ശ്രീമദ്വാല്മീകീയ രാമായണേ സുംദരകാംഡമ് ।
അഥ ഏകവിംശസ്സര്ഗഃ ।
തസ്യ തദ്വചനം ശ്രുത്വാ സീതാ രൌദ്രസ്യ രക്ഷസഃ ।
ആര്താ ദീനസ്വരാ ദീനം പ്രത്യുവാച ശനൈർവചഃ ॥ 1 ॥
ദുഃഖാര്താ രുദതീ സീതാ വേപമാനാ തപസ്വിനീ ।
ചിംതയംതീ വരാരോഹാ പതിമേവ പതിവ്രതാ ॥ 2 ॥
തൃണമംതരതഃ കൃത്വാ പ്രത്യുവാച ശുചിസ്മിതാ ।
നിവര്തയ മനോ മത്തഃ സ്വജനേ ക്രിയതാം മനഃ ॥ 3 ॥
ന മാം പ്രാര്ഥയിതും യുക്തം സുസിദ്ധിമിവ പാപകൃത് ।
അകാര്യം ന മയാ കാര്യമേകപത്ന്യാ വിഗര്ഹിതമ് ॥ 4 ॥
കുലം സംപ്രാപ്തയാ പുണ്യം കുലേ മഹതി ജാതയാ ।
ഏവമുക്ത്വാ തു വൈദേഹീ രാവണം തം യശസ്വിനീ ॥ 5 ॥
രാക്ഷസം പൃഷ്ഠതഃ കൃത്വാ ഭൂയോ വചനമബ്രവീത് ।
നാഹമൌപയികീ ഭാര്യാ പരഭാര്യാ സതീ തവ ॥ 6 ॥
സാധു ധര്മമവേക്ഷസ്വ സാധു സാധുവ്രതം ചര ।
യഥാ തവ തഥാന്യേഷാം ദാരാ രക്ഷ്യാ നിശാചര ॥ 7 ॥
ആത്മാനമുപമാം കൃത്വാ സ്വേഷു ദാരേഷു രമ്യതാമ് ।
അതുഷ്ടം സ്വേഷു ദാരേഷു ചപലം ചലിതേംദ്രിയമ് ॥ 8 ॥
നയംതി നികൃതിപ്രജ്ഞം പരദാരാഃ പരാഭവമ് ।
ഇഹ സംതോ ന വാ സംതി സതോ വാ നാനുവര്തസേ ॥ 9 ॥
തഥാഹി വിപരീതാ തേ ബുദ്ധിരാചാരവര്ജിതാ ।
വചോ മിഥ്യാപ്രണീതാത്മാ പഥ്യമുക്തം വിചക്ഷണൈഃ ॥ 10 ॥
രാക്ഷസാനാമഭാവായ ത്വം വാ ന പ്രതിപദ്യസേ ।
അകൃതാത്മാനമാസാദ്യ രാജാനമനയേ രതമ് ॥ 11 ॥
സമൃദ്ധാനി വിനശ്യംതി രാഷ്ട്രാണി നഗരാണി ച ।
തഥേയം ത്വാം സമാസാദ്യ ലംകാ രത്നൌഘസംകുലാ ॥ 12 ॥
അപരാധാത്തവൈകസ്യ നചിരാദ്വിനശിഷ്യതി ।
സ്വകൃതൈര്ഹന്യമാനസ്യ രാവണാദീര്ഘദര്ശിനഃ ॥ 13 ॥
അഭിനംദംതി ഭൂതാനി വിനാശേ പാപകര്മണഃ ।
ഏവം ത്വാം പാപകര്മാണം വക്ഷ്യംതി നികൃതാ ജനാഃ ॥ 14 ॥
ദിഷ്ട്യൈതദ്വ്യസനം പ്രാപ്തോ രൌദ്ര ഇത്യേവ ഹര്ഷിതാഃ ।
ശക്യാ ലോഭയിതും നാഹമൈശ്വര്യേണ ധനേന വാ ॥ 15 ॥
അനന്യാ രാഘവേണാഹം ഭാസ്കരേണ പ്രഭാ യഥാ ।
ഉപധായ ഭുജം തസ്യ ലോകനാഥസ്യ സത്കൃതമ് ॥ 16 ॥
കഥം നാമോപധാസ്യാമി ഭുജമന്യസ്യ കസ്യ ചിത് ।
അഹമൌപയികീ ഭാര്യാ തസ്യൈവ വസുധാപതേഃ ॥ 17 ॥
വ്രതസ്നാതസ്യ വിപ്രസ്യ വിദ്യേവ വിദിതാത്മനഃ ।
സാധു രാവണ രാമേണ മാം സമാനയ ദുഃഖിതാമ് ॥ 18 ॥
വനേ വാശിതയാ സാര്ധം കരേണ്വേവ ഗജാധിപമ് ।
മിത്രമൌപയികം കര്തും രാമഃ സ്ഥാനം പരീപ്സതാ ॥ 19 ॥
വധം ചാനിച്ഛതാ ഘോരം ത്വയാസൌ പുരുഷര്ഷഭഃ ।
വിദിതഃ സ ഹി ധര്മജ്ഞഃ ശരണാഗതവത്സലഃ ॥ 20 ॥
തേന മൈത്രീ ഭവതു തേ യദി ജീവിതുമിച്ഛസി ।
പ്രസാദയസ്വ ത്വം ചൈനം ശരണാഗതവത്സലമ് ॥ 21 ॥
മാം ചാസ്മൈ നിയതോ ഭൂത്വാ നിര്യാതയിതുമര്ഹസി ।
ഏവം ഹി തേ ഭവേത്സ്വസ്തി സംപ്രദായ രഘൂത്തമേ ॥ 22 ॥
അന്യഥാ ത്വം ഹി കുർവാണോ വധം പ്രാപ്സ്യസി രാവണ ।
വര്ജയേദ്വജ്രമുത്സൃഷ്ടം വര്ജയേദംതകശ്ചിരമ് ॥ 23 ॥
ത്വദ്വിധം തു ന സംകൃദ്ധോ ലോകനാഥഃ സ രാഘവഃ ।
രാമസ്യ ധനുഷഃ ശബ്ദം ശ്രോഷ്യസി ത്വം മഹാസ്വനമ് ॥ 24 ॥
ശതക്രതുവിസൃഷ്ടസ്യ നിര്ഘോഷമശനേരിവ ।
ഇഹ ശീഘ്രം സുപർവാണോ ജ്വലിതാസ്യാ ഇവോരഗാഃ ॥ 25 ॥
ഇഷവോ നിപതിഷ്യംതി രാമലക്ഷ്മണലക്ഷണാഃ ।
രക്ഷാംസി പരിനിഘ്നംതഃ പുര്യാമസ്യാം സമംതതഃ ॥ 26 ॥
അസംപാതം കരിഷ്യംതി പതംതഃ കംകവാസസഃ ।
രാക്ഷസേംദ്രമഹാസര്പാന് സ രാമഗരുഡോ മഹാന് ॥ 27 ॥
ഉദ്ധരിഷ്യതി വേഗേന വൈനതേയ ഇവോരഗാന് ।
അപനേഷ്യതി മാം ഭര്താ ത്വത്തഃ ശീഘ്രമരിംദമഃ ॥ 28 ॥
അസുരേഭ്യഃ ശ്രിയം ദീപ്താം വിഷ്ണുസ്ത്രിഭിരിവ ക്രമൈഃ ।
ജനസ്ഥാനേ ഹതസ്ഥാനേ നിഹതേ രക്ഷസാം ബലേ ॥ 29 ॥
അശക്തേന ത്വയാ രക്ഷഃ കൃതമേതദസാധു വൈ ।
ആശ്രമം തു തയോഃ ശൂന്യം പ്രവിശ്യ നരസിംഹയോഃ ॥ 30 ॥
ഗോചരം ഗതയോര്ഭ്രാത്രോരപനീതാ ത്വയാധമ ।
ന ഹി ഗംധമുപാഘ്രായ രാമലക്ഷ്മണയോസ്ത്വയാ ॥ 31 ॥
ശക്യം സംദര്ശനേ സ്ഥാതും ശുനാ ശാര്ദൂലയോരിവ ।
തസ്യ തേ വിഗ്രഹേ താഭ്യാം യുഗഗ്രഹണമസ്ഥിരമ് ॥ 32 ॥
വൃത്രസ്യേവേംദ്രബാഹുഭ്യാം ബാഹോരേകസ്യ വിഗ്രഹേ ।
ക്ഷിപ്രം തവ സ നാഥോ മേ രാമഃ സൌമിത്രിണാ സഹ ॥ 33 ॥
തോയമല്പമിവാദിത്യഃ പ്രാണാനാദാസ്യതേ ശരൈഃ ।
ഗിരിം കുബേരസ്യ ഗതോഽഥ വാലയം സഭാം ഗതോ വാ വരുണസ്യ രാജ്ഞഃ ।
അസംശയം ദാശരഥേര്ന മോക്ഷ്യസേ മഹാദ്രുമഃ കാലഹതോഽശനേരിവ ॥ 34 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ഏകവിംശസ്സര്ഗഃ ॥
