্পৈশ্চান্য়ৈঃ পরিক্ষিপ্তং পদ্মিন্য়া চ সপদ্ময়া ॥ 6 ॥
ফলমূলাশনৈর্দাংতৈশ্চীরকৃষ্ণাজিনাংবরৈঃ ।
সূর্যবৈশ্বানরাভৈশ্চ পুরাণৈর্মুনিভির্বুতম্ ॥ 7 ॥
পুণ্য়ৈশ্চ নিযতাহারৈঃ শোভিতং পরমর্ষিভিঃ ।
তদ্ব্রহ্মভবনপ্রখ্য়ং ব্রহ্মঘোষনিনাদিতম্ ॥ 8 ॥
ব্রহ্মবিদ্ভির্মহাভাগৈর্ব্রাহ্মণৈরুপশোভিতম্ ।
তদ্দৃষ্ট্বা রাঘবঃ শ্রীমাংস্তাপসাশ্রমমংডলম্ ॥ 9 ॥
অভ্যগচ্ছন্মহাতেজা বিজ্য়ং কৃত্বা মহদ্ধনুঃ ।
দিব্যজ্ঞানোপপন্নাস্তে রামং দৃষ্ট্বা মহর্ষয়ঃ ॥ 10 ॥
অভ্যগচ্ছন্স্তদা প্রীতা বৈদেহীং চ যশস্বিনীম্ ।
তে তং সোমমিবোদ্য়ংতং দৃষ্ট্বা বৈ ধর্মচারিণম্ ॥ 11 ॥
লক্ষ্মণং চৈব দৃষ্ট্বা তু বৈদেহীং চ যশস্বিনীম্ ।
মংগলানি প্রয়ুংজানাঃ প্রত্যগৃহ্ণংদৃঢব্রতাঃ ॥ 12 ॥
রূপসংহননং লক্ষ্মীং সৌকুমার্য়ং সুবেষতাম্ ।
দদৃশুর্বিস্মিতাকারা রামস্য় বনবাসিনঃ ॥ 13 ॥
বৈদেহীং লক্ষ্মণং রামং নেত্রৈরনিমিষৈরিব ।
আশ্চর্যভূতাংদদৃশুঃ সর্বে তে বনচারিণঃ ॥ 14 ॥
অত্রৈনং হি মহাভাগা স্সর্বভূতহিতে রতাঃ ।
অতিথিং পর্ণশালায়াং রাঘবং সংন্যবেশযন্ ॥ 15 ॥
ততো রামস্য় সত্কৃত্য় বিধিনা পাবকোপমাঃ ।
আজহ্রুস্তে মহাভাগাঃ সলিলং ধর্মচারিণঃ ॥ 16 ॥
পুষ্পং মূলং ফলং সর্বমাশ্রমং চ মহাত্মনঃ ।
নিবেদয়িত্বা ধর্মজ্ঞাস্তে ততঃ প্রাংজলয়োঽব্রুবন্ ॥ 17 ॥
ধর্মপালো জনস্য়াস্য় শরণ্যস্ত্বং মহাযশাঃ ।
পূজনীযশ্চ মান্যশ্চ রাজা দংডধরো গুরুঃ ॥ 18 ॥
ইংদ্রস্য়েহ চতুর্ভাগঃ প্রজা রক্ষতি রাঘব ।
রাজা তস্মাদ্বরান্ভোগান্রম্য়ান্ ভুঙক্তেলোকনমস্কৃতঃ ॥ 19 ॥
তে বয়ং ভবতা রক্ষ্য়া ভবদ্বিষযবাসিনঃ ।
নগরস্থো বনস্থো বা ত্বং নো রাজা জনেশ্বরঃ ॥ 20 ॥
ন্যস্তদংডা বয়ং রাজংজিতক্রোধা জিতেংদ্রিয়াঃ ।
রক্ষণীয়াস্ত্বয়া শশ্বদগর্ভভূতাস্তপোধনাঃ ॥ 21 ॥
এবমুক্ত্বা ফলৈর্মূলৈঃ পুষ্পৈর্বন্য়ৈশ্চ রাঘবম্ ।
অন্য়ৈশ্চ বিবিধাহারৈঃ সলক্ষ্মণমপূজযন্ ॥ 22 ॥
তথান্য়ে তাপসাস্সিদ্ধা রামং বৈশ্বানরোপমাঃ ।
ন্য়াযবৃত্তা যথান্য়ায়ং তর্পয়ামাসুরীশ্বরম্ ॥ 23 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে প্রথমস্সর্গঃ ॥
