śrīmadvālmīkīya rāmāyaṇē sundarakāṇḍam ।
atha saptadaśassargaḥ ।
tataḥ kamudaṣaṇḍābhō nirmalaṃ nirmalōdayaḥ ।
prajagāma nabhaśchandrō haṃsō nīlamivōdakam ॥ 1 ॥
sāchivyamiva kurvan sa prabhayā nirmalaprabhaḥ ।
chandramā raśmibhiśśītaissiṣēvē pavanātmajam ॥ 2 ॥
sa dadarśa tataḥ sītāṃ pūrṇachandranibhānanām ।
śōkabhārairiva nyastāṃ bhārairnāvamivāmbhasi ॥ 3 ॥
didṛkṣamāṇō vaidēhīṃ hanumānmārutātmajaḥ ।
sa dadarśāvidūrasthā rākṣasīrghōradarśanāḥ ॥ 4 ॥
ēkākṣīmēkakarṇāṃ cha karṇaprāvaraṇāṃ tathā ।
akarṇāṃ śaṅkukarṇāṃ cha mastakōchChvāsanāsikām ॥ 5 ॥
atikāyōttamāṅgīṃ cha tanudīrghaśirōdharām ।
dhvastakēśīṃ tathā'kēśīṃ kēśakambaladhāriṇīm ॥ 6 ॥
lambakarṇalalāṭāṃ cha lambōdarapayōdharām ।
lambōṣṭhīṃ chubukōṣṭhīṃ cha lambāsyāṃ lambajānukām ॥ 7 ॥
hrasvāṃ dīrghāṃ tathā kubjāṃ vikaṭāṃ vāmanāṃ tathā ।
karālāṃ bhugnavaktrāṃ cha piṅgākṣīṃ vikṛtānanām ॥ 8 ॥
vikṛtāḥ piṅgalāḥ kālīḥ krōdhanāḥ kalahapriyāḥ ।
kālāyasamahāśūlakūṭamudgaradhāriṇīḥ ॥ 9 ॥
varāhamṛgaśārdūlamahiṣājaśivāmukhīḥ ।
gajōṣṭrahayapādīścha nikhātaśirasō'parāḥ ॥ 10 ॥
ēkahastaikapādāścha kharakarṇyaśvakarṇikāḥ ।
gōkarṇīrhastikarṇīścha harikarṇīstathāparāḥ ॥ 11 ॥
anāsā atināsāścha tiryaṅnāsā vināsikāḥ ।
gajasannibhanāsāścha lalāṭōchChavāsanāsikāḥ ॥ 12 ॥
hastipādā mahāpādā gōpādāḥ pādachūlikāḥ ।
atimātraśirōgrīvā atimātrakuchōdarīḥ ॥ 13 ॥
atimātrāsyanētrāścha dīrghajihvānakhāstathā ।
ajāmukhīrhastimukhīrgōmukhīssūkarīmukhīḥ ॥ 14 ॥
hayōṣṭrakharavaktrāścha rākṣasīrghōradarśanāḥ ।
śūlamudgarahastāścha krōdhanāḥ kalahapriyāḥ ॥ 15 ॥
karālā dhūmrakēśīścha rākṣasīrvikṛtānanāḥ ।
pibantīḥ satataṃ pānaṃ sadā māṃsasurāpriyāḥ ॥ 16 ॥
māṃsaśōṇitadigdhāṅgīrmāṃsaśōṇitabhōjanāḥ ।
tā dadarśa kapiśrēṣṭhō rōmaharṣaṇadarśanāḥ ॥ 17 ॥
skandhavantamupāsīnāḥ parivārya vanaspatim ।
tasyādhastāchcha tāṃ dēvīṃ rājaputrīmaninditām ॥ 18 ॥
lakṣayāmāsa lakṣmīvān hanumān janakātmajām ।
niṣprabhāṃ śōkasantaptāṃ malasaṅkulamūrdhajām ॥ 19 ॥
kṣīṇapuṇyāṃ chyutāṃ bhūmau tārāṃ nipatitāmiva ।
chāritravyapadēśāḍhyāṃ bhartṛdarśanadurgatām ॥ 20 ॥
bhūṣaṇairuttamairhīnāṃ bhartṛvātsalyabhūṣaṇām ।
rākṣasādhipasaṃruddhāṃ bandhubhiścha vinā kṛtām ॥ 21 ॥
viyūthāṃ siṃhasaṃruddhāṃ baddhāṃ gajavadhūmiva ।
chandrarēkhāṃ payōdāntē śāradābhrairivāvṛtām ॥ 22 ॥
kliṣṭarūpāmasaṃsparśādayuktāmiva vallakīm ।
sītāṃ bhartṛvaśē yuktāmayuktāṃ rākṣasīvaśē ॥ 23 ॥
aśōkavanikāmathyē śōkasāgaramāplutām ।
tābhiḥ parivṛtāṃ tatra sagrahāmiva rōhiṇīm ॥ 24 ॥
dadarśa hanumān dēvīṃ latāmakusumāmiva ।
sā malēna cha digdhāṅgī vapuṣā chāpyalaṅkṛtā ॥ 25 ॥
mṛṇālī paṅkadigdhēva vibhāti na vibhāti cha ।
malinēna tu vastrēṇa parikliṣṭēna bhāminīm ॥ 26 ॥
saṃvṛtāṃ mṛgaśābākṣīṃ dadarśa hanumān kapiḥ ।
tāṃ dēvīṃ dīnavadanāmadīnāṃ bhartṛtējasā ॥ 27 ॥
rakṣitāṃ svēna śīlēna sītāmasitalōchanām ।
tāṃ dṛṣṭvā hanumān sītāṃ mṛgaśābanibhēkṣaṇām ।
mṛgakanyāmiva trastāṃ vīkṣamāṇāṃ samantataḥ ॥ 28 ॥
dahantīmiva niḥśvāsairvṛkṣān pallavadhāriṇaḥ ।
saṅghātamiva śōkānāṃ duḥkhasyōrmimivōtthitām ॥ 29 ॥
tāṃ kṣamāṃ suvibhaktāṅgī vinābharaṇaśōbhinīm ॥ 30 ॥
praharṣamatulaṃ lēbhē mārutiḥ prēkṣya maithilīm ।
harṣajāni cha sō'śrūṇi tāṃ dṛṣṭvā madirēkṣaṇām ।
mumuchē hanumāṃstatra namaśchakrē cha rāghavam ॥ 31 ॥
namaskṛtvā cha rāmāya lakṣmaṇāya cha vīryavān ।
sītādarśanasaṃhṛṣṭō hanumān saṃvṛtō'bhavat ॥ 32 ॥
ityārṣē śrīmadrāmāyaṇē vālmīkīya ādikāvyē sundarakāṇḍē saptadaśassargaḥ ॥
