ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ସପ୍ତଦଶସ୍ସର୍ଗଃ ।
ତତଃ କମୁଦଷଂଡାଭୋ ନିର୍ମଲଂ ନିର୍ମଲୋଦୟଃ ।
ପ୍ରଜଗାମ ନଭଶ୍ଚଂଦ୍ରୋ ହଂସୋ ନୀଲମିଵୋଦକମ୍ ॥ 1 ॥
ସାଚିଵ୍ୟମିଵ କୁର୍ଵନ୍ ସ ପ୍ରଭୟା ନିର୍ମଲପ୍ରଭଃ ।
ଚଂଦ୍ରମା ରଶ୍ମିଭିଶ୍ଶୀତୈସ୍ସିଷେଵେ ପଵନାତ୍ମଜମ୍ ॥ 2 ॥
ସ ଦଦର୍ଶ ତତଃ ସୀତାଂ ପୂର୍ଣଚଂଦ୍ରନିଭାନନାମ୍ ।
ଶୋକଭାରୈରିଵ ନ୍ୟସ୍ତାଂ ଭାରୈର୍ନାଵମିଵାଂଭସି ॥ 3 ॥
ଦିଦୃକ୍ଷମାଣୋ ଵୈଦେହୀଂ ହନୁମାନ୍ମାରୁତାତ୍ମଜଃ ।
ସ ଦଦର୍ଶାଵିଦୂରସ୍ଥା ରାକ୍ଷସୀର୍ଘୋରଦର୍ଶନାଃ ॥ 4 ॥
ଏକାକ୍ଷୀମେକକର୍ଣାଂ ଚ କର୍ଣପ୍ରାଵରଣାଂ ତଥା ।
ଅକର୍ଣାଂ ଶଂକୁକର୍ଣାଂ ଚ ମସ୍ତକୋଚ୍ଛ୍ଵାସନାସିକାମ୍ ॥ 5 ॥
ଅତିକାୟୋତ୍ତମାଂଗୀଂ ଚ ତନୁଦୀର୍ଘଶିରୋଧରାମ୍ ।
ଧ୍ଵସ୍ତକେଶୀଂ ତଥାଽକେଶୀଂ କେଶକଂବଲଧାରିଣୀମ୍ ॥ 6 ॥
ଲଂବକର୍ଣଲଲାଟାଂ ଚ ଲଂବୋଦରପୟୋଧରାମ୍ ।
ଲଂବୋଷ୍ଠୀଂ ଚୁବୁକୋଷ୍ଠୀଂ ଚ ଲଂବାସ୍ୟାଂ ଲଂବଜାନୁକାମ୍ ॥ 7 ॥
ହ୍ରସ୍ଵାଂ ଦୀର୍ଘାଂ ତଥା କୁବ୍ଜାଂ ଵିକଟାଂ ଵାମନାଂ ତଥା ।
କରାଲାଂ ଭୁଗ୍ନଵକ୍ତ୍ରାଂ ଚ ପିଂଗାକ୍ଷୀଂ ଵିକୃତାନନାମ୍ ॥ 8 ॥
ଵିକୃତାଃ ପିଂଗଲାଃ କାଲୀଃ କ୍ରୋଧନାଃ କଲହପ୍ରିୟାଃ ।
କାଲାୟସମହାଶୂଲକୂଟମୁଦ୍ଗରଧାରିଣୀଃ ॥ 9 ॥
ଵରାହମୃଗଶାର୍ଦୂଲମହିଷାଜଶିଵାମୁଖୀଃ ।
ଗଜୋଷ୍ଟ୍ରହୟପାଦୀଶ୍ଚ ନିଖାତଶିରସୋଽପରାଃ ॥ 10 ॥
ଏକହସ୍ତୈକପାଦାଶ୍ଚ ଖରକର୍ଣ୍ୟଶ୍ଵକର୍ଣିକାଃ ।
ଗୋକର୍ଣୀର୍ହସ୍ତିକର୍ଣୀଶ୍ଚ ହରିକର୍ଣୀସ୍ତଥାପରାଃ ॥ 11 ॥
ଅନାସା ଅତିନାସାଶ୍ଚ ତିର୍ୟଙ୍ନାସା ଵିନାସିକାଃ ।
ଗଜସନ୍ନିଭନାସାଶ୍ଚ ଲଲାଟୋଚ୍ଛଵାସନାସିକାଃ ॥ 12 ॥
ହସ୍ତିପାଦା ମହାପାଦା ଗୋପାଦାଃ ପାଦଚୂଲିକାଃ ।
ଅତିମାତ୍ରଶିରୋଗ୍ରୀଵା ଅତିମାତ୍ରକୁଚୋଦରୀଃ ॥ 13 ॥
ଅତିମାତ୍ରାସ୍ୟନେତ୍ରାଶ୍ଚ ଦୀର୍ଘଜିହ୍ଵାନଖାସ୍ତଥା ।
ଅଜାମୁଖୀର୍ହସ୍ତିମୁଖୀର୍ଗୋମୁଖୀସ୍ସୂକରୀମୁଖୀଃ ॥ 14 ॥
ହୟୋଷ୍ଟ୍ରଖରଵକ୍ତ୍ରାଶ୍ଚ ରାକ୍ଷସୀର୍ଘୋରଦର୍ଶନାଃ ।
ଶୂଲମୁଦ୍ଗରହସ୍ତାଶ୍ଚ କ୍ରୋଧନାଃ କଲହପ୍ରିୟାଃ ॥ 15 ॥
କରାଲା ଧୂମ୍ରକେଶୀଶ୍ଚ ରାକ୍ଷସୀର୍ଵିକୃତାନନାଃ ।
ପିବଂତୀଃ ସତତଂ ପାନଂ ସଦା ମାଂସସୁରାପ୍ରିୟାଃ ॥ 16 ॥
ମାଂସଶୋଣିତଦିଗ୍ଧାଂଗୀର୍ମାଂସଶୋଣିତଭୋଜନାଃ ।
ତା ଦଦର୍ଶ କପିଶ୍ରେଷ୍ଠୋ ରୋମହର୍ଷଣଦର୍ଶନାଃ ॥ 17 ॥
ସ୍କଂଧଵଂତମୁପାସୀନାଃ ପରିଵାର୍ୟ ଵନସ୍ପତିମ୍ ।
ତସ୍ୟାଧସ୍ତାଚ୍ଚ ତାଂ ଦେଵୀଂ ରାଜପୁତ୍ରୀମନିଂଦିତାମ୍ ॥ 18 ॥
ଲକ୍ଷୟାମାସ ଲକ୍ଷ୍ମୀଵାନ୍ ହନୁମାନ୍ ଜନକାତ୍ମଜାମ୍ ।
ନିଷ୍ପ୍ରଭାଂ ଶୋକସଂତପ୍ତାଂ ମଲସଂକୁଲମୂର୍ଧଜାମ୍ ॥ 19 ॥
କ୍ଷୀଣପୁଣ୍ୟାଂ ଚ୍ୟୁତାଂ ଭୂମୌ ତାରାଂ ନିପତିତାମିଵ ।
ଚାରିତ୍ରଵ୍ୟପଦେଶାଢ୍ୟାଂ ଭର୍ତୃଦର୍ଶନଦୁର୍ଗତାମ୍ ॥ 20 ॥
ଭୂଷଣୈରୁତ୍ତମୈର୍ହୀନାଂ ଭର୍ତୃଵାତ୍ସଲ୍ୟଭୂଷଣାମ୍ ।
ରାକ୍ଷସାଧିପସଂରୁଦ୍ଧାଂ ବଂଧୁଭିଶ୍ଚ ଵିନା କୃତାମ୍ ॥ 21 ॥
ଵିୟୂଥାଂ ସିଂହସଂରୁଦ୍ଧାଂ ବଦ୍ଧାଂ ଗଜଵଧୂମିଵ ।
ଚଂଦ୍ରରେଖାଂ ପୟୋଦାଂତେ ଶାରଦାଭ୍ରୈରିଵାଵୃତାମ୍ ॥ 22 ॥
କ୍ଲିଷ୍ଟରୂପାମସଂସ୍ପର୍ଶାଦୟୁକ୍ତାମିଵ ଵଲ୍ଲକୀମ୍ ।
ସୀତାଂ ଭର୍ତୃଵଶେ ୟୁକ୍ତାମୟୁକ୍ତାଂ ରାକ୍ଷସୀଵଶେ ॥ 23 ॥
ଅଶୋକଵନିକାମଥ୍ୟେ ଶୋକସାଗରମାପ୍ଲୁତାମ୍ ।
ତାଭିଃ ପରିଵୃତାଂ ତତ୍ର ସଗ୍ରହାମିଵ ରୋହିଣୀମ୍ ॥ 24 ॥
ଦଦର୍ଶ ହନୁମାନ୍ ଦେଵୀଂ ଲତାମକୁସୁମାମିଵ ।
ସା ମଲେନ ଚ ଦିଗ୍ଧାଂଗୀ ଵପୁଷା ଚାପ୍ୟଲଂକୃତା ॥ 25 ॥
ମୃଣାଲୀ ପଂକଦିଗ୍ଧେଵ ଵିଭାତି ନ ଵିଭାତି ଚ ।
ମଲିନେନ ତୁ ଵସ୍ତ୍ରେଣ ପରିକ୍ଲିଷ୍ଟେନ ଭାମିନୀମ୍ ॥ 26 ॥
ସଂଵୃତାଂ ମୃଗଶାବାକ୍ଷୀଂ ଦଦର୍ଶ ହନୁମାନ୍ କପିଃ ।
ତାଂ ଦେଵୀଂ ଦୀନଵଦନାମଦୀନାଂ ଭର୍ତୃତେଜସା ॥ 27 ॥
ରକ୍ଷିତାଂ ସ୍ଵେନ ଶୀଲେନ ସୀତାମସିତଲୋଚନାମ୍ ।
ତାଂ ଦୃଷ୍ଟ୍ଵା ହନୁମାନ୍ ସୀତାଂ ମୃଗଶାବନିଭେକ୍ଷଣାମ୍ ।
ମୃଗକନ୍ୟାମିଵ ତ୍ରସ୍ତାଂ ଵୀକ୍ଷମାଣାଂ ସମଂତତଃ ॥ 28 ॥
ଦହଂତୀମିଵ ନିଃଶ୍ଵାସୈର୍ଵୃକ୍ଷାନ୍ ପଲ୍ଲଵଧାରିଣଃ ।
ସଂଘାତମିଵ ଶୋକାନାଂ ଦୁଃଖସ୍ୟୋର୍ମିମିଵୋତ୍ଥିତାମ୍ ॥ 29 ॥
ତାଂ କ୍ଷମାଂ ସୁଵିଭକ୍ତାଂଗୀ ଵିନାଭରଣଶୋଭିନୀମ୍ ॥ 30 ॥
ପ୍ରହର୍ଷମତୁଲଂ ଲେଭେ ମାରୁତିଃ ପ୍ରେକ୍ଷ୍ୟ ମୈଥିଲୀମ୍ ।
ହର୍ଷଜାନି ଚ ସୋଽଶ୍ରୂଣି ତାଂ ଦୃଷ୍ଟ୍ଵା ମଦିରେକ୍ଷଣାମ୍ ।
ମୁମୁଚେ ହନୁମାଂସ୍ତତ୍ର ନମଶ୍ଚକ୍ରେ ଚ ରାଘଵମ୍ ॥ 31 ॥
ନମସ୍କୃତ୍ଵା ଚ ରାମାୟ ଲକ୍ଷ୍ମଣାୟ ଚ ଵୀର୍ୟଵାନ୍ ।
ସୀତାଦର୍ଶନସଂହୃଷ୍ଟୋ ହନୁମାନ୍ ସଂଵୃତୋଽଭଵତ୍ ॥ 32 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ସପ୍ତଦଶସ୍ସର୍ଗଃ ॥
