શ્રીમદ્વાલ્મીકીય રામાયણે સુંદરકાંડમ્ ।
અથ સપ્તદશસ્સર્ગઃ ।
તતઃ કમુદષંડાભો નિર્મલં નિર્મલોદયઃ ।
પ્રજગામ નભશ્ચંદ્રો હંસો નીલમિવોદકમ્ ॥ 1 ॥
સાચિવ્યમિવ કુર્વન્ સ પ્રભયા નિર્મલપ્રભઃ ।
ચંદ્રમા રશ્મિભિશ્શીતૈસ્સિષેવે પવનાત્મજમ્ ॥ 2 ॥
સ દદર્શ તતઃ સીતાં પૂર્ણચંદ્રનિભાનનામ્ ।
શોકભારૈરિવ ન્યસ્તાં ભારૈર્નાવમિવાંભસિ ॥ 3 ॥
દિદૃક્ષમાણો વૈદેહીં હનુમાન્મારુતાત્મજઃ ।
સ દદર્શાવિદૂરસ્થા રાક્ષસીર્ઘોરદર્શનાઃ ॥ 4 ॥
એકાક્ષીમેકકર્ણાં ચ કર્ણપ્રાવરણાં તથા ।
અકર્ણાં શંકુકર્ણાં ચ મસ્તકોચ્છ્વાસનાસિકામ્ ॥ 5 ॥
અતિકાયોત્તમાંગીં ચ તનુદીર્ઘશિરોધરામ્ ।
ધ્વસ્તકેશીં તથાઽકેશીં કેશકંબલધારિણીમ્ ॥ 6 ॥
લંબકર્ણલલાટાં ચ લંબોદરપયોધરામ્ ।
લંબોષ્ઠીં ચુબુકોષ્ઠીં ચ લંબાસ્યાં લંબજાનુકામ્ ॥ 7 ॥
હ્રસ્વાં દીર્ઘાં તથા કુબ્જાં વિકટાં વામનાં તથા ।
કરાલાં ભુગ્નવક્ત્રાં ચ પિંગાક્ષીં વિકૃતાનનામ્ ॥ 8 ॥
વિકૃતાઃ પિંગલાઃ કાલીઃ ક્રોધનાઃ કલહપ્રિયાઃ ।
કાલાયસમહાશૂલકૂટમુદ્ગરધારિણીઃ ॥ 9 ॥
વરાહમૃગશાર્દૂલમહિષાજશિવામુખીઃ ।
ગજોષ્ટ્રહયપાદીશ્ચ નિખાતશિરસોઽપરાઃ ॥ 10 ॥
એકહસ્તૈકપાદાશ્ચ ખરકર્ણ્યશ્વકર્ણિકાઃ ।
ગોકર્ણીર્હસ્તિકર્ણીશ્ચ હરિકર્ણીસ્તથાપરાઃ ॥ 11 ॥
અનાસા અતિનાસાશ્ચ તિર્યઙ્નાસા વિનાસિકાઃ ।
ગજસન્નિભનાસાશ્ચ લલાટોચ્છવાસનાસિકાઃ ॥ 12 ॥
હસ્તિપાદા મહાપાદા ગોપાદાઃ પાદચૂલિકાઃ ।
અતિમાત્રશિરોગ્રીવા અતિમાત્રકુચોદરીઃ ॥ 13 ॥
અતિમાત્રાસ્યનેત્રાશ્ચ દીર્ઘજિહ્વાનખાસ્તથા ।
અજામુખીર્હસ્તિમુખીર્ગોમુખીસ્સૂકરીમુખીઃ ॥ 14 ॥
હયોષ્ટ્રખરવક્ત્રાશ્ચ રાક્ષસીર્ઘોરદર્શનાઃ ।
શૂલમુદ્ગરહસ્તાશ્ચ ક્રોધનાઃ કલહપ્રિયાઃ ॥ 15 ॥
કરાલા ધૂમ્રકેશીશ્ચ રાક્ષસીર્વિકૃતાનનાઃ ।
પિબંતીઃ સતતં પાનં સદા માંસસુરાપ્રિયાઃ ॥ 16 ॥
માંસશોણિતદિગ્ધાંગીર્માંસશોણિતભોજનાઃ ।
તા દદર્શ કપિશ્રેષ્ઠો રોમહર્ષણદર્શનાઃ ॥ 17 ॥
સ્કંધવંતમુપાસીનાઃ પરિવાર્ય વનસ્પતિમ્ ।
તસ્યાધસ્તાચ્ચ તાં દેવીં રાજપુત્રીમનિંદિતામ્ ॥ 18 ॥
લક્ષયામાસ લક્ષ્મીવાન્ હનુમાન્ જનકાત્મજામ્ ।
નિષ્પ્રભાં શોકસંતપ્તાં મલસંકુલમૂર્ધજામ્ ॥ 19 ॥
ક્ષીણપુણ્યાં ચ્યુતાં ભૂમૌ તારાં નિપતિતામિવ ।
ચારિત્રવ્યપદેશાઢ્યાં ભર્તૃદર્શનદુર્ગતામ્ ॥ 20 ॥
ભૂષણૈરુત્તમૈર્હીનાં ભર્તૃવાત્સલ્યભૂષણામ્ ।
રાક્ષસાધિપસંરુદ્ધાં બંધુભિશ્ચ વિના કૃતામ્ ॥ 21 ॥
વિયૂથાં સિંહસંરુદ્ધાં બદ્ધાં ગજવધૂમિવ ।
ચંદ્રરેખાં પયોદાંતે શારદાભ્રૈરિવાવૃતામ્ ॥ 22 ॥
ક્લિષ્ટરૂપામસંસ્પર્શાદયુક્તામિવ વલ્લકીમ્ ।
સીતાં ભર્તૃવશે યુક્તામયુક્તાં રાક્ષસીવશે ॥ 23 ॥
અશોકવનિકામથ્યે શોકસાગરમાપ્લુતામ્ ।
તાભિઃ પરિવૃતાં તત્ર સગ્રહામિવ રોહિણીમ્ ॥ 24 ॥
દદર્શ હનુમાન્ દેવીં લતામકુસુમામિવ ।
સા મલેન ચ દિગ્ધાંગી વપુષા ચાપ્યલંકૃતા ॥ 25 ॥
મૃણાલી પંકદિગ્ધેવ વિભાતિ ન વિભાતિ ચ ।
મલિનેન તુ વસ્ત્રેણ પરિક્લિષ્ટેન ભામિનીમ્ ॥ 26 ॥
સંવૃતાં મૃગશાબાક્ષીં દદર્શ હનુમાન્ કપિઃ ।
તાં દેવીં દીનવદનામદીનાં ભર્તૃતેજસા ॥ 27 ॥
રક્ષિતાં સ્વેન શીલેન સીતામસિતલોચનામ્ ।
તાં દૃષ્ટ્વા હનુમાન્ સીતાં મૃગશાબનિભેક્ષણામ્ ।
મૃગકન્યામિવ ત્રસ્તાં વીક્ષમાણાં સમંતતઃ ॥ 28 ॥
દહંતીમિવ નિઃશ્વાસૈર્વૃક્ષાન્ પલ્લવધારિણઃ ।
સંઘાતમિવ શોકાનાં દુઃખસ્યોર્મિમિવોત્થિતામ્ ॥ 29 ॥
તાં ક્ષમાં સુવિભક્તાંગી વિનાભરણશોભિનીમ્ ॥ 30 ॥
પ્રહર્ષમતુલં લેભે મારુતિઃ પ્રેક્ષ્ય મૈથિલીમ્ ।
હર્ષજાનિ ચ સોઽશ્રૂણિ તાં દૃષ્ટ્વા મદિરેક્ષણામ્ ।
મુમુચે હનુમાંસ્તત્ર નમશ્ચક્રે ચ રાઘવમ્ ॥ 31 ॥
નમસ્કૃત્વા ચ રામાય લક્ષ્મણાય ચ વીર્યવાન્ ।
સીતાદર્શનસંહૃષ્ટો હનુમાન્ સંવૃતોઽભવત્ ॥ 32 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે સપ્તદશસ્સર્ગઃ ॥
