ശ്രീമദ്വാല്മീകീയ രാമായണേ സുംദരകാംഡമ് ।
അഥ സപ്തദശസ്സര്ഗഃ ।
തതഃ കമുദഷംഡാഭോ നിര്മലം നിര്മലോദയഃ ।
പ്രജഗാമ നഭശ്ചംദ്രോ ഹംസോ നീലമിവോദകമ് ॥ 1 ॥
സാചിവ്യമിവ കുർവന് സ പ്രഭയാ നിര്മലപ്രഭഃ ।
ചംദ്രമാ രശ്മിഭിശ്ശീതൈസ്സിഷേവേ പവനാത്മജമ് ॥ 2 ॥
സ ദദര്ശ തതഃ സീതാം പൂര്ണചംദ്രനിഭാനനാമ് ।
ശോകഭാരൈരിവ ന്യസ്താം ഭാരൈര്നാവമിവാംഭസി ॥ 3 ॥
ദിദൃക്ഷമാണോ വൈദേഹീം ഹനുമാന്മാരുതാത്മജഃ ।
സ ദദര്ശാവിദൂരസ്ഥാ രാക്ഷസീര്ഘോരദര്ശനാഃ ॥ 4 ॥
ഏകാക്ഷീമേകകര്ണാം ച കര്ണപ്രാവരണാം തഥാ ।
അകര്ണാം ശംകുകര്ണാം ച മസ്തകോച്ഛ്വാസനാസികാമ് ॥ 5 ॥
അതികായോത്തമാംഗീം ച തനുദീര്ഘശിരോധരാമ് ।
ധ്വസ്തകേശീം തഥാഽകേശീം കേശകംബലധാരിണീമ് ॥ 6 ॥
ലംബകര്ണലലാടാം ച ലംബോദരപയോധരാമ് ।
ലംബോഷ്ഠീം ചുബുകോഷ്ഠീം ച ലംബാസ്യാം ലംബജാനുകാമ് ॥ 7 ॥
ഹ്രസ്വാം ദീര്ഘാം തഥാ കുബ്ജാം വികടാം വാമനാം തഥാ ।
കരാലാം ഭുഗ്നവക്ത്രാം ച പിംഗാക്ഷീം വികൃതാനനാമ് ॥ 8 ॥
വികൃതാഃ പിംഗലാഃ കാലീഃ ക്രോധനാഃ കലഹപ്രിയാഃ ।
കാലായസമഹാശൂലകൂടമുദ്ഗരധാരിണീഃ ॥ 9 ॥
വരാഹമൃഗശാര്ദൂലമഹിഷാജശിവാമുഖീഃ ।
ഗജോഷ്ട്രഹയപാദീശ്ച നിഖാതശിരസോഽപരാഃ ॥ 10 ॥
ഏകഹസ്തൈകപാദാശ്ച ഖരകര്ണ്യശ്വകര്ണികാഃ ।
ഗോകര്ണീര്ഹസ്തികര്ണീശ്ച ഹരികര്ണീസ്തഥാപരാഃ ॥ 11 ॥
അനാസാ അതിനാസാശ്ച തിര്യങ്നാസാ വിനാസികാഃ ।
ഗജസന്നിഭനാസാശ്ച ലലാടോച്ഛവാസനാസികാഃ ॥ 12 ॥
ഹസ്തിപാദാ മഹാപാദാ ഗോപാദാഃ പാദചൂലികാഃ ।
അതിമാത്രശിരോഗ്രീവാ അതിമാത്രകുചോദരീഃ ॥ 13 ॥
അതിമാത്രാസ്യനേത്രാശ്ച ദീര്ഘജിഹ്വാനഖാസ്തഥാ ।
അജാമുഖീര്ഹസ്തിമുഖീര്ഗോമുഖീസ്സൂകരീമുഖീഃ ॥ 14 ॥
ഹയോഷ്ട്രഖരവക്ത്രാശ്ച രാക്ഷസീര്ഘോരദര്ശനാഃ ।
ശൂലമുദ്ഗരഹസ്താശ്ച ക്രോധനാഃ കലഹപ്രിയാഃ ॥ 15 ॥
കരാലാ ധൂമ്രകേശീശ്ച രാക്ഷസീർവികൃതാനനാഃ ।
പിബംതീഃ സതതം പാനം സദാ മാംസസുരാപ്രിയാഃ ॥ 16 ॥
മാംസശോണിതദിഗ്ധാംഗീര്മാംസശോണിതഭോജനാഃ ।
താ ദദര്ശ കപിശ്രേഷ്ഠോ രോമഹര്ഷണദര്ശനാഃ ॥ 17 ॥
സ്കംധവംതമുപാസീനാഃ പരിവാര്യ വനസ്പതിമ് ।
തസ്യാധസ്താച്ച താം ദേവീം രാജപുത്രീമനിംദിതാമ് ॥ 18 ॥
ലക്ഷയാമാസ ലക്ഷ്മീവാന് ഹനുമാന് ജനകാത്മജാമ് ।
നിഷ്പ്രഭാം ശോകസംതപ്താം മലസംകുലമൂര്ധജാമ് ॥ 19 ॥
ക്ഷീണപുണ്യാം ച്യുതാം ഭൂമൌ താരാം നിപതിതാമിവ ।
ചാരിത്രവ്യപദേശാഢ്യാം ഭര്തൃദര്ശനദുര്ഗതാമ് ॥ 20 ॥
ഭൂഷണൈരുത്തമൈര്ഹീനാം ഭര്തൃവാത്സല്യഭൂഷണാമ് ।
രാക്ഷസാധിപസംരുദ്ധാം ബംധുഭിശ്ച വിനാ കൃതാമ് ॥ 21 ॥
വിയൂഥാം സിംഹസംരുദ്ധാം ബദ്ധാം ഗജവധൂമിവ ।
ചംദ്രരേഖാം പയോദാംതേ ശാരദാഭ്രൈരിവാവൃതാമ് ॥ 22 ॥
ക്ലിഷ്ടരൂപാമസംസ്പര്ശാദയുക്താമിവ വല്ലകീമ് ।
സീതാം ഭര്തൃവശേ യുക്താമയുക്താം രാക്ഷസീവശേ ॥ 23 ॥
അശോകവനികാമഥ്യേ ശോകസാഗരമാപ്ലുതാമ് ।
താഭിഃ പരിവൃതാം തത്ര സഗ്രഹാമിവ രോഹിണീമ് ॥ 24 ॥
ദദര്ശ ഹനുമാന് ദേവീം ലതാമകുസുമാമിവ ।
സാ മലേന ച ദിഗ്ധാംഗീ വപുഷാ ചാപ്യലംകൃതാ ॥ 25 ॥
മൃണാലീ പംകദിഗ്ധേവ വിഭാതി ന വിഭാതി ച ।
മലിനേന തു വസ്ത്രേണ പരിക്ലിഷ്ടേന ഭാമിനീമ് ॥ 26 ॥
സംവൃതാം മൃഗശാബാക്ഷീം ദദര്ശ ഹനുമാന് കപിഃ ।
താം ദേവീം ദീനവദനാമദീനാം ഭര്തൃതേജസാ ॥ 27 ॥
രക്ഷിതാം സ്വേന ശീലേന സീതാമസിതലോചനാമ് ।
താം ദൃഷ്ട്വാ ഹനുമാന് സീതാം മൃഗശാബനിഭേക്ഷണാമ് ।
മൃഗകന്യാമിവ ത്രസ്താം വീക്ഷമാണാം സമംതതഃ ॥ 28 ॥
ദഹംതീമിവ നിഃശ്വാസൈർവൃക്ഷാന് പല്ലവധാരിണഃ ।
സംഘാതമിവ ശോകാനാം ദുഃഖസ്യോര്മിമിവോത്ഥിതാമ് ॥ 29 ॥
താം ക്ഷമാം സുവിഭക്താംഗീ വിനാഭരണശോഭിനീമ് ॥ 30 ॥
പ്രഹര്ഷമതുലം ലേഭേ മാരുതിഃ പ്രേക്ഷ്യ മൈഥിലീമ് ।
ഹര്ഷജാനി ച സോഽശ്രൂണി താം ദൃഷ്ട്വാ മദിരേക്ഷണാമ് ।
മുമുചേ ഹനുമാംസ്തത്ര നമശ്ചക്രേ ച രാഘവമ് ॥ 31 ॥
നമസ്കൃത്വാ ച രാമായ ലക്ഷ്മണായ ച വീര്യവാന് ।
സീതാദര്ശനസംഹൃഷ്ടോ ഹനുമാന് സംവൃതോഽഭവത് ॥ 32 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ സപ്തദശസ്സര്ഗഃ ॥
