ශ්රීමද්වාල්මීකීය රාමායණේ සුංදරකාංඩම් ।
අථ ඒකවිංශස්සර්ගඃ ।
තස්ය තද්වචනං ශ්රුත්වා සීතා රෞද්රස්ය රක්ෂසඃ ।
ආර්තා දීනස්වරා දීනං ප්රත්යුවාච ශනෛර්වචඃ ॥ 1 ॥
දුඃඛාර්තා රුදතී සීතා වේපමානා තපස්විනී ।
චිංතයංතී වරාරෝහා පතිමේව පතිව්රතා ॥ 2 ॥
තෘණමංතරතඃ කෘත්වා ප්රත්යුවාච ශුචිස්මිතා ।
නිවර්තය මනෝ මත්තඃ ස්වජනේ ක්රියතාං මනඃ ॥ 3 ॥
න මාං ප්රාර්ථයිතුං යුක්තං සුසිද්ධිමිව පාපකෘත් ।
අකාර්යං න මයා කාර්යමේකපත්න්යා විගර්හිතම් ॥ 4 ॥
කුලං සංප්රාප්තයා පුණ්යං කුලේ මහති ජාතයා ।
ඒවමුක්ත්වා තු වෛදේහී රාවණං තං යශස්විනී ॥ 5 ॥
රාක්ෂසං පෘෂ්ඨතඃ කෘත්වා භූයෝ වචනමබ්රවීත් ।
නාහමෞපයිකී භාර්යා පරභාර්යා සතී තව ॥ 6 ॥
සාධු ධර්මමවේක්ෂස්ව සාධු සාධුව්රතං චර ।
යථා තව තථාන්යේෂාං දාරා රක්ෂ්යා නිශාචර ॥ 7 ॥
ආත්මානමුපමාං කෘත්වා ස්වේෂු දාරේෂු රම්යතාම් ।
අතුෂ්ටං ස්වේෂු දාරේෂු චපලං චලිතේංද්රියම් ॥ 8 ॥
නයංති නිකෘතිප්රජ්ඤං පරදාරාඃ පරාභවම් ।
ඉහ සංතෝ න වා සංති සතෝ වා නානුවර්තසේ ॥ 9 ॥
තථාහි විපරීතා තේ බුද්ධිරාචාරවර්ජිතා ।
වචෝ මිථ්යාප්රණීතාත්මා පථ්යමුක්තං විචක්ෂණෛඃ ॥ 10 ॥
රාක්ෂසානාමභාවාය ත්වං වා න ප්රතිපද්යසේ ।
අකෘතාත්මානමාසාද්ය රාජානමනයේ රතම් ॥ 11 ॥
සමෘද්ධානි විනශ්යංති රාෂ්ට්රාණි නගරාණි ච ।
තථේයං ත්වාං සමාසාද්ය ලංකා රත්නෞඝසංකුලා ॥ 12 ॥
අපරාධාත්තවෛකස්ය නචිරාද්විනශිෂ්යති ।
ස්වකෘතෛර්හන්යමානස්ය රාවණාදීර්ඝදර්ශිනඃ ॥ 13 ॥
අභිනංදංති භූතානි විනාශේ පාපකර්මණඃ ।
ඒවං ත්වාං පාපකර්මාණං වක්ෂ්යංති නිකෘතා ජනාඃ ॥ 14 ॥
දිෂ්ට්යෛතද්ව්යසනං ප්රාප්තෝ රෞද්ර ඉත්යේව හර්ෂිතාඃ ।
ශක්යා ලෝභයිතුං නාහමෛශ්වර්යේණ ධනේන වා ॥ 15 ॥
අනන්යා රාඝවේණාහං භාස්කරේණ ප්රභා යථා ।
උපධාය භුජං තස්ය ලෝකනාථස්ය සත්කෘතම් ॥ 16 ॥
කථං නාමෝපධාස්යාමි භුජමන්යස්ය කස්ය චිත් ।
අහමෞපයිකී භාර්යා තස්යෛව වසුධාපතේඃ ॥ 17 ॥
ව්රතස්නාතස්ය විප්රස්ය විද්යේව විදිතාත්මනඃ ।
සාධු රාවණ රාමේණ මාං සමානය දුඃඛිතාම් ॥ 18 ॥
වනේ වාශිතයා සාර්ධං කරේණ්වේව ගජාධිපම් ।
මිත්රමෞපයිකං කර්තුං රාමඃ ස්ථානං පරීප්සතා ॥ 19 ॥
වධං චානිච්ඡතා ඝෝරං ත්වයාසෞ පුරුෂර්ෂභඃ ।
විදිතඃ ස හි ධර්මජ්ඤඃ ශරණාගතවත්සලඃ ॥ 20 ॥
තේන මෛත්රී භවතු තේ යදි ජීවිතුමිච්ඡසි ।
ප්රසාදයස්ව ත්වං චෛනං ශරණාගතවත්සලම් ॥ 21 ॥
මාං චාස්මෛ නියතෝ භූත්වා නිර්යාතයිතුමර්හසි ।
ඒවං හි තේ භවේත්ස්වස්ති සංප්රදාය රඝූත්තමේ ॥ 22 ॥
අන්යථා ත්වං හි කුර්වාණෝ වධං ප්රාප්ස්යසි රාවණ ।
වර්ජයේද්වජ්රමුත්සෘෂ්ටං වර්ජයේදංතකශ්චිරම් ॥ 23 ॥
ත්වද්විධං තු න සංකෘද්ධෝ ලෝකනාථඃ ස රාඝවඃ ।
රාමස්ය ධනුෂඃ ශබ්දං ශ්රෝෂ්යසි ත්වං මහාස්වනම් ॥ 24 ॥
ශතක්රතුවිසෘෂ්ටස්ය නිර්ඝෝෂමශනේරිව ।
ඉහ ශීඝ්රං සුපර්වාණෝ ජ්වලිතාස්යා ඉවෝරගාඃ ॥ 25 ॥
ඉෂවෝ නිපතිෂ්යංති රාමලක්ෂ්මණලක්ෂණාඃ ।
රක්ෂාංසි පරිනිඝ්නංතඃ පුර්යාමස්යාං සමංතතඃ ॥ 26 ॥
අසංපාතං කරිෂ්යංති පතංතඃ කංකවාසසඃ ।
රාක්ෂසේංද්රමහාසර්පාන් ස රාමගරුඩෝ මහාන් ॥ 27 ॥
උද්ධරිෂ්යති වේගේන වෛනතේය ඉවෝරගාන් ।
අපනේෂ්යති මාං භර්තා ත්වත්තඃ ශීඝ්රමරිංදමඃ ॥ 28 ॥
අසුරේභ්යඃ ශ්රියං දීප්තාං විෂ්ණුස්ත්රිභිරිව ක්රමෛඃ ।
ජනස්ථානේ හතස්ථානේ නිහතේ රක්ෂසාං බලේ ॥ 29 ॥
අශක්තේන ත්වයා රක්ෂඃ කෘතමේතදසාධු වෛ ।
ආශ්රමං තු තයෝඃ ශූන්යං ප්රවිශ්ය නරසිංහයෝඃ ॥ 30 ॥
ගෝචරං ගතයෝර්භ්රාත්රෝරපනීතා ත්වයාධම ।
න හි ගංධමුපාඝ්රාය රාමලක්ෂ්මණයෝස්ත්වයා ॥ 31 ॥
ශක්යං සංදර්ශනේ ස්ථාතුං ශුනා ශාර්දූලයෝරිව ।
තස්ය තේ විග්රහේ තාභ්යාං යුගග්රහණමස්ථිරම් ॥ 32 ॥
වෘත්රස්යේවේංද්රබාහුභ්යාං බාහෝරේකස්ය විග්රහේ ।
ක්ෂිප්රං තව ස නාථෝ මේ රාමඃ සෞමිත්රිණා සහ ॥ 33 ॥
තෝයමල්පමිවාදිත්යඃ ප්රාණානාදාස්යතේ ශරෛඃ ।
ගිරිං කුබේරස්ය ගතෝऽථ වාලයං සභාං ගතෝ වා වරුණස්ය රාජ්ඤඃ ।
අසංශයං දාශරථේර්න මෝක්ෂ්යසේ මහාද්රුමඃ කාලහතෝऽශනේරිව ॥ 34 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ඒකවිංශස්සර්ගඃ ॥
