ශ්රීමද්වාල්මීකීය රාමායණේ බාලකාංඩම් ।
අථ දශමස්සර්ගඃ ।
සුමංත්රශ්චෝදිතෝ රාජ්ඤා ප්රෝවාචේදං වචස්තදා ।
යථර්ශ්යශෘංගස්ත්වානීත ශ්ශ්රුණු මේ මංත්රිභිස්සහ ॥ 1 ॥
රෝමපාදමුවාචේදං සහාමාත්යඃ පුරෝහිතඃ ।
උපායෝ නිරපායෝऽයමස්මාභිරභිචිංතිතඃ ॥ 2 ॥
ඍශ්යශෘංගෝ වනචරස්තපස්ස්වාධ්යයනේ රතඃ ।
අනභිජ්ඤස්ස නාරීණාං විෂයාණාං සුඛස්ය ච ॥ 3 ॥
ඉංද්රියාර්ථෛරභිමතෛර්නරචිත්තප්රමාථිභිඃ ।
පුරමානායයිෂ්යාමඃ ක්ෂිප්රං චාධ්යවසීයතාම් ॥ 4 ॥
ගණිකාස්තත්ර ගච්ඡංතු රූපවත්යස්ස්වලංකෘතාඃ ।
ප්රලෝභ්ය විවිධෝපායෛරානේෂ්යංතීහ සත්කෘතාඃ ॥ 5 ॥
ශ්රුත්වා තථේති රාජා ච ප්රත්යුවාච පුරෝහිතම් ।
පුරෝහිතෝ මංත්රිණශ්ච තථා චක්රුශ්ච තේ තදා ॥ 6 ॥
වාරමුඛ්යාශ්ච තච්ඡ්රුත්වා වනං ප්රවිවිශුර්මහත් ।
ආශ්රමස්යාවිදූරේऽස්මින් යත්නං කුර්වංති දර්ශනේ ॥ 7 ॥
ඍෂිපුත්රස්ය ධීරස්ය නිත්යමාශ්රමවාසිනඃ ।
පිතුස්සනිත්යසංතුෂ්ටෝ නාතිචක්රාම චාශ්රමාත් ॥ 8 ॥
න තේන ජන්මප්රභෘති දෘෂ්ටපූර්වං තපස්විනා ।
ස්ත්රී වා පුමාන්වා යච්චාන්යත්සර්වං නගරරාෂ්ට්රජම් ॥ 9 ॥
තතඃ කදාචිත්තං දේශමාජගාම යදෘච්ඡයා ।
විභංඩකසුතස්තත්ර තාශ්චාපශ්යද්වරාංගනාඃ ॥ 10 ॥
තාශ්චිත්රවේෂාඃ ප්රමදා ගායංත්යෝ මධුරස්වරාඃ ।
ඍෂිපුත්රමුපාගම්ය සර්වා වචනමබ්රුවන් ॥ 11 ॥
කස්ත්වං කිං වර්තසේ බ්රහ්මන් ජ්ඤාතුමිච්ඡාමහේ වයම් ।
ඒකස්ත්වං විජනේ ඝෝරේ වනේ චරසි ශංස නඃ ॥ 12 ॥
අදෘෂ්ටරූපාස්තාස්තේන කාම්යරූපා වනේ ස්ත්රියඃ ।
හාර්දාත්තස්ය මතිර්ජාතා ව්යාඛ්යාතුං පිතරං ස්වකම් ॥ 13 ॥
පිතා විභංඩකෝऽස්මාකං තස්යාහං සුත ඖරසඃ ।
ඍශ්යශෘංග ඉති ඛ්යාතං නාම කර්ම ච මේ භුවි ॥ 14 ॥
ඉහාශ්රමපදෝऽස්මාකං සමීපේ ශුභදර්ශනාඃ ।
කරිෂ්යේ වෝऽත්ර පූජාං වෛ සර්වේෂාං විධිපූර්වකම් ॥ 15 ॥
ඍෂිපුත්රවචශ්ශ්රුත්වා සර්වාසාං මතිරාස වෛ ।
තදාශ්රමපදං ද්රෂ්ටුං ජග්මුස්සර්වාශ්ච තේන තාඃ ॥ 16 ॥
ආගතානාං තතඃ පූජාමෘෂිපුත්රශ්චකාර හ ।
ඉදමර්ඝ්යමිදං පාද්යමිදං මූලමිදං ඵලං ච නඃ ॥ 17 ॥
ප්රතිගෘහ්ය ච තාං පූජාං සර්වා ඒව සමුත්සුකාඃ ।
ඍෂේර්භීතාශ්ච ශීඝ්රං තා ගමනාය මතිං දධුඃ ॥ 18 ॥
අස්මාකමපි මුඛ්යානි ඵලානීමානි වෛ ද්විජ ।
ගෘහාණ ප්රති භද්රං තේ භක්ෂයස්ව ච මා චිරම් ॥ 19 ॥
තතස්තාස්තං සමාලිංග්ය සර්වා හර්ෂසමන්විතාඃ ।
මෝදකාන්ප්රදදුස්තස්මෛ භක්ෂ්යාංශ්ච විවිධාන් බහූන් ॥ 20 ॥
තානි චාස්වාද්ය තේජස්වී ඵලානීති ස්ම මන්යතේ ।
අනාස්වාදිතපූර්වාණි වනේ නිත්යනිවාසිනාම් ॥ 21 ॥
ආපෘච්ඡ්ය ච තදා විප්රං ව්රතචර්යාං නිවේද්ය ච ।
ගච්ඡංති ස්මාපදේශාත්තා භීතාස්තස්ය පිතුස්ස්ත්රියඃ ॥ 22 ॥
ගතාසු තාසු සර්වාසු කාශ්යපස්යාත්මජෝ ද්විජඃ ।
අස්වස්ථහෘදයශ්චාසීද්දුඃඛං ස්ම පරිවර්තතේ ॥ 23 ॥
තතෝऽපරේද්යුස්තං දේශමාජගාම ස වීර්යවාන් ।
මනෝජ්ඤා යත්ර තා දෘෂ්ටා වාරමුඛ්යාස්ස්වලංකෘතාඃ ॥ 24 ॥
දෘෂ්ට්වෛව ච තාස්තදා විප්රමායාංතං හෘෂ්ටමානසාඃ ।
උපසෘත්ය තතස්සර්වාස්තාස්තමූචුරිදං වචඃ ॥ 25 ॥
ඒහ්යාශ්රමපදං සෞම්ය හ්යස්මාකමිති චාබ්රුවන් ।
තත්රාප්යේෂ විධිශ්ශ්රීමාන් විශේෂේණ භවිෂ්යති ॥ 26 ॥
ශ්රුත්වා තු වචනං තාසාං සර්වාසාං හෘදයංගමම් ।
ගමනාය මතිං චක්රේ තං ච නින්යුස්තදා ස්ත්රියඃ ॥ 27 ॥
තත්ර චානීයමානේ තු විප්රේ තස්මින්මහාත්මනි ।
වවර්ෂ සහසා දේවෝ ජගත්ප්රහ්ලාදයංස්තදා ॥ 28 ॥
වර්ෂේණෛවාගතං විප්රං විෂයං ස්වං නරාධිපඃ ।
ප්රත්යුද්ගම්ය මුනිං ප්රහ්වශ්ශිරසා ච මහීං ගතඃ ॥ 29 ॥
අර්ඝ්යං ච ප්රදදෞ තස්මෛ න්යායතස්සුසමාහිතඃ ।
වව්රේ ප්රසාදං විප්රේංද්රාන්මා විප්රං මන්යුරාවිශේත් ॥ 30 ॥
අංතඃපුරං ප්රවිශ්යාස්මෛ කන්යාං දත්ත්වා යථාවිධි ।
ශාංතාං ශාංතේන මනසා රාජා හර්ෂමවාප සඃ ॥ 31 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ දශමස්සර්ගඃ ॥
