શ્રીમદ્વાલ્મીકીય રામાયણે બાલકાંડમ્ ।
અથ એકસપ્તતિતમસ્સર્ગઃ ।
એવં બ્રુવાણં જનકઃ પ્રત્યુવાચ કૃતાંજલિઃ ।
શ્રોતુમર્હસિ ભદ્રં તે કુલં નઃ પરિકીર્તિતમ્ ॥ 1 ॥
પ્રદાને હિ મુનિશ્રેષ્ઠ કુલં નિરવશેષતઃ ।
વક્તવ્યં કુલજાતેન તન્નિબોધ મહામુને ॥ 2 ॥
રાજાઽભૂત્ ત્રિષુ લોકેષુ વિશ્રુત સ્સ્વેન કર્મણા ।
નિમિઃ પરમધર્માત્મા સર્વસત્ત્વવતાં વરઃ ॥ 3 ॥
તસ્ય પુત્રોમિથિર્નામ મિથિલા યેન નિર્મિતા ।
પ્રથમો જનકો નામ જનકાદપ્યુદાવસુઃ ॥ 4 ॥
ઉદાવસોસ્તુ ધર્માત્મા જાતો વૈ નંદિવર્ધનઃ ।
નંદિવર્ધનપુત્રસ્તુ સુકેતુર્નામ નામતઃ ॥ 5 ॥
સુકેતોરપિ ધર્માત્મા દેવરાતો મહાબલઃ ।
દેવરાતસ્ય રાજર્ષેર્બૃહદ્રથ ઇતિ સ્મૃતઃ ॥ 6 ॥
બૃહદ્રથસ્ય શૂરોઽભૂન્મહાવીરઃ પ્રતાપવાન્ ।
મહાવીરસ્ય ધૃતિમાન્ સુધૃતિસ્સત્યવિક્રમઃ ॥ 7 ॥
સુધૃતેરપિ ધર્માત્મા દૃષ્ટકેતુસ્સુધાર્મિકઃ ।
દૃષ્ટકેતોસ્તુ રાજર્ષેર્હર્યશ્વ ઇતિ વિશ્રુતઃ ॥ 8 ॥
હર્યશ્વસ્ય મરુઃ પુત્રો મરોઃ પુત્રઃ પ્રતિંધકઃ ।
પ્રતિંધકસ્ય ધર્માત્મા રાજા કીર્તિરથસ્સુતઃ ॥ 9 ॥
પુત્રઃ કીર્તિરથસ્યાપિ દેવમીઢ ઇતિ સ્મૃતઃ ।
દેવમીઢસ્ય વિબુધો વિબુધસ્ય મહીધ્રકઃ ॥ 10 ॥
મહીધ્રકસુતો રાજા કીર્તિરાતો મહાબલઃ ।
કીર્તિરાતસ્ય રાજર્ષેર્મહારોમા વ્યજાયત ॥ 11 ॥
મહારોમ્ણસ્તુ ધર્માત્મા સ્વર્ણરોમા વ્યજાયત ।
સ્વર્ણરોમ્ણસ્તુ રાજર્ષેર્હ્રસ્વરોમા વ્યજાયત ॥ 12 ॥
તસ્ય પુત્રદ્વયં જજ્ઞે ધર્મજ્ઞસ્ય મહાત્મનઃ ।
જ્યેષ્ઠોઽહમનુજો ભ્રાતા મમ વીરઃ કુશધ્વજઃ ॥ 13 ॥
માં તુ જ્યેષ્ઠં પિતા રાજ્યે સોઽભિષિચ્ય નરાધિપઃ ।
કુશધ્વજં સમાવેશ્ય ભારં મયિ વનં ગતઃ ॥ 14 ॥
વૃદ્ધે પિતરિ સ્વર્યાતે ધર્મેણ ધુરમાવહમ્ ।
ભ્રાતરં દેવસંકાશં સ્નેહાત્પશ્યન્ કુશધ્વજમ્ ॥ 15 ॥
કસ્ય ચિત્ત્વથકાલસ્ય સાંકાશ્યાદગમત્પુરાત્ ।
સુધન્વા વીર્યવાન્રાજા મિથિલામવરોધકઃ ॥ 16 ॥
સ ચ મે પ્રેષયામાસ શૈવં ધનુરનુત્તમમ્ ।
સીતા કન્યા ચ પદ્માક્ષી મહ્યં વૈ દીયતામિતિ ॥ 17 ॥
તસ્યાપ્રદાનાદ્બ્રહ્મર્ષે યુદ્ધમાસીન્મયા સહ ।
સ હતોઽભિમુખો રાજા સુધન્વા તુ મયા રણે ॥ 18 ॥
નિહત્ય તં મુનિશ્રેષ્ઠ સુધન્વાનં નરાધિપમ્ ।
સાંકાશ્યે ભ્રાતરં વીરમભ્યષિંચં કુશધ્વજમ્ ॥ 19 ॥
કનીયાનેષ મે ભ્રાતા અહં જ્યેષ્ઠો મહામુને ।
દદામિ પરમપ્રીતો વધ્વૌ તે મુનિપુંગવ ॥ 20 ॥
સીતાં રામાય ભદ્રં તે ઊર્મિલા લક્ષ્મણાય ચ ।
વીર્યશુલ્કાં મમ સુતાં સીતાં સુરસુતોપમામ્ ॥ 21 ॥
દ્વિતીયામૂર્મિલાં ચૈવ ત્રિર્દદામિ ન સંશયઃ ।
દદામિ પરમપ્રીતો વધ્વૌ તે રઘુનંદન ॥ 22 ॥
રામલક્ષ્મણયો રાજન્ ગોદાનં કારયસ્વ હ ।
પિતૃકાર્યં ચ ભદ્રં તે તતો વૈવાહિકં કુરુ ॥ 23 ॥
મખા હ્યદ્ય મહાબાહો તૃતીયે દિવસે પ્રભો ।
ફલ્ગુન્યામુત્તરે રાજંસ્તસ્મિન્વૈવાહિકં કુરુ ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે એકસપ્તતિતમસ્સર્ગઃ ॥
