ශ්රීමද්වාල්මීකීය රාමායණේ සුංදරකාංඩම් ।
අථ සප්තදශස්සර්ගඃ ।
තතඃ කමුදෂංඩාභෝ නිර්මලං නිර්මලෝදයඃ ।
ප්රජගාම නභශ්චංද්රෝ හංසෝ නීලමිවෝදකම් ॥ 1 ॥
සාචිව්යමිව කුර්වන් ස ප්රභයා නිර්මලප්රභඃ ।
චංද්රමා රශ්මිභිශ්ශීතෛස්සිෂේවේ පවනාත්මජම් ॥ 2 ॥
ස දදර්ශ තතඃ සීතාං පූර්ණචංද්රනිභානනාම් ।
ශෝකභාරෛරිව න්යස්තාං භාරෛර්නාවමිවාංභසි ॥ 3 ॥
දිදෘක්ෂමාණෝ වෛදේහීං හනුමාන්මාරුතාත්මජඃ ।
ස දදර්ශාවිදූරස්ථා රාක්ෂසීර්ඝෝරදර්ශනාඃ ॥ 4 ॥
ඒකාක්ෂීමේකකර්ණාං ච කර්ණප්රාවරණාං තථා ।
අකර්ණාං ශංකුකර්ණාං ච මස්තකෝච්ඡ්වාසනාසිකාම් ॥ 5 ॥
අතිකායෝත්තමාංගීං ච තනුදීර්ඝශිරෝධරාම් ।
ධ්වස්තකේශීං තථාऽකේශීං කේශකංබලධාරිණීම් ॥ 6 ॥
ලංබකර්ණලලාටාං ච ලංබෝදරපයෝධරාම් ।
ලංබෝෂ්ඨීං චුබුකෝෂ්ඨීං ච ලංබාස්යාං ලංබජානුකාම් ॥ 7 ॥
හ්රස්වාං දීර්ඝාං තථා කුබ්ජාං විකටාං වාමනාං තථා ।
කරාලාං භුග්නවක්ත්රාං ච පිංගාක්ෂීං විකෘතානනාම් ॥ 8 ॥
විකෘතාඃ පිංගලාඃ කාලීඃ ක්රෝධනාඃ කලහප්රියාඃ ।
කාලායසමහාශූලකූටමුද්ගරධාරිණීඃ ॥ 9 ॥
වරාහමෘගශාර්දූලමහිෂාජශිවාමුඛීඃ ।
ගජෝෂ්ට්රහයපාදීශ්ච නිඛාතශිරසෝऽපරාඃ ॥ 10 ॥
ඒකහස්තෛකපාදාශ්ච ඛරකර්ණ්යශ්වකර්ණිකාඃ ।
ගෝකර්ණීර්හස්තිකර්ණීශ්ච හරිකර්ණීස්තථාපරාඃ ॥ 11 ॥
අනාසා අතිනාසාශ්ච තිර්යඞ්නාසා විනාසිකාඃ ।
ගජසන්නිභනාසාශ්ච ලලාටෝච්ඡවාසනාසිකාඃ ॥ 12 ॥
හස්තිපාදා මහාපාදා ගෝපාදාඃ පාදචූලිකාඃ ।
අතිමාත්රශිරෝග්රීවා අතිමාත්රකුචෝදරීඃ ॥ 13 ॥
අතිමාත්රාස්යනේත්රාශ්ච දීර්ඝජිහ්වානඛාස්තථා ।
අජාමුඛීර්හස්තිමුඛීර්ගෝමුඛීස්සූකරීමුඛීඃ ॥ 14 ॥
හයෝෂ්ට්රඛරවක්ත්රාශ්ච රාක්ෂසීර්ඝෝරදර්ශනාඃ ।
ශූලමුද්ගරහස්තාශ්ච ක්රෝධනාඃ කලහප්රියාඃ ॥ 15 ॥
කරාලා ධූම්රකේශීශ්ච රාක්ෂසීර්විකෘතානනාඃ ।
පිබංතීඃ සතතං පානං සදා මාංසසුරාප්රියාඃ ॥ 16 ॥
මාංසශෝණිතදිග්ධාංගීර්මාංසශෝණිතභෝජනාඃ ।
තා දදර්ශ කපිශ්රේෂ්ඨෝ රෝමහර්ෂණදර්ශනාඃ ॥ 17 ॥
ස්කංධවංතමුපාසීනාඃ පරිවාර්ය වනස්පතිම් ।
තස්යාධස්තාච්ච තාං දේවීං රාජපුත්රීමනිංදිතාම් ॥ 18 ॥
ලක්ෂයාමාස ලක්ෂ්මීවාන් හනුමාන් ජනකාත්මජාම් ।
නිෂ්ප්රභාං ශෝකසංතප්තාං මලසංකුලමූර්ධජාම් ॥ 19 ॥
ක්ෂීණපුණ්යාං ච්යුතාං භූමෞ තාරාං නිපතිතාමිව ।
චාරිත්රව්යපදේශාඪ්යාං භර්තෘදර්ශනදුර්ගතාම් ॥ 20 ॥
භූෂණෛරුත්තමෛර්හීනාං භර්තෘවාත්සල්යභූෂණාම් ।
රාක්ෂසාධිපසංරුද්ධාං බංධුභිශ්ච විනා කෘතාම් ॥ 21 ॥
වියූථාං සිංහසංරුද්ධාං බද්ධාං ගජවධූමිව ।
චංද්රරේඛාං පයෝදාංතේ ශාරදාභ්රෛරිවාවෘතාම් ॥ 22 ॥
ක්ලිෂ්ටරූපාමසංස්පර්ශාදයුක්තාමිව වල්ලකීම් ।
සීතාං භර්තෘවශේ යුක්තාමයුක්තාං රාක්ෂසීවශේ ॥ 23 ॥
අශෝකවනිකාමථ්යේ ශෝකසාගරමාප්ලුතාම් ।
තාභිඃ පරිවෘතාං තත්ර සග්රහාමිව රෝහිණීම් ॥ 24 ॥
දදර්ශ හනුමාන් දේවීං ලතාමකුසුමාමිව ।
සා මලේන ච දිග්ධාංගී වපුෂා චාප්යලංකෘතා ॥ 25 ॥
මෘණාලී පංකදිග්ධේව විභාති න විභාති ච ।
මලිනේන තු වස්ත්රේණ පරික්ලිෂ්ටේන භාමිනීම් ॥ 26 ॥
සංවෘතාං මෘගශාබාක්ෂීං දදර්ශ හනුමාන් කපිඃ ।
තාං දේවීං දීනවදනාමදීනාං භර්තෘතේජසා ॥ 27 ॥
රක්ෂිතාං ස්වේන ශීලේන සීතාමසිතලෝචනාම් ।
තාං දෘෂ්ට්වා හනුමාන් සීතාං මෘගශාබනිභේක්ෂණාම් ।
මෘගකන්යාමිව ත්රස්තාං වීක්ෂමාණාං සමංතතඃ ॥ 28 ॥
දහංතීමිව නිඃශ්වාසෛර්වෘක්ෂාන් පල්ලවධාරිණඃ ।
සංඝාතමිව ශෝකානාං දුඃඛස්යෝර්මිමිවෝත්ථිතාම් ॥ 29 ॥
තාං ක්ෂමාං සුවිභක්තාංගී විනාභරණශෝභිනීම් ॥ 30 ॥
ප්රහර්ෂමතුලං ලේභේ මාරුතිඃ ප්රේක්ෂ්ය මෛථිලීම් ।
හර්ෂජානි ච සෝऽශ්රූණි තාං දෘෂ්ට්වා මදිරේක්ෂණාම් ।
මුමුචේ හනුමාංස්තත්ර නමශ්චක්රේ ච රාඝවම් ॥ 31 ॥
නමස්කෘත්වා ච රාමාය ලක්ෂ්මණාය ච වීර්යවාන් ।
සීතාදර්ශනසංහෘෂ්ටෝ හනුමාන් සංවෘතෝऽභවත් ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ සප්තදශස්සර්ගඃ ॥
