śrīmadvālmīkīya rāmāyaṇē sundarakāṇḍam ।
atha ēkaviṃśassargaḥ ।
tasya tadvachanaṃ śrutvā sītā raudrasya rakṣasaḥ ।
ārtā dīnasvarā dīnaṃ pratyuvācha śanairvachaḥ ॥ 1 ॥
duḥkhārtā rudatī sītā vēpamānā tapasvinī ।
chintayantī varārōhā patimēva pativratā ॥ 2 ॥
tṛṇamantarataḥ kṛtvā pratyuvācha śuchismitā ।
nivartaya manō mattaḥ svajanē kriyatāṃ manaḥ ॥ 3 ॥
na māṃ prārthayituṃ yuktaṃ susiddhimiva pāpakṛt ।
akāryaṃ na mayā kāryamēkapatnyā vigarhitam ॥ 4 ॥
kulaṃ samprāptayā puṇyaṃ kulē mahati jātayā ।
ēvamuktvā tu vaidēhī rāvaṇaṃ taṃ yaśasvinī ॥ 5 ॥
rākṣasaṃ pṛṣṭhataḥ kṛtvā bhūyō vachanamabravīt ।
nāhamaupayikī bhāryā parabhāryā satī tava ॥ 6 ॥
sādhu dharmamavēkṣasva sādhu sādhuvrataṃ chara ।
yathā tava tathānyēṣāṃ dārā rakṣyā niśāchara ॥ 7 ॥
ātmānamupamāṃ kṛtvā svēṣu dārēṣu ramyatām ।
atuṣṭaṃ svēṣu dārēṣu chapalaṃ chalitēndriyam ॥ 8 ॥
nayanti nikṛtiprajñaṃ paradārāḥ parābhavam ।
iha santō na vā santi satō vā nānuvartasē ॥ 9 ॥
tathāhi viparītā tē buddhirāchāravarjitā ।
vachō mithyāpraṇītātmā pathyamuktaṃ vichakṣaṇaiḥ ॥ 10 ॥
rākṣasānāmabhāvāya tvaṃ vā na pratipadyasē ।
akṛtātmānamāsādya rājānamanayē ratam ॥ 11 ॥
samṛddhāni vinaśyanti rāṣṭrāṇi nagarāṇi cha ।
tathēyaṃ tvāṃ samāsādya laṅkā ratnaughasaṅkulā ॥ 12 ॥
aparādhāttavaikasya nachirādvinaśiṣyati ।
svakṛtairhanyamānasya rāvaṇādīrghadarśinaḥ ॥ 13 ॥
abhinandanti bhūtāni vināśē pāpakarmaṇaḥ ।
ēvaṃ tvāṃ pāpakarmāṇaṃ vakṣyanti nikṛtā janāḥ ॥ 14 ॥
diṣṭyaitadvyasanaṃ prāptō raudra ityēva harṣitāḥ ।
śakyā lōbhayituṃ nāhamaiśvaryēṇa dhanēna vā ॥ 15 ॥
ananyā rāghavēṇāhaṃ bhāskarēṇa prabhā yathā ।
upadhāya bhujaṃ tasya lōkanāthasya satkṛtam ॥ 16 ॥
kathaṃ nāmōpadhāsyāmi bhujamanyasya kasya chit ।
ahamaupayikī bhāryā tasyaiva vasudhāpatēḥ ॥ 17 ॥
vratasnātasya viprasya vidyēva viditātmanaḥ ।
sādhu rāvaṇa rāmēṇa māṃ samānaya duḥkhitām ॥ 18 ॥
vanē vāśitayā sārdhaṃ karēṇvēva gajādhipam ।
mitramaupayikaṃ kartuṃ rāmaḥ sthānaṃ parīpsatā ॥ 19 ॥
vadhaṃ chānichChatā ghōraṃ tvayāsau puruṣarṣabhaḥ ।
viditaḥ sa hi dharmajñaḥ śaraṇāgatavatsalaḥ ॥ 20 ॥
tēna maitrī bhavatu tē yadi jīvitumichChasi ।
prasādayasva tvaṃ chainaṃ śaraṇāgatavatsalam ॥ 21 ॥
māṃ chāsmai niyatō bhūtvā niryātayitumarhasi ।
ēvaṃ hi tē bhavētsvasti sampradāya raghūttamē ॥ 22 ॥
anyathā tvaṃ hi kurvāṇō vadhaṃ prāpsyasi rāvaṇa ।
varjayēdvajramutsṛṣṭaṃ varjayēdantakaśchiram ॥ 23 ॥
tvadvidhaṃ tu na saṅkṛddhō lōkanāthaḥ sa rāghavaḥ ।
rāmasya dhanuṣaḥ śabdaṃ śrōṣyasi tvaṃ mahāsvanam ॥ 24 ॥
śatakratuvisṛṣṭasya nirghōṣamaśanēriva ।
iha śīghraṃ suparvāṇō jvalitāsyā ivōragāḥ ॥ 25 ॥
iṣavō nipatiṣyanti rāmalakṣmaṇalakṣaṇāḥ ।
rakṣāṃsi parinighnantaḥ puryāmasyāṃ samantataḥ ॥ 26 ॥
asampātaṃ kariṣyanti patantaḥ kaṅkavāsasaḥ ।
rākṣasēndramahāsarpān sa rāmagaruḍō mahān ॥ 27 ॥
uddhariṣyati vēgēna vainatēya ivōragān ।
apanēṣyati māṃ bhartā tvattaḥ śīghramarindamaḥ ॥ 28 ॥
asurēbhyaḥ śriyaṃ dīptāṃ viṣṇustribhiriva kramaiḥ ।
janasthānē hatasthānē nihatē rakṣasāṃ balē ॥ 29 ॥
aśaktēna tvayā rakṣaḥ kṛtamētadasādhu vai ।
āśramaṃ tu tayōḥ śūnyaṃ praviśya narasiṃhayōḥ ॥ 30 ॥
gōcharaṃ gatayōrbhrātrōrapanītā tvayādhama ।
na hi gandhamupāghrāya rāmalakṣmaṇayōstvayā ॥ 31 ॥
śakyaṃ sandarśanē sthātuṃ śunā śārdūlayōriva ।
tasya tē vigrahē tābhyāṃ yugagrahaṇamasthiram ॥ 32 ॥
vṛtrasyēvēndrabāhubhyāṃ bāhōrēkasya vigrahē ।
kṣipraṃ tava sa nāthō mē rāmaḥ saumitriṇā saha ॥ 33 ॥
tōyamalpamivādityaḥ prāṇānādāsyatē śaraiḥ ।
giriṃ kubērasya gatō'tha vālayaṃ sabhāṃ gatō vā varuṇasya rājñaḥ ।
asaṃśayaṃ dāśarathērna mōkṣyasē mahādrumaḥ kālahatō'śanēriva ॥ 34 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ēkaviṃśassargaḥ ॥
